Mateo 10

Meꞌ tindeg si Isa sampūꞌ duk duwehin

(Markus 3:13-19; Lukas 6:12-16)

1Manjari ilinganan weꞌ ne tindegne sampūꞌ duk duwehin pī si iye duk inurungan siye weꞌ ne kapatut magpaluwas meꞌ seyitan duk magpakawuliꞌ kēmon bayuꞌ-bayuꞌan saki. 2Inin ēn meꞌ sampuk-duwe tindegne kawakilannen: kaꞌissaꞌ si Simon inēnan isab si Petros duk pungtinaꞌinen si Andariyas, ubus si Yakub duk pungtinaꞌinen si Yahiya, meꞌ anak Sebedehin. 3Si Pilip duk Bartolome, si Tomas duk Mateo magpāku-pāku sukeyin, duk si Yakub anak Alpahin. Sinduwehin si Taddeo duk 4si Simon, iye aꞌa pangangatuhin, duk si Judas Iskariyot. Si Judas inin iye mamuddihan si Isahin.

Pinalengngan weꞌ si Isa tindegne sampūꞌ duk duwehin

(Markus 6:7-13; Lukas 9:1-6)

5Dinaꞌak weꞌ si Isa tindegne sampuk-duwe miyaꞌan lumengngan. Sinessaꞌan siye weꞌ ne, paꞌinne, “Daꞌa kaꞌam pī si lahat bangsa seddili atawa si meꞌ puweblo bangsa Samariya. 6Saguwaꞌ pī kaꞌam si meꞌ aꞌa bangsa Israꞌil hadja. Iyuꞌ siye kuweꞌ meꞌ bili-bili lepas. 7Pī kaꞌam magmahalayak weꞌ tapit ne waktu pagbayaꞌ Tuhanin. 8Pakoleꞌun bi meꞌ masakihin, pakellumun bi bang niyaꞌ aꞌa matey, pakoleꞌun bi meꞌ aꞌa inipulin, paluwasun bi meꞌ seyitanin. Inurungan kaꞌam kapatut weꞌ ku gaꞌ kaꞌam magbayed, hangkan nabang kaꞌam gaꞌi subey binayedan. 9Daꞌa kaꞌam magboꞌo sīn, bisan sinsilyu dem sabitanbi. 10Daꞌa kaꞌam magboꞌo bāg atawa badjuꞌ pagsayinanbi atawa tehompaꞌ atawa tungkud. Aꞌa maghinangin subey tinabang sukalnen.

11“Pagtekka kaꞌam si puweblo atawa kalumaꞌan, miha kaꞌam aꞌa hāp addatnen. Laꞌi kaꞌam patennaꞌ si iye tiggelanbi laꞌi si lahat miyaꞌan. 12Bang kaꞌam manaꞌik si lumaꞌ, paꞌinun bi, ‘Karayaw urungan Tuhanin kaꞌam kasanyangan.’ 13Bang kaꞌam inaddatan weꞌ aꞌa lumaꞌin, paꞌamban du kasanyangan pinākubin si iye. Saguwaꞌ bang gaꞌi kaꞌam inaddatan, gaꞌ du niyaꞌ kaꞌujudan pinaꞌinbi miyaꞌan. 14Bang meꞌ aꞌahin gaꞌi ngaddatan kaꞌam duk gaꞌi mabayaꞌ pakale si kaꞌam, tahalaꞌ kaꞌam amban lumaꞌ miyaꞌan atawa puweblo miyaꞌan. Pagpaganun bi dahuꞌ leppug bettisbin tandaꞌ weꞌ muwas ne kaꞌam si siye, ubus bu tahalaꞌ ne kaꞌam. 15Sabennal akahante kaꞌam weꞌ pagtaꞌabut ellew pangahukum Tuhan manusiyaꞌin, pasōng teꞌed bohat hukuman si meꞌ aꞌa si puweblo miyaꞌan amban hukuman si meꞌ lahat Sodom duk Gomorahin, meꞌ lahat mabawag sabab duse meꞌ aꞌanen.”

