Maatiyos 16
16
Faarisiin kee Tsadduuqhiim ishaarar esseran
(Markos 8:11-13; Luukas 12:54-56)
1 Faarisiin kee Tsadduuqhiim yemeetinyaako kaa yacakkanoona ciloh carsheeko ishaara ten yayballaw kaa esseren. 2Usuk lel: “Baarho dhumta gedda: ‘Caran cassoweh yanemhi sabbatah, mece ayyer zuruuf yakko kinni’ tarhxin. 3Dhaxiine lel: ‘Caran cassoweyaako dattoweh yanemhi sabbatah, kaafa cilish rob rado kinni’ tarhxin. Caranti beeno akah taysherheerhegiiniikah taarhigin, waqhti ishaarar taysharhaarhagoona laakin mirhictaana. 4Ta uma am-immine wayta ijo ishaara wagiita, Yoonaas ishaaraako bextih laakin aki ishaara akah tamxawo maki” yerhxeh alle yedebbe. Amaymih lel ten xabeh akko yedee.
Faarisiin kee Tsadduuqhiim ayco
(Markos 8:14-21)
5Amaa katattaynit amaa carhalle taben gedda, folo sinneelih beyoona biyashshiiten. 6Yeesus: “Faarisiin kee Tsadduuqhiim aycooko zeelita” akko yerhxe. 7Tayim arhxuk yanem: “Folo mibaahinomhi sabbatah kinni” arhxuk sinne sinneh adde wagroyshiten. 8Yeesus laakin tayim yeerhegeh: “Ko imaan dagito, aymihi folo malitiinim sinne sinneh adde wagroyshitak taniinim? 9Kaddih miduhitiini? Ayi koona kinnas, koona shiix dhiiceh, ayidhdhale jambiil akko tooqhociinim mitazzikkiriini? 10Hido lel amaa malxina kinnas affara shiix dhiiceyaako ayidhdhale jambiil akko tooqhociinim mitazzikkiriini? 11Anu folot sabbatah waanishak maaniyom tafhamoona aaginah tantaana? Faarisiin kee Tsadduuqhiim aycooko zeelita” akko yerhxe. 12Amaymik sarrah zeelitoona meeddam akah warishem folot aycooko makiiki, Faarisiin kee Tsadduuqhiim aydarasko kinam yifhimin.
Bithroos Yeesus Masiix kinamah yashhide
(Markos 8:27-30; Luukas 9:18-21)
13Kado Yeesus Filibboos Qayseeriyaati wakalelle yemeete gedda, ishi katattaynit: “Xiyawti Barhi miyatto kinni yarhxiini xiyaw?” yerhxeh ten essere. 14Usun lel: “Gari yaythimmiqhe Yohannis yarhxin, aki mari Eliyaas yarhxin, aki mari Ermiyaas hido aki nobowaako tiya kinni yarhxin” akko yerhxin. 15Usuk lel: “Atin lel miyatto kinni tarhxiini?” akko yerhxe. 16Simcoon Bithroos: “Atu Masiix, yane Yallih Barha kito” yerhxeh alle yedebbe. 17Yeesus lel: “Simcoon Yoonaas barha, tayim ku tuybulluwem carshelle geytima yi Abba kibah xazo kee biilo makiiki, atu baraka-letiya kito. 18Atu lel kok arhxiyuk ane, atu Bithroos kito, ta qooqhaxhi bukakke lel kaniisa siraaxo kiyo, Hadeesti xayli lel akko yashsho maki. 19Anu carshi nigsinnah mafaatix koh axawo kiyo, atu baarholle turhuwem carshelle tamadhdhawo kinni. Atu baarholle tiftixem lel carshelle tamfattaxo kinni” yerhxeh alle yedebbe. 20Amaymik sarrah amaa katattaynit usuk Masiix kinam aki marah warishaanamko ten yeemere.
Yeesus ishi raba kee rabaakohi ugut yaakumeh warisha
(Markos 8:31; Luukas 9:22-27)
21Amaa geddaako erherhisheh Yeesus Yerusaalem fanah yadaw alle tanem, naba mara, sheekhat manabottit kee sercat dhiiceenitko mango cazaab geyo kinam kee kaa yigdifiinih lel maddaxit lellec rabaako uguto kinam ishi katattaynitih akah caddoyshe. 22Bithroos lel wasanalle kaa beyeyaako: “Maddara tayim isheeko mirix-ish! Tayim caduruh kottalle takko maki” arhxuk kaa yaskaalafo erherhishe. 23Usuk laakin Bithroosudde ufkun-yerhxeyaako: “Atu yi andafo kito. Atu xiyawim kibah Yallihim ishi xangaladde sayshak mitanitooki, mirix yok erhex, Sheethano!” akko yerhxe.
Ishi masqal tooqhoceh Yeesus kataa
(Markos 8:32—9:1; Luukas 9:23-27)
24Sarrah Yeesus ishi katattaynitik: “Yi kataw farhinnanti, ishi xino alle tane, ishi masqal yooqhoceh lel yi kataw. 25Amayim lel ishi aniina gargeereti tee yaylawo kinni, yottah arhxuk ishi rooxe yeyleeti laakin tee geyo kinamhi sabbatah kinni. 26Xiyawti umbuka caalamalle tanem yiksibeh kaa rooxi wayemko, ayim kaa tamfice? Hido lel xiyawti ishi rooxi idhdhah ayim yaxaye? 27Xiyawti Barhi ishi Abbah nabnedde ishi malaykutlih yamaato kinni, amaa gedda lel umman tiya kaa-kaa ciyyo balih akah yafdaw kinni. 28Talle daw-yerhxeh yane maradde Xiyawti Barhi ishi nigsinnadde amiituk kaa yabliinindah rabaako dhacame wayo le mari adde yaniinim rummah sinak arhxiyuk ane” akko yerhxe.
தற்சமயம் தேர்ந்தெடுக்கப்பட்டது:
Maatiyos 16: SCC
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2024 Wycliffe Ethiopia
