Chituwa 14
14
Farao warondo ŵaYisraele
1Sono Ambuya anguti kwaku Mosese, 2“Ŵanene ŵaYisraele kuwere vuli ndi kwachigoŵa ku maso Pihahiroto, pakati pa Migidolo ndi nyanja ku maso kwa Balizefoni; mwamugoŵa kuthuŵezgana nagho, pafupi pa nyanja. 3Pakuti Farao wakakambanga kuti ŵaYisraele ‘Ŵawira mu charu; bozwa laŵajariya mukati.’ 4Ndipo ndikanonopaskanga mtima waku Farao ndipo wakaŵandondoloskanga, ndipo ine ndirondenge unkhankhu paku Farao ndi liŵanja lake lose; ndipo ŵaEgipiti ŵakaziŵanga kuti Ndine Ambuya.” Ndipo ŵanguchitade viyo.
5Penipo wangumunene karonga wa Egipiti kuti ŵanthu ŵa ŵathaŵa, maghanaghano ghake ndi gha ŵaŵanda ŵake ghangusintha pa ŵanthu ŵa; ndipo wanguti, “Nchine chenicho tachita, po tazomerezga ŵaYisraele kuruta ndi kureka kutiteŵete?” 6Viyo wangurongoso gareta lake ndi wanguruta ndi ŵankhondo ŵake pamoza nayo, 7ndipo wanguto magareta ghake ghakusankhika machimi pe chumi ghankhonde ndi limoza (600) ndi magareta ghose ghanyake gha Egipiti ndi ŵara ŵankhondo ŵakutufuliya wo. 8Ndipo Ambuya angunonopeska mtima waku Farao karonga wa Egipiti ndipo wangundondoloska ŵaYisraele ŵachiruta ndi kugiya. 9ŴaEgipiti ŵanguŵandondoloska, ŵakavalo wose ndi magareta ghose ghaku Farao ŵankhondo ŵapa ŵakavalo ndi liŵanja lake la nkhondo ndipo wanguŵasaniya ŵakugoŵa pa nyanja, pa Pihahiroto ku maso kwa Balizefoni.
10Penipo Farao wangundere pafupi, ŵaYisraele ŵanguyinuska maso ghawo, ndipo ŵanguwona ŵaEgipiti ŵazanga kurondo iwo; ndipo ŵangutenthema ukongwa. Ndipo ŵaYisraele ŵanguliriya ku Ambuya; 11ndipo ŵanguti kwaku Mosese, “Kumbi nchifukwa chakuti mulivi miunda mu Egipiti, po watituzgamo kuzachifwiya mu bozwa? Nchine cho wachita kwaku ifwe, pakutituzga mu Egipiti? 12Ichi si ndichu tingukamba kwaku iwe mu Egipiti? ‘Utireke, titataliyenge ŵaEgipiti,’ pakuti kutataliya ŵaEgipiti nkhwamampha kwakuruska kufwiya mu bozwa.” 13Ndipo Mosese wanguti ku ŵanthu, “Rekani kopa, mani gwa, ndipo muwonenge utaski wa Ambuya weniwo akamuchitiyaninga msana wale; pakuti ŵaEgipiti wa muwona msana wale kuti, mukaŵawonango so cha. 14Ambuya akakurwiyaninga, ndipo imwe muje ŵaka chisisi.”
