LUK 22
22
Jisu Aphan Kepathiji Abidi Keri
(Mat 26.1-5; Mar 14.1-2; Jon 11.45-53)
1Lapen Thap kave Ahim Amei nang leji dokdok-lo. Bangso amei aphan ke Kejok Amei puta pulo. 2Kurusar akethe atum lapen Aron thekser atum rat aphan pherelo, la apotsi halatum Jisu aphan kepathijoiji abidi rilo.
Jisu Aphan Kechobeiji Aphan Judas Alam Chedondunlo
(Mat 26.14-26; Mar 14.10-11)
3Anke bang krehini asangho atum angbong pen inut, Iskariot pu a-Judas, aning arlo Soitan lutchok-lo. 4Lasi Judas nangbarlo, lapen halatum arideng Jisu aphan kehodaiji abidi Kurusar lapen Kardom ahem ahemphu atum pen pen chingvailo. 5Halatum aning arong-lo lapen alangliphan tangka kepiji aphan chepathik-lo. 6Judas halatum kechingvai alam chedondunlo, lapen Jisu aphan kehodaiji aphan, rat atum nang kechini dunde pin ahut keme ribomlo.
Jisu Kejut A-an Kechoji Aphan Kesik
(Mat 26.17-25; Mar 14.12-21; Jon 13.21-30)
7Thap kave Ahim Arong aje Amei ahut Kejok Amei a-An kechoji aphan biresak aso kethuji arni nanglelo. 8Pitor lapen Jon aphan Jisu toisi pulo, “Damra etum Kejok Amei a-an kechoji aphan sik damnon.”
9Halatum arjulo, “Konatsi kesikdam nangjima? Nangli ning kehang kodakma?”
10Alangli thak-lo, “Nangtum rongsopi kelut pen mamat inut pinso amonit lang atebuk kepon abang pen nangtum chetongji. Alangli phi phi dunra, alangli kelutdam ahemle lut damnon, 11lapen hem ahemphu aphan lapule punon: ‘Thanbang lapusonsi nangliphan pulo, neli lapen neli sangho atum pen Kejok Amei a-an kechoji aphan hem angdeng konatma?’ 12Lapen nangtum aphan alangli angsong angdeng kangni adim kedotang adim nang paklangji; hadak-le siknon.”
13Halatum damsi kadokave Jisu kethan ateng long-lo, lapen halatum Kejok Amei a-an sik-lo.
Hemphu A-an Kecho
(Mat 26.26-30; Mar 14.22-36; 1 Kor 11.23-25)
14Ahut nang choksi, Jisu ketoitang atum pen an kechojisi ingnilo. 15Alangli halatum aphan pulo, “Ne kesung kepho aphrang nangtum pen labangso Kejok Amei a-an kechojisi ne ning hang-lo! 16Pima ne nangtum aphan nangthanlang, Arnam Arat angbong labangso chekok ke tik ke ne bangso a-an chothuthedetji.”
17Anke Jisu harlung enlo lapen Arnam aphan rosi pulo, “La enra nangtum angbong chebengnon, 18pima ne nangtum aphan nangthanlang, non pen mo Arnam a-Rat vangvetik-ke ne labangso adrakha ahorlang junjedetji.”
19Ansi alangli him eplang enlo, Arnam aphan rolo, beng-lo, lapen ha-latum aphan pisi pulo, “La nangtum aphan kepitang ke nebang arpumlo. Nephan kechemathathujile, la klem-non.” 20Lasonthotsi an chodet aphi alangli harlung ehong enlo, lapen la halatum aphan pisi pulo, “Bangso aharlung ke nevi pen sap kethengtang Arnam akechechak kemilo, lake nangtum aphansi dungpitang-lo!#Jer 31.31-34
21“Bonsetta, langtha! Nephan hotur arideng kehodaiji abang ne pensi an chorap rap-lo! 22Arnam kepathiktang asonthotsi Monit a-Sopo thinangpo, bonta alangliphan kehodaiji abang ko-an akepherememe aduk pho nangpo!”#Lun 41.9
23Anke halatum angbong komat abangsi labangso akam klempoma pusi halatum kecharjuji pangcheng-lo.
