Luk 3
3
Tɔ́ʼɔɓay a Zâŋ Batís
(Mat 3:1-12; Mrk 1:1-8; Zâŋ 1:19-28)
1A ɓil mbimbɔ̂m bôo a ndíɓíké, a ɓil káwa mbây a mbây a lúkí Tibɛr, Pɔŋsé Pilát kaw ɓá mbây tûlkaw a tísiri a Judé, Herod ɓá mbây ka tísiri a Galilê, nyîn nɛ́ Filíp, ɓá mbây ka tísiri a Itiré rá̧ tísiri a Tarasoní, Lizaninya ɓá mbây ka Abilɛn, 2A ɓil nâmké nɔ́, A̧na rá̧ Kayíf, kaw ɓá gáŋnjuku a nzáʼaká̧nari̧, dáy Gáŋvbôn saɓay hí̧ Zâŋ, gun a Zakari ka lawkɔ́r. 3Nǎŋnɔ́, Zâŋ uru a há̧ra̧ ɓil pûri ka gbaŋ mbii Jurdɛ́ŋ too, a kakaa a sa: Í fere káwa a wǎyri, a í nyá batêm, ɓay a Gáŋvbôn ké vbá̧buma hí̧ wǎyri: 4Hɛ̧ké niŋ ɓá báŋké ka porofɛ́t Ezayí ɗé ka̧n ɓil mbété a mɛ̌ ɓá:
«Njuku a há̧na kakaa ka lawkɔ́r ɓá: Í mɔny ŋgboro a Gáŋmbây,
Í mɔny ŋgboro a mɛ̌ too ɓá ndáráké.»
5Ŋgɛŋrí̧ too e mbara, konri̧ rá̧ kɔ̂lri too e ɗéra,
ŋgboro a rá̧nákéri too e ndara,
ŋgboro a belyákéri too e béla.
6Nǎŋnɔ́, njukuri too e kó pɛ̧́na ka Gáŋvbôn hí̧y.
7Dáy njukuri, ɓá ŋgɛ̧́náké gí, ɓay a Zâŋ ké ma ɓá kuriri nyá batêm. Zâŋ sa hí̧ kuriri ɓá: «Mɛ̧rɛ̧ a mbéruri! A gé tɔ́ʼɔ wǎyri ŋgboro ŋgú hɛ́rɛ a Gáŋvbôn ka gí ɗɛ́ŋ dáy lé? 8Dáy, í tɔ́ʼɔ ka ŋgboro péna a béláké, ɓá í fere káwa a wǎyri dá! A í pɔŋ sa ɓá: Rú kaw ɓá gun a Abaraham! Katína, mi sa hí̧ wǎyri ɓá, Gáŋvbôn ma fere saw nɛ́rí̧ tɛ̧́ gunri̧ hí̧ Abaraham! 9Ŋgɛŋnɛ́, téna ná ɗɛ́ŋ ɓay a kúŋ dii ka sɛ̧wkéri dá: dii too, ka zi hí̧ léna a béláké yáy, kú e kuŋáké a ɓá vbú hɔrɛ!»
10Dáy njukuri vbí nɛ́ ɓá: «A̧hí̧ rú e niŋáké lé?» 11Ké fere a sa hí̧ kuriri: «Njuku ka erú a gári sére, ké hí̧ mbêw hí̧ njuku ka zi tí rú yáy, a njuku ka erú ka hɛ̧lâʼa, ké wal hí̧ njuku ka zi tí rú yáy.»
12Njuku mára̧ lari lambô a Rɔmɛri̧ kɔ́, gí ɓay a Zâŋ ké ɓá kuriri nyá batêm, a gí vbí nɛ́ ɓá: «Njuku tɔ́ʼɔhɛ̧, dáy a ɓurú a̧hí̧ rú e niŋáké lé?» 13Ké fere a sa hí̧ kuriri: «Í vbí lari lambô tá tûl lari ka sáŋnaké tɔ́ʼɔ yá.»
14Ŋgawbéreri kɔ́ gí vbí nɛ́: «A ɓurú wá, a̧hí̧ rú e niŋáké lé?» Ké sa hí̧ kuriri: «Í naʼa lari a njuku ka ŋgɛ́rɛ malé kúŋɓay kɔ̧ nzáʼa a njuku yá. Í kaw ɓá tûl lari péna a wǎyri.»
