Luk 15

Na sifisifi na 'e dola

(Matiu 18:12-14)

1Aia na to'a ni konilana takisi ma to'a abula ta'aa ki kera ofu mai kalia tha Jisas uria rongolanalaa. 2Sui na Farasi ki ma wane ni to'odoo ki 'ana biibirangaa keka 'uu'ubulu 'una 'eri, “Wane ne'e 'e thathagonia to'a abula ta'a ki ma ka fanga biida.”

3Sui tha Jisas ka fa'arongo kera 'ana tarifula ne'e, 4“Mada sa ta wane 'i amalu'a, 'e too 'ana te'e talange'e fa sifisifi, ma te'e fa doo 'ani kera ka dola. 'E a'i si eekwatania sikwa taafulu fa sifisifi ma sikwa fa sifisifi 'eki la kula ni fangalaa kera, sui ka rofe buira na sifisifi na 'e dola neri, laalae ka rikia bo'o? 5Ma si manga na 'e rikia, nia ka se'ethaathala 'asia na'a ma ka kwaua gwauna 'abana 6ma ka oli mai 'i luma. Sui nia ka 'ai ura wane kwaimaani nia ki ma imole ki na kera too kaakali nia ka sore'a, ‘Mulu se'ethaathala bi nau, sulia ku rikia la'u na sifisifi nau baa na 'e dola.’ 7Nau ku fa'arongo kamalu'a, 'uria la'u bo'o, se'ethaathalalaa 'i thalo faafia te'e wane abula ta'aa na 'e manata akele fasia ta'aalaa nia ki, 'e ba'ita ka talua sikwa taafulu imole ma sikwa imole ki na kera kokota na kesi 'ato'ia manata akelelaa.”

Tarifula sulia seleni na 'e dola

8“Mada sa ta kini ka too 'ana taafulu fa seleni, ma te'e fa doo ka dola. Taa na kai ilia? Nia kai fa'atharua na la'afa, ma ka kaofia la luma 'eri, ma ka rofe tainga'i laalae ka rikia bo'o. 9Ma si manga na 'e rikia, nia ka 'ai uria na imole kwaimaani nia ki, ma imole ki na kera too kaakali nia te'e si kula, ma ka sore'a, ‘Mulu se'ethaathala bi nau, nau ku rikia na'a fa seleni nau ba na 'e dola.’ 10'E 'uria la'u bo'o, nga se'ethaathalalaa 'e ba'ita 'i ma'alutana ensolo ki tha God faafia te'e imole abula ta'aa na 'e manata akele fasia ta'aalaa nia ki.”

Tarifula sulia wela 'e dola

11Ma tha Jisas ka fa'arongo kera 'ana ta tarifula la'u: “Te'e wane 'e too 'ana roo kaluwane ki. 12Wane buri 'eri ka ba'e 'una 'eri ura maka nia, ‘Maka, 'o falea mai na bali nau 'ana aludooa kulu.’ Aia ma maka nia ka ukalia na aludooa baa ki 'i ma'alutadaro'a.

13“'E a'i si tau bo'o, na wane buri ba ka ofua riki'idoo nia ki, ma ka lae na'a ura te'e fanua daa. Ma nia ka 'uanaa te'efau na riki'idooa nia ki 'ana birangaa ta'aa ki. 14Buira 'e 'uanaa na'a riki'idoo nia ki, na uni'i thaofaa 'e ba'ita ka tatha la fanua 'eri sui, ma nia ka a'i si too na'a 'ana ta si doo. 15Ma nia ka lae ka raa fana te'e wane 'ana fanu 'eri. Wane 'eri ka fale nia uria na kai tharea na botho ki. 16Ma nia ka thaofa 'asia na'a laalae fanga botho mena sa kai 'ania na'a. Sui, ta imole mena si falea bo'o ta si doo 'i ana.

17“Sui si manga manatana oli mai ka to'o, nia ka manata 'ana 'i tala'ana, ‘Wanenira maka nau ki mena fanga ki kai teo si manga 'ana reere'elaa, ma nau na kwai maelia na'a thaofaa ne'e! 18Nau kwai oli sana maka nau ma kwai sore'a 'i sana: maka 'ae, nau ku garo na'a 'i maana God ma 'i maamu la'u bo'o. 19Nau 'e a'i si tala'ana 'oki 'alangi nau la'u 'ana kaluwane 'oe, 'o ngali nau mala ta wanenira 'oe.’ 20Nia ka oli 'i sana maka nia.

“Si manga nia 'e nii daa 'uu, maka nia 'e riki nia ma ka fungu 'ana tatakomia 'i fana, ma ka fita 'i sana kaluwane nia, ka oofia ma ka nono'ia.

21“Ma kaluwane nia 'eri ka sore'a 'i sana, ‘Maka, nau ku garo na'a 'i maana God, ma 'i maamu la'u bo'o. Nau 'e a'i si tala'ana 'oki 'alangi nau 'ana kaluwane 'oe.’

22“Sui ma maka nia ka sore'a sana wanenira nia ki, ‘'Eli'eli! Ngalia mai na to'oni tekwa baa na 'e le'a ka tatha ma moko fa'ato'oni nia 'ania. Alua na ringi 'i 'abana ma sadolo 'i 'ae na. 23Ngalia mai na buluka gwagwaruruta'a ba, ma moko thaungia. Kulu raa 'ana faafangaa ma kuka se'ethaathala 'akalu'a. 24Sulia na kaluwane nau ne'e 'e mae sui ka maruki la'u; nia 'e dola sui kuka riki nia la'u.’ Ma elelea 'ana faafangaa ba ka thafali bona'a.

25“Si manga 'eri la'u bo'o, na kaluwane na'o nia 'e ni mai 'i laa raa. Si manga 'e fula karangi na mai luma, nia ka rongoa na'a nguulaa ma waawaelalaa. 26Nia ka 'ai uria te'e wanenira kera ma ka soeto'ona uria taa na 'e fuli neri. 27Wanenira 'eri ka sore'a, ‘Thaasimu na 'e fula ma maka 'oe ka thaungia buluka gwagwaruruta'a baa sulia nia 'e maruki bana ma ka oli mai ka fula na'a.’

28“Ma uluna'o ba ka rake'iri ma si thathami kotho bona'a 'i laa luma. Ma maka nia ka kotho kau maa ka ili uria ngata fa'ekwalaa 'i sana. 29Sui ma nia ka lu'ua maka nia 'una 'eri, ‘Rikia fasi, fa ngali 'oro ne'e ki nau ku tofe'e raa bakua 'i femu ma ta si manga kwasi ade bo'o fasia ba'elamu. Sui 'oe 'osi falea mena 'amu'a ta kali nanigoti faku fasi kwa raa 'ana ta faafangaa bia wane kwaimaani nau ki. 30Sui taa si manga na kaluwane 'oe ne'e na 'e 'uanaa na aludooa 'oe ki bia na kini olodola ki 'e oli mai luma, 'oe 'oko thaungia bona'a na buluka gwagwaruruta'a ba fana!’

31“Ma maka nia ka sore'a 'i sana, ‘Kaluwane nau, 'oe 'o ni bii nau 'ana si manga ki sui ma aludooa nau ki sui doo 'oe ki neri. 32Sui ma kuki raa 'ana faafangaa ma kuki se'ethaathala bona'a, sulia thaasimu ne'e na 'e mae sui ka maruki la'u bana, 'e dola sui kuka riki nia la'u.’ ”

தற்சமயம் தேர்ந்தெடுக்கப்பட்டது:

Luk 15: MLU

சிறப்புக்கூறு

பகிர்

நகல்