Péna a Apotereri 5
5
Kúŋɓay a Ananínya rá̧ Safíra
1Dáy njuku a há̧na erú, rɛŋɛ́ ɓá Ananínya rá̧ wûny a mɛ̌ Safíra, sé mbí gel a kuriri mbêw a zé, 2a wal lariké, ka ɓá a há̧na mú, wûny a mɛ̌ tu ɓayké kɔ́, a ɓá gazínké sé hí̧ apotereri. 3Dáy Píyɛ́r sa hí̧ nɛ́ ɓá: «Ananínya, ɓayhí̧rá̧ mɔ pɔŋ lawɔ́ hí̧ Sata̧n, a kúŋɓay hí̧ Têm Pukí, a kúŋ nzáʼa lari a gel ka mɔ mbí a zé lé? 4Gelké, tá ɓá ɓala a mɔ̌, rá̧ pé mɔ mbí pé a zé yá lé? Dáy ka mɔ zéy, lariké zi tí ɓá ɓala a mɔ̌ nyá lé? Ɓayhí̧rá̧, mɔ mbí mára̧ kɛrɛ nǎŋ ka̧n lawɔ́ le? Zi tí ɓá njukuri, pé mɔ kúŋɓay hí̧ kuriri yá, ɓá Gáŋvbôn.» 5A fal láɓay nɔ́, Ananínya lé vbú siri a hú. Njukuri too ka láɓayké, wɔ́w ŋgbá kuriri. 6Kaban njukuri gí ku hûlké, a mbí kála sé goro.
7Sɛl a sêe sáy a falké, wûny a Ananínya gí ka̧, a zi tu hɛ̧ ka tay yá. 8Dáy Píyɛ́r vbí nɛ́ ɓá: «Mɔ́ sa hí̧ mí, gel ka i mbí ka a zéy, lariké too pɛ̧́nɛ́ lé?» Ké zibɔʼɔké a sa: «lariké too, pɔ̧́nɔ́.» 9Dáy Píyɛ́r sa hí̧ nɛ́: «Ná a̧ní rá̧, mɔ̌ kuu wɔ̧rɔ̧́ a mɔ̌, i mɔny ɓay mbêw, ɓay a i lé Têm Pukí a Gáŋvbôn lé? Mɔ́ lá, njukuri ka sé goro wɔ̧rɔ̧́ a mɔ̌y, e ka nzáʼaŋgboro, kú e gí mbí mɔ́ sé goro kɔ́.» 10Núnmbɛ̧́nɛ́ nɔ́, wûny a Ananínya lé vbú bɔʼɔ a Píyɛ́r, a hú. Kaban njukuri ri gí, a gí ziŋ nɛ́ ké hú dá. Dáy a kú mbí nɛ́, a sé goro nɛ́ ka̧n gbaŋa a wɔ̧rɔ̧́ a mɛ̌. 11Egilize too rá̧ njukuri too ka láɓayké, gáŋ wɔ́w ŋgbá kuriri.
Apotereri niŋ hɛ̧saʼamri̧ ɓá ŋgɛ̧́náké
12Apotereri niŋ hɛ̧ yérkéri rá̧ hɛ̧saʼamri̧ ɓá a ŋgɛ̧́náké a bazeŋ a njukuri. Njuku láɓulawri mára̧ too mbêw kaw bɔʼɔ vûn a Salomoŋ, 13Njuku a há̧na mbêw zi laŋ ɓay sé ri bazeŋ a kuriri yá. Nǎŋnɔ́ njukuri ɓá ŋgɛ̧́náké e ka hɛ̧ hɛʼɛ sé ŋgboro a kuriri mambá. 14Bon a njukuri ka láɓulaw hí̧ Gáŋmbây, wɔ̧rɔ̧́njukuri rá̧ wûnynjukuri, ŋgɛ̧́ gé ɓá mbɛl. 15Nǎŋnɔ́, njukuri ɓá njuku záŋmári̧ gí kɔ̧ gbaŋ ŋgboro, a ɓá kuriri gí ná ɓil hîi rá̧ tûl tíbôy mbí záŋmá, rá̧ Píyɛ́r mí kaw tána lé, têm mûn nɛ́, mí ziŋ guku njuku záŋmá a há̧na a bazeŋ a kuriri lé, ké ziŋ ŋgɛ́rɛ. 16Njuku a fékéri ɓá ŋgɛ̧́náké, gí a ɓil pûri ka ná ɗɔ́ŋ Zerúzalɛ̂m. Kú gí ka njuku záŋmári̧ rá̧ njukuri ka têm ɓékéri erú ka mûn a kuriri, nǎŋnɔ́ kuriri too, kú gí ziŋ ŋgɛ́rɛ.
