Péna a Apotereri 4
4
Píyɛ́r rá̧ Zâŋ a mbɛl a gáŋnjuku walɓayri
1Píyɛ́r rá̧ Zâŋ kaw saɓay hí̧ njukuri ɓáy, lé njuku nzáʼaká̧na a há̧narí̧, mbây a njuku koro vûn a Gáŋvbônri̧ rá̧ njukuri a kú ɗí kuriri ɓá Sadusiyɛ̧ri̧ gí ka̧. 2Kú e ka hɛ́rɛ sé tûl tɔ́ʼɔɓay a kuriri hí̧ njukuri, a tûl sa ɓá Gáŋvbôn toma Zezú a hûl, sa a goló ɓá, njukuri too ka húy, e ziŋ toma ka hûl. 3Nǎŋnɔ́, kú gí ŋgbá Píyɛ́r rá̧ Zâŋ, ka tu kuriri ka̧n vûn sɛl, ka̧ tí pélé a féké, ɓayhí̧lé ka bɔʼɔlêw, pé kú gí ŋgbá kuriri. 4Nǎŋnɔ́ a bazeŋ a njukuri ka lá tɔ́ʼɔɓay a kuriri, njukuri ɓá ŋgɛ̧́náké ziŋ láɓulaw, dáy bon a njukuri too ka láɓulaw, zaa ké ka̧ kumrá̧ké ndíɓí.
5Típélé a féké, mbây a Juyífri, gáŋnjuku pûri rá̧ njuku tɔ́ʼɔ sáŋnari̧, mára̧ há̧narí̧ a Zerúzalɛ̂m. 6Njukukéri ɓá: A̧na, ka ɓá gáŋnjuku nzáʼaká̧nay, Kayíf, Zâŋ, Alekzaŋndɛrɛ rá̧ njukuri ka e a ɓil sɛl î̧n a gáŋnjuku a nzáʼaká̧nari̧ too. 7Dáy, kú ɗá Píyɛ́r rá̧ Zâŋ gí mbɛl a kuriri, a vbí kuriri ɓá: «A gé hí̧ wǎyri kpɔ́ŋa malé ka rɛŋ a gé, rá̧ i ŋgɛ́rɛ njuku kpɛrɛ nɔ́ lé?» 8Nǎŋnɔ́ Píyɛ́r, mbá ka Têm Pukí, mbí ɓay a sa hí̧ kuriri: «Wǎyri, gáŋnjuku a pûri rá̧ mbây a Izirayɛ́lri, 9kú vbí rú ɓay, a sénɛ́ ɓay ka rú niŋ béla hí̧ njuku kpɛrɛ nɛ́, ɓay rú sa ka ŋgboro a sí̧ rá̧ njuku nɛ́ ziŋ ŋgɛ́rɛy lé? 10Bel mambá, í lá, wǎyri too njuku Izirayɛ́lri, ɓá ka rɛŋ a Zezú Kiris a Nazarɛ́t, ka i ɓara nɛ́ ka̧n tûl dii vbatay, ka Gáŋvbôn toma nɛ́ a bazeŋ a hûlri, pé njuku nɛ́ a ew a mbɛl a wǎyri nɛ́y, ziŋ ŋgɛ́rɛ ɓá béláké. 11Zezú ɓá njuku ka Mbété sa:
“Saw, ka wǎyri njuku mbó vûnri̧ sáŋ,
pé ré tɛ̧́ gáŋ saw ŋgbá vûn.”
12Njuku ma ziŋ pɛ̧́na ka ŋgboro a féké yá, ɓá ka ŋgboro a mɛ̌ mbɛ́ŋ, ɓayhí̧lé gel a há̧na zi tí ka tísiri nɛ́, ka Gáŋvbôn hí̧ njuku a há̧na rɛŋ, ka ná e ziŋ pɛ̧́na, ka ŋgboro a mɛ̌, zi tí yá.»
13Njukuri walɓayri, kaw yér, ɓayhí̧lé kú kó Píyɛ́r rá̧ Zâŋ, saɓayké táŋ wɔ́w, a tu ɓá Píyɛ́r rá̧ Zâŋ, ɓá njukuri ka hɛ̧ mbɛla a kuriri zi ŋgɛ̧́ nyáy. A goló, kú tu ɓá Píyɛ́r rá̧ Zâŋ e kuu Zezú. 14Dáy kú zi tu a̧hí̧, kú e sanáké yá, ɓayhí̧lé njuku kpɛrɛ ka ziŋ ŋgɛ́rɛ, ew ka gbaŋa Píyɛ́r kuu Zâŋ. 15Dáy, kú sa hí̧ kuriri ɓá kú tɛ̧́ kála, a kaw mɔny ɓay a bazeŋ a kuriri, 16a sa: «A̧hí̧, ná e niŋáké ziŋ njuku nɛ́rí̧ lé? Ɓayhí̧lé, kú niŋ gáŋ hɛ̧sáʼama, njukuri too ka Zerúzalɛ̂m tu, ná zi ma manyáké yá. 17Dáy, a ɓayké, ké zi ná wal ma bazeŋ a njukuri lé, ná de kuriri saɓay ka rɛŋ a Zezú hí̧ njukuri.»