Komat Abang Thenei
24Halatum angbong komat abang theneima, pusi halatum lam kechedanji pangcheng-lo.#Mat 18.1; Mar 9.34; Luk 9.46 25Jisu halatum aphan pulo, “Ajat kaprek kaprek arecho atum ke halatum arat ahemphulo, lapen det keja atum aphan ke ‘Rat ajirpo atum’, pusi pulo.#Mat 20.25-27; Mar 10.42-44 26Bonta nangtum aphan ke lapuson kali; la alar nangtum angbong kethenei abang ke akebinei ason thakthak nangji, lapen keja abang ke ban ason thakthak nangji.#Mat 23.11; Mar 9.35 27Komat abang themu? An kechoji aphan kangni abang helo. Bonta neke nangtum angbong inut keru kethai abang ason thakthak-lo.#Jon 13.12-15
28“Nephan asat hei hei kelang ahut nangtum nelong doverlo; 29lapen ne-Po nephan isi a-Rat ne kepi ason thak-thaksi neta nangtum aphan nangpipo, 30atheke, nangtum ne Rat angbong kecholongji lapen kejun longji aphan, lapen Israel kur krehini aphan kangsaijisi nangtum recho anghoi athak ingniji.#Mat 19.28
Pitor Kechekrongkreji Alam Jisu Kethanmek
(Mat 26.31-35; Mar 14.27-31; Jon 13.36-38)
31“Simon, Simon! arjutha! Nangtum aphan sok ason aphe-e pen asok kepaprekji aphan kangrapji aphan, Soitan hukum long-lo. 32Bonta Simon, nangtum akekroi ke-ik edetji aphan ne nangphan Arnam nang ardom pilo. Lapen mo nang nangning chiruidet lote nang korte atum ajakong pathevek nangji.”
33Pitor thak-lo, “hemphu, nanglong phatek kejangdunji lapen kethi dunji aphan anta ne chesik ding-lo!”
34“Ne nangphan nangpulong, Pitor, paningve vo kuke aphrang nang nephan batai kethom chinine pusi pudetji.”
Thiya, Jarong Lapen Nokjir Kepachepontoi
35Anke Jisu amethang asangho atum aphan pulo, “Tangka athia, jarong lapen keng-op pacheponpepin pen ne nangtum aphan nangketoi ahut nangtum kopine akedorde doloma?”#Mat 10.9-10; Mar 6.8-9; Luk 9.3; 10.4
Halatum thak-lo, “Thangta akedorde ave.”
36“Bonta nonke tangka athia, jarong kedo abang pachepon nang; lapen nokjir kavedet abang amethang achoi dingpo chejorra nokjir epak pachenam nang,” pusi Jisu halatum aphan pulo. 37“Pima ne nangtum aphan nangpulang, hastro along ketok ason, atheke, ‘Alangli adai kedo atum ason phonang-lo,’ labangso alam nephan chekokvek nangji, pima nelamjir ketoktang an chekokbomlo.”#Isa 53.12
38Asangho atum pulo, “Langtha! Hemphu! dak nokjir pakni do!”
Alangli halatum aphan pulo, “La anta dorpo!”
Oliv Anglong Athak Jisu Kardom
(Mat 26.36-46; Mar 14.32-42)
39Jisu halabangso arongsopi o-kangsi, kai ason ha Oliv anglong damlo; lapen asangho atum alangli long dunlo. 40Halabangso adim nanglesi Alangli halatum aphan pulo, “Nangtum asat keklokle detjile Arnam ardomnon.”
41Arlong pen kevar pale un-chit an akehelo alangli damlo, lapen akengphu patongruisi Arnam ardomlo. 42Alangli pulo, “Nang ning hangte nang labangso aharlung nelong pen pontha po! Bonta ne ning kehang kali, nang ning kehangle papleng nang.” 43Sining angsong pen inut apherangke alangliphan cheklangsi alangliphan ajakong pathe muchot-lo. 44Alangli aning dukpiksi ansose Arnam ardomlo, lapen ang-i vi asonthak thaksi longle athak nangklodop dop-lo.
45Arnam kardom patangdet aphi alangli thursi asangho atum along chedamlo, lapen halatum aning aduk pen amek kejangklip alangli thek-long-lo. 46Alangli halatum aphan pulo, “Nangtum kopisi nangmek kejangklip-loma? Thurnon, lapen nangtum asat keklokledetjile Arnam ardomnon.”
Jisu Aphan Kenep
(Mat 26.47-56; Mar 14.43-50; Jon 18.3-11)
47Jisu lam keningjebom ahut armu atum vang-lo. Jisu asangho bangkrehini angbong pen inut, Judas pu abangsi halatum aphan nangjalo. Alangli Jisu aphan kangjupjisi adung an vang-lo. 48Bonta Jisu pulo, “Judas, nang kangjup pensi Monit a-Sopo aphan hotur arideng hodaipoma?”
