Mateo 14

Kamatey Yahiya magpandi-pandi aꞌahin

(Markus 6:14-29; Lukas 9:7-9)

1Masa miyaꞌan Sultan Herod magbayaꞌ si lahat Jalilin. Manjari takalene sabab meꞌ hinangan si Isahin. 2Paꞌin si Herod si meꞌ bagellalnen, “Aꞌa miyaꞌan asal iye ne teꞌed si Yahiya magpandi-pandi meꞌ aꞌahin. Ellum iye balik. Hangkan hep tahinangne meꞌ hinangan balakatan miyaꞌ an.” 3-4Peggeꞌ bakas dinaꞌak hep weꞌ Sultan Herod siniggew si Yahiya duk iningketan duk kinalabusu. Kuweꞌ inin kahalanne miyaꞌan: Si Sultan Herod inin magkabayaꞌ duk ipalnen Herodiyas, bu ellum pe salinen si Pilip, ella Herodiyasin. Manjari sakaliꞌ ne siye magdambuwaꞌ, inamāhan sultanin weꞌ si Yahiya. Paꞌin Yahiya si iye, “Gaꞌi halal bang kew magdambuwaꞌ duk anda pungtinaꞌinun. Magduse kew.” 5Kemuwe miyaꞌan mabayaꞌ papatey si Herod Yahiya, saguwaꞌ tinalew iye si meꞌ aꞌahin peggeꞌ kahagad meꞌ aꞌahin weꞌ nabi si Yahiya. 6Manjari dambuwaꞌ ellew ngahinang si Herod pagjamu-jamuhan panābu ellew panganak si iyehin. Mansak anak Herodiyas dendehin duk mayam meꞌ aꞌa malaꞌihin. Sinna manamal si Herod 7hangkan paꞌinne si dendehin, “Sapahanku ine-ine pākunu, asal pangurungku teꞌed kaꞌu.” 8Peggeꞌ bakas sinessaꞌan andang weꞌ saꞌinen dendehin, hangkan paꞌinne si sultanin, “Pangurungun aku kuweꞌitu kōk Yahiya magpandi-pandi aꞌahin binettad diyataꞌ talam.” 9Magsusun teꞌed sultanin, saguwaꞌ peggeꞌ bakas iye napa si panaꞌanan meꞌ bisitanen, hangkan dinaꞌak ne weꞌ ne pinangurung si dendehin pinākunen. 10Dinaꞌak weꞌ ne dambuwaꞌ sundalunen munggelan Yahiya laꞌi dem kalabusu. 11Ubus binoꞌo ne kōknen diyataꞌ talam duk pinangurung si budjangin. Manjari binoꞌo weꞌ budjangin pī si saꞌinen. 12Pagubus miyaꞌan, tekka meꞌ tindeg Yahiyahin ngeddoꞌ bangkeynen duk kinubul weꞌ de. Ubus hap pī siye ngakahan si Isa.

Pamakan si Isa meꞌ aꞌa lime ngibuhin

(Markus 6:30-34; Lukas 9:10-17; Yahiya 6:1-14)

13Pagkale si Isa aka-aka sabab Yahiyahin, tahalaꞌ iye magbangkaꞌ pī si lahat makagindew-gindew, iye dendangan. Sakaliꞌ inin takale weꞌ meꞌ aꞌa mabanesin, tahalaꞌ siye amban meꞌ kalumaꞌanin duk paturul siye amban higad lamew. 14Pagtakas si Isa, banes teꞌed aꞌa kitene duk maꞌaseꞌ iye si siye duk pinakoleꞌ weꞌ ne meꞌ masakihin. 15Pagkohap ne, pī meꞌ tindegnen si iye duk paꞌinde, “Lahat gaꞌi hep inin tantu papituhan aꞌa bu iyuꞌ ne kohap teꞌed. Daꞌakun meꞌ aꞌa inin pī si meꞌ kalumaꞌan duk siye makabelli kinakande.” 16Paꞌin si Isa, “Gaꞌi siye subey tahalaꞌ. Kaꞌam ne mamakan siyehin.” 17Paꞌin meꞌ tindegnen, “Luwal maniyaꞌ si kamitu, lime kayuꞌ pan duk duwe kenna.” 18Paꞌin si Isa, “Boꞌohun bi pitu si aku.” 19Manjari dinaꞌak weꞌ si Isa meꞌ aꞌahin ningkoloꞌ diyataꞌ balili. Ubus miyaꞌan ineddoꞌ weꞌ ne pan lime kayuꞌin duk kenna duwehin duk mayam iye magdiyataꞌ langit magpasalamat si Tuhan. Ubus bu binahagiꞌ-bahagiꞌ weꞌ ne panin duk pinangurung weꞌ ne si meꞌ tindegnen duk pangurungde isab si meꞌ aꞌahin. 20Mangan siye kēmon duk esso siye. Pagubus siye mangan tinipun weꞌ meꞌ tindeg si Isahin lukasden, sampūꞌ duk duwe bakaꞌ pennoꞌ. 21Meꞌ aꞌa bakas mamanganin niyaꞌ siye lime ngibu lellahin bukut meꞌ dendehin duk meꞌ mākanakin.

