Luk 2

Mbuŋa a Zezú

(Mat 1:1-17)

1A ɓil nâmké nɔ́, Ogiste mbây a lúkí, hí̧nzáʼa ɓá kú kɛ̧́ bon a njukuri ka tísiri a Rɔmɛri̧ too. 2Dáy titíla kɛ̧́ bon a njukuriké, tí a ɓil nâm ka Kírínís kaw ɓá mbây a tûlkaw a ɓil kaw a Siri. 3Njukuri too, e sé ɗé rɛŋ a kuriri, njuku a sí̧ lé too ka sɛ̧w dii pû mɛ̌. 4Nǎŋnɔ́ Jozɛf kɔ́, uru ka Nazarɛ́t gáŋ pû a tísiri a Galilê ɓay a sé ɗé rɛŋɛ́ ka Bɛtɛlɛyɛ̂m, a tísiri a Judé, gel a kú mbuŋ zîi a mɛ̌, mbây Davít. Ɓayhí̧lé, ké ɓá gun sɛl î̧n a Davít. 5Ké sé, ɓay a sé ɗé rɛŋɛ́ kuu Marí wûny dala a mɛ̌, ka erú a ɓil. 6Gelka kú e ka Bɛtɛlɛyɛ̂m, nâm ka Marí e mbuŋay, gí ka̧ dá. 7Ké mbuŋ gun a mbɔŋɔ a mɛ̌ ɓá wɔ̧rɔ̧́njuku, ké ku gunké ka gári a ɓá nɛ́ ná ɓil kumbôn lâʼa a ndayri, ɓayhí̧lé gel nâm nyá gɔ́rɔ́ri ɔ dá.

Aŋnze tɔ́ʼɔ mûn nɛ́ hí̧ njuku koro hɛ̧hɔ́lari

8A ɓil kaw a mbêwké nɔ́, njuku koro hɛ̧hɔ́lari erú, kú ná ɓil kpâa, ɓay a koro hɛ̧hɔ́la a kuriri. 9Dáy aŋnze a Gáŋmbây tɔ́ʼɔ mûn nɛ́ hí̧ kuriri, hɔ̧́na a Gáŋmbây táŋgel ɗɔ́ŋ kuriri, dáy wɔ́w ŋgbá kuriri. 10Nǎŋnɔ́, aŋnze sa hí̧ kuriri: «Í ŋgú wɔ́w yá, ɓayhí̧lé mi gí sa Bélaɓay ka ná ɓá hɛ̧ rí mûn a njukuri too hí̧ wǎyri. 11Sû̧ŋ nɛ́, a ɓil gáŋ pû a Davít, kú mbuŋ njuku pɛ̧́hɛ̧ hí̧ wǎyri, ké ɓá Kiris, Gáŋmbây. 12Nǎŋnɔ́, í kó ŋgána ka e tɔ́ʼɔ ɓá mɛ̌: Í gé ziŋ gun a pɛ̂ŋ a kú ku nɛ́ ka laa ná ɓil kumbôn lâʼa a ndayri.»

13Núnmbɛ̧́nɛ́, aŋnze a fékéri ɓá ŋgɛ̧́náké a nûnalê ɗere gí ziŋ aŋnze ráy, a ɗél Gáŋvbôn a sa:

14«Hɔ̧́na ké hí̧ Gáŋvbôn a nûnalê,

a vónáké ké hí̧ njukuri ka Gáŋvbôn zi a tísiri!»

Njuku koro hɛ̧hɔ́lari sé Bɛtɛlɛyɛ̂m

15Gelka aŋnzeri pɔŋ kuriri ka a rekála sé nûnalê, njuku koro hɛ̧hɔ́lari sa a bazeŋ a kuriri ɓá: «Ná sé Bɛtɛlɛyɛ̂m, a ná sé kó hɛ̧ ka tá ka Gáŋmbây sa hí̧ nárí̧ ka ŋgboro a aŋnze a mɛ̌ri̧.»

16Kú uru, a sé ɓá gánáké a gé ziŋ Marí kuu Jozɛf rá̧ gun ka ná a ɓil kumbôn lâʼa a ndayri. 17Gelka kú gé kó nɛ́ dáy, kú saɓay ka aŋnze sa hí̧ kuriri sé tûl a gunké. 18Njukuri too, ka láɓay ka njuku koro hɛ̧hɔ́lari sáy, kaw yér. 19Dáy Marí ŋgbá ɓay nɔ́rí̧ too kɔ̧ lawɛ́, ka ɛ́ ɓilké. 20Falké, njuku koro hɛ̧hɔ́lari rekála a ɗél hɔ̧́na a Gáŋvbôn. Kú ɗél nɛ́, ɓay tûl hɛ̧ a kú lá, ka a kóy, ɓayhí̧lé hɛ̧ri̧ too tá ɓá báŋké nɔ́, ka aŋnze sa hí̧ kuriri.

