Popodalaina 11
11
Na Ruma Ululuna Pa Babeli
1Ego na abana doruna sa kame gu sa na paranga ko kai paranga gu sa qai paparangania. 2Totonai qai oro lao vei pa kale sagere tapo sira na tinoni sa, qai kamua sa kai arare lavata pa Sina ko qai suvere togasa ketakoi.
3Qai vaiparanga lao lame sira, <<Aria, ta roiti biriki tu beto ta vamangini vamaururia,>> qarigu. Ko qaike varoitia sa na patu goto na biriki tu beto nake nyelaka peso goto na tita tu. 4Beto poni qai paranga, <<Aria ko ta roiti vanigita tu kai gugusu lavata, mi turua kai ruma ululuna ko na batuna mi iolo sae kamua tu na oka, ko mi pore isongoda kita mai vaqaqatagita tinganai vei doru eqa pa abana,>> qarigu.
5Ba I Iahova sa gore lagere doria sa na gugusu lavata beto na ruma ululuna isa qai korapa roitinia ira na tinoni. 6Ko sa paranga si Iahova, <<Koi! Kai puku tinoni gu sa aipira ko kai paranga gu sa qai parangania sira doru. Ko api sa qai podalai roitinia gu ko kopira sa kepore kai sakasa mai nyogua roitinia ira mina tapataria. 7Ko Aria, ta gore vairurainiria sa na dia paranga ko maike vanongorainiria sa na sakasa mai pojaria,>> sau sisa.
8Ko sa vaqaqataria tinganai vei eqa pa abana i Iahova sira ko qai beto roitinia sa na gugusu lavata. 9Ko na ginugua vei isa sa sa tavaisongonia Babeli sa na ia isa ura ketakoi i Iahova sa vairurainiria sa na paranga tana kasia abana doruna.#11.9 Pa paranga Hiburu na isongo <<Babel>> beto na paranga <<Balal>> na ginuana sa <<vairurai>> qai vaiqiro. Ko koko ketakoi sa i Iahova sa vaqaqataria tinganai vei eqa pa abana doruna sira na tinoni.
Na Tututi Koko Tai Semu Kamu Ti Ebarami
10Alepi sa na vavakatona na tutina i Semu.
Karu aoro pa liguna na popogoso kolo, totonai kai gogoto aorona si Semu, qi vaporea isa si Apasadi. 11Beto pa liguna qi pore i Apasadi sa qi suvere mutugu ka lima gogoto aoro si Semu ko qi vaporeria mutugu sa kaki tuna marene na rereko.
12Totonai qi kamua ka uengavululima aorona si Apasadi, qi vaporea isa si Sela. 13Beto pa liguna qi pore i Sela sa qi suvere mutugu ka made gogoto ka ue aoro si Apasadi ko qi vaporeria mutugu sa kaki tuna marene na rereko.
14Totonai qi kamua ka uengavuluputa aorona si Sela, qi vaporea isa si Ebe. 15Beto pa liguna qi pore i Ebe sa qi suvere mutugu ka made gogoto ka ue aoro si Sela ko qi vaporeria mutugu sa kaki tuna marene na rereko.
16Totonai qi kamua ka uengavulu made aorona si Ebe, qi vaporea isa si Peleqi. 17Beto pa liguna qi pore i Peleqi sa qi suvere mutugu ka made gogoto uengavuluputa aoro si Ebe ko qi vaporeria mutugu sa kaki tuna marene na rereko.
18Totonai qi kamua ka uengavuluputa aorona si Peleqi, qi vaporea isa si Reu. 19Beto pa liguna qi pore i Reu sa qi suvere mutugu karu gogoto sia aoro si Peleqi ko qi vaporeria mutugu sa kaki tuna marene na rereko.
20Totonai qi kamua ka uengavulu karu aorona si Reu, sa qi vaporea isa si Seruqi. 21Beto pa liguna qi pore i Seruqi sa qi suvere mutugu karu gogoto vitu aoro si Reu ko qi vaporeria mutugu sa kaki tuna marene na rereko.
22Totonai qi kamua ka uengavuluputa aorona si Seruqi, qi vaporea isa si Naho. 23Beto pa liguna qi pore i Naho sa qi suvere mutugu ka aru gogotoputa aoro si Seruqi ko qi vaporeria mutugu sa kaki tuna marene na rereko.
24Totonai qi kamua ka rabete sia aorona si Naho, qi vaporea isa si Tera. 25Beto pa liguna qi pore i Tera sa qi suvere mutugu kai gogoto manogasia aoro si Naho ko qi vaporeria mutugu sa kaki tuna marene na rereko.
26Pa liguna qi kamua ka vitu ngavuluputa aorona si Tera, qi vaporeria isa sira Ebarami, i Naho beto i Harani.
Na tutina i Tera
27Alepi sa na vavakatona na tutina i Tera.
I Tera sa vaporeria sira Ebarami, i Naho beto i Harani. Beto i Harani sa vaporea si Loti. 28Totonai korapa toana tu i Tera na tamana sa, sa mate si Harani pa Ur na gugusu tadira na tinoni Kaledia, na ia ketakoi sa podo. 29Ira Ebarami beto i Naho sa qai okoto teku maqotadi. Na isongona na maqotana i Ebarami si Serai beto na isongona na maqotana i Naho si Milika; i Milika sa na tuna rereko i Harani isa na tamadi ira Milika i Isika. 30Ego i Serai sa qi kepore tuna ura na egoro sisa.
31I Tera sa tonia si Ebarami isa na tuna marene, i Loti nona mabusu isa na tuna i Harani beto i Serai na roana isa na maqotana i Ebarami beto ko qai mekarai taloa pa Ur na gugusu tadira na tinoni Kaledia ko mai lao pa Kenani qarigu. Ba totonai qai kamu pa Harani sa, qai suvere togasa gu ketakoi.
32Sa kamua karu gogoto lima aorona si Tera beto sa sa mate pa Harani.
தற்சமயம் தேர்ந்தெடுக்கப்பட்டது:
Popodalaina 11: LGA
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024, Islands Bible Ministries. All rights reserved.