Lumengngan si Isa diyataꞌ lamew

(Markus 6:45-52; Yahiya 6:15-21)

22Puwas miyaꞌan dinaꞌak weꞌ si Isa meꞌ tindegnen pasakey dem bangkaꞌ. Pinadehellu siye weꞌ ne pī si dambiyaꞌ lamew sābune pe mapoleꞌ meꞌ aꞌahin. 23Pagubus ne siye patahalaꞌne, pī iye si punu dendang-dendangan missā si Tuhan. Pagsangem ne, laꞌi iye dendangan. 24Na, bangkaꞌin tala ne amban higad bu tewwaꞌ weꞌ goyak peggeꞌ pasumbal si siye baliyuhin. 25Pagdayiꞌ ellew ne, pī si Isa si siye lumengngan diyataꞌ kuwit-kuwit lamewin. 26Pagkite meꞌ tindegnen iye lumengngan diyataꞌ kuwit-kuwit lamewin, kadahitan siye manamal peggeꞌ kannalde weꞌ panyataꞌ iye. Magkilahap teꞌed siye peggeꞌ kaꞌumagadan siye. 27Saguwaꞌ magtawus missā si Isa si siye, paꞌ inne, “Pahagetun bi ateybin. Aku hep ituꞌ. Daꞌa kaꞌam tinalew.”

28Manjari ngalingan si Petros, paꞌinne, “Tuwan, bang kaꞌu iyan, daꞌakun ku piyu si kaꞌu lumengngan diyataꞌ boheꞌ.” 29Paꞌin si Isa, “Pitu ne kew.” Hangkan duwaꞌi si Petros amban bangkaꞌ bu lumengngan diyataꞌ boheꞌ hap pī pu si Isa. 30Saguwaꞌ pagkitene goyak mahadjehin, tinalew iye duk palenneb ne iye. Magtawus iye ngalingan, paꞌinne, “Tuwan, timbulun ku.” 31Manjari magtawus iye inantan weꞌ si Isa bu inonot. Ubus paꞌin si Isa, “Gaꞌi kew tantu sandel si aku. Weꞌey magduwe-duwe pikilannun?” 32Manjari pagdiyalemde dem bangkaꞌ, padeheng ne baliyuhin. 33Pasujud si iye meꞌ lella dem bangkaꞌin duk paꞌinde, “Bennal Anak Tuhanin kew.”

Pinakoleꞌ meꞌ aꞌahin weꞌ si Isa laꞌi si Gennesaret

(Markus 6:53-56)

34Pagsakaliꞌ ne siye lumipag, tekka siye si lahat Gennesaret. 35Takilale si Isa weꞌ meꞌ aꞌa lahat miyaꞌan, hangkan pinasan weꞌ de meꞌ aꞌa masaki si meꞌ kalahatan mapaliputin duk binoꞌo weꞌ de pu si Isa. 36Pabuyuꞌ-buyuꞌ siye pu si Isa bang makajari antan meꞌ masakihin bisan hadja tuggu semmeknen. Na, kēmon makaꞌantan iyehin kawuliꞌan.

ప్రస్తుతం ఎంపిక చేయబడింది:

Mateo 14: yakV

హైలైట్

షేర్ చేయి

కాపీ