Maatiyos 21

Yeesus Nugus balih Yerusaalem oroba

(Markos 11:1-11; Luukas 19:28-40; Yohannis 12:12-19)

1Kado Yerusaalemih kab-yerhxiinih Oolac koomalle geytimta Beetfagille yemeetin gedda, Yeesus lamma katattayna dhirhiyeyaako: 2“Ta sin nifidde yane dik fanah aduwa, akkanih lel tumudhdhuwe xera ishi culluttaalih geytoona kitin. Tiftixiinih yoh baha. 3Akkinnanti wulim sinak yerhxemko: ‘Maddari ten farheh kinni’ akko erhexa, usuk lel akkanih ten dhirhiyo kinni” akko yerhxe. 4Tayim tekkem lel tamaa nabii:

5“Tsiyoon barhäk tahe akko erhexa:

‘Taykinna, amnonobba hin ku nugus xerakke,

tamarremhi barha kin culluttakke gaxeh kolle amiituk yane’”#Zakariyya 9:9

yerhxeh yinem takmalo ciloh kinni.

6Amaa katattaynit lel tamaa Yeesus akah ten yeemereekah aben. 7Amaa xera kee cullutta akah baahen, sinni natsul guzguzuh alle hayenih usuk alle defeye. 8Amaa xiyawko mango mari sinni natsul araxadde akah sidishen, gari lel xorhti xakuk yigriciinih araxadde akah sidishen. 9Amaa afa kee sarradde akko aduuk tine mango xiyaw lel: “Yalla xamdishinna! Dawud Barhah! Maddari migacalle yamiiteti dhaacole kinni! Yalla xamde takkoo agani carshelle!”#Zaabur 118:26 arhxuk zeerak yinin. 10Usuk Yerusaalem orobe gedda: “Tati miyatto kinni?” arhxuk amaa daafo inkoh saxximte. 11Amaa mango xiyaw lel: “Tati Galiilaati Naazretko yemeete nabii Yeesus kinni” yerhxin.

Yeesus maqhdas care yatsrige

(Markos 11:15-19; Luukas 19:45-48; Yohannis 2:13-22)

12Yeesus maqhdas caredde orobeh, amaa maqhdas caredde aabixuk kee dhaamak tine xiyaw inkoh yeyyeeceh, solaadi yaybiddile marih thawlal kee xamaama aabixuk yine marahi kuraasi yeydedebbe. 13“‘Yi cari salaat careh decsiimo kinni’#Isayas 56:7 yarhxiinim tunkuttubeh tane, atin laakin garaacenti gonna akko abten” akko yerhxe.

14Inti-malit kee tumunkusem maqhdas caredde alle yemeetinyaako ten uruse. 15Sheekhat manabottit kee sercat dhiiceenit laakin, ta usuk abe cibra kin xaaja yublinya kee cindham maqhdas caredde zeereenih: “Yalla xamdishinna! Dawud Barhah!” arhxuk yoobbin gedda mangum kurrayen: 16“Ta mari arhxuk yaniinim aabbituk tane?” akko yerhxin. Yeesus lel: “Yoo,

‘Zabul kee angu dhowa laatsenti afko fayla tisqirribeh tanito’#Zaabur 8:2

yarhxiinim maqhrayinnitiiniho?” akko yerhxe. 17Ten xabeyaako lel, amaa daafooko yewceh Beetcaniya fanah yedeeyaako amalle dhiine.

Yeesus indacarto abaara

(Markos 11:12-14,20-24)

18Dhaxiine, daafo fanah gaxak, safriite. 19Arax afak wuli indacartö yubleyaako, alle yemeete gedda dharhaako bextih walaa inkim akko migeyinna. “Kamboh daro akko yarhxiinim kooko geytime waytoo” akko yerhxe. Amaa indacartö lel akkanih kafte.

20Katattaynit amayim yublinyaako: “Indacartö akkanih aaginah kafte?” arhxuk cibrah raben. 21Yeesus: “Atin imaan teelliinih, lammaa-garbite wayteenimko, ta indacartolle tekkeh tanem bisa maki abtoona litiinim, ta koomak lel: ‘Bukkutaaki badadde ciddit’ akko terhxiinimko, amayim takko kinam rummah sinak arhxiyuk ane. 22Teemeniinih dhaacitinninnim lel kabbattoona kitin” akko yerhxe.

Yeesus reeza esseriman

(Markos 1:27-33; Luukas 20:1-8)

23Maqhdas caredde orobe gedda, aydurusuk sheekhat manabottit kee xiyawko naba mari alle yemeetiinih: “Awlih reezah kinni tayim abak tanitom, ta reeza koh toxoyem lel miya kinni?” akko yerhxin. 24Yeesus: “Anu lel wuli essero sin essero kiyo, radde yoh tedebbiinimko, anu lel tayim awlih reezah abak aniyom sinah warisho kiyo. 25Yohannis aythammaq awlaako yemeete? Carsheeko, woole xiyawko?” yerhxeh alle yedebbe. Usun lel sinne-sinneh taginah waanishak yinin: “‘Carsheeko’ akko nerhxemko: ‘Aymih kaa aamine wayteeni?’ nok yarhxo kinni. 26‘Xiyawko’ akko nerhxemko lel ta mango xiyaw Yohannis inkoh nabiih kaa yabliinimhi sabbatah, tenko mashshinna.” 27Amaymih Yeesusuk: “Minaarhige” akko yerhxin. Usuk lel: “Anu gantah tayim awlih reezah abak aniyom sinah warisho makiyo” akko yerhxe.

Lamma barhih aymassal

28“Aymih sinalle higgida? Wuli xiyawti lamma barha luuk yine. Afti tiyalle yemeeteh: ‘Yi barha, kaafa aduwaaki cinab dhagedde ukhdum’ akko yerhxe. 29Usuk lel: ‘Maadiye’ yerhxeh alle yedebbe, sarrah laakin yeththeeceseh yedee. 30Malammit barhalle yedeeh lel amahe akko yerhxe. Usuk lel: ‘Maddara, adaw kiyo’ akko yerhxe, laakin maadayinna. 31Ta lammaako awlihti abbat farhi abe?” akko yerhxe. Usun: “Aftiti” akko yerhxin. Yeesus lel: “Miiri yaskattit kee sharaamuth sinko yaakumiinih Yallih nigsinnadde oroboona kinoonim rummah sinak arhxiyuk ane. 32Amayim lel, Yohannis xaqqi araxah sinalle yemeeteh, atin kaa maamanitiini, miiri yaskattit kee sharaamuth laakin kaa yeemeniinimhi sabbatah kinni. Tayim tubliinimko sarrah lel taamanoona ciloh maththaacasitiini.

Cinab dhageh baclaysheenitti aymassal

(Markos 12:1-12; Luukas 20:9-19)

33Aki aymassal lel oobbaanta. Wuli cinab dhage yitkile cari-manabotti yine, yekeeyeyaako lel cinab adde yatsmuqhinikke akah faraaceh, dhawrheeni qobba akah siraaxeyaako, baclaysheenitidde yeskeereeh, aki baarho kallaaxe. 34Orbat waqhti kab-yerhxe gedda lel kaa cinab daro akah baahoona ciloh baclaysheenit fanah ishi garuuza fare. 35Amaa baclaysheenit kaa garuuza yibbirhiinih, tiya akko yootokin, tiya akko yigdifin, tiyalle dhayit alle ciden. 36Malammih lel tamaa afti maraako mango aki garuuza fare. Tenak lel amayim balih akko aben. 37Abayshimalle: ‘Yi barha xishmatoona kinon’ yerhxeh ishi barha fare. 38Amaa baclaysheenit laakin amaa barha yublin gedda sinne-sinneh: ‘Tati waarish kinni. Amowa, kaa nigdifeh kaa miiraas akko beynoo’ yerhxin. 39Kaa yibbirhiinih lel amaa cinab dhageeko irolle kaa cideenih kaa yigdifin. 40Amaydo, amaa cinab dhageh wanna yamiite gedda, ta baclaysheenitik ayim akko abo kinni?” akko yerhxe. 41Usun: “Amaa uma mara uma liyah ten yeylee, amaa cinab dhage lel cinab daro waqhte-waqhteh akah yaxaye aki baclaysheenitidde yaskeere” akko yerhxin.

42Yeesus lel:

“‘Siraaxa mari ilaacen dhayitti

ongolot dhaa yekkeh yane;

tayim Maddari abitto kinni,

ni intidde lel mangum carha mece’#Zaabur 118:22-23

yarhxiinim Kutuubudde caduruh maqhrayinnitiini?

43Amaydo, Yallih nigsinna sinak beyoona kinoonim kee, tee daro yayfiriye aki marah tamxawo kinam sinak arhxiyuk ane. 44Ta dhayittolle radati yeggedeedeleh butur yakko kinni; akkinnan tiyalle rademko lel kaa yachaflaqho kinni” akko yerhxe.

45Sheekhat manabottit kee Faarisiin kaa aymassal yoobbin gedda, ten zacabah waanishak yanem yeerhegin. 46Kaa yabbarhoona farhak yinin hanuk, amaa mango xiyaw nabiih kaa abluk yiniinimhi sabbatah, tena mashshiiten.

தற்சமயம் தேர்ந்தெடுக்கப்பட்டது:

Maatiyos 21: SCC

சிறப்புக்கூறு

பகிர்

நகல்