Camba 25
25
Ibrahiima kurkiɗ nga
1Ibrahiima nameen tok ɓitiɓ wiiriis teeku Ketura. 2A raakeen na ɗe kuɓu ƴaar yasna-yino : Simraan na Yoksan, Medaan, Majaan, Yisbak na Suwa. 3Yoksan, a yi baab ɓi Sabaa na Deedaan ; Deedaan nikka caaciŋ Asuur ci na Letuus ci na Lewuum ci. 4Majaan, a yi baabiŋ Eefa na Eefer, Hanook, Abida na Elda'ah. Ɓii jen ɓa kuɓuuciŋ Ketura na set ciŋ ɗe.
5Ibrahiima eɗeen Isaahha raak-raak kaŋ ɗe ne a lama. 6Ŋ ini kaɗ ŋ kuɓuucaŋ ɓitiɓ caŋ ɗe ɓinooɓa, a nameen ɓa on ŋ raak-raaka wa a na pese, a cootiɗta ɓa ŋ kur, ŋ ɓak pulohaaɗ-noh po, ɓa ussa Isaahha, kuɓkiŋ ɗe. 7Ibrahiima pesiɗ kiis teemet na ndaŋkiyaah-yasna-kanak na kiis yatuus (175) nde a kurukka nga. 8A kaan ŋ kiyaɓko neɓiɗ, ŋ finho kipes hutiɗ, a haadda Jaanim. 9Kuɓuuciŋ ɗe Isaahha na Ismaayla uummba ɗe ŋ huraŋ atoh fa nik Makpela, wa ŋ fiki Mamre ŋ yohon Efron, kuɓkaŋ Sohar, ya ɓaahe ŋ Hit ca. 10Yohneem weɗ Ibrahiima romee ŋ Hit ca. A yi na ɓitiice Saarata, ɓa uumbu nga. 11Ŋ finho kakaan kaŋ Ibrahiima, Kooh barke'iɗta Isaahha. A yi Isaahha, a genee ŋ sero laaha teeku Lahay-Roy.
Ɓi rimkoh ŋ Ismaayla
12Inii weɗ naandsuku ŋ Ismaayla na ɓi rimkoh nga ɗe, kuɓki Ibrahiima raakee na Haajara, yi pulohee Misra, ñaamaŋ Saarata. 13Tiik ciŋ ɓa ceɗi cii : Nebayot a yi saawi, taammba nga Kedaar, taambissa nga Aadabel, na Mipsam, 14Misma, Duma, Maasa, 15Hadad, Teema, Yeetur, Nafis po gannga ŋ Keedama. 16Ɓii ɓeɗ kuɓuuciŋ Ismaayla ƴaar ci, tiik ciŋ ɓa ceɗi ceem. Ɓa nikka kilifa ndaŋkiyaah na kanak (12) ɓi fu inah ne kur ca na ndut ca ɓa adgohee teeksee nga ɓa. 17Ismaayla pesiɗ kiis teemet na ndaŋkiyaah-kaahay na kiis yasna-kanak (137), a kurukka nga, a haadda Jaanim. 18Ɓi rimkoh nga ɗe genee ŋ harmban Hawiilaa na Suur, ŋ pulohaaɗ-nohaŋ Misra, ŋ waas Assuur. Ɓa genoh ɗaa, saɓsukohiɗ na ɓaah caŋ ɓa.
Raakuukaŋ siis ca : Esaaw na Yaŋhooɓa
19Inii weɗ naandsuku ŋ Isaahha na kahan ce ; Isaahha nikee kuɓu Ibrahiima. 20Wa a raak kiis ndaŋkiyaah-nikiis (40), a ɓayya Rebeka ɓitiɓ, taambɗoh Laban. Rebeka namee nik kuɓu Betuwel ; ɓeɗ ɓeem, ɓa ɓaahee ŋ cuuɓaŋ Aram ca, ɓa genee Paddan-Aram. 21Waaye Rebeka mineeɗi raak kuɓu, a ineem tah po, Isaahha kiimmba Nikiɗi ŋ ini kaɗ ŋ ɓitiice, Nikiɗi teyɗukiɗta ɗe ; Rebeka ammba rook.
22Wa a amb rook, kuɓu kanak hiñoheeɗa ŋ ɗooƴ rookiŋ ɗe, a woosa ne : « Wa ye tah wa kaɗohha an nga so ? » A kaɗta meeksa Nikiɗi. 23Nikiɗi woosa ɗe ne : «
Ca cuuɓ kanak nik ŋ rookiŋ ɗa,
cuuɓ kanak ɗalohiɗ hey rimkohe nga ɗa ;
winoori hey uupɗe wi tas hatil,
te yi ƴini hey yilfe yi yakki. »
24Wa noha a joyee ɓasloh ree, laam-laam raakɗi nga, ɓa nikangannga siis. 25Ya ɗeɓ raaku nikka ruumind coy, a riiffa na find haa a ɓeku kulɓa, ɓa teekka ɗe Esaaw. 26Ya taamb nga, raaku na yaahiŋ ɗe ambiɗ ŋ patangiŋ kotiŋ Esaaw, ɓa teekka ɗe Yaŋhooɓa. Wa komaakceem na raakse, wa tel Isaahha raakiɗ kiis ndaŋkiyaah-yasna-yino (60).
Esaaw tooniɗ kisaawiŋ ɗe
27Wa komaakca yak, Esaaw nikka kaalsukoh keeh-keeh, a uupee waaɗ nik ŋ bilaf fa. Yaŋhooɓa nak, a nikee ɓo' yeeɓkiɗ, a nikangee ŋ ɗiip ca. 28Ŋ ineem Isaahha uupee waaɗ Esaaw laam a waaɗeen sepet kaalsukuuɗ lool, waaye Rebeka uupee waaɗ Yaŋhooɓa.
29Wa raakka mbeh, Yaŋhooɓa tikeeɗa suppa, wa hennda Esaaw pulohha kaala yaaɓiɗ. 30A woosa Yaŋhooɓa ne : « Faɗ to ŋ on suppaani ruumndii, laam ŋ minisɗi in. » Ineem weɗ tah a tapuusa tiikiŋ Edom (ruumind). 31Yaŋhooɓa loffa ɗe ne : « Mbaa ɗah, toon ndo waɗiŋ ɗa paaɗ, wiŋ saawi fu nikoh. » 32Esaaw woosa ne : « Mi yi aɗuk po ŋ minisɗi, waɗ saaw raakiɗ to winde etoh ? » 33Yaŋhooɓa loffa ɗe ne : « Giñiɗ to ineem paaɗ. » Weɗ Esaaw giñohha, a toonnda ɗe wa. 34Yaŋhooɓa eɗta ɗe mbuuru na suppa iraak, a ñammba, a annda po ƴutta, a cootta waas ce. Esaaw sagankohoh waɗiŋ saawiŋ ɗe ɗaa.
தற்சமயம் தேர்ந்தெடுக்கப்பட்டது:
Camba 25: YM
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© Wycliffe Bible Translators, Inc