LUK 23
23
Jisu Aphan Pilat Angno Kevan
(Mat 27.1-2,11-14; Mar 15.1-5; Jon 18.28-38)
1Armu thurpetsi Jisu aphan Pilat angno ponlo, 2hadak halatum alangliphan adai ketinjisi pangcheng-lo: “Labangso amonit rat aphan kechorung, Koisor Recho aphan midu pinangne pu halatum aphan kethan lapen amethangsi Khristo Recho pu kechekrong nelitum thek long-lo.”
3Pilat alangliphan arjulo, “Jihudi atum arecho nangli heloma?”
Alangli thak-lo, “La si nangli puloke.”
4Anke Pilat Kurusar akethe atum lapen armu aphan pulo, “Labangso amonit adai neli thangnatta thek longle.”
5Bonta halatum aphrang apar jasemetsi pulo, “Alangli Judia adet adang an thanbomsi monit atum aphan chorung chojarlo. Alangli Galili pen pangchengsi non ladak anta vang-lo.”
Jisu Aphan Herod Along Kepon
6Pilat labangso alam arjulongsi arjulo, “Alangli Galili amonitma?” 7Alangli Herod recho kecho adim pu chinisi, alangli Jisu aphan Herod along toithulo. Herodta halabangso ahut Jerusalemsi dolo. 8Herod Jisu aphan thek-longsi aning arong pik-lo, pima alangli lamjir aphrang pen arjulong-lo, lapen ajirdingklui pen kethek-longji aphan aning hang-olo. Jisu kopine manghu meme akam keklem kethek-longji aphan alangli aning thelo. 9Lasi Herod Jisu aphan ason ason alam arjulo, bonta Jisu thangta thakthedet-lo. 10Kurusar kethe atum lapen aron thekser atum arjap phrongsi Jisu aphan jasemet lam bok-lo. 11Herod lapen alangli chedanbang atum Jisu aphan pinremlo, langrop-lo; anke halatum alangliphan lir-lir lor-lor, mesen ape pindengsi puthot Pilat along toithujuilo. 12Halabangso arni mamatsi Herod lapen Pilat jirpo jalang-lo; labangso aphrangke halatum angbong hoturlo.
Jisu Aphan Kepathiji Ahukum Kepi
(Mat 27.15-26; Mar 15.6-16; Jon 18.39—19.16)
13Ansi Pilat Kurusar kethe atum, kangsai amei keja atum, lapen rat atum aphan pangrumsi, 14halatum aphan pulo, “Nanglitum labangso amonit aphan neli long vanlo, lapen pulo, alangli rat atum aphan chorung chojarlo. Non, neli nanglitum angnosi alangliphan asat langtang-lo, lapen nanglitum alangliphan kebok alam an angbong pen neli thangnat adai longledet-lo. 15Herod jokta alangliphan adai longthekthedet-lo, pima alangli laphan nelitum along nangtoi thujuilo. Labangso amonit kethi nangji atheng, lapuson adai kedo akam keklem thangta ave. 16Lasi neli alangliphan pachoksi lophlotpo.”
17Kejok Amei Arong-aje abatai tin halatum aphan Pilat inut akoidi lophlot nangji. 18Armu do-an angdi isi hangjo josi pulo, “Pathinon alangliphan! Netum aphan Barabbasle lophlotnon!.” 19Rongsopi angbong kehurisei kedo lapen monit kepathi pen apotsi Barabbas aphan ke phatek bengthot-lo.
20Pilatke Jisu aphan kelophlotji aning hangsi rat atum aphan puthot choningrithulo. 21Bonta halatum hangjobomsi pulo, “Alangliphan theng-parpan athak pathinon! Alangliphan thengparpan athak pathinon!”
22Pilat batai kethom aphong halatum aphan pulo, “Bonta alangli kopi adai kethesi klem tang-loma? Alangli kethi nangji atheng pu neli thangta thek longle! Neli alangliphan pachok chotsi lophlotpo.”
23Bonta halatum Jisu aphan thengparpan athak pathi nangji pusi ase kethe dotik an hangjobomlo, lapen kejutsi halatum akehangjo chepahailo. 24Lasi halatum kehang atengsi Pilat Jisu aphan kepathiji ahukum pilo. 25Lapen halatum kehang, kehorisei lapen monit kepathi pen apot phatek kebeng thot abang aphan Pilat lophlot-lo, lapen alangli halatum aning kehang aling Jisu aphan keviji aphan halatum arideng hodaidet-lo.
Jisu Aphan Thengparpan Athak Kesak
(Mat 27.32-44; Mar 15.21-32; Jon 19.17-27)
26Chedanbang atum Jisu aphan pondet-lo, lapen halatum kedambom ahut ha havar pen kevang Kirene asor, Simon pu abang pen halatum chetong-lo. Halatum alangliphan nepcheksi aphang athak thengparpan batkok-lo, lapen Jisu aphi phi papondunlo.