Gáŋnjuku a Juyífri ɓá apotereri tɔ́ʼɔsêe
17Dáy gáŋnjuku nzáʼaká̧na rá̧ njukuri ka e kuu mɛ̌, zi ɓay a sa ɓá Sadusiyɛ̧ri̧, uru ka sɛ́rɛ ziŋ apotereri. 18Kú ŋgbá apotereri a ɓá kuriri sé kɔ̧ vûn sɛl a dawá. 19Dáy ka sû̧ŋ, aŋnze a Gáŋvbôn a há̧na, gí ŋgburu nzáʼaŋgboro vûn sɛl too, a ten apotereri a sa hí̧ kuriri ɓá: 20«Í sé ɓil vûn a Gáŋvbôn, a í sa hí̧ njukuri hɛ̧ too ka kó káwa a ŋgɛŋké.» 21Apotereri niŋ ɓá báŋké a ké sáy, a uru ka típélé rím a sé ɓil vûn a Gáŋvbôn, a tí táʼa tɔ́ʼɔhɛ̧ hí̧ njukuri.
Gáŋnjuku nzáʼaká̧na rá̧ njukuri ka e kuu mɛ̌, mára̧ gáŋnjuku pû a Juyífri, ɓay a gí láhá̧narí̧. Dáy, a kú pé njukuri sé ɗá apotereri ka vûn sɛl gírú. 22Gelka njuku koro hɛ̧ri̧ gé ká̧y, kú gé ziŋ kuriri a vûn sɛl yá. Kú resé vûn walɓay a gé rerú ka fal ɓayké hí̧ kuriri, 23a sa: «Rú gé ziŋ nzáʼaŋgboro vûn sɛl tu ɓá a béláké, rá̧ njuku koro hɛ̧ri̧ mí ew ka nzáʼaŋgborokéy, dáy gelka rú gé ŋgburu nzáʼaŋgboroy, rú zi gé ziŋ njuku mbêw a ɓilké yá.» 24Mbây a njuku koro vûn a Gáŋvbônri̧ rá̧ gáŋnjuku a njuku nzáʼaká̧nari̧, láɓayké a kaw yér, a zi tu ɓay a kú e sanáké mbêw sé tûl hɛ̧ ka ziŋ apotereri yá. 25Dáy, njuku a há̧na gí, a sa hí̧ kuriri ɓá: «Njukuri, ka i ŋgbá kuriri kɔ̧ vûn sɛl, kú e a ɓil vûn a Gáŋvbôn a ŋgɛŋnɛ́, a kaw tɔ́ʼɔhɛ̧ hí̧ njukuri.»
26Mbây a njuku koro nzáʼa vûn sɛlri, uru a sé kuu gunbɛʼɛri, ɓay a sé ɗa apotereri regí. Dáy, kú zi gé niŋ ŋgɛ́rɛ kuu kuriri yá, ɓayhí̧lé kú ŋgú wɔ́w, ɓay a njukuri, kú zi ná vbú kuriri ka saw. 27Fal ka njuku koro vûn sɛlri ɓá apotereri gíy, kú gí ɓá kuriri ew mbɛl a gáŋnjuku walɓayri, dáy gáŋnjuku nzáʼaká̧na vbí kuriri ɓay, 28a sa: «Rú de wǎyri a gelé ɓá, í zi ná tɔ́ʼɔhɛ̧ ka rɛŋ a njuku nɔ́. Dáy a̧hí̧ i niŋ lé? Hɛ̧ tɔ́ʼɔ a wǎyri wal ma ɓil pû Zerúzalɛ̂m too! Nǎŋnɔ́, i zi ɓá, i ɓá sêm mûn a njuku nɔ́ fere kɔ̧ tûl a ɓurú lé!» 29Píyɛ́r rá̧ gárá apotereri too sa ɓá: «Belɓá njuku ké lá nzáʼa a Gáŋvbôn, ndé lá nzáʼa a njukuri. 30Gáŋvbôn a zîi manárí̧, rehí̧ ndísɛ̌ʼɛ hí̧ Zezú ka fal ka i ɓara nɛ́ ka̧n tûl dii vbatay, ka a í nɛ́y. 31Gáŋvbôn gbaŋ nɛ́ sé sâa kaw ndɔ̂ʼɔ lâʼa a mɛ̌, a ɓá nɛ́ kaw ɓá Mbây rá̧ njuku pɛ̧́hɛ̧, ɓay a hí̧ ŋgboro hí̧ njuku Izirayɛ́lri a kú mɔny káwa a kuriri, a kú ziŋ vbá̧buma ɓéké a kuriri. 32Rú kaw ɓá njukuri ka kó, ka a lá hɛ̧ké, ɓurú rá̧ Têm Pukí ka Gáŋvbôn hí̧ njukuri ka lá nzɛ́ʼɛ.»
