Maatiyos 15
15
Xiyaw cayda kee amrit
(Markos 7:1-13)
1Sarrah Faarisiin kee sercat dhiiceenit Yerusaalemko yemeetiinih Yeesusuk: 2“Aymihi ku katattaynit kalxit marih cayda yagdiliinim? Folo beetan gedda gaba miyadhdhooliini” akko yerhxin. 3Usuk: “Atin lel aymihi sinni caydah arhxitin Yallahi amre tagdiliinim? 4Amayim lel Yallih amri: ‘Ishi abba kee ishi ina xishmat’#Muuca 20:12; Gabbaacime Sercat 5:16 kee ‘Ishi abba kee ishi inah waatimati rummah rabo alle tane’#Muuca 21:17; Leewiiti Sheekhino 20:9 yarhxemhi sabbatah kinni. 5Atin laakin: ‘Ishi abbak hido ishi inak: “Sinah xato takko taarhigem Yallah tomxowweh tane” yerhxemko, 6ishi abba xishmatam kaa mifarhshishsha’ tarhxin. Amaydo, sinni caydah arhxitin Yallih amre ciddan. 7Ko munaafiqhiino, nabii Isayas sin sabbatah akah waanisheekah:
8‘Ta xiyaw afah kinni yi xishmataanam,
ten afcaado laakin yottaako mirixtah tane.
9Xiyaw amrit kin labcad aydurusuk,
fayda maleh yoh yacbudin’
yerhxem meceetih yane”#Isayas 29:13 yerhxeh alle yedebbe.
Xiyawto masxishsham
(Markos 7:14-23)
10Mango xiyawah ishelle akah deecimeh lel: “Toobbiinih ifhima; 11kaa afko saytam makiiki xiyawto masxishsham, kaa afko tawcem kinni xiyawto masxishsham” akko yerhxe. 12Sarrah katattaynit yemeetiinih: “Ta marhxo yoobbin gedda Faarisiin yissimingidiinim taarhige?” akko yerhxin. 13Usuk: “Akkinnan xarha carshelle geytima yi Abba atkilinnixeya bukkutto kinni. 14Ten xaba; usun inti-malit kin santisheenit kinon. Inti-mali, inti-male santishemko inkoh kinni boozodde radaanam” akko yerhxe. 15Bithroos laakin: “Ta aymassal noh caddos” akko yerhxe. 16Usuk lel: “Atin gantah kaddih afhimekkah taniini? 17Afko sayinnannim garballe tillabtah irolle awcuk mitabliini? 18Afko awcinnannim laakin afcaadooko tamiite, tayim kinni lel xiyawto masxishsham. 19Amayim lel afcaadooko, uma xisaab, gidfo, zina, uma-xibar, garca, zirabah yashhidiinim kee waato tawcemhi sabbatah kinni. 20Tayim kinni xiyawto masxishsham. Adhdhoolinnixe gabah beetaanam walaa inketta mimasxishsha” akko yerhxe.
Kancaan numahi imaan
(Markos 7:24-30)
21Yeesus amakkeeko yewceh Tsoor kee Tsiidoon manthiqhalle hirgiime. 22Taykinna lel wuli Kancaan baarhoh numa amaa zoobäako temeeteh weecak: “Maddara, Dawud Barha, yi barhä dhacumaatih timjinnineh tanek yolle raxmat” arhxuk wecte. 23Usuk laakin walaa inki waanitta alle maadabbinna. Kaa katattaynit yemeetiinih: “Sarradde nokko weecak tanek, tee hadan” arhxuk kaa dhaacimen. 24Usuk: “Tamaa telee Israa-eel carih ciidoh bisa kinni farritimem” yerhxeh alle yedebbe. 25Ishi laakin: “Maddara, yi xat” arhxuk temeeteyaako kaa nifille gululluubuyte. 26Usuk lel: “Cindhamti folo beyaanah kaarah cidaanam mecem maki” yerhxeh alle yedebbe. 27Ishi lel: “Yoo, Maddara, kaara gantah maka ten wannunhi thawlaako rade butur beetaanam” akko terhxe. 28Yeesus lel: “Te numa, ku imaan naba tiya kinni. Atu akah fadhdheekah lel koh yakkoo” yerhxeh alle yedebbe. Tee barhä lel amalle anuk urte.
Yeesus mango mara urusa
29Yeesus amakkeeko yedeeh Galiilaati igilhi gimamalle gerhe. Koomalle yewceh lel amalle defeye. 30Amalle lel xankiishinam, inti-malit, tumunkusem, naxar-malit, kee aki mango mara baaheenih mangum mango xiyaw alle yemeetinyaako kaa ibadde hayen, usuk lel ten uruse. 31Amaymih naxar-malit waanishak, tumunkusem urak, tixinkishem gerhak, inti-malit lel abluk yublin gedda lel amaa mango xiyaw cibrah raben. Usun lel Israa-eel Yalla yeynebin.
Yeesus affara shiix bettiisha
(Markos 8:1-10)
32Sarrah Yeesus ishi katattaynitih akah deecimeh: “Ta xiyaw adooxa lellec yottaalih kaleenih yaniinimhi sabbatah, beetaanam lel maloonimhi sabbatah, raxmah uluc yok xarhak yanin. Araxadde safrah radaanamko lel safradde ten dhirhiyo mifarha” akko yerhxe. 33Amaa katattaynit lel: “Ta gina-le zibolle, tayidhdha mango xiyaw bettishsho dhicta folo awlaako geyno?” akko yerhxin. 34Yeesus lel: “Ayidhdhale kinnas litiini?” akko yerhxe. Usun lel: “Malxina kinnas kee daguu cindha caasa” akko yerhxin. 35Amaa xiyaw lel baarholle defeyoona ten yeemereh, 36amaa malxina kinnas kee caasa beyeyaako, dhaaco abeh, yigdileyaako amaa katattaynitih yoxoye, katattaynit lel amaa mango xiyawah yoxoyin. 37Usun lel beeteenih inkoh xayten. Amaa raace yeggedeedele kinnosko lel malxina jambiil yooqhocin. 38Amaa beete mari lel sayyo kee cindhamko bextih affara shiix labhattiya kuuk yinin. 39Amaa mango xiyaw dhirhiyek sarrah, jalbadde koreh Magadan zooba fanah yedee.
தற்சமயம் தேர்ந்தெடுக்கப்பட்டது:
Maatiyos 15: SCC
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2024 Wycliffe Ethiopia