Kú zi rɛŋ a Zezú

21Nâm zíndɔ̂ʼɔséreké a fal mbuŋa, ɓá nâm a kú e ɓá gun ndá ganzáy. Nǎŋnɔ́, kú zi rɛŋɛ́ ɓá Zezú, rɛŋ ka aŋnze tí sa hí̧ Marí ɗambɛl rá̧ a ké ka̧ ɓil.

Kú ɓá Zezú sé vûn a Gáŋvbôn

22Dáy nâm ka Marí rá̧ Jozɛf e mɔny mûn a kuriri ɓá báŋké ka sáŋna a Mɔyíze tɔ́ʼɔy, gí ka̧. Nǎŋnɔ́, Jozɛf kuu Marí, mbí gun a sé vûn a Gáŋvbôn ka Zerúzalɛ̂m, sé ɓá nɛ́ tɔ́ʼɔ Gáŋmbây. 23Ɓayhí̧lé kú ɗé ka̧n ɓil mbété a sáŋna a Gáŋmbây ɓá: «Mbɔŋɔ gunri̧ too a ɓil î̧n, ka ɓá gun wɔ̧rɔ̧́njukuy, kú ɓá nɛ́ kaw ɓórí, ɓay a Gáŋmbây.» 24Kú sé niŋ hɛ̧púna kɔ́, ka sáŋna a Gáŋmbây vbíy: «Ŋgôl sére, malé gun bûm sére.»

25Dáy, njuku a há̧na erú ka Zerúzalɛ̂m, rɛŋɛ́ ɓá Simɛ̧yɔ́ŋ. Ké ɓá njuku a ndáráké, a ɓá njuku lá nzáʼa a Gáŋvbôn. Ké kaw zoko njuku pɛ̧́ gun Izirayɛ́lri. Têm Pukí e kuu mɛ̌, 26a tí tɔ́ʼɔ hí̧ nɛ́ ɓá, ké tí hûl táŋ kó Kiris ka Gáŋmbây e pé gí yá. 27Dáy, ka ŋgboro a Têm Pukí, Simɛ̧yɔ́ŋ uru, a sé vûn a Gáŋvbôn, a goló, Jozɛf kuu Marí kɔ́, ɓá Zezú gí ɓay a niŋ hɛ̧ ka sáŋna vbíy hí̧ nɛ́. 28Simɛ̧yɔ́ŋ gé mbí gun ka̧n ndɔ̂ʼɛ, a zi awá hí̧ Gáŋvbôn a sa:

29«Ŋgɛŋnɛ́, Gáŋmbây, mɔ niŋ hɛ̧ ka mɔ hí̧nzáʼa ɓayké dá.

Mɔ́ pɔŋ njukupéna a mɔ̌, ké ziŋ hûl a ɓil a vónáké.

30Ɓayhí̧lé, mi kó ka nûn ní njuku pɛ̧́hɛ̧, ka mɔ hí̧ rú dá.

31Pɛ̧́na, ka mɔ mɔny ɓay a njukuri too kú kóy.

32Ké ɓá geltáŋa, ka e niŋ rá̧ njukuri too ka tísiri kú tu mɔ́,

a rená ɓá hɔ̧́na hí̧ gun Izirayɛ́l, njuku a mɔ̌ri̧.»

Simɛ̧yɔ́ŋ saɓay ka Gáŋvbôn ɓá ka̧n nzɛ́ʼɛ

33Jozɛf kuu Marí, láɓay ka Simɛ̧yɔ́ŋ sa sé tûl a Zezú, a kaw yér. 34Simɛ̧yɔ́ŋ ɗí béla kɔ̧ tûl a kuriri a sa hí̧ Marí, mâa Zezú: «Gáŋvbôn ten gun nɛ́ ɓay a ɓá gun Izirayɛ́lri ɓá ŋgɛ̧́náké lé, a ɓay a ɓá a fékéri ɓá a ŋgɛ̧́náké uru sâa. Ké e kaw ɓá ŋgána a Gáŋvbôn, dáy njukuri e sáŋ nɛ́. 35Nǎŋnɔ́, ké e ten kɛrɛ a múnáké a ɓil law a njukuri ɓá ŋgɛ̧́náké kɔ̧ kála. Dáy a mɔ̌, Marí, mɔ́ e lá séna law, ɓá báŋa gá̧má ka túŋ mɔ́y.»

