Chituwa 13
13
Ŵana ŵaumwali ŵapatulikiya kwa Ambuya
1Ambuya anguti kwaku Mosese, 2“Undipatuliye waumwali wose, che chose cho nchakudanga kubanuwa chibali mukati mu ŵaYisraele, wose ŵa munthu ndi ŵa nyama, mbangu.”
3Ndipo Mosese wanguti ku ŵanthu, “Kumbukani zuŵa ili, mwaku lo mungutuliya mu Egipiti, kutuwa mu nyumba ya uŵanda, pakuti ndi nthazi ya janja Ambuya Angukutuzgani ku malo yagha: kuwulevi kurgha chiŵande cha mtupu. 4Zuŵa ili mukatuwanga, mu mwezi wa Abibi. 5Ndipo penipo Ambuya atikutoleni mu charu cha ŵaKanani, ŵaHiti, ŵaAmori, ŵaHivi, ndi ŵaYebusi cho angurapiya ku auskemwe kwachipaska imwe, charu chakutaŵala mukaka ndi uchi, mukasunganga uteŵeti uwu mu mwezi uwu. 6Mazuŵa ghankhonde ndi ghaŵi mukarghanga chiŵande chambura mtupu, ndipo pa zuŵa la chinkhonde ndi chiŵi kukaŵanga dghera laku Ambuya. 7Chiŵande chambura mtupu chikarghikanga mazuŵa ghankhonde ndi ghaŵi, chiŵande cha mtupu chireke kuwoneka mwinu mu charu chose. 8Ndipo mukamuneniyanga mwana winu munthurumi mu zuŵa lo, ‘Nchifukwa chaku cho Ambuya angundichitiya po ndingutuwa mu Egipiti.’ 9Ndipo chikaŵanga kwaku imwe nge nchisimikizgu pa janja linu ndipo nge nchikumbusku pakati pa maso ghinu, alinga kuti dangu la Ambuya liŵenge mu mlomo winu; pakuti ndi janja la nthazi Ambuya akutuzgani mu Egipiti. 10Viyo mukasunganga dangu lenili pa nyengo yake yakutemeka chirimika ndi chirimika.
11“Ndipo penipo Ambuya akutoliyani mu charu cha ŵaKanani uli ndimo angurapiya kwaku imwe ndi ku auskemwe, ndipo akachipaskanga kwaku imwe, 12mukapatuliyanga pade ku Ambuya chose cho chijura chibali. Chaumwali chose cha ng'ombe zinu cho nchinthurumi chikaŵanga cha Ambuya. 13Chaumwali chose cha mbunda mukawombonga ndi kamberere, pamwenga asani kuti muchiwombonge cha mukafyonga khosi lake. Waumwali yose wa munthu mu ŵana ŵinu ŵanthurumi mukawombonga. 14Ndipo asani mu nyengo yo yituza mwana winu munthurumi watikufumbani, ‘Ching'anamuwanji ichi?’ Mutinge kwaku iyo, ‘Ndi nthazi ya janja Ambuya angutituzga mu Egipiti, ku nyumba ya uŵanda, 15Pakuti penipo Farao wangukana ndi unonono kutizomerezga kuruta, Ambuya angubaya ŵaumwali wose mu charu cha Egipiti wose ŵaumwali ŵa munthu ndi ŵaumwali ŵa ng'ombe. Chifukwa cho ndipereka ku Ambuya ŵaumwali wose wo ŵajura chibali; kweni ŵaumwali wose ŵa ŵana ŵanthurumi ndiwombo.’ 16Chikaŵanga nge nchakuteskiyapo pa janja linu pamwenga pa mbonekera pakati pa maso ghinu, pakuti ndi janja la nthazi Ambuya angutituzga mu Egipiti.”
Ulendo wakuka ku Nyanja Yiyera pe
17Penipo Farao wanguŵazomerezga ŵanthu kuti ŵarutenge, Chiuta kuti wanguŵarongozga mu nthowa ya charu cha ŵaFilisti cha, chingana kuwa kwenga kufupi, pakuti Chiuta wanguti, “Vinu ŵanthu ŵangang'anamuka ŵachiwona nkhondo, ndi ŵangawere ku Egipiti.” 18Kweni Chiuta wanguŵarongozga ŵanthu ŵa kwakuzunguliya mu nthowa ya ku bozwa kurazga ku Nyanja Yiyera. Ndipo ŵaYisraele ŵangukwera kutuwa mu charu cha Egipiti ŵakuskoma nkhondo. 19Ndipo Mosese wanguto viwanga vyaku Yosefe pamoza nayo, pakuti Yosefe wangurapiska kwakuneneska ŵaYisraele kuti, “Chiuta wakachezganga namwe, viyo mukapinganga viwanga vyangu pamoza namwe.” 20Ndipo ŵanguruta ku nthazi kutuwa pa Sukoto, ndi ŵangugoŵa pa Etama pa umari wa bozwa. 21Ndipo Ambuya anguruta paurongo pawo ndi msana mu mzati wa mtambo kuŵarongozga mu nthowa, ndipo ndi usiku mu mzati wa moto kuwapaska ukweru, mwakuti ŵendenge ndi msana ndi so ndi usiku; 22mzati wa mtambo ndi msana, ndi mzati wa moto ndi usiku, kuti vingutuwako cha kuurongo kwa ŵanthu.
தற்சமயம் தேர்ந்தெடுக்கப்பட்டது:
Chituwa 13: TongaMw
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible Society of Malawi