Mateo 13

Dalilan sabab magsabulak binihiꞌ

(Markus 4:1-9; Lukas 8:4-8)

1Ellew miyaꞌan hap pī si Isa si higad lamew Jalil ningkoloꞌ magtoloꞌ. 2Banes aꞌa patipun si iye laꞌi. Hangkan pasakey iye duk ningkoloꞌ iye dem bangkaꞌ. Meꞌ aꞌa mabanesin nengge laꞌi si higad lamew. 3Magusihat iye si meꞌ aꞌahin duk ekka usihatne si dalilan. Paꞌinne, “Niyaꞌ aꞌa pī si tanaꞌne magsabulak binihiꞌ. 4Pagsabulakne, niyaꞌ binihiꞌ tapisik si lān. Manjari pī meꞌ manuk-manukin manganne. 5Meꞌ binihiꞌ sinduwehin laboꞌ diyataꞌ batu pānas, gaꞌi lalem bulaknen. Mura tomoꞌ binihiꞌin peggeꞌ gaꞌi lalem bulaknen. 6Pagsilak ellewin magtawus ngingking duk peggeꞌ gaꞌi lalem gamutnen, manjari lanes. 7Laboꞌ binihiꞌ sinduwehin dem kasampinitan. Samet nulig sampinitin duk katalungan tinanemin. 8Na, binihiꞌ sinduwehin laboꞌ si kahāpan bulak duk moꞌo buwaꞌne. Jarinen niyaꞌ ne ekka manamal, niyaꞌ ne ekka, duk niyaꞌ isab sarang-sarang. 9Amey-amey pakalehun bi bang niyaꞌ pinaꞌin si kaꞌam.”

Puꞌunne magdalilan

(Markus 4:10-12; Lukas 8:9-10)

10Manjari hap pī si iye meꞌ tindegnen duk paꞌinde, “Weꞌey kew magdalilan bang kew magtoloꞌ?” 11Sambungan si Isa siye, paꞌinne, “Kaꞌurungan ne kaꞌam kataꞌu supaya tahātibi meꞌ tinapukan Tuhan dem pikilannen sabab bang saꞌingge pagbayaꞌne si meꞌ aꞌanen. Saguwaꞌ meꞌ aꞌa sinduwehin gaꞌ kaꞌurungan. 12Peggeꞌ aꞌahin, bang pakale pahāp-hāp, pasōng pangahātinen. Saguwaꞌ bang aꞌahin gaꞌi pakale pahāp-hāp, bisan niyaꞌ kataꞌuhanne kuweꞌahat, ujud tahalaꞌ du amban iye. 13Inin sababnen hangkan ku magdalilan bang ku magtoloꞌ si siye, peggeꞌ mayam siye saguwaꞌ gaꞌi takitede, duk pakale siye saguwaꞌ gaꞌi takalede teꞌed duk gaꞌi tasabutde. 14Na, tuman ne tasulat Nabi Isaya dem kitabin, pinaꞌin,

‘Asal pakale du kaꞌam saguwaꞌ gaꞌi tahātibi. Asal mayam du kaꞌam saguwaꞌ gaꞌi takilalebi. 15Peggeꞌ ngatuwas ne atey meꞌ aꞌa inin. Tampengde tayingeden duk pakeddemde mataden. Bang dumaꞌin hinanganden sa iyan, takitede siꞌ duk matade, takalede siꞌ duk tayingede, tasabutde siꞌ dem ateyde duk pabalik siꞌ siye si aku, paꞌin Tuhanin, duk ampunku siꞌ meꞌ duseden.’

16Saguwaꞌ bang kaꞌam, asal hāp pe kaꞌam,” paꞌin si Isa, “peggeꞌ takilalebi takitebin duk tahātibi takalebin. 17Sabennal akahante kaꞌam, ekka meꞌ nabi duk meꞌ aꞌa sukuꞌ si Tuhan awwalley mabayaꞌ teꞌed ngite takitebi kuweꞌitu inin, saguwaꞌ gaꞌ inin takitede. Mabayaꞌ teꞌed isab takalede meꞌ takalebi kuweꞌitu inin, saguwaꞌ gaꞌ takalede.”

