LUK 20

Jisu Ajakong Alam

(Mat 21.23-27; Mar 11.27-33)

1Arni isi Jisu rat atum aphan Kardom a-Hem arlo kethanbom lapen Birta Keme kepachethangbom ahut, kurusar akethe atum lapen Akesar atum pen pen Aron thekser atum vang-lo, 2lapen alangliphan pulo, “Lahei akam keklemji nangli kopi ajakong doma? Matsi labangso ajakong nangliphan pilo? Nelitum aphan thantha.”

3Jisu halatum aphan thak-lo, “Toh! Nonke neli nanglitum aphan eson alam arjulang. Neliphan thantha, 4Jon baptisom kepi ajakong Arnam pentong kevangma, mate monit penma?”

5Halatum angbong chedanseisi chepulo, “Etum pisi pupoma? Etum jongsi ‘Arnam pen’ pulote alangli ke, ‘Kopi apotsi tangte nanglitum Jon aphan kroikredet loma,’ pusi puji. 6Bonta etum jongsi ‘Monit pen’ pulote, labangso arat atum do-an etum aphan arlong pen arbupo, pima, Jon ke inut Arnam amontrilo pusi halatum kroipet-lo.” 7Lasi halatum thak-lo, “Alangli konat pensi kevangma, lake nelitum chinine.”

8Lapen Jisu halatum aphan pulo, “Neli kopi ajakong pensi lahei akam klem loma, neli jokta nanglitum aphan thanthelo.”

Drakha Aberi Alamlir

(Mat 21.33-46; Mar 12.1-12)

9Anke Jisu labangso alamlir rat atum aphan thanlo: “Ahut isi inut amo-nit drakha aberi tikilo. Alangli kehon atum aphan bi tekangsi arni dingklui aphan ahem che-osi damlo.#Isa 5.1 10Lapen drakha athe kepangrumji ahut nanglesi, alangli pharman kelongji aphan aban inut aphan beri kehon atum along nangtoilo. Bonta kehon atum ban aphan areng paso-osi areng angse nangtoijuilo. 11Lasi puthot alangli anut kaprek aban aphan toilo; bonta beri kehon atum alangliphanta areng paso-olo, patherak-lo, lapen areng angsesi nangtoijuilo. 12Anke alangli kethom aphong ban aphan toilo; beri kehon atum laphanta areng amek padolo, lapen ingtan varchorlo. 13Ansi drakha aberi ahemphu pulo, ‘Ne kopisi klempoma? Ne methang kechinghon asopo aphan ne toipo; halatum alangliphan aman pivekji!’ 14Bonta kehon atum alangliphan thek longsi, halatum hijan chepulo, ‘Lake ahemphu asopolo. La aphan pathilot lonang; anke amar atar etum chepahemphu longpo!’ 15Lasi halatum alangliphan beri angtan varchorlo, lapen pathilot-lo.

“Tangte, drakha aberi ahemphu hala-tum aphan kopisi klemjima” pusi Jisu arjulo. 16“Alangli vangsi halabangso amonit atum aphan pathipo, lapen drakha aberi ke akaprek kehon atum aphan pidetpo.”

Monit atum labangso alam arju longsi pulo, “Lapuson paplang nang!”

17Jisu halatum aphan langdingsi pulo, “Tangte, labangso ahastro alamthe kopilo?

‘Thangta me-me pusi kekim atum ke-en-e a-arlongsi

Kadokave apar akenangsotnei a-arlong cheplang tang-lo.’#Lun 118.22

18Halabangso a-arlong athak keklo abang aling chebengniji; lapen jongsi mane aphu athak bangso a-arlong klo lote, alangliphan padukniji.”

Detpangri Aphan Midu Kepi Alam

(Mat 22.15-22; Mar 12.13-17)

19Aron thekser atum lapen kurusar atum hadak mamat Jisu aphan kenepji aphan bor-ilo; pima alangli halatum aputhak labangso alamlir thanlo pusi chinilo; bonta halatum rat aphan phereduk-lo. 20Lasi halatum ahut keme rilo. Halatum kelang dunjoiji aphan monit toilo, dhoromi ason cheplangsi damlo, atheke, alangli keningje alam kenepdun thekji aphan lapen labangso pen ajok Jisu aphan Roman detpangri lapen govornor arideng kehodai thekji aphansi halatum lapuson klemlo. 21La kelangjoi atum Jisu aphan pulo, “Thanbang, nangli keningje lapen kethan alam ke chok pu nelitum chini. Nangli monit amahang langle, bonta monit aphan Arnam aning kehang kopi, labangso alamjir ahokpet alamsi nangli thanlo pu nelitum chinilo. 22Nelitum aphan thantha, ili Roman a-Recho aphan midu kepi aron doma, avema?”