Niyaꞌ sōng kabinasahan

(Markus 13:9-13; Lukas 21:12-17)

16“Pahatul-hatul kaꞌam peggeꞌ palengngante kaꞌam pī si meꞌ aꞌa laꞌatan. Kuweꞌ kaꞌam dalil meꞌ anak bili-bili pī dem kaꞌekkahan asu bingis. Hangkan subey lalem akkalbin duk hāp hadja dem ateybin. 17Papateng-pateng kaꞌam peggeꞌ niyaꞌ iyan meꞌ aꞌa niggew kaꞌam. Sōngande du kaꞌam si meꞌ hukum duk paglubakande kaꞌam dem meꞌ langgalde. 18Boꞌode kaꞌam si harapan meꞌ gubnul duk meꞌ sultan peggeꞌ nuhut kaꞌam aku duk kaꞌam makapagaka aka-aka mahāpin si siye duk si meꞌ aꞌa bangsa seddili. 19Bang kaꞌam boꞌode hinukum, daꞌa kaꞌam magsuse bang ine binissābin. Pinangurung du si kaꞌam waktu miyaꞌan bang ine binissābin. 20Peggeꞌ dumaꞌin amban kaꞌam binissābin saguwaꞌ iye mamissāhin, Niyawa Samabi Tuhanin maluꞌu diyalem baranbin.

21“Si pasōngan, niyaꞌ iyan meꞌ aꞌa, sōngan meꞌ pungtinaꞌiden siye dinaꞌak pinapatey. Niyaꞌ isab iyan meꞌ anak sōngan samaden siye dinaꞌak pinapatey. Duk meꞌ anakin bantahande matettoꞌaden duk daꞌakde matettoꞌaden pinapatey. 22Duk kaꞌam, meꞌ tindegkun,” paꞌin si Isa, “kabunsihan du kaꞌam weꞌ kēmon aꞌa peggeꞌ nuhut kaꞌam aku. Saguwaꞌ sine-sine nandal sampay si tamanan kabinasahan inin, taga umul du si surgaꞌ gaꞌ niyaꞌ tamananne. 23Bang kaꞌam bininasa si puweblo dambuwaꞌ, lahi kaꞌam pī si puweblo seddili. Akahante kaꞌam, gaꞌi pe talatagbi magmahalayak si kēmon kalahat-lahatan si Israꞌilin, pitu ne ku balik, aku Anak Manusiyaꞌin.

24“Mulidin gaꞌi langkew amban gurunen. Duk daraꞌakanin gaꞌi langkew amban amunen. 25Hangkan mulidin subey magsukul bang saliꞌ ne iye duk gurunen, duk daraꞌakanin subey magsukul bang saliꞌ ne iye duk amunen. Bang aku, panuhutanbin ēnande nakuraꞌ seyitanin, pasōng pe laꞌat pangēnde kaꞌamin, meꞌ tindegkun.”

Sine subey katalewanin

(Lukas 12:2-7)

26“Daꞌa kaꞌam tinalew si aꞌa. Gaꞌ niyaꞌ dinebbunan weꞌ gaꞌi ujud paguwaꞌ, gaꞌ niyaꞌ tinapukan weꞌ gaꞌi ujud kataꞌuhan. 27Ine-ine akaku si kaꞌam sangem, akahun bi bang ellew, duk ine-ine takalebi bang kaꞌam hadja, palataꞌun bi si meꞌ aꞌa si tabuꞌan. 28Daꞌa kaꞌam tinalew si meꞌ makapapatey baranin bu bang niyawahin gaꞌi du tapapateyde. Saguwaꞌ iye subey katalewanbin, Tuhanin, peggeꞌ dumaꞌin hadja baran saguwaꞌ sampay niyawa makajari pakaꞌatanne dem narkaꞌ. 29Niyaꞌ meꞌ manuk-manuk dikiꞌ tabellite duwek kayuꞌ dambuwaꞌ sīn. Bisan mura halgaꞌden, gaꞌ niyaꞌ siye laboꞌ si bulak bang gaꞌi amban kabayaꞌan Tuhan. 30Na, pasōng ne kaꞌam, gaꞌi kaꞌam takayipat weꞌ Tuhanin. Bisan kōkbin kataꞌuhanne bang piye lamba ekkahannen. 31Hangkan daꞌa kaꞌam tinalew. Mahalgaꞌ pe kaꞌam amban meꞌ manuk-manuk maꞌekkahin.”