33Gelka, njuku walɓayri láɓay nɔ́y, kú ɗí hɛ́rɛ a zi ɓay a kú í kuriri. 34Dáy, njuku a há̧na erú a bazeŋ a kuriri, ké ɓá Fariziyɛ̧́ rɛŋɛ́ ɓá Gamaliyɛ́l, gáŋnjuku tɔ́ʼɔ sáŋna, a njukuri too hɛʼɛ nɛ́ mambáy. Ké uru a ɓil a njuku walɓayri, a sa ɓá kú ɓá apotere nɔ́rí̧ tɛ̧́ kála rá̧ ɓáy. 35Dáy a mbí ɓay a sa hí̧ kuriri: «Wǎy, njuku Izirayɛ́lri, i kó rá̧, hɛ̧ ka i zi ɓay a niŋ ziŋ njuku nɔ́rí̧y. 36Zi ɗiɓaŋ yá ɓáy, ka njuku a há̧na, ka rɛŋɛ́ ɓá Tedás gíy, ka mbí mûn ɓá báŋa a njuku a sukí, njukuri ndé ísɔ́t nɛŋ, ka tɔ́ŋ nɛ́. Dáy kú í nɛ́, nǎŋnɔ́ njukuri too ka tɔ́ŋ nɛ́, ɓɛrɛ, gé lé mbí ŋgboro a mɛ̌. Hɛ̧ ka ziy zi tí yá. 37Falké ɓáy, a ɓil nâm ka mbây pû, hí̧nzáʼa ɓá kú kɛ̧́ njukuri ka tísiri a mɛ̌, ná kó Judas, njuku a tísiri a Galilê. Ké rɔ́ʼɔ njukuri ɓá a ŋgɛ̧́náké tɔ́ŋ nɛ́, ɓilké nɔ́ too, mɛ̌ kɔ́ ké ziŋ hûl, njukuri ka tɔ́ŋ nɛ́y, ɓɛrɛ, a ɓɔ́l mbêw mbêw too. 38Dáy a ŋgɛŋnɛ́, mi sa hí̧ wǎyri: I kél njuku nɔ́rí̧ mbaa, a i pɔŋ kuriri kála. Ɓayhí̧lé, kɛrɛké rá̧ pénáké, mí gí ka ŋgboro a njukuy, e tɛwrɛ, ɓá báŋa njuku a ǎ̧wrí̧. 39Dáy hɛ̧ké, mí gí ka ŋgboro a Gáŋvbôn, i marú̧ ɓay a ɓewaké yá. I kó rá̧, ɓay a í zi ná kaw rúbére ziŋ Gáŋvbôn!»
Njuku walɓay a Juyífri, zibɔʼɔ ɓay a Gamaliyɛ́l. 40Kú reɗí apotereri gí, dáy a gí vbá̧ kuriri, a de kuriri ɓá kú zi ná saɓay ka rɛŋ a Zezú nɔ́ ɓáy, dáy a pɔŋ kuriri kála. 41Apotereri tɛ̧́ a vûn walɓay ka mûnrína, ɓay ka Gáŋvbôn kó kuriri marú̧ ɓay a kú tɔ́ʼɔsêe, ɓay tûl rɛŋ a Zezú. 42Nǎŋnɔ́ nâm too, a ɓil vûn a Gáŋvbôn rá̧ a ɓil vûnri̧, kú zi pɔŋ tɔ́ʼɔhɛ̧ a kuriri a sa Bélaɓay a Zezú Kiris yá.
தற்சமயம் தேர்ந்தெடுக்கப்பட்டது:
Péna a Apotereri 5: pnz
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 CABTAL
