Matta 11
11
Nǝb Twama Yohanaɨ Nǝ Yʊtǝm Mwɛ Sagsagɔ
(Luk 7:18-35)
1Yesu a dɨ mɛlatǝm bɛtɔ mɛlalɨ gǝnɔ kʊb jeli yoi gǝm kɛl nɨɨ, nǝngɔ a gun a daa gɔ a shu ya mɛla nǝbɔ gǝm lɛɨ, kiyo jim kɛl Kwaamaɨ lɛ a tuulɔtɨn jini. 2Kwama gɔ Yohana nǝ Yʊtǝm mwɛ Sagsagɔ gǝ na a lɔsomi, nǝngɔ a nyʊwa kanjǝl nɨ Kiristi maa lɛɨ, nǝngɔ a twam bɛtɔ mɛlalɨ gǝnɔ a daa gǝ woi, 3gɔ ya ja bʌ gǝn gɔ, “Nǝmɔ wʊnɨ ja sʊwa gɔ bɛ lɛɨ ka? Nǝ dʌng kaa nǝl ka?” 4Yesu a jǝla ji gɔ, “Ya jǝ́ sʊwa Yohana jʊ jǝ́ kuwo, jǝ́ nyʊwaɨ. 5Kululʌmɔ kuwo daagɔ lɛ, nǝbɔ bʊtɔgɔ a swam swamɨ, yɔ yɔm lɛ, nǝbɔ a mwata mwataɨ a nya lǝma, nǝb nɨ mɨ jǝ nyʊwa lɔl lɛɨ, jǝ nyʊwa kɛlɔ lɛ, nǝbɔ a bʊlaɨ, ja gun, ja kiyo nǝb bʊnǝnɔ gǝm fulon kɛl lǝmɨgɔ. 6Bwiligɔ na a nǝb nɨ a kɨɨ bɔ nǝl a dul mɨɨ.”
7Nǝn kwama ja shumi, nǝngɔ Yesu a tǝl sʊwa nǝbɔ kɛlɔ lɛ a dul Yohanaɨ gɔ, “N wɛ jǝ́ jel sǝ jǝ́ kuwo a mʊgɔ kuuli? N yayiligɔ yʊwagɔ mǝg lɛɨ ka? Ɔ ɔ! 8Na mɨ nyɨɨ, n wɛ jǝ́ yɔ dʌngtǝmɨ? Jǝ́ yɔ dʌngtǝm nʊ nɨ a mal bɛllɛ nyantɨnɨ ka? Ɔ ɔ! N nǝbɔ a lɔ fɔlɔɨ gǝ mal bɛllɛ nyantɨn nɛɨ. 9N wɛ jǝ́ yɔ dʌngtǝmɨ? N nǝkuwotǝmkǝga ka? N bɨlǝngǝn mǝ sʊwa jen nɛɨ, a laa nǝkuwotǝmkǝga. 10Nʊ nɨ nǝn gɔ ja mʊla a dul gǝn gɔ,
“ ‘Mǝ twam bwɛ twama
mǝndɨ a kǝga mʊn,
wʊnɨ fɛka mʊn golagɔ lɛɨ
dɨsɔ la ń bɛɨ.’
11N bɨlǝngǝn mǝ sʊwa jen nɛɨ, ja lǝga bɔ ja bʌ kaa nǝl a yooli nɨ, wʊnɨ a laa Yohana nǝ Yʊtǝm mwɛ Sagsagɨɨ. N sʊwa jen, nʊ nɨ a dwal a fɔlɔn lɔ Kwaamaɨ, a laa gǝn. 12A kwama Yohana nǝ Yʊtǝm mwɛ Sagsagɔ a bɛ nǝn a dwiyeni, fɔlɔn lɔ Kwaamaɨ nyʊwa gaalan nɛ, nǝb nɨ nǝ ji gaalan nɛɨ, nǝji jǝ swɨ lɛ ja yem fɔlɔn lɔ Kwaamaɨ nǝn kwaanɨ. 13Diil Musaɨ jǝbɔ langǝn bwangǝn nǝbkuwotǝmkǝgagɨɨ ja sʊwa kɛl a fɔlɔn lɔ Kwaamaɨ, nǝngɔ la Yohana a bɛɨ. 14Na jǝ́ jǝla nǝn twama jini, Yohana nǝn gɔ n nʊ ja sʊwa kɛl a dul gǝn gɔ Iliya bɛ bɛɨ. 15Nʊ nɨ nǝn lɔl nyʊwatǝmɨ, bɛ ga nyʊwa.
16“Mǝ mʊrka kal nɨ nǝn wɛ? Maa na bɛtɔ nɨ yǝm a gamdʌbo jǝ jo fatǝm gaan jinɔ lɛ jǝ sʊwa lɛ gɔ,
17“ ‘Nǝ guu jem jwalɔ,
jǝ́ kɔ yegɔ!