15Njukuri zoko ka law mbêw, a kaw vbí law kuriri ɓá: «Zâŋ nɛ́, zi tí ɓá Kiris yá lé?» 16Dáy, Zâŋ sa hí̧ kuriri ɓá: Mǐ, mi ɓá wǎyri nyá batêm ɓǎŋ, dáy njuku a há̧na e gína, ké ndé mí ka kpɔ́ŋay. Mi zi ma sɛ́l sɛl sabɔʼɔ a mɛ̌ nyá. Mɛ̌, ké e ɓá wǎyri nyá batêm ka ŋgboro a Têm Pukí, rá̧ kuu hɔrɛ. 17Ké ŋgbá yoŋ gɔ́ hɛ̧ ka̧n ndɔ̂ʼɛ, ɓay ɗém mɛ̧rɛ̧ rá̧ mbû̧nyké. Dáy, ké e fa̧ mɛ̧rɛ̧ kɔ̧ ɓil pûl a mɛ̌, a njúŋ mbû̧nyké, ka hɔrɛ ka tí húna bɔʼɔ mbêw yá. 18Nǎŋnɔ́, pé Zâŋ tɔ́ʼɔ Bélaɓay hí̧ njukuri, a rehí̧ nzáʼa nzɛ́rɛ a fékéri ɓá ŋgɛ̧́náké hí̧ kuriri.
19Dáy, Zâŋ saɓay hí̧ Herod, ka ɓá mbây a tísiri a Galilê, ɓay ka ké rɔ́ʼɔ Heródiyad, wûny a nyîn nɛ́, ka a nyá rá̧ ɓay a ɓékéhɛ̧ a fékéri ɓá ŋgɛ̧́náké a ké niŋ. 20Nǎŋnɔ́, Herod reniŋ gáŋ ɓékéhɛ̧ a féké ɓáy: Ké ŋgbá Zâŋ sé ka̧n vûn sɛl.
Batêm a Zezú
(Mat 3:13-17; Mrk 1:9-11)
21A falké ka njukuri too nyá batêm dáy, Zezú gí, Zâŋ gí ɓá nɛ́ nyá batêm kɔ́. Gelka Zezú kaw gɔ́ŋ Gáŋvbôn, nûnalê ŋgburu, 22Têm Pukí ɗere gí tûlé, ɓá báŋa bûm. Dáy, kú lá kɔ́ŋ a há̧na ka saɓay gí a nûnalê ɓá: «Mɔ́ ɓá Gun zína a mǐ, a tûló pé mi ziŋ mûnrína a mǐ tooy.»
Sɛ̧w a Zezú
(Mat 1:1-17)
23Zezú tí péna a mɛ̌, a ké erú ka mbimbɔ̂m bonsáy. Njukuri kɛrɛ ɓá, ké ɓá gun a Jozɛf ka ɓá gun a Eli 24gun a Matát, gun a Leví, gun a Mɛlkí, gun a Zanáy, gun a Jozɛf, 25gun a Matatiyas, gun a Amós, gun a Nahum, gun a Ɛslí, gun a Nagay, 26gun a Mát, gun a Matatiyas, gun a Semɛnyîn, gun a Josɛk, gun a Joda, 27gun a Zohanan, gun a Resá, gun a Zorobabɛ́l, gun a Salatiyɛl, gun a Nɛ́ri, 28gun a Mɛlkí, gun a Adi, gun a Kozâm, gun a Ɛlmadam, gun a Ɛr 29gun a Zezú, gun a Eliezɛr, gun a Jorim, gun a Matát, gun a Leví, 30gun a Simɛyɔ́ŋ, gun a Juda, gun a Jozɛf, gun a Zonam, gun a Eliyakim, 31gun a Mɛléya, gun a Mɛ́na, gun a Matáta, gun Nataŋ, gun a Davít 32gun a Ezayí, gun a Zobɛd, gun a Bowaz, gun a Salmoŋ, gun a Nasoŋ, 33gun a Aminadab, gun a Admin, gun a Arni, gun a Hɛsrɔŋ, gun a Farɛ́s, gun a Juda, 34gun a Zakob, gun a Izák, gun a Abaraham, gun a Terá, gun a Nakɔr, 35gun a Seruk, gun a Ragawu, gun a Falɛk, gun a Ebɛr, gun a Sala, 36gun a Kaynam, gun a Arpazad, gun a Sêm, gun a Nuwé, gun a Lemɛk, 37gun a Matúsala, gun a Enɔ́k, gun a Zarɛd, gun a Maléléyɛl, gun a Kaynaŋ, 38gun a Enos, gun a Sɛt, gun a Adam, Adam gun a Gáŋvbôn.
தற்சமயம் தேர்ந்தெடுக்கப்பட்டது:
Luk 3: pnz
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 CABTAL
