Malko 15
15
Yesu pali Pilato
(Mt 27:1-2, 11-14; Lk 23:1-5; Yn 18:28-38)
1Walangi kulucha, ayikolo iyakapela yamba ponga nakombe na yakaandika, yamwitengo yoshi, yanyepa Yesu, yamsenda yamtwala kuli Pilato. 2Pilato wamtondosya, waati: “Wewe uli mwene wa aYudea?” Nawe wannena, waati: “Wewe walanda.” 3Nayo ayikolo iyakapela yalile yamtakila ivyavula. 4Pilato wamtondosya kaili, waati: “Utaluvwanga chimwi? Lola, ifintu vinga fino yakutakila.” 5Leelo Yesu atachili avwange chimwi; chaleka Pilato wazunguka.
Yesu na Balaba
(Mt 27:15-26; Lk 23:13-25; Yn 18:39—19:16)
6Apa manda ya wanda ukulu wasapulanga unnyepwa umwi, wino yalomba. 7Nga kwali untu wino yatangi Balaba, wali unnyepwa ponga na antu yano yachisile mpanzyela nu kumola untu um-mpanzyela iyo. 8Ngiumba liyo litampa ukunnomba ayachitile fino wamanyilila. 9Pilato wayanena, waati: “Chene! Mulusita musapwile umwene wa aYudea?” 10Kuno wamanyile fino ayikolo iyakapela yamfimile uku uzuwa. 11Leelo ayikolo iyakapela yatunkola iumba, yaati: “Chingawa ningo, Balaba ayulilwe.” 12Pilato wayanena kaili, waati: “Ivyo nchite uli wi, wino muluti: Mwene wa aYudea?” 13Yumi chongo kaili, yaati: “Akonkomelwa apa nsalaba!” 14Pilato wayanena, waati: “Uipe chi uno wachita?” Yalusya nkani ukumi chongo: “Akonkomelwa apa nsalaba!” 15Pilato fino wakasime iumba lituzye, wayasapwila Balaba, wafima Yesu, pano wamuma ni mikowa, kuti akonkomelwe apa nsalaba.
Asalifi yasoweka Yesu
(Mt 27:27-31; Yn 19:2-3)
16Nayo asalifi yantwala um-nsolo, ali Preitolio (alikuti: ng'anda yi Gavana) yakongana ponga asalifi yoshi. 17Yamswika umwenda wa mala ya sambalau, yasuka inkata ya myonga, yamswika uku ntwe. 18Yatampa ukunnaula, yaluti: “Tulukulaula, mwene wa aYudea!” 19Yamuma ni lonje uku ntwe, yamswila na mati, yafukama nu kumwinamila. 20Nga pano yamsoweka, yamzula umwenda wuwu wa mala ya zambalau, yamzwika imyenda yaakwe unkola. Yansenda panzi kuti yamkonkomele apa nsalaba. 21Yannemenkezya untu wino wapitanga ukufuma uku vyalo, Simoni wa ku Kilene, isi wi Aleksanda na Lufo, kuti asende unsalaba wakwe.
Yesu wakonkomelwa apa nsalaba
(Mt 27:32-44; Lk 23:26-43; Yn 19:17-27)
22Yamtwala apantu pano yakuluti “Golgota,” alikuti: “Ipanga lya ntwe.” 23Yampa amasi ya nsabibu yano yuminkine na manemane, leelo wayakana. 24Yamkonkomela apa nsalaba, yankanya ivizwalo vyaakwe, yachita ichimala-mpaka, kuti chila ntu atole chani. 25Nga pano yali saa tatu, yamsenda, yamkonkomela apa nsalaba. 26Pali maandiko ya nnandu waakwe apiyulu yaakwe, yaatile: MWENE WA YUDEA. 27Pali aivi yakapoka-ya-ifintu, yumozilwa ponga nawe, wenga ikasa lya kwi lunji, na wenga ikasa lya kuli kamani. [28Ngi Lyandiko lifikilile lino litile: “Yamuminkinye ponga na aipe.”]
29Nga yano yapitanga un-nzila yamtuka, yapukusya imitwe yao, yaati: “Ehee, wewe wino ungumola ng'anda-nkulu-iyi-Leesa nu kuikula uku manda yatatu; 30Fyusya umweso wako, uwike uku nsalaba!” 31Ifino na yikolo iyakapela yamsoweka akola na akola, ponga na yakaandika, yaati: “Wafyusizye anji, atangi aufyusye unkola. 32Klisto ngi umwene wa Islaeli, awike li kwene uku nsalaba, kuti tulole nu kuzumila.” Na yalye yano yakonkomilwe ponga nawe kwene yamtuka.
Yesu wafwa
(Mt 27:45-56; Lk 23:44-49; Yn 19:28-30)
33Na pano wawu nsanya pakasi, kwawa ichanda insi yoshi, kufika pano lyatemba. 34Na pano lyatemba, Yesu avwanga ukwiswi ikulu, ati: “Eloi, Eloi, Lama Sabaktani?” alikuti: ‘Leesa wane, Leesa wane, nga fino wanta?’ 35Na pali yano yimilile pao, yamwi yaati: “Lola, alwita Elia.” 36Na wenga awituka ulwilo, wazuzya inkamu divai, watela itete, wanwesya, waati: “Lekini tulole ndi Elia wamwiza mwisye.” 37Nawe Yesu afumya iswi ikulu, umweso umputuka.
38Nu mwenda wa ng'anda-nkulu-iyi-Leesa walepuka fuma piyulu kufika na pansi, utupande tuwili. 39Ngu unkulu wa asalifi, wino wimilile apipi, pano walola wafwa, ni ifintu fino vyaombeka, walanda ukuti: “Umwenemo, untu wi wali uMwana