Pinahāti weꞌ si Isa dalilan sabab aꞌa magsabulak binihiꞌin

(Markus 4:13-20; Lukas 8:11-15)

18“Kuweꞌitu pakale teꞌed kaꞌam duk tasabutbi bang ine hāti dalilan sabab aꞌa magsabulak binihiꞌin. 19Meꞌ binihiꞌ tapisik si lānin dalil meꞌ aꞌa makakale lapal sabab pagbayaꞌan Tuhanin bu gaꞌ tasabutde. Manjari pī nakuraꞌ seyitanin ngagew lapalin amban dem pikilan meꞌ aꞌa miyaꞌan. 20Meꞌ binihiꞌ malaboꞌ diyataꞌ batu pānasin dalil meꞌ aꞌa makakale lapal Tuhanin duk magtawus kinahagad weꞌ de duk kēgan siye. 21Saguwaꞌ gaꞌ nganggamut palalem lapal Tuhanin dem ateyde. Hangkan gaꞌ siye makatatas tiggel. Pagtekka kasusehanin atawa bang bininasa siye sabab panuhutde lapalin, gaꞌi ne siye kahagad. 22Duk meꞌ binihiꞌ malaboꞌ dem kasampinitanin dalil meꞌ aꞌa makakale lapal Tuhanin, saguwaꞌ luwal siye mikil sabab kasusehande si dunyahin. Iye mamahalgaꞌ si siyehin meꞌ pangalataꞌden. Hangkan bang dalil tinanemin, katalungan lapal Tuhan bakas takaleden duk gaꞌ magbuwaꞌ. 23Duk meꞌ sinabulakan dem bulak mahāpin, siye dalil meꞌ aꞌa makakale lapal Tuhanin duk kinahagad weꞌ de. Bang dalil tinanemin, lapal Tuhan bakas takaleden magbuwaꞌ diyalem ateyde. Sinduwehin buwaꞌnen ekka manamal, sinduwehin ekka, duk sinduwehin sarang-sarang.”

Dalilan sabab sabetin

24Manjari magdalilan ne isab si Isa si meꞌ aꞌahin, paꞌinne, “Pagbayaꞌ Tuhan si meꞌ aꞌanen kuweꞌ dalil binihiꞌ sabulakan aꞌa dem tanaꞌne. 25Dambuwaꞌ sangem sasang tuli ne kēmon aꞌahin, hap pī bantanen bu binubudan weꞌ ne bigi sabet pinaturul si binihiꞌin, ubus bu tahalaꞌ iye. 26Manjari pagtomoꞌ ne binihiꞌin duk nagnaꞌ ne buwaꞌ, takite isab meꞌ sabetin. 27Meꞌ daraꞌakannen pī si dapuꞌ tanaꞌin duk paꞌinde, ‘O Tuwan, hāp hep meꞌ binihiꞌ tinanemnu si tanaꞌnun. Amban meꞌ sabet miyaꞌan?’ 28Nambung dapuꞌ tanaꞌin, paꞌinne, ‘Hinangan bantakun iyan.’ Paꞌin meꞌ daraꞌakannen, ‘Mabayaꞌ ke kew bang kami harap pī meddutan meꞌ sabet miyaꞌan?’ 29‘Daꞌa,’ paꞌinne, ‘peggeꞌ bang beddutbi sabetin, kaw tabeddut tinanemin isab. 30Ambat siye nulig kaduwe sampay pagani. Manjari pagtaꞌabut ne pinagani, paꞌinku saꞌ si meꞌ mamaganihin: Beddutun bi dahuꞌ meꞌ sabet iyan duk pekkesun bi bu bi ne ngeggasne. Ubus bu paganihun bi ne buwaꞌ tanaꞌin duk ennaꞌun bi dem kamaligku.’ ”

