Matta 10
10
Yesu A Jo Bɛtɔ Mɛlalɨ Gǝnɔ Kʊb Jeli Yo
(Mar 3:13-19; Luk 6:12-16)
1Nǝngɔ Yesu a jo bɛtɔ mɛlalɨ gǝnɔ kʊb jeli yoi, a nǝ ji fɔlɔn jǝgtǝm nǝblaam fitʌni, gɔ ya ja gung nǝb twɨlamɔ lɛ jǝbɔ nǝb nɨ mɨ kwamɨgǝnɨ. 2Dun bɛtɔ twamagɔ kʊb jeli yoi n wɔ: Na tɨkǝgagɔ nǝn Saminu wʊnɨ jǝ jo lɛ gɔ Bitrusi, jǝbɔ kɨla gɔ Andarawas, jǝbɔ Yakubu bʊla Zabadi, jǝbɔ kɨla gɔ Yohana, 3jǝbɔ Filibus, jǝbɔ Bartalamawas, jǝbɔ Toma, jǝbɔ Matta wʊnɨ yo kemʌn tǝm lɛɨ, jǝbɔ Yakubu bʊla Halfaɨ, jǝbɔ Tadawus, 4jǝbɔ Saminu nǝ swɨtǝm tǝm gǝn jǝbɔ Yahuza Iskariyoti wʊnɨ a lungto Yesui.
Yesu A Twam Kʊb Jeli Yo Nɨ
(Mar 6:7-13; Luk 9:1-6)
5N kʊb jeli yo nɨ Yesu a twamɨ, a sʊwa ji gɔ, “Ka jǝ́ dɔ lɛ tǝm Bʌtʌbi jǝbɔ tuulɔ Samariyagɔ. 6Bɛ jǝ́ yɔ a daa nǝbɔ Israilaɨ woi, a maa na kwamɨtɨn nɨ a lɛlaɨ. 7Kanga jǝ́ yɔɨ, ya jǝ́ sʊwa jengɔ, ‘Fɔlɔn lɔ Kwaamaɨ a dwama.’ 8Jǝ́ gung nǝb nɨ mɨ kwamɨgǝnɨ, jǝ́ gung nǝb nɨ a bʊlalaɨ, jǝ́ gung nǝbɔ bʊtɔgɔ a mwata mwataɨ, jǝ́ jǝg nǝblaamɔ. Jǝ́ nya nǝn kwan, jǝ́ nǝ ji nǝn kwan. 9Ka jǝ́ ta lɛ kemʌn mʊn jǝbɔ maalʊ, jǝbɔ kemʌn sǝlǝn a bǝlatɨn jenɔ gǝm. 10Ka jǝ́ ta lɛ sʊwa a yɔm jenɔ gǝm, jǝbɔ bɛllɛ yo, jǝbɔ twam, jǝbɔ dwam. N dǝngdǝng nǝ maajɨ a ja mɨbam maajɨ gǝnɔ.
11“Tuulɔ nɨ gwam jǝbɔ bɛ tuulɔ nɨ jǝ́ dɔ woi, jǝ́ saa kwamɨ nǝlɨ jǝ́ shig wo, a yɔ nǝn a kum nɨ jǝ́ bǝla daa gɔ lɛɨ. 12Na ya jǝ́ dɔ lɔngɔ lɛɨ, jǝ́ sʊwa jengɔ, ‘Lǝmagɔ a bɛ a lɔ nɨ.’ 13Na lɔ gɔ n lɔ nyanɨ, bɛ jǝ́ maa keli sǝ Kwaama a nǝ ji lǝma. Na ke bɔ lɔ nyanɨ, bɛ bwili jenɔ a yǝla a dul jen. 14Na kaa nǝl a kɔ a yo jen bɨɨ, a kɔ nyʊwatǝm kɛl jeni, jǝ́ bǝla lɔ gɔ jǝbɔ tuulɔ gɔ, jǝ́ buum kuulɔ a naa jeni.#10:14 Buutǝm kuul nɨ a naa jeni gǝ nʊng jǝ́ kɔ nǝb nɨ a yo bɔ kɛl jeni. 15N bɨlǝngǝn mǝ sʊwa jen nɛɨ, nǝn di borang Kwaamaɨ, jʊ bwɨ lɛ nǝn tuulɔ gɨɨ, bwɨla laa laa jʊ a bwɨ nǝn Sadumagɔ jǝbɔ Gwamratagɨɨ.