ŴaYisraele ŵalowoka pa yumu
15Ambuya anguti kwaku Mosese, “Chifukwa chine uliriya kwaku ine? Wanene ŵaYisraele kuti ŵarutiriyenge. 16Soska ndodo yako ndi utambaruliye janja lako kurazga ku nyanja ndi uyigaŵe pakati alinga kuti ŵaYisraele ŵarutenge pa mtunda uyumu kuporota mu nyanja. 17Ndipo ndikanonopeskanga mitima ya ŵaEgipiti kuti ŵaseremo kuŵandondoloska, ndipo ine ndirondenge unkhankhu paku Farao ndi liŵanja lake lose, magareta ghake, ndi ŵankhondo ŵapa ŵakavalo ŵake. 18Ndipo ŵaEgipiti ŵakaziŵanga kuti ndine Ambuya, nditakuti ndaronda unkhankhu paku Farao magareta ghake, ndi ŵankhondo ŵapa ŵakavalo ŵake.” 19Sono mungelo waku Chiuta yo wendanga paurongo pa liŵanja la ŵaYisraele wangundere ndi wanguja kuvuli kwawo; ndipo chiguŵa cha mtambo chingutuwako kuurongo kwawo ndi chinguma kuvuli kwawo. 20Kuza pakati pa liŵanja la ŵaEgipiti ndi liŵanja la ŵaYisraele. Ndipo penga mtambo ndi mdima; ndipo usiku ungukapo wambura liŵanja limoza kuŵandika pafupi pa linyake usiku wose.
21Sono Mosese wangutambaruliya janja lake pa nyanja; ndipo Ambuya angudikiskiya vuli nyanja ndi mphepo ya nthazi yaku vuma usiku wose, ndipo nyanja anguyisanduska mtunda uyumu ndipo maji ghangugawukana. 22Ndipo ŵaYisraele ŵangusere mukati mu nyanja pa mtunda uyumu, maji ghanguŵa chimati kwaku wo ku marghe ghawo ndi ku maze ghawo. 23ŴaEgipiti ŵangundondoloska ndi ŵanguweremo pavuli pawo mukati mu nyanja, ŵakavalo wose ŵaku Farao magareta ghake, ndi ŵankhondo ŵapa ŵakavalo ŵake. 24Ndipo kumatandakucha Ambuya mu mzati wa moto ndi mu mtambo ŵangulereska pasi pa liŵanja la ŵaEgipiti, ndi kofya liŵanja la ŵaEgipiti. 25Kuphatizga kukoroŵeka mawilo gha magareta viyo kuti ŵaghaguguzanga ndi unonono ukuru; ndipo ŵaEgipiti ŵanguti, “Tiyeni tithaŵe ku ŵaYisraele pakuti Ambuya atuŵarwiya paku ifwe.”
ŴaEgipiti ŵabira mu Nyanja Yiyera
26Sono Ambuya anguti kwaku Mosese, “Tambaluriya janja lako pa nyanja kuti maji ghawere vuli pa ŵaEgipiti, pa magareta ghawo, ndi pa ŵankhondo ŵapa ŵakavalo ŵawo.” 27Viyo Mosese wangutambaluriya janja lake pa nyanja, ndipo nyanja yo yinguwere mu malo ghake wati wawoneka mlenji; ndipo ŵaEgipiti ŵanguthaŵiya mwenimo, ndipo Ambuya angupunda ŵaEgipiti mukati mu nyanja. 28Maji ghanguwe ndi ghangukuka magareta gho ndi ŵankhondo ŵapa ŵakavalo ndi liŵanja la nkhondo lose laku Farao lo linguŵarondo mu nyanja, kuti kungujapo nanga njumoza waku wo cha. 29Kweni ŵaYisraele ŵangwenda pa mtunda uyumu mukati mu nyanja, maji ghenga chimati kwaku wo, ku janja lawo la marghe ndi ku maze kwawo.
30Viyo ndimu Ambuya angutaskiya ŵaYisraele zuŵa liya ku janja la ŵaEgipiti; ndi Yisraele wanguwona ŵaEgipiti ŵakufwa pa likumba la nyanja. 31Ndipo ŵaYisraele ŵanguwona nchitu yikuru yo Ambuya anguchita pa ŵaEgipiti, ndipo ŵanthu ŵangopa Ambuya ndipo ŵanguvwana mu Ambuya ndi mu muŵanda wawo Mosese.
தற்சமயம் தேர்ந்தெடுக்கப்பட்டது:
Chituwa 14: TongaMw
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible Society of Malawi