23Bonta halatum akepacherei abidi chinisi halatum aphan pulo, 24“Neliphan rup apoisa isi nepaklangtha. Komat a-arjan lapen amensi la athak kedoma?” “Recho” pusi halatum thak-lo.

25Lasi Jisu pulo, “Toh tangte, Recho amar Recho aphan pinon, lapen Arnam amar Arnam aphan pinon.”

26Hadak halatum rat angno thangta alangli lam akechokche nep thekthedet-lo, lapen alangli kethak alam pen apot manghuphrongsi halatum doklip-lo.

Kethi Pen Kethur Alam

(Mat 22.23-33; Mar 12.18-27)

27Ansi manene a-Saduki atum, atheke kethitang atum thurthuthe pu kepu atum, Jisu along vangsi pulo,#Akam 23.8 28“Thanbang, Moses labangso aron ilitum aphan etokpilo: ‘Jongsi inut amonit aso ave akole thilot-ra apiso pamo tekang-lo tangte, hala kethitang abang apoton kedoji aphan akorte abang la hemepi aphan patengvek nangji.’#Keth 25.5 29Ahut isi korte bang throksi dolo; aklengsi abang piso ensi aso ave ako thilot-lo. 30Anke halabangpi aphan adakvam abang pateng-lo, 31lapen ke adakvam abangta pateng dunlo. Lasonthotsi la kadokave bang throksita cheplang-lo-asomar ave ako thi-et-lo. 32Kadokave aphi arlosota thilot-lo. 33Tangte, mo kethitang atum kethur arni, alangli komat apiso cheplangpo? Pima la bang throksita labangpi pen chepangri pet-lo.”

34Jisu halatum aphan thak-lo, “Labangso akai apinso lapen arloso atum chepangri, 35bonta kethi pen kethur dunlongji a-ot kedo atum, lapen mo kevangji akai kedo dunlongji atum ke piso-en-e, penanta dode, 36Halatum ke sining pherangke atum ason thakthakpo lapen thi un-elo. Halatum ke Arnam asomarlo, pima halatum kethi pen thurtang-lo. 37Lapen kethitang atum kethurji pu angthek Moses paklangdak-lo. Thengplum along me ketot-ang ahastro angdeng along alangli Hemphu aphan ‘Abraham a-Arnam, Isaak a-Arnam, lapen Jakob a-Arnam,’ pusi pulo.#Keba 3.6 38Alangli ke kethitang atum a-Arnam kali, Alangli ke kereng-et atum a-Arnamlo. Pima alangli long kadokave atum rengver.”

39Manene aron thekser atum pulo, “Thanbang, nangli kethak alam mesen!” 40Hala pen apar halatum karjuji haihedet-lo.

Jisu David A-Sopoma?

(Mat 22.41-46; Mar 12.35-37)

41Jisu halatum aphan arjulo, “Khristo ke David asopolo pu monit atum kopusonsi puthekma? 42Pima David amethangsi Lun aloh along tok-lo;

‘Hemphusi ne-Hemphu aphan pulo:#Lun 110.1

43ne nang hotur atum aphan nang keng kedong-i anghoi ason bibe tik ke nang ne ar-ele ingnitha.’#Lun 110.1

44David alangliphan ‘Hemphu’ pusi hang-lo; tangte, kopusonsi Khristo ke David asopo jilangma?”

Aron Thekser Atum Pen Kepacheretoi

(Mat 23.1-36; Mar 12.38-40)

45Rat atum alangliphan karju phrong ahut, Jisu amethang asangho atum aphan pulo, 46“Aron thekser atum aphan cherehurnon! Latum choi keding chingchoisi kephurijisi aning hangpik, lapen hithi borwa along man kepi akardom kelongji aphan aning dokpik; Sinagog along anghoi keme lapen kecho kejun amei ahut akemenei adim kangniji aphan chongvai; 47lapen latum hemepi atum akhi cho-et-lo, lapen ke athak kechepaklang aphan Arnam kardom ajir pading pik pik-lo! Latum aphan aduk so muchotji!.”

தற்சமயம் தேர்ந்தெடுக்கப்பட்டது:

LUK 20: KARBIBSI

சிறப்புக்கூறு

பகிர்

நகல்