Dalilan sabab bigi madikiꞌ-dikiꞌin duk sabab pagpasulig addunin

(Markus 4:30-34; Lukas 13:18-21)

31Ubus magdalilan iye balik si siye, paꞌinne, “Pagbayaꞌ Tuhan si meꞌ aꞌanen kuweꞌ dalil da bayuꞌ bigi dikiꞌ-dikiꞌ tinanem weꞌ aꞌa si tanaꞌne. 32Nahut manamal bigi inin saguwaꞌ bang nulig ne, ngahadje amban kēmon jambangan duk manjari kayu ne. Hangkan makajari meꞌ manuk-manukin pī ngahinang sabakande diyataꞌ meꞌ pangene.”

33Magdalilan pe iye seddili, paꞌinne, “Pagbayaꞌ Tuhan si meꞌ aꞌanen kuweꞌ dalil pasulig ineddoꞌ weꞌ dende bu pinasaget weꞌ ne dem tirigu duwempuk-lime kilu. Ubus inaddun weꞌ ne. Ubus nulig ne kēmon addunin.” 34Kahabaꞌ si Isa magtoloꞌ si meꞌ aꞌa mabanesin, magdalilan hadja iye. Gaꞌ iye missā si siye bang dumaꞌin si dalilan. 35Na, tuman ne sinulat dambuwaꞌ nabi dem kitabin, pinaꞌin,

“Magdalilan ku bang ku magtoloꞌ si siye. Akahanku siye sabab meꞌ manggaꞌ kinataꞌuhan kemuwe tagnaꞌ pinapanjari dunyahin.”

Pinahātihan weꞌ si Isa dalilan sabab sabetin

36Manjari inambanan weꞌ si Isa meꞌ aꞌa mabanesin duk padiyalem iye dem lumaꞌ. Hap pī isab meꞌ tindegnen duk paꞌinde si iye, “Pahātihanun koꞌ kami dalilan sabab sabet si tanaꞌin.” 37Nambung iye, paꞌinne, “Aku, Anak Manusiyaꞌin, dalil aꞌa magsabulak binihiꞌ mahāpin. 38Tanaꞌin dunyahin. Hāti binihiꞌ mahāpin, meꞌ aꞌa manuhut pagbayaꞌan Tuhanin. Sabetin meꞌ aꞌa manuhut nakuraꞌ seyitanin. 39Banta aꞌahin, bakas mamubudan sabetin, iye nakuraꞌ seyitanin. Waktu pagpaganihin, hātinen bang kiyamat ne dunyahin. Mamaganihin meꞌ malaꞌikatin. 40Na, bang sabetin, tinipun du hadja duk ineggas. Kuweꞌ miyaꞌan du isab maꞌumantagin bang taꞌabut ne ellew kiyamat. 41Aku, Anak Manusiyaꞌin, daꞌakku du meꞌ malaꞌikatkun pitu dem dunya nipun kēmon meꞌ aꞌa makapaduse saweꞌden duk kēmon meꞌ aꞌa maghinangan malaꞌatin. 42Duk ilakasan du siye dem ebbut narkaꞌ. Magmatey siye iyan laꞌi duk magtageꞌot meꞌ impenden hawal pagsusunden. 43Saguwaꞌ meꞌ aꞌa sukuꞌ si Tuhanin sahaya kuweꞌ mata ellewin laꞌi si pagbayaꞌan Samade Tuhanin. Amey-amey pakalehun bi bang niyaꞌ pinaꞌin si kaꞌam.”

Dalilan sabab alataꞌ tinapukanin

44Magdalilan ne isab si Isa, paꞌinne, “Pagbayaꞌ Tuhan si meꞌ aꞌanen kuweꞌ dalil alataꞌ tinapukan dem bulak bu takasuwaꞌ weꞌ dambuwaꞌ aꞌa. Dinebbunan balik weꞌ ne duk kēgan iye manamal hangkan pinabellihan weꞌ ne kēmon-kēmonnen. Ubus bu binelli weꞌ ne bulak palaꞌihan alataꞌ takasuwaꞌne miyaꞌan.”