Magbennal nuhut Almasi

(Lukas 12:8-9)

32“Sine-sine magbennal si harapan aꞌa weꞌ patuhut iye si aku, asal magbennal du ku isab si harapan Tuhan, Samaku si surgaꞌin, weꞌ patuhut iye si aku. 33Saguwaꞌ sine-sine masuwey si harapan aꞌa weꞌ gaꞌi iye patuhut si aku, masuwey du ku isab si harapan Samaku si surgaꞌin weꞌ gaꞌi iye patuhut si aku.”

Magkuntara meꞌ aꞌahin sabab si Isa

(Lukas 12:51-53; 14:26-27)

34“Weꞌ kannalbi pitu ku moꞌo kasanyangan si dunya? Gaꞌi ku pitu moꞌo kasanyangan saguwaꞌ pitu ku moꞌo jān pagsaggaꞌan. 35Sababku anak lellahin nguntarahan samanen duk anak dendehin nguntarahan saꞌinen duk eyuꞌan dendehin nguntarahan matoꞌane dendehin. 36Aꞌahin, iye bantane teꞌedin meꞌ usbanen. 37Bang aꞌahin kalasahanne saꞌi-samanen pasōng amban aku, gaꞌi iye pataꞌ manjari tindegku, duk bang aꞌahin kalasahanne anaknen pasōng amban aku, gaꞌi iye pataꞌ manjari tindegku. 38Bang aꞌahin gaꞌi nuhut aku duk moꞌo olom pamapateyan iyehin, hātinen gaꞌi iye maglillaꞌ nandal kabinasahan duk bisan pe matey, gaꞌi iye pataꞌ manjari tindegku. 39Bang aꞌahin ellegne umulnen, gaꞌ niyaꞌ umulne salama-lama. Saguwaꞌ bang aꞌahin gaꞌi ellegne umulnen duk maglillaꞌ pe iye matey hawal tuyuꞌne manuhut akuhin, taga umul du iye salama-lama.”

Tinumbasan weꞌ Tuhanin

(Markus 9:41)

40“Bang niyaꞌ aꞌa ngaddatan kaꞌam, aku inaddatannen. Duk bang niyaꞌ ngaddatan aku, addatanne isab Tuhanin, mamapitu aku si dunyahin. 41Bang niyaꞌ ngaddatan aꞌa magpalataꞌ bissā Tuhanin peggeꞌ magpalataꞌ hep iye bissā Tuhanin, tinumbasan du iye kuweꞌ panumbas si aꞌa magpalataꞌ bissā Tuhanin. Bang niyaꞌ ngaddatan aꞌa bentel peggeꞌ aꞌa bentel iye, tinumbasan du iye kuweꞌ panumbas si aꞌa bentelin. 42Duk sine-sine ngurungan dambuwaꞌ meꞌ manuhut aku madiyawaꞌ pagaꞌanen bisan da sawan boheꞌ peggeꞌ nuhut aku iye, sabennal akahante kaꞌam, asal tinumbasan teꞌed iye hāp.”

ప్రస్తుతం ఎంపిక చేయబడింది:

Mateo 10: yakV

హైలైట్

షేర్ చేయి

కాపీ