Gaalan Nɨ Bɛ Lɛɨ
(Mar 13:9-13; Luk 2:11,12; 21:12-19)
16“N wɔ mǝ twam jen nɛ na kwamɨ a kʊm bangashɨtɨn. A dul kɛl nɨɨ, jǝ́ yǝlam nǝb yʊlan na sɔɔtɨn, na kumfiyotɨn wʊnɨ mɨ maa fanyal lɛɨ.
17“Bɛ jǝ́ kɨla nǝbɔ, jǝ yɔ yɔ nǝn jen a kǝga nǝb dʊʊm koteregɨɨ, ja tʊm jen nǝn banjangɨ a kan mɛlalɨ jin. 18A kɛl dul mɨ, jǝ yɔ yɔ nǝn jen a kǝga nǝb dʊʊmɨ jǝbɔ kǝga fɔlɔlɔmɨ, sǝ jǝ́ nǝ nyiyo a kǝga jin, jǝbɔ kǝga Bʌtʌbi. 19Kwama ja lungto jen, ja yɔ nǝn jen a kan borangɨ, ka jǝ́ kom lɛ dul jenɔ a jʊ nɨ jǝ́ sʊwa lɛɨ. Yʊwa Kwaamaɨ nǝ jen nǝ jʊ nɨ jǝ́ sʊwa lɛ a kwama gɨɨ. 20N ke bɔ jen jǝ́ sʊwa kɛl lɛɨ. N Yʊwa Tɨya jeni sʊwa kɛl lɛ a daa jen woi.
21“Kɛ lungto lungto kɨla gɔ ja jʌ, tɛ lungto lungto bʊla gɔ, bɛtɨ gun gun tʌgo a tɛtǝlam jinɔ gǝm, ja jʌ ji. 22Nǝbɔ kɔ jen kɔ a kɛl dul mɨ. Nʊ nɨ a kʊ nǝl a yɔ nǝn a dɨltǝmɨ, bʊʊ bʊʊ. 23Na jǝ nǝ jen gaalan nɛ a kaa tuulɔɨ, jǝ́ mwal jǝ́ shu a kaa tuulɔ. N bɨlǝngǝn mǝ sʊwa jen nɛɨ, mɨsɔ jǝ́ dɨɨ kɛlatǝm tuulɔtɨn Israilagɔ lɛ gwam, sǝ Bʊla Nǝlɨ a bɛ.
24“Bwɛ mɛlalɨ mɨsɔ laa feyi gǝnɔ lɛ. Bwɛ jwaalɛ mɨsɔ laa tɛlalɔ gǝnɔ lɛ. 25A la nyɔ bwɛ mɛlalɨ a yǝlam na feyi gǝnɔ, bwɛ jwaalɛ na tɛlalɔ gǝnɔ. Na ja jo nǝ lɔngɔ gɔ, Baalzabuli, nǝbɔ a mʊgɔ lɔngɨɨ jǝ jo ji nǝn dun won?
Nʊ Nɨ Jǝ́ Nyʊwa Taal Gǝnɔ Lɛɨ
(Luk 12:2-7)
26“Ka jǝ́ nyʊwa lɛ taal jinɔ. Mɨ jʊ nɨ wo ja sum sumi mɨsɔ jǝ wum lɛɨ. Mɨ jʊ nɨ wo ja yʊ yʊɨ mɨsɔ jǝ nyǝm lɛɨ. 27Jʊ nɨ mǝ sʊwa jen a kumtojilii, jǝ́ sʊwa a nyalǝm. Jʊ nɨ mǝ sʊwa jen daddadɨ, jǝ́ sʊwa gǝn a talɨ. 28Ka jǝ́ nyʊwa lɛ taal nǝb nɨ jʌ bʊtɔgɔ lɛ, mɨ ji nǝn kwaan nɨ jǝ jʌ dʊʊmɨgɔ lɛɨ. Jǝ́ nyʊwa taal nʊ nɨ nǝn kwaan jʌtǝm bʊtɔgɔ jǝbɔ dʊʊmɨgɔ a mʊgɔ lɔ kǝlaɨ. 29Nǝbɔ gǝ miyo bandwɨnɛgɔ yo a kemʌn sǝlǝnɔ win, mɨ nʊ nɨ wo win yal lɛ a tǝmɨ, Tɨya jen a nyǝm bɨɨ. 30Yitʌn dul jenɔ, Kwaama a nyǝm ladatǝm jinɔ. 31Ka jǝ́ nyʊwa lɛ taal, bwayǝlǝn jenɔ a laa a bandwɨnɛtɨnɨ.