Dalilan sabab mutsaꞌin

45“Damikkiyan,” paꞌin si Isa, “pagbayaꞌ Tuhan si meꞌ aꞌanen kuweꞌ dalil aꞌa magpiha, batang melli meꞌ mutsaꞌ hāp. 46Bang iye ngasuwaꞌ dambuwaꞌ mutsaꞌ mahalgaꞌ manamal, pabellihanne kēmon-kēmonnen duk belline mutsaꞌ dambuwaꞌ miyaꞌan.”

Dalilan sabab pokotin

47“Damikkiyan,” paꞌin si Isa, “pagbayaꞌ Tuhan si meꞌ aꞌanen kuweꞌ dalil pokot tineppadan dem tahik duk makaꞌeddoꞌ ekka bayuꞌ-bayuꞌan kenna. 48Pagpennoꞌ ne pokotin, onot meꞌ aꞌahin ne tudju higad tahik ubus ningkoloꞌ siye bu peneꞌde kennahin. Meꞌ kenna mahāpin pinadem pangisihande duk meꞌ manggaꞌi mahāpin ilakasan hadja. 49Sa iyan du isab bang kiyamat ne. Paguwaꞌ meꞌ malaꞌikatin duk paseddilide meꞌ aꞌa malaꞌatin amban meꞌ aꞌa mabentelin. 50Meꞌ aꞌa malaꞌatin laboꞌde dem ebbut narkaꞌ. Magmatey siye iyan laꞌi duk magtageꞌot meꞌ impenden hawal pagsusunden.”

51Tinilew weꞌ si Isa meꞌ tindegnen, paꞌinne, “Tasabutbi ke kēmon binissāku si kaꞌam miyaꞌan?” “Aweꞌ,” paꞌinde. 52Manjari paꞌin si Isa, “Bang niyaꞌ guru si saraꞌ āgama bu nuhut ne iye pagbayaꞌan Tuhanin, kuweꞌ dalil aꞌa dayahan iye, ekka alataꞌne magbaꞌahu-andang peggeꞌ taꞌu ne iye manoloꞌ toloꞌ matuꞌuhin duk toloꞌ baꞌahuhin.”

Astel meꞌ aꞌa Nasaretin pu si Isa

(Markus 6:1-6; Lukas 4:16-30)

53Pagubus si Isa magdalilan inin, tahalaꞌ iye amban lahat miyaꞌan. 54Hap pī iye balik si lahatne duk magusihat iye laꞌi dem langgal. Ulaliꞌ meꞌ aꞌahin, paꞌinde, “Amban taꞌeddoꞌ aꞌa inin kataꞌunen duk balakatne paghinangne meꞌ hinangan makaꞌulaliꞌin? 55Takilalete bi hep aꞌa inin; iye inin anak kalpenterohin. Saꞌinen si Mariyam. Pungtinaꞌine hep disi Yakub duk si Yoses duk si Simon duk si Judas. 56Duk meꞌ pungtinaꞌine dendehin tiyaꞌ du hep tuꞌu si lahatte bi. Amban enteꞌ taꞌeddoꞌne meꞌ kataꞌune inin?” 57Duk peddiꞌ ateyde pu si Isa. Manjari paꞌin si Isa si siye, “Pagaddatan nabihin antag-antag. Saguwaꞌ bang si lahatne duk si lumaꞌne gaꞌi iye pagaddatan.” 58Gaꞌi du ekka hinangan makaꞌulaliꞌ hininang si Isa si lahatnen peggeꞌ meꞌ aꞌa malaꞌihin gaꞌi kahagad si iye.

ప్రస్తుతం ఎంపిక చేయబడింది:

Mateo 13: yakV

హైలైట్

షేర్ చేయి

కాపీ