LUK 19
19
Jisu Lapen Jakaias
1Jisu Jeriko nanglesi rongsopi angbong dong ponputsi damlo. 2Hadak midu kerung akethe abang dolo. Alangli menke Jakaias puhelo. Alangli inut keplang-o abang-lo. 3Jisu komatma, la kethek longjisi alangli bor-i bomlo, bonta alangli kebi-kethi amonit pinak, lapen armu do-o apotsi alangli Jisu aphan thek long un-e det-lo. 4Lasi alangli armu aphrang katvirsi Jisu aphan kethek longji aphan ingle athengpi arong arlu krak-lo, pima alangli halabangso atovarsi vangbomlo. 5Halabangso adim nanglesi Jisu angsong anat langsi Jakaias aphan pulo, “Hir serak non, Jakaias, pima pini neli nangli hemsi do nangji.”
6Jakaias hir seraksi aning arong pen alangliphan chak-lo. 7Lapen kethek dunlong atum an pasimuhursi pulo, “Labangso amonit papi ahemsi alohi cho damlo!”
8Malomso aphi Jakaias thursi Hemphu aphan pulo, “Arju iktha, Hemphu! Neli mar do-an achitim neli keduk kelak atum aphan pipo, lapen jongsi neli kechobei pen mane abang pen kopine enlote, halabangso abang aphan neli phan phli pithupo.”
9Jisu alangliphan pulo, “Labangso ahem arlo pini kejok vang tang-lo, pima labangso amonitta Abraham asupolo. 10Monit a-Sopo ke kangbotang aphan keriji lapen kepajokjisi vang-lo.”#Mat 18.11
Ser Angkleng Alamlir
(Mat 25.14-30)
11Monit atum labangso alam karjubom ahut Jisu thanbomsi eson alamlir thanlo. Alangli non Jerusalem nang tebok-het-lo, lapen Arnam Arat non amat nang klangpo pusi halatum mathalo.#Mat 25.14-30 12Lasi alangli pulo, “Ahut isi inut arleng kethe, recho kecho longji aphan heloving adet damlo, la aphi hem kechevoithuji aphan chepathik-lo. 13Alangli damde ako amethang aban bang kep atum aphan chehang-lo, lapen anut-tin aphan ser ingkleng isi si pitekangsi halatum aphan pulo, ‘Neli vangve tik ke la pen bepar klem-inon.’ 14Bonta alangli arat aso atum alangliphan hijimpet-lo, lapen alangli phi keng keng pherangke atum toidunsi papulo, ‘Nelitum aphuthak labangso amonit recho kechoji aphan nelitum ning hanghe.’
15“Halabangso amonit recho akam long-lo lapen hem chevoilo. Lapen alangli ban atum ko-an ale long-lo, labangso kechinijisi amethang adung kevangji ahukum pilo. 16Aphrang abang vangsi pulo, ‘Hemphu, nangli nekepi ingkleng isi aser pen neli ser ingkleng kep long-lo.’ 17Alangli pulo, ‘Me-ongchot-lo! Nang ke mesen abanlo! Bihek akamta nangli keklem pame apot nangliphan neli long kep arongsopi kechepahemphuji ajakong nangpipo.’ 18Adunthu aban vangsi pulo, ‘Hemphu, nangli ingkleng isi aser nekepi pen neli ser ingkleng pho long-lo.’ 19Labangso abang aphan alangli pulo, ‘Nangli rongsopi longpho kechepahemphuji ajakong longpo.’”
20“Anut kaprek aban vangsi pulo, ‘Hemphu, nangli ser angkleng daksi do; neli piban pen thitsi bikok-lo. 21Nangliphan neli pherelo, pima nanglike haijai amonit. Nanglike kebibe amarta humlok lapen kerikre adimsi kerot.’ 22Alangli alangliphan pulo, ‘Nangli kehingno aban! Nangli methang keningje alamthe pen neli nangli dai padopo! Neli ke haijai amonit, kebibe amar humlok lapen kerikre adimsi kerot pu nangli chinilo. 23Toh, tangte, nangli kopi apotsi neli tangka bank along thap damde det-loma? Anlote neli kechevang thu ahut ale pen chelong thuji apot-lo.’
