Luk 14

Jisas 'e fa'a'akwaa te'e wane 'ana Sabat

1'Ana te'e fa Sabat, si manga tha Jisas 'e lae ka fanga 'ana 'i laa luma te'e wane gwaunga'i 'ana Farasi ki, tei to'a keka lio fiifii ura taa na kai ilia ki. 2Te'e wane 'abana ma 'aena 'e uubu 'e ni la'u bo'o kula 'eri. 3Jisas ka soeto'ona 'aina Farasi ma wane ni kwaifa'amanatai 'ana biibirangaa 'eki 'una 'eri, “Nga biranga kulu 'e ala faafia fa'a'akwaalaa 'ana Sabat mada 'e a'i?”

4Sui a'i ta wane si lu'u nia bo'o. Ma nia ka ra'u 'ana wane ba, ma ka fa'a'akwaa, sui ka fa'arongo nia kai oli nana. 5Sui tha Jisas ka soeto'oda, “Mada sa wela 'oe, mada buluka 'oe 'e 'asia 'i laa ta kilu 'ana Sabat, 'e a'i 'osi 'eli'eli ura 'oki lafua?” 6Ma kesi too bo'o 'ana te'e si doo na keki lu'u nia 'ania.

7Si manga tha Jisas 'e rikia na to'a ki na kera alunga'i kera mai ura fangalaa 'eri kera filia si kula ni 'onolaa fana wane 'inoto ki, nia ka fa'arongo kera 'ana si tarifula ne'e: 8“Si manga ta wane ka alunga'i 'oe ura laa ta faafangaa 'ana luma'aa, a'i 'osi 'ono 'ana si kula ni 'onolaa to'a 'inoto ki, sulia ana ta wane na 'e 'inoto ka talu 'oe fata'i na kera alungania la'u bo'o. 9Mada sa ka 'una 'eri, wane na 'e alunga'i kamaro'a sui, kai lae mai ma ka ba'e 'una 'eri 'i samu, ‘Tata'e fasia ara'i ne'e ka 'ono 'i kula 'ena.’ Sui 'oki tata'e 'ana se'enonia ma 'oko 'ono 'ana si kula ni kelowane'alaa. 10Sui si manga kera alunga'i 'oe, 'ono si kula ni kelowane'a, fasia si manga na wane na 'e alunga'i 'oe 'e riki 'oe, nia ka sore'a 'i samu, ‘Wane nau, 'o 'idu mai si kula le'a ne'e.’ Ma keki fa'a'inoto 'oe 'i na'ofana figua na 'e alunga'i nia mai 'ana faafangaa 'eri. 11Sulia ni tei bana na 'e tala fa'aba'ita nia, keki fa'afa'ekwa nia. Ma ni tei bana na 'e fa'afa'ekwa nia, keki fa'a'inoto nia.”

12Sui Jisas ka sore'a sana wane na 'e ba'e mai uri nia, “Si manga 'o raa 'ana ta faafangaa, 'osi alungania na imole kwaimaani 'oe ki, do'oramu mada waiwaena 'oe, mada inalamu ki, mada to'a riki'idoo ki. Mada sa 'oko ilia si doo 'eri, keki alunga'i 'oe la'u mai ura du'ulana si doo na 'o ilia. 13Sui si manga na 'o raa 'ana ta faafangaa, alungania to'a kesi riki'i doo, nga tero, ma 'afumae ma to'a maada rodo, 14ma kai le'a 'asia na'a femu. Sulia doo'anitaa kesi du'utaala ta si doo 'i femu, God kai kwaiaranga'i 'oe na'a si manga na nia kai fa'atata'ea to'a kokota nia ki fasia maea.”

Tarifula sulia na faafangaa 'i thalo

(Matiu 22:1-10)

15Si manga te'e wane na 'e nii la'u bo'o bii nia 'ana faafangaa 'eri 'e rongoa si doo 'eri, nia ka sore'a sana tha Jisas, “Le'a fana wane 'eri na tootoo kai fanga 'ana faafangaa 'i laa na 'inotoa tha God.”

16Jisas ka lu'ua, “Te'e wane 'e kwaithathai 'ana te'e faafangaa ba'ita, ma ka alungania to'a 'oro mamana bo'o. 17Si manga 'ana faafangaa 'eri na'a, nia ka falea waneniraa nia ura kai fa'arongoa to'a baa ki na 'e alunganida, ‘Lae na mai, doo ki sui bo'o 'e kwaithathai na'a.’