49Asangho atum la keplangji dokdok alam chinisi arjulo, “Netum nokjir che-en nonma, Hemphu?” 50Halatum angbong inut abang ke Kurusar kethenei aban ano ar-e chorphlak-lo.
51Bonta Jisu pulo, “La apar klem-rinon!” Alangli ano otsi pamethulo.
52Ansi alangliphan kenepjisi kevang, kurusar kethe atum, kardom ahem keton aron-aso atum ahemphu atum lapen akesar atum aphan Jisu pulo, “Nangtum nephan kenepji aphan dokait aphan asonsi kaibong pen lapen nokjir pen vang nangkok-loma? 53Arni arni neli nanglitum pen Kardomhemthepi along dorap rap-lo setta nanglitum neliphan kenepji mathathedet-lo. Bonta nonke nanglitum aphan aporlo; kangting ajakongsi kehailo.”#Luk 19.47; 21.37
Pitor Jisu Aphan Kechekrongkre
(Mat 26.57-58,69-75; Mar 14.53-54,66-72; Jon 18.12-18,25-27)
54Halatum Jisu aphan nepsi Kurusar Kethenei ahem ponlo. Pitorta achar achar pen halatum aphi phi dunlo. 55Thekup angbongchit me thorsi halatum me chinghip-lo, lapen Pitorta halatum along chinghipdunlo. 56Lapen banpi inut alangli me kechinghip thek longsi Pitor aphan langdingsi labangpi pulo, “Labangso amonit jokta Jisu along dolo!”
57Bonta alangli chekrongkre detsi pulo, “Neli alangliphan chinita chinine, pei!”
58Malomso aphi inut amonit alangliphan thek longsi pulo, “Nangli jokta halatum angbong pen inut-lo!”
Bonta Pitor thak-lo, “Neli kali, koh!”
59Lapen porphai isi aphi anut kaprek amonit pu pasodaksi pulo, “Ahok-lo, labangso amonitta Jisu along dolo, pima alangli amatta Galili asorlo!”
60Bonta Pitor thak-lo, “Nangli kopi alamthesi keningjema, neli chinine.”
Halabangso ahut mamat alangli keningje ahut vo ejon kulo.
61Lapen Hemphu chetevarlo, lapen Pitor aphan langsap-lo, lapen Pitor, Hemphu alangliphan kepu, “Paningve vo kuke aphrang, nang nephan batai kethom chinine pusi puji” pu alam chemathalo. 62Pitor hong barsi chiru pik-lo.
Jisu Aphan Kepinrem Lapen Kechok
(Mat 26.67-68; Mar 14.65)
63Jisu aphan kehon amonit atum alangliphan pinremlo, lapen chok-lo. 64Halatum amek phungthipsi alangliphan arjulo, “Matsi nangphan teng-lo? Thantha!” 65Lapen halatum penang kepinrem alam pen alangliphan pulo.
Meipi Angno Jisu Aphan Kevan
(Mat 26.59-66; Mar 14.55-64; Jon 18.19-24)
66Lapen kethe-ang pen mamat akesar atum, Kurusar akethe atum lapen aron thekser atum chingrumpet-lo, lapen Jisu aphan kangsai a-Meipi angno vandet-lo. 67Halatum pulo, “Nelitum aphan thannon, nangli heloma Khristo loma?”
Alangli thak-lo, “Neli nanglitum aphan thansetta nanglitum kroikre-detji; 68lapen neli nanglitum aphan arju setta, nanglitum neliphan thakthedetji. 69Bonta non pen apar ke Monit a-Sopo, jakong theparpik a-Arnam ar-esi ingnipo.”
70Halatum kadokave pulo, “Tangte, nangli Arnam a-Sopoloma?” Alangli halatum aphan thak-lo, “neli helo pusi nanglitum pulo.”
71Lapen halatum pulo, “Ansose kopi ahaki nangjilangma! Pima ilitum methang methangsi alangli ingho pen keningje arjulong tang-lo!”
தற்சமயம் தேர்ந்தெடுக்கப்பட்டது:
LUK 22: KARBIBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Karbi Holy Bible © Bible Society of India, 2010.
Used by permission. All rights reserved worldwide.