27Armu ake-ongpi alangli phi phi dunlo; halatum angbong arlosomar atumta dunsi aning dukpiksi chiru charhelo. 28Jisu halatum aphan chepangnosi pulo, “Jerusalem asor a-arlosomar atum! Neliphan chiru nangne, bonta nanglitum methang methang aphan lapen nanglitum asomar atum aphanle chirunon. 29Pima langtha! halatum lapuson kepuji arni vangbomlo, ‘Aso kave pinlang, osomar kepathe thelang lapen osomar kelana longlelang a-arlosomar atum ko-an akerengme!’ 30Halabangso ahut monit atum inglong hei hei aphan puji, ‘Netum aphuthak klonon!’ lapen inglongso aphan puji, ‘Netum aphan dipthip non!’#Hos 10.8; Kepa 6.16 31Pima halatum theng kerengseng ahut lapuson akam klem lote, mo theng kekrengklang ahut kopisi cheplang poma?”
32Anut kaprek banghini amonit, adai thedung atumta Jisu aphan pen pen kepathi rap-rapji aphansi ponlo. 33Halatum “Phu bongkok” pu adim nanglesi hadak Jisu aphan thengparpan athak sak-lo, lapen hala banghini adai thedung atum aphanta sak-lo, inut aphan ke ar-e anat lapen inut aphan ke arvi anatsi bilo. 34Jisu pulo, “O Po, latum aphan diya non! Pima latum kopisi keklem, lake latum chechinine,”#Lun 22.18
Halatum khadot pathusi alangli pe chethakdet-lo. 35Rat atum arjap phrong pen langdunlo, lapen Jihudi atum angbong keja atum alangliphan putot-lo: “Alangli bang aphan pajok-lo; alangli jongsi Arnam kangvaitang abang, Khristo tangte, amethangle pachepajoknang!”#Lun 22.7 36Chedanbang atumta alangliphan pinremlo: halatum alangli dung vangsi drakha ahorlang kethor pilo,#Lun 69.21 37lapen pulo, “Nangli jongsi Jihudi atum arecho tangte, nangli methangle chepajok non!”
38Alangli thak anat lahei hei alamthe tok-lo: “lake Jihudi atum a-Recho.”
39Hala kejangling banghini, adai thedung atum angbong pen inut abangta alangliphan kepinrem pen pulo, “Nangli helo Khristo, kalima? Chepajok-ra nelitum aphanta pajoknon!”
40Bonta anut kaprek abang alangli-phan thaksi ingchek-lo, “Nang Arnam aphan phererema? Nangta alangli son esonpet aduk pholo. 41Ili kephonang ke athikpet-lo, pima ilike keklemtang akam pen apot kepho nangji aduk binongsi long-lo; bonta alangli ke thang akechokcheta avepin.” 42Lapen alangli Jisu aphan pulo, “Nangli nangli methang arat angbong kelut damji ahut neliphan tengneri, Jisu!”
43Jisu alangliphan pulo, “Neli nangliphan alam chak-lo, pini nangli nelilong ha Kerengme adim dolongpo.”
Jisu Kethi
(Mat 27.45-46; Mar 15.33-41; Jon 19.28-30)
44Halabangso ahut nerlo chitim anbak pen arni atur avedet-lo, lapen ha baji kethom anta det adang an ingtingkuk-lo; 45lapen Kardom ahem kebeng ape chingsek pahini dak-lo.#Keba 26.31-33 46Jisu jasemet ase kethe pen hangsersi pulo, “O Po! Ne nekarjong nangrideng nangchehodailo!” Alangli la pudetsi thilot-lo.#Lun 31.5
47Chedanbang bangpharo ahemphu la keplangtang alam thek-longsi Arnam aphan anong pathesi pulo, “Chenam, labangso amonit adai ave!”
48Lapen kelangdunji aphan kechingrumpet a-armu atum an keplangtang alam an thek-longsi halatum kadokaveta ningduk pen aning cheteng ponbomsi hem chevoilo. 49Bonta kadokave Jisu pen kechechini atum an, lapen Galili adet pen aphi phi nangkedun arlosomar atum anta, achar arjapphrongsi langding-lo.#Luk 8.2-3
Jisu Aphan Kebidam
(Mat 27.57-61; Mar 15.42-47; Jon 19.38-42)
50Judia adet angbong Arimathea arongsopi pen inut amonit Joseph pu abang dolo. 51Alangli ke mesen lapen aman kedo abang-lo, lapen Arnam arat kevangji aphan kanghongding abang-lo. Alanglita Kangsai amei amonit-lo setta alangli halatum keklemtang lapen kepathiktang akam kroidundelo. 52Alangli Pilat along damsi Jisu abang arpum hangdamlo. 53Anke alangli abang arpum nangpehirsi, linen ape pen perhetsi, arlongsi kerok atipit arlo pe-i damlo, lapen hadak badu aphanta pe-i damde pinlang. 54Halabangso arni ke Bhomta arnilo, lapen Sabbath arni chengji dokdok-lo.
55Jisu aphi phi Galili adet pen nang kedun arlosomar atum Joseph along dunsi, tipit lapen Jisu abang arpum kosonsi pe-i loma, la lang damlo. 56Anke halatum hem chevoilo, lapen kenemprujin amar hei hei lapen kenempru ajangthuta sik-lo.#Keba 20.10; Keth 5.14
Hukum atengsi Sabbath arni halatum sang-lo.
தற்சமயம் தேர்ந்தெடுக்கப்பட்டது:
LUK 23: KARBIBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Karbi Holy Bible © Bible Society of India, 2010.
Used by permission. All rights reserved worldwide.
