Popodalaina 12
12
I Iahova sa kukua si Ebarami
1Ego qi pojania i Iahova si Ebarami, <<Mu loai na mua gugusu, na tavitimu beto na mua tatamana beto ko mu lao pa ia mana vabatinigo ara.
2Mana roiti veinigo kai bubutu tinoni poreveveina ara sao
Beto mana mananigo ara sao;
Mana vaporeveveinaia ara sa na isongomu ao,
Beto ao sa muna vuvugu vaniria na mana ira na tinoni.
3Mana mananiria ara sira na tinoni mai mananigo,
Isa mina levenigo ao sa ara mana levenia tugu;
Beto doruna na tinoni pa abana
Sa mai teku mana tamu,>> qiu sisa.
4Ko sa taloa si Ebarami vei sa ule vei vania perangana i Iahova ko i Loti sa qaqiri tutia sisa. Ka vitu ngavulu lima aorona si Ebarami totonai sa taloa riu koko pa Harani 5Sa tonia si Serai na maqotana, i Loti na vabuguna, doru na isisongo qai kole tauku vaikamuniria beto ira na tinoni qai tekuria pa Harani, beto ko qai gore vei pa ia pa Kenani tinganai ko qai kamu tu ketakoi.
6Ego sa rerege tomea i Ebarami sa na ia isa ko sa kamu tu pa ia sa kole na gou lavata pa More pa Sekemu. Na totoso isa sa ira na bubutu tinoni Kenani sa qai suvere pa ia isa. 7Sa votu tai Ebarami si Iahova ko sa paranga, <<Na vuamu ao mana vaniria ara sa na ia lani,>> saunia. Ko sa vaturua i Ebarami sa kai ia vavakukuvuna ketakoi lao tai Iahova isa qi votu tana.
8Beto koko ketakoi sa sa gogojo lao vei tu pa moedi na kukubo pa kalena pa Beteli keta pa sagere tapo ko sa vaturua nona aqaqo pa vaikorapaina pa Beteli keta pa suvu tapo beto pa Ai keta pa sagere tapo. Ketakoi sa vaturua isa sa kai ia vavakukuvuna lao tai Iahova beto sa kuku vatarasae isa sa na isongona i Iahova. 9Beto poni sa taloa si Ebarahami ko sa gogojo gore vei tu pa Negev.
I Ebarami Pa Ijipi
10Ego sa raja sa na songe pa ia isa, ko i Ebarami sa sa gore ko mi suvere vei kai tinoni karovona tu pa Ijipi sau ura sa raja vaneneqi sa na songe. 11Totonai sa tata tome pa ijipi poni sa pira sau si Ebarami lao tai Serai na maqotana, <<Ago! Qa gigilai qua ara sa na rereko babata jonga sao. 12Totonai mai batigo ira na tinoni Ijipi sa pira marigu, Na maqotana tugu isa sa le alepi marigu. Ko mai vaisiu sara goto ao kode maike kotigo. 13Ko na luluqu ara sina munaguniria ko mai kopu vatalenisiu beto maike vamate talenisiu ara sao,>> saunia.
14Ko totonai sa kamu pa Ijipi si Ebarami sa, qai batia tugu ira tinoni Ijipi sa na rereko babata jonga si Serai. 15Beto totonai qai batia ira na tinoni lalavata tai Pero sisa sa qai riu vanyonyoro vania si Pero ko sa tatoni lao pa ruma tana bangara si Serai. 16Pa laena i Sera sa sa kopu vatalenia i Pero si Ebarami ko sa teku isongoria na sipi, na bulumakau, na dongiki marene na rereko, na nabulu marene na rereko beto na kameli si Ebarami.
17Ba pa laena i Sera na maqotana i Ebarami sa sa varajaniria na mo ikikekerena i Iahova si Pero beto ira na tinoni qai suvere pa nona ruma lavata. 18Ko sa kuku vakamua i Pero si Ebarami, pira saunia, <<Na sa sa qu roiti lamenia ao taqu? Na maqotamu tu ao sina, ba ai sa vei ko quke ule vanisiu? 19Ai sa vei ko qu paranga, Na luluqu ara sina qugu ko qa tekua ko qa nago veinia na maqotaqu. Ko ina! Tekua na maqotamu. Tonia ko mu riu,>> sau. 20Beto ko sa parangaria nona tinoni si Pero pa veveina i Ebarami ko qai garunu variua sisa tavitia na maqotana beto doru sakasava sa isongoria.
தற்சமயம் தேர்ந்தெடுக்கப்பட்டது:
Popodalaina 12: LGA
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024, Islands Bible Ministries. All rights reserved.