Malko 16
16
Yesu watutuluka
(Mt 28:1-8; Lk 24:1-12; Yn 20:1-10)
1Na pano uwanda wa Sabato wasila, Malia Mandalena na Malia nyina wi Yakobo, na Salome yakazile amafuta, kuti yakampake. 2Na katondo-tondo, wanda wa kutampa ijuma, yaile ukwilindi, pano ilanzi lyapalala. 3Yatondosyana atupu, yaati: “Uwini wautukunkila ifinga lili apilindi?” 4Nga pano yalola, yawine fino ifinga lili isunkulusye; nalyo lyali ikulu ndi. 5Pano yingila umwilindi, yalola unnumendo atensi uku lusansa lwi lunji, aswite umwenda untiswe, nga yachintukila. 6Nawe ayanena, ati: “Mutachi chintukila; mulusita Yesu wa ku Nazaleti, wino wakonkomilwe apa nsalaba; watatutuluka, asipo pa; lolini pano yamwisile. 7Leelo pitangi, mukanene alondeshi yaakwe na Petlo, ukuti: wamukolelela ukuyu ku Galilea, ukuno mulunnola, ndi fino wamunenile.” 8Nga yafuma ukunsi, yituka kufuma ukwilindi, kuno yali ni ngofi nu kutetema. Na yatachili yanena umwi iswi, kuno yofile.
Yesu waloleka uku yantu. Watuma alondeshi
(Mt 28:9-10; Yn 20:11-18)
[9Nawe pano watutuluka untondo-tondo, wanda wa kutampa ijuma, intangulo walolike na Malia Mandalena, wino waatisiziwe iviwa saba. 10Nawe wayile anena yano yali ponga nawe, nayo yalile yachili yalulila nu kulosya. 11Nayo yao pano yapulika fino umpuma, nawe watannola, yatachili yazumile. 12Ichisila cha ifintu vi walolike ku yantu yaili pali yeneyo, angali nu mwata unji, nayo yayanga uku vyalo. 13Nayo yao yapita yaya yanena anji; nayo kwene yatachili yayazumile.
14Ichisila cha ifintu fiyo, aloleka na yalye ikumi na wenga, pano yalyanga, wayasunda uku kuntazumila kwao nu ukomu wa myenso yao, kuno yatachili yayazumile yalye yano yamwine pano watatutuluka uku yafwi. 15Wayanena, waati: “Pitini un-nsi monsi nu kusunda iswi-zipe uku vilengwa vyonsi. 16Uwazumila nu kubatiziwa, alufyuka; leelo wino atasumile aluya umu uputuzi. 17Ni vilangizyo vi vilulondela azumile; ukwizina lyane yalufumyi viwa, yaluvwanga imivwango mipya. 18yalulema inzoka; nanti yanwa chimwi ichakuyumola, chitangi chiyakole nanti uche; yaluwika makasa yao apa yalwale, nayo yalupola”.
19Ngu Mwene Yesu lino wavwanga nayo, wapokelelwa umwiyulu, wikala ikasa lyi lunji lyi Leesa. 20Nayo yao yapita yasunda konsi konsi, uMwene angaluomba ponga nayo, nu kukomya iswi liyo ku vilangizyo fino vyalondekine nalyo.]
தற்சமயம் தேர்ந்தெடுக்கப்பட்டது:
Malko 16: FNT1988
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
New Testament in Fipa © United Bible Societies, 1988. Bible Society of Tanzania.