Nʊngtǝm Jǝlatǝm Nǝn Nǝbʊʊlɨ A Kǝga Nǝbɨɨ
(Luk 12:8,9)
32“Gwam nʊ nɨ a jǝla gɔ gǝ na a mɨɨ a kǝga nǝbɨɨ, mǝ tǝmɨ mǝ jǝla jǝla mǝʊ gǝ na a mɨ a kǝga Tɨya mɨɨ nɨ a dʌbʌli. 33Nʊ nɨ a kana nyǝmtǝm mǝndɨ a kǝga nǝbɨɨ, mǝ kana kana nyǝmtǝm gǝnɔ a kǝga Tɨya mɨ nɨ a dʌbʌli.
Mǝ Bɛ Bɔ Nǝn Yɨm Kwamɨgǝn Mǝ Bɛ Nǝn Gulʌn
(Luk 12:51-53; 14:26,27)
34“Ka jǝ́ bʊʊla lɛ jengɔ mǝ bɛ nǝn yɨm kwamɨgǝn a yooli nɨ. Ke bɔ yɨm kwamɨgǝn mǝ bɛ nǝnɨ, mǝ bɛ nǝn gulʌn. 35Mǝ bɛ sǝ ba n mʊrka kɨlan
“ ‘a kʊm bwɛɨ jǝbɔ tɨya gɔ,
bwɛnɔɔlɨ jǝbɔ nyɨya gɔ,
nɔɔlɨ jǝbɔ yul gɔ.
36Nǝbɔ lɔ gɨɨ,
yǝlam nǝb kiim gǝn.’
37“Nʊ nɨ a swɨ nyɨya gɔ jǝbɔ tɨya gɔ a laa ɨ, a la bɔ a yǝlam a mɨ. Nʊ nɨ a swɨ bʊla gɔ jǝbɔ bwɛnɔɔlɨ gǝnɔ a laa ɨ, a la bɔ a yǝlam a mɨ. 38Nʊ nɨ a do bɔ tɨya kʊʊtǝm gǝnɔ a bwang mɨɨ, a la bɔ a yǝlam a mɨ. 39Nʊ nɨ a nya kʊlɨ gǝnɨ, jʊ jʊ. Nʊ nɨ a jʊ kʊlɨ gǝnɔ a kɛl dul mɨɨ, nya nya.
Maajɨ Bwili
(Mar 9:41)
40“Nʊ nɨ a yo jeni, a yo i. Nʊ nɨ a yo ii, a yo nʊ nɨ a twam ɨɨ. 41Nʊ nɨ a yo nǝkuwotǝmkǝga jʊ a bwɨɨ n nǝkuwotǝmkǝgaɨ, nya nya lǝma nǝkuwotǝmkǝgagɨɨ. Nʊ nɨ a yo nǝ dǝngdǝngɔ jʊ a bwɨɨ n nǝ dǝngdǝngɨ, nya nya lǝma nǝ dǝngdǝngɨ. 42Nʊ nɨ a nǝ win a kʊm bɛtɔ twama nɨ mwɛ yʌbʌm nǝn bɛ kʌshii, jʊ a bwɨɨ n bwɛ mɛlalɨ mɨɨ, n bɨlǝngǝn mǝ sʊwa jen nɛɨ, mɨsɔ lɛ lǝma gǝnɔ lɛ wo.”
தற்சமயம் தேர்ந்தெடுக்கப்பட்டது:
Matta 10: DBD
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©️2024 Luke Initiative for Scripture Translation