18“Sui ma to'a baa ki keka fofokwailiu bada. Etana wane ka sore'a, ‘Nau ku bi'i usia bo'o te'e si gano, nau kwai lae kwai rikia fasi. Kwaimanatai 'asia na'a, kwasi lae bo kau.’

19“Ruana wane ka sore'a, ‘Nau ku bi'i usia bo'o te'e taafulu buluka, ma sa kwai lae bo'o ura ku thathamia kwai ilito'oda 'ana raalada. Kwaimanatai 'asia na'a, kwasi lae bo kau.’

20“Sui ma uula wane ka sore'a, ‘Nau ku bi'i uusikini bo'o, nau kwasi lae bo mai.’

21“Ma wanenira ba ka oli mai ma ka fa'arongoa wane'inoto nia 'ana doo 'eki. Ma wane'inoto nia ka ba'e 'una 'eri, ‘Lae 'eli'eli kau sulia tala ba'ita, ma si tala fa'ekwa ki 'ana ma'e toaa ne'e ma 'oko talaia mai na to'a kesi riki'i doo, nga tero, to'a maada 'e rodo bia to'a 'aeda 'e katu.’

22“Sui wanenira 'eri ka sore'a, ‘Wane'inoto, nau ku ilia sui na'a si doo ba na 'o sore'a 'i saku sui ma kula 'oro ni 'onolaa 'ana faafangaa ne'e 'e gwa'u 'uu bana.’

23“Sui ma wane'inoto 'eri ka fa'arongoa wanenira nia, ‘Lae kau sulia tala ki na 'e too tau kau 'ana thaakali 'ana ma'e toaa ne'e, ma 'oko su'unga'i mai ta wane na 'oko fulato'ona, fasia luma nau ka fungu. 24Ku fa'arongo kamalu'a, 'e a'i ta wane na ku alungania 'i na'o kai 'anito'ona siina si faafangaa ne'e.’ ”

Na 'afeta'ia na disaepol kai fulato'ona

(Matiu 10:37-38)

25Aia ma figua ba'ita na 'e lae bia tha Jisas, ma nia 'e akele ma ka sore'a 'i sada, 26“Mada sa tei bana ka lae mai 'i saku ma ka liothau 'ana maka nia ma thainana, kwaina ma wela nia ki, do'orana ki ma waiwaena nia ki, iu, ma nia mena 'i tala'ana ka talu nau, kwa'i wane 'eri 'e a'i si tala'ana kai too mala disaepol nau. 27Ma tei bana na a'i si ngalia 'airarafolo nia ma keka lae 'i buriku, 'e a'i si tala'ana kai lae bii nau, mala disaepol nau.

28“Mada sa ta wane 'i amalu'a, 'e thathamia kai kasia ta luma ba'ita, kai 'ono fasi, sui ka to'o uria liulana si doo ki sui fasi ka rikia, nia 'e too 'ana fita malefo na 'e tala'ana fa'asuilana si raa 'eri? 29Sulia mada sa mulu thafali boaa luma 'eri, ma sui 'e a'i musi tala'ana fa'asuilana, imole ki sui keki waela 'ani kamalu'a, 30ma keki sore'a, ‘wane ne'e 'e thafali kasia bi'u ne'e ma 'e a'i si tala'ana fa'asuilana.’

31“Mada sa ta king kai lae 'ana firulaa biia ta king la'u. Si doo kai ilia na'o na kai manata fasi, mada sa nia biia te'e mole'e wane nia ki, 'e tala'ana kai siitatha bana faafia nga oomea na 'e lae mai biia roo mole'e wane ki? 32Mada sa 'e a'i, nia kai falea tei wane nia ki si manga na oomea 'eri 'e ni daa 'uu, ura keki soe uria si taa na keki ilia fasi enenoa kai to'o ma'alutada. 33Talafana la'u bo'o, mada sa tei amalu'a na 'e a'i si luka 'ana si doo ki sui 'e a'i si tala'ana kai too mala disaepol nau ki.”

Solo na 'e a'i si 'amalila

(Matiu 5:13; Mak 9:50)

34“Solo 'e le'a, sui taa mada sa a'i si 'amalila, adelana 'ufita na kai 'amalila la'u? 35Nia 'e a'i si tala'ana na tha'egano mada ta ta'erau ura fa'ata'elana doo ki. Keki 'uu bada 'ania. Tei na 'e too 'ana alinga fana rongolaa, keki rongoa.”

தற்சமயம் தேர்ந்தெடுக்கப்பட்டது:

Luk 14: MLU

சிறப்புக்கூறு

பகிர்

நகல்