Mateo 11

Meꞌ panilew weꞌ Yahiya magpandi-pandi aꞌahin

(Lukas 7:18-35)

1Pagubus inin tinoloꞌan weꞌ si Isa si meꞌ tindegne sampuk-duwehin, tahalaꞌ iye billaꞌi duk hap pī iye si meꞌ puweblo matapitin magtoloꞌ duk magusihat laꞌi.

2Yahiya magpandi-pandi aꞌahin kinalabusu ne. Kaꞌakahan Yahiya sabab meꞌ hinangan Almasihin ubus bu daꞌakne meꞌ tindegnen hap pī pu si Isa. 3Paglaꞌi ne siye, tilewde si Isa bang iye ne ke bakas pinaꞌal mapitu si dunyahin atawa bang niyaꞌ pe ke seddili subey ase-asede pitu. 4Manjari sambungan si Isa meꞌ tindeg Yahiyahin, paꞌinne, “Pī ne kaꞌam duk akahanun bi Yahiya meꞌ bakas takalebi binissākun duk takitebi hininangkun. 5Akahanun bi iye weꞌ ngite ne meꞌ mapessekin, lumengngan ne meꞌ makukuꞌin, kawuliꞌan ne meꞌ inipulin, makakale ne meꞌ mabisuhin, ellum ne balik meꞌ mamateyin duk minahalayak ne aka-aka mahāpin si meꞌ aꞌa makaꞌaseꞌ-aseꞌin. 6Duk kēgan du sasuku gaꞌi magduwe-duwe si akuhin.”

7Paglumikut ne meꞌ dinaꞌak Yahiyahin, missā si Isa si meꞌ aꞌa mabanesin sabab Yahiya. Paꞌinne, “Ine teꞌ bakas kabayaꞌanbi pinayamanin papībi pu si Yahiya si lahat makagindew-gindewin? Kabayaꞌanbi ke pinayamanin aꞌa gaꞌi teteg pamikilnen kuweꞌ dalil udjung-udjung magpalehan weꞌ baliyu? 8Dumaꞌin? Na, weꞌey kaꞌam hap pī? Mayaman aꞌa magsemmek mahalgaꞌ? Meꞌ aꞌa magsemmek mamahalgaꞌin laꞌi patennaꞌanden dem meꞌ astanaꞌ. 9Na, weꞌey teꞌ kaꞌam hap pī? Mayaman nabi? Aweꞌ, akahante kaꞌam nabi takitebin pasōng amban nabi sinduwehin. 10Si Yahiya hep inin aꞌa sinulat dem kitabin, pinaꞌin laꞌi, ‘Paꞌin Tuhanin, daꞌakku pī pamasanankun dehellu amban kaꞌu duk memesne lānnun.’ 11Sabennal, akahante kaꞌam,” paꞌin si Isa, “gaꞌ niyaꞌ aꞌa bakas inanakan tuꞌu si dunya bangsahan amban Yahiya magpandi-pandi aꞌahin. Saguwaꞌ dem pagbayaꞌan Tuhanin bisan aꞌahin diyawaꞌ teꞌed pagaꞌanen, bangsahan pe iye amban Yahiya. 12Kemuwe tagnaꞌ magmahalayak si Yahiya sampay maꞌin, basag pagmahalayak sabab pagbayaꞌan Tuhanin, duk meꞌ aꞌahin magtuyuꞌ teꞌed duk siye umasek pī si pagbayaꞌan Tuhanin. 13Meꞌ kanabihanin duk saraꞌ si Musahin magaka sabab pagbayaꞌan Tuhanin ngeregseꞌ katekka Yahiyahin. 14Bakas pinaꞌal hep weꞌ pitu balik si dunya Nabi Eliyas. Bang kaꞌam mabayaꞌ kahagad si bissā meꞌ kanabihanin, si Yahiya ne hep si Nabi Eliyas. 15Amey-amey pakalehun bi bang niyaꞌ pinaꞌin si kaꞌam.