24“Lapen ke hadak karjapphrong atum aphan alangli pulo, ‘Alang long kedo aser angkleng ponra hala ingkleng kep kedo aban aphan pidamnon.’ 25Bonta halatum alangliphan pulo, ‘Hemphu, alangli ke ser ingkleng kep dotang-lo!’ 26‘Ne nangtum aphan nang pulang, amar kedo abangphutin aphan pidetji lapen thangta kavedet abang pen asap kedo amar anta ponthudetji.#Mat 13.12; Mar 4.25; Luk 8.18 27Lapen ke neliphan halatum aphuthak recho kepachoji aning kehanghe atum aphan neli long vanpet non, lapen neli ingnole latum aphan pathi-etnon.’”
Jisu Anong Kethe Pen Jerusalem Kelut Dam
(Mat 21.1-11; Mar 11.1-11; Jon 12.12-19)
28Jisu labangso alam pudetsi alangli Jerusalem anat dambomlo. 29Alangli Oliv anglong akung kedo Bethphage lapen Bethani pu arong nangleji dokdok ahut alangli bang hini asangho atum aphan toisi pulo, 30“Nangtum kepangno arongle damnon; hadak kelut pen mamat baduta kardonde pinlang agadha aso kekokdong thekdam longji. Phlok-ra dak-le vannon. 31Mane jongsi, nangtum kopi apotsi la phlok-lo pu arjulote. Hemphu nangji pura punon.”
32Halatum damlo lapen halatum aphan Jisu kethan ateng kadokave long-lo. 33Halatum gadha aso kephlok-bom ahut ahemphu atum latum aphan arjulo, “Nanglitum kopi apotsi gadha aso phlok-loma?”
34Halatum thak-lo, “Hemphu nangji,” 35lapen halatum gadha aso Jisu along vanlo. Anke latum amethang methang ape gadha athak limsi amoi athak Jisu aphan pardonlo. 36Alangli kedam ahut monit atum amethang methang ape tovar athak limlo.
37Alangli Jerusalem nangleji dokdok adim, Oliv anglong anat kehir kecheng adim along, halatum kethek long akemanghumeme akam an pen apot asangho atum ake-ongpi Arnam aphan rosi ase kethe pen anong pathelo: 38“Hemphu amen pen kevang a-Recho aphan Arnam hirjume papinang! Sining athak ning kangsam padonang, lapen Arnam aphan anong pathe nang!”#Lun 118.26
39Lapen armu atum angbong pen manene a-Pharisi atum Jisu aphan pulo, “Thanbang, nangli sangho atum aphan kepadojoi jile hukum pinon!”
40Jisu thak-lo, “Neli nanglitum aphan nangthan lang, jongsi latum dojoilo tangte, arlong atum amethangsi hangjoji.”
Jerusalem Pen Apot Jisu Aningduk
41Alangli ha rongsopi nanglesi la thek long-lo lapen la pen apot aning duk-lo, 42lapen pulo, “Mai! Pini nang ning kangsam kelongji aphan kopi nangji, lale chini asonte mesenji apot-lo! Bonta nonke nangtum thek longlelo! 43Nang hotur atum nangphan bithe bitha paisong buichenji, nangkompetji, lapen bithe bitha penta nang khang thipji; lason ahut vangji. 44Halatum nangphan lapen paisong arlo kedo amonit atum an pavirkoiji; arlong isinatta kangrei-redet avedetji, pima Arnam nangphan kepajokji aphan kevang ahut nang apor chininedet-lo.”
Jisu Kardomhemthepi Kepangthir
(Mat 21.12-17; Mar 11.15-19; Jon 2.13-22)
45Ansi Jisu Kardomhemthepi lutdamsi mar kejor atum aphan kephlungji pangchengsi, 46halatum aphan pulo, “Hastro along toktang-lo, atheke Arnam pulo, ‘Ne hem ke Arnam kardom ahem pusi puji,’ bonta nangtum la kanghu atum kechepatu angthor paman tang-lo!”#Luk 21.37
47Arnivangta Jisu Kardomhemthepi arlo lam thanbomlo. Kurusar akethe atum, Aron thekser atum, lapen rat aphan keja atum alangliphan kepathiji aning hang-lo,#Luk 21.37 48bonta halatum atovar long thekthe det-lo, pima kadokave arat atum mon-e pensi alangli lam arjudunlo.
தற்சமயம் தேர்ந்தெடுக்கப்பட்டது:
LUK 19: KARBIBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Karbi Holy Bible © Bible Society of India, 2010.
Used by permission. All rights reserved worldwide.