A̧na, porofɛ́t a Gáŋvbôn

36Wûny a há̧na ɓá kpɔʼɔrɔ erú kɔ́ a Zerúzalɛ̂m, ké ɓá porofɛ́t, rɛŋɛ́ ɓá A̧na Ké ɓá gun a Fanuwɛ̂l, a ɓil sɛl î̧n a Asɛr. Ké kaw kú wɔ̧rɔ̧́ a mɛ̌ mbimbɔ̂m zíndɔ̂ʼɔsáy yáŋ. 37Dáy, wɔ̧rɔ̧́ a mɛ̌ gí hú, ké rekaw ɓá wûnysêe mbimbɔ̂m bon zíndɔ̂ʼɔsére a nɛŋ. A̧na zi pɔŋ gí ɓil vûn a Gáŋvbôn nyá, ké niŋ péna hí̧ nɛ́ sû̧ŋ ka sêe too, ka e a ɓil sáŋhɛ̧ rá̧ gɔ́ŋ Gáŋvbôn dát. 38Nǎŋnɔ́, A̧na gí ka̧ pí, ka tí zi awá hí̧ Gáŋvbôn, a saɓay a gunké hí̧ njukuri too, ka kaw zoko ɓá Gáŋvbôn ké pɛ̧́ Zerúzalɛ̂m.

Rená a Jozɛf kuu Marí gí Nazarɛ́t

39Gelka Jozɛf kuu Marí ɔrɔ hɛ̧ri̧ too ka sáŋna a Gáŋmbây vbíy, kú ré kuu gun sé Nazarɛ́t pû a kuriri ka tísiri a Galilê. 40Gun hɔ̧́, a kpáʼa, ka mbá ka hɛ̧túna, béla a Gáŋvbôn e kuu mɛ̌.

Zezú a ɓil vûn a Gáŋvbôn

41Mbimbɔ̂m dát lé, bâa Zezú kuu mâa a mɛ̌ sé Zerúzalɛ̂m ɓay a mára̧ Pâk#2:41 Pâk a Juyífri. 42Gelka Zezú erú ka mbimbɔ̂m bôo a sére dáy, kú ɗá nɛ́ sé Zerúzalɛ̂m kuu kuriri, ɓayhí̧lé ná ɓá hɛ̧ niŋa a kuriri dát dá. 43A mára̧ Pâk ɔ dáy, kú rekála, a zi tu ɓá Zezú ɔ Zerúzalɛ̂m nyá. 44Kú kɛrɛ ɓá ké e kuu mbáŋa séna a kuriri. Dáy a séséna nâm mbêw a zi kó nɛ́ nyá, a tí ɛ́ nɛ́ a ɓil a î̧n a kuriri rá̧ mbáŋa séna a kuriri, 45dáy a zi ziŋ nɛ́ nyá, a re ɛ́ nɛ́ sé ka̧ Zerúzalɛ̂m. 46Nâm a sáyké, kú gé ziŋ nɛ́ a ɓil vûn a Gáŋvbôn kaw a bazeŋ a gáŋnjuku tɔ́ʼɔ sáŋnari̧, a kaw lá kuriri, a vbí kuriri ɓay.

47Njukuri too, ka lá nɛ́, kaw yér sé tûl hɛ̧túna a mɛ̌, rá̧ zibɔʼɔ ɓay a mɛ̌. 48Gelka bâa a mɛ̌ kuu mâa a mɛ̌, gé kó nɛ́, kú kaw yér. Dáy mâa a mɛ̌ sa hí̧ nɛ́: «Gun ní, ɓayhí̧rá̧ mɔ́ niŋ nǎŋnɔ́ ziŋ rú lé? Mɔ́ kó! Bâa a mɔ̌ kuu mǐ, law a ɓurú lú too, a gel ɛ́ mɔ́.» 49Dáy Zezú sa hí̧ kuriri ɓá: «Ɓayhí̧, í ɛ́ mí lé? I zi tu ɓá mi kaw niŋ nzáʼapéna a mǐ a ɓil vûn a Bâa a mǐ nyá lé?» 50Dáy kú zi lá ɓil ɓay a ké sa hí̧ kuriri yá.

51Falké, Zezú lá nzáʼa a kuriri, a rekála kuu kuriri sé Nazarɛ́t. Mâa a mɛ̌ koro hɛ̧ nɔ́rí̧ too ka tay kɔ̧ lawɛ́. 52Zezú hɔ̧́ gé ɓá mbɛl a ɓil rɔ̧́na rá̧ béla káwa a mbɛl a Gáŋvbôn rá̧ njukuri.

தற்சமயம் தேர்ந்தெடுக்கப்பட்டது:

Luk 2: pnz

சிறப்புக்கூறு

பகிர்

நகல்