16“Manjari,” paꞌin si Isa, “ine pangandalilanku meꞌ aꞌa ellum kuweꞌitu inin? Kuweꞌ siye mākanak magtingkoloꞌ si tabuꞌan magdagey magkawin duk magkubul. Maglingan siye si meꞌ saweꞌden, paꞌinde, 17‘Magtambul kami si kaꞌam, saguwaꞌ gaꞌ du kaꞌam mansak. Magmatey kami saguwaꞌ gaꞌ du kaꞌam magtangis.’ 18Kuweꞌ kaꞌam mākanak miyaꞌan. Peggeꞌ pitu Yahiya bu daran iye muwase duk gaꞌi iye nginum makalango, na, paꞌin meꞌ aꞌahin weꞌ pasayedan seyitan iye. 19Ubus aku, Anak Manusiyaꞌin, pitu ku bu mangan ku duk nginum, na, paꞌin meꞌ aꞌahin, ‘Payamanun bi aꞌa iyan, dahagaꞌ teꞌed duk palalango. Meꞌ bagaynen meꞌ aꞌa magpāku-pāku sukey duk meꞌ aꞌa dusehan sinduwehin.’ Saguwaꞌ,” paꞌin si Isa, “meꞌ hinangan Tuhanin naksiꞌ weꞌ lalem teꞌed kataꞌu Tuhanin.”

Kaꞌaseꞌ-aseꞌ meꞌ aꞌa manggaꞌi makahagadin

(Lukas 10:13-15)

20Manjari nagnaꞌ inamāhan weꞌ si Isa meꞌ aꞌa si meꞌ puweblo bakas pangahinanganne meꞌ hinanganne maꞌekka makaꞌulaliꞌin, peggeꞌ gaꞌ pindahande ateyden. 21Paꞌinne, “Kaꞌaseꞌ-aseꞌ kaꞌam meꞌ aꞌa Korasinin. Kaꞌaseꞌ-aseꞌ kaꞌam meꞌ aꞌa Betsaidahin. Peggeꞌ bang laꞌi miyaꞌan si lahat Tiros duk Sidon pangahinanganku meꞌ hinangan makaꞌulaliꞌ tahinangku luꞌu si kaꞌamin, tiggel ne miyaꞌan meꞌ aꞌa malaꞌihin magsusun duk lebbahande duseden duk sa addatden magsemmek karut siye duk mandi duk abu pamakitede pagsusunden. 22Akahante kaꞌam, pagtaꞌabut ellew pangahukum Tuhan manusiyaꞌin, pasōng teꞌed bohat hukuman si kaꞌamin amban hukuman si meꞌ aꞌa Tiros duk Sidonin. 23Duk kaꞌam, meꞌ aꞌa Kapernaumin,” paꞌin si Isa, “kannalbi pinalangkew kaꞌam pī si surgaꞌ? Pinadiyawaꞌ du kaꞌam pī dem narkaꞌ. Bang meꞌ aꞌa si Sodomin takitede meꞌ hinangan makaꞌulaliꞌ takitebin, tuꞌu pe siꞌ lahatden ngeregseꞌ kuweꞌitu. 24Akahante kaꞌam,” paꞌin si Isa, “weꞌ pagtaꞌabut ellew pangahukum Tuhan manusiyaꞌin, pasōng teꞌed bohat hukuman si kaꞌamin amban hukuman si lahat Sodomin, lahat mabawag sabab duse meꞌ aꞌanen.”

Pitu kaꞌam si aku duk kaꞌam humali

(Lukas 10:21-22)

25Manjari, waktu miyaꞌan paꞌin si Isa, “O Ammaꞌ, kaꞌu magbayaꞌ si langit duk bulakin. Pudjite kew teꞌed peggeꞌ urungannu kataꞌu meꞌ aꞌa maꞌawamin duk tapukannu kataꞌu inin amban meꞌ aꞌa malangkew pangadjiꞌnen duk amban meꞌ makasabutin. 26Aweꞌ, Ammaꞌ, asal pudjite kew peggeꞌ kuweꞌ inin kinabayaꞌannun.” 27Duk paꞌin si Isa pe, “Bakas pinangandel ne si aku kēmon-kēmonin weꞌ Samaku Tuhanin. Gaꞌ niyaꞌ ngataꞌuhan bang sine ku, aku Anak Tuhanin, luwal hadja Samaku Tuhanin. Duk gaꞌ isab niyaꞌ ngataꞌuhan bang sine Samakun, luwal hadja aku, Anaknen duk sine-sine pineneꞌku pamakilalehanku Samakun. 28Pitu kaꞌam si aku, sine-sine kaꞌam pekkeng duk kabohatan supaya kaꞌam humali. 29Tayimaꞌun bi panoloꞌkun duk ngaya kaꞌam amban aku, peggeꞌ hāp ku duk diyawaꞌ ateykun, manjari humali ne dem ateybin. 30Peggeꞌ pangandaꞌakankun mura tinuhut duk gaꞌi hunit hininang.”

ప్రస్తుతం ఎంపిక చేయబడింది:

Mateo 11: yakV

హైలైట్

షేర్ చేయి

కాపీ