Nǝ ma nafɨ bwaagɔ,
jǝ́ kɔ jitǝm wigɔ!’
18Yohana a bɛ do diil mwɛmɔ lɛ, mɨ nɔɔ bʊgɛ lɛ, nǝngɔ ja sʊwa gɔ, ‘Nǝngǝn nǝn nǝblaam!’ 19Bʊla Nǝlɨ a bɛ, ja lɛ, nɔɔ lɛ, jǝ́ sʊwa lɛ gɔ, ‘Jǝ́ kuwo nǝ jam nɨ jǝbɔ nǝ nɔɔtǝm nɨ jǝbɔ fatǝm nǝb yotǝm kemʌn tǝmɔ, jǝbɔ nǝb bwɨlangkɛlɔ!’ Yʊlan Kwaamaɨ gǝ nʊng dǝngdǝng gǝnɔ a gola nǝb nɨ a bwangtǝnɨ.”
Gʊtǝm Lɔl A Tuulɔtɨn Nɨ Ja Yǝla Bɔ Ja Bǝla Bwɨlangkɛl Jini
(Luk 10:13-15)
20Nǝngɔ a tǝl gʊtǝm lɔl tuulɔtɨn nɨ ga maa kɔrɔ kanjǝl laatǝm kang a kʊm jini, jʊ a bwɨɨ ja yǝla bɔ ja bǝla bwɨlangkɛl jinɔ. 21“N mwɛ mʊn, Korasinu! N mwɛ mʊn, Betsaida! Na na kanjǝl laatǝm kang nɨ mǝ maa a tuulɔ mʊnɨ, na na mǝ maa a Taya jǝbɔ Sidoni, na ja yǝla ja bǝla bwɨlangkɛl jinɔ kǝnǝn, jǝ yǝm nǝn bwɨlang tulong dwang a mʊgɔ bugom. 22Mǝ sʊwa jen nɛ, gaalan nɨ jǝ nǝ jen nɛ nǝn kɔkɔ borangɨ, laa laa gaalan nɨ ja nǝ Tayagɔ jǝbɔ Sidoni.
23“Jǝ́ nǝbɔ Kafarnahumi jǝ́ kuwo lɛ jǝ gung jen a dʌbʌl ka? Ɔ ɔ, jǝ gǝla nǝn jen a daa yamtǝm borang. Kanjǝl laatǝm kang nɨ mǝ maa a tuulɔ jeni, na na mǝ maa a Sadumaɨ, na tuulɔ nɨ wo dwiyen. 24Mǝ sʊwa jen nɛ, nǝn kɔkɔ borangɔ gaalan nɨ jǝ nǝ ń nɛɨ, laa laa gaalan nɨ ja nǝ tuulɔ Sadumagɨɨ.”
Jǝ́ Bɛ A Daa Mɨ Woi Jǝ́ Nya Nya Fǝbtǝm
(Luk 10:21,22)
25A kwama gɔ nǝngɔ Yesu a sʊwa gɔ, “Tɛtɛ, Tɛlalɔ dʌbʌlɔ jǝbɔ tǝmɔ, n buu mʊn kang mʊ yʊ nǝb yʊlanɔ jǝbɔ nǝb nyǝmtǝmɔ kanjǝl nɨɨ, mʊ nʊng bɛtɔ dwalǝnɨ. 26Tɛtɛ, n jʊ mʊ swɨ maatǝmɨ.
27“Kanjǝlɔ gwam Tɛtɛ mɨ a nɨ ɨ nɨ ɨɨ. Mɨ nǝn nʊ nɨ a nyǝm Bwɛɨ, na ke bɔ Tɛ bwɛɨ. Mɨ nǝn nʊ nɨ a nyǝm Tɛ bwɛɨ, na ke bɔ Bwɛɨ jǝbɔ nʊ nɨ Bwɛ swɨ lɛ a fɛta ji ja nyǝm Tɛ bwɛɨ.
28“Jǝ́ bɛ a daa mɨ woi gwam jǝ́ nǝb nɨ jǝ́ dɔta lɛ, jǝ́ gʌ lɛ nǝn kʊlǝn nɨ a tuu tuui a dul jeni, mǝ nǝ jen nǝ fǝbtǝm. 29Jǝ́ do maajɨ mǝndɨ kanga nɛɛgɔ a do tɨya kwɨlɔ sǝ a maa maajɨɨ. Jǝ́ mɛla a daa mǝ woi. Mǝ nǝ shig shig, mɨ mǝ nǝn gungtǝm dul, jǝ́ nya nya fǝbtǝm a nǝl jen. 30Tɨya kwɨl mǝndɨ a bwa bɔ. Kʊlǝn mǝndɨ a tuu bɔ.”
தற்சமயம் தேர்ந்தெடுக்கப்பட்டது:
Matta 11: DBD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