18Nǎŋnɔ́, kú reɗí Píyɛ́r rá̧ Zâŋ a de kuriri saɓay malé tɔ́ʼɔɓay ka rɛŋ a Zezú. 19Dáy, Píyɛ́r rá̧ Zâŋ zi nzáʼa kuriri ɓá: «I wal ɓil ɓayké ka mûn a wǎyri, ná ɓá hɛ̧ a ndáráké a mbɛl a Gáŋvbôn, ɓá rú lá nzáʼa a wǎyri, a many nzáʼa a Gáŋvbôn lé? 20Ɓayhí̧lé, rú zi ma pɔŋ saɓay a hɛ̧, ka rú lá ka súkú a ɓurú, ka kó ka nûn a ɓurú yá.» 21Kú re saɓay ɓá ŋgɛ́rɛ́ké ɓáy hí̧ kuriri, a pɔŋ kuriri kála. Kú zi ziŋ ŋgboro niŋ hɛ̧ a belyáké ziŋ kuriri yá, ɓayhí̧lé njukuri too ɗél Gáŋvbôn, ɓay tûl hɛ̧ a kú niŋ. 22Njuku kpɛrɛ ka ziŋ ŋgɛ́rɛ ka ŋgboro a hɛ̧sáʼama nɔ́, mbimbɔ̂m a mɛ̌ ndé bon nɛŋ dá.
Njuku láɓulawri gɔ́ŋ Gáŋvbôn
23Gelka kú pɔŋ kuriri, Píyɛ́r rá̧ Zâŋ sé ziŋ njuku a kuriri, a sa hí̧ kuriri, hɛ̧ ka mbây a njuku nzáʼaká̧nari̧, rá̧ gáŋnjuku pûri sa hí̧ kuriri. 24Fal láɓayké kuriri too, kú ɗíŋ a vbí Gáŋvbôn ka law mbêw a sa: «Gáŋmbây, mɔ̌ pé mɔny nûnalê, tísiri, mbii lúkí rá̧ hɛ̧ri̧ too ka e a ɓilké. 25Ɓá mɔ̌, ka ŋgboro a Têm Pukí, pé saɓay ka ŋgboro a zîi manárí̧ Davít, koy a mɔ̌, ɓá:
“Ɓayhí̧rá̧ njukuri ka zi tí ɓá Juyífri yáy tɔ́ mûn a kuriri lé?
Ɓayhí̧rá̧ kú láhá̧narí̧ ɓay a niŋ hɛ̧ ka zi tí ka nɛ́rɛ̧ nyáy lé?
26Mbây a tísiriri, mɔny mûn a kuriri kaw ɗɛ́ŋ ɓay a rúbére,
dáy mbâyri láhá̧narí̧ ɓay a rúbére ziŋ Gáŋmbây rá̧ njuku pɛ̧́hɛ̧ a ké ten#4:26 Mbété si̧ŋ 2:1-2.”
27Ɓayhí̧lé katína, Herod rá̧ Pɔŋsé Pilát, láhá̧narí̧ a ɓil pû nɛ́, kuu njukuri ka zi tí ɓá Juyífri yáy, rá̧ gun Izirayɛ́lri, ɓay rúbére kuu njukupéna a mɔ̌, a táŋáké, Zezú ka mɔ ten ɓá Mɛsí. 28Nǎŋnɔ́, kú niŋ hɛ̧ too ka kpɔ́ŋa ɓá báŋké ka mɔ zi ka a tí ŋgá̧nzáʼa ɗambɛl. 29Dáy a ŋgɛŋnɛ́, Gáŋmbây, mɔ́ ŋgbá tûló sé tûl ɓay a ŋgɛ́rɛ́ké a kú sáy, a mɔ́ hí̧ njukupéna a mɔ̌ri̧, ŋgɛ́rɛ tɔ́ʼɔɓay a mɔ̌, táŋ wɔ́w. 30Mɔ́, tɔ́ʼɔ kpɔ́ŋa mɔ̌, rá̧ kú niŋ hɛ̧sáʼamari̧ rá̧ hɛ̧ yérkéri, a kú ŋgɛ́rɛ njukuri ka rɛŋ a Zezú, njukupéna a mɔ̌, a táŋáké.»
31Gelka kú ɔrɔ gɔ́ŋ Gáŋvbôn, gel a kú mára̧ kawrúy laŋ, kú mbá ka Têm Pukí too, a tí tɔ́ʼɔɓay a Gáŋvbôn ka ŋgɛ́rɛ.
Law mbêw a njuku láɓulawri
32Njukuri ka láɓulaw, niŋ law mbêw, a e ka kɛrɛ a mbêwké. Njuku a há̧na ka e sa ɓá hɛ̧zíŋa a mɛ̌, ɓá ɓala mɛ̌ hɛʼɛ zi tí yá, hɛ̧zíŋa a kuriri too, ɓá a kuriri too mbêw. 33A ɓil kpɔ́ŋa ɓá ŋgɛ̧́náké, pé apotereri kaw saɓay a toma a Gáŋmbây Zezú a kú kóy. Nǎŋnɔ́, Gáŋvbôn ɗí ɓay a béláké, ɓá ŋgɛ̧́náké kɔ̧ tûl a kuriri. 34Njuku a há̧na mbêw a bazeŋ a kuriri, ka hɛ̧ e mbá nɛ́ zi tí yá. Ɓayhí̧lé njukuri ka e ka wâʼari, malé vûnri̧, sé zé, a ɓá lariké gí 35hí̧ apotereri. Kú wal lariké ma njuku mbêw mbêw too sé tûl hɛ̧ ka mbá nɛ́. 36Nǎŋnɔ́, njuku a há̧na rɛŋɛ́ ɓá Jozɛf, ɓá gun sɛl î̧n a Leví, kú mbuŋ nɛ́ a tísiri a Sípɛrɛ, apotereri ɗí nɛ́ ɓá Barnabas, zi ɓay a sa ɓá: «njuku hí̧ ŋgɛ́rɛ», 37ké sé zé wâʼa mbêw a ké erúy, ka ɓá lariké gí hí̧ apotereri.
தற்சமயம் தேர்ந்தெடுக்கப்பட்டது:
Péna a Apotereri 4: pnz
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 CABTAL
