Maatiyos 20
20
Cinab dhageh shaqqaala
1Yeesus malammih: “Amayim lel carshi nigsinna, ishi cinab dhageh shaqqaala yayshaqhalo dhaxiine ifanih yewce cari-manabottah higgidamhi sabbatah kinni. 2Amaa shaqqaalah lellecille babbarhi diinaar akah abo yensemeemeceh, ishi cinab dhage fanah ten dhirhiye. 3Yewce gedda lel dhaxiinit saaca sagalah shuqhle hin aki mari cadaagalle daw-arhxuk ten yuble, 4tenak lel: ‘Atin gantah amaa cinab dhage fanah aduwa, eeddam sinah axawo kiyo’ akko yerhxe. 5Usun lel yedeyin. Lellecti abrha kee kasit saaca adoxuh yewceh amayim balih abe. 6Kasit saaca koonuh yewceh lel aki mara daw-arhxuk ten geye. ‘Aymih talle shuqhle hinnim muluu lellec daw-arhxuk taniini?’ akko yerhxe. 7Usun lel: ‘Walaa inketti ni mayshaqhalinnamhi sabbatah kinni’ akko yerhxin. Usuk: ‘Atin gantah amaa cinab dhage fanah aduwa’ akko yerhxe. 8Kasi yekke gedda, amaa cinab dhageh wanna kaa shaqqaalat masxadaadarak: ‘Shaqqaalah inkoh akah deecimteh, sarroorimat tiyaako erherhishsheh afti tiya fanah ten casbe akah ikfil’ akko yerhxe. 9Amaa kasit saaca koonuh tushtuqhulem yemeetin gedda babbarhi diinaar kabbaaten. 10Kado amaa afti mari yemeetin gedda, ziyaada kabbaatoona lon sinne yekkeliinih yinin, laakin usun gantah babbarhi diinaar kabbaaten. 11-12Kabbaaten gedda lel: ‘Ta inki saaca yushtuqhule sarrat mara, lellecti tanto kee sirii harur cureh ase nottaalih ten agaagishshe’ arhxuk amaa cari-manabottalle alle yongoroozomin. 13Usuk laakin: ‘Nangali, ku mazlamiyo. Inki diinaarah yottaalih mansamaamacito? 14Ishim bishshitaaki aduu. Ta sarrat khaddaamah kottah oxoyem akah axawo farheh ane. 15Innimik farhinnannim akko abo mirhiica? Hido lel anu xinda-mece ekkemih yolle ashshiinak tanito?’ 16Amaydo, sarrat mari afadde, afti mari lel sarradde gaxoona kinon” akko yerhxe.
Yeesus maddaxih ishi rabi yaakumeh warisha
(Markos 10:32-34; Luukas 18:31-34)
17Yeesus aganalle Yerusaalem fanah awcuk, amaa lamman kee taman katattayniya ulah araxko iscirhii-isheh: 18“Taykinna, Yerusaalem fanah awcuk nane. Xiyawti Barhi lel sheekhat manabottit kee sercat dhiiceenitih kaa yasxawna kinon, usun lel rabih kaa yaqhtsacoona kinon, 19usun lel alle tsaggarowoona kee khormaajah kaa sabaceenih masqalakke kaa takaroona Aki-marah kaa yasxawna kinon, usuk lel maddaxit lellec rabaako uguto kinni” akko yerhxe.
Inat essero
(Markos 10:46-52; Luukas 18:35-43)
20Sarrah Zibdit cindhamhi ina ishi cindhamlih alle temeeteyaako kaa nifille gululluubuyteh akkinnannim kaa esserte. 21Usuk lel: “Ayim fadhdhe?” akko yerhxe. Ishi lel: “Ta yi lamma barhi ku nigsinnadde, wuliti mizgaako, wuliti lel guraako, defeyoona kinon erhex” akko terhxe. 22Yeesus: “Ayim esserak taniinim aarhiguk mitaniini. Tamaa anu aacabo liyo kobbaaya taacaboona dhictaana?” arhxuk alle yedebbe. Usun lel: “Dhicna” akko yerhxin. 23Usuk: “Yi kobbaaya taacaboona kitin, yi mizga kee yi guraakohi defeena laakin, yi Abba akah yisqirribe marah kibah, anu maki axayem” akko yerhxe. 24Amaa tamana katattayni tayim yoobbin gedda, amaa lamma sacalalle alle kurrayen. 25Yeesus laakin ishelle akah deecimeh: “Aki-mara, ten reezon ten bukalle maddarit yakkiinim kee ten naba mari ten yagziinim taarhigin. 26Sin fanadde tayim takko alle mitane. Laakin sinadde naba tiya akkinnanti sin khaddaam yakko alle tane. 27Sinadde erhedhdho akkinnanti sin garuzzo yakko alle tane, 28Xiyawti Barhi gantah akah yakhdamoona makiiki, yakhdamo kee mango marih muucah ishi aniina tillaabisho kinni yemeetem” akko yerhxe.
Yeesus lamma inti-male urusa
(Markos 10:46-52; Luukas 18:35-43)
29Usun Yerikhooko awcuk lel, mango xiyaw kaa katayen. 30Taykinna lel, lamma inti-mali arax afakke defeyenya, Yeesus tillaabak yoobbin gedda: “Maddara, Dawud Barha nolle raxmat!” arhxuk zeereenih andhaxen. 31Amaa mango xiyaw, sik-yarhxoona ten yoskoolofin, usun laakin: “Maddara, Dawud Barha nolle raxmat” arhxuk amayimko ziyaada zeereenih andhaxen. 32Daw-yerhxeyaako, Yeesus akah deecimeh: “Ayim sinah abo yok fadhdhaana?” akko yerhxe. 33Usun: “Maddara, ni intit noh fakkitoo” akko yerhxin. 34Yeesus lel raxmah uluc akko xarheenih ten intit dhagandhaageh, akkanih ten mablo akah gaxteyaako kaa katayen.
தற்சமயம் தேர்ந்தெடுக்கப்பட்டது:
Maatiyos 20: SCC
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2024 Wycliffe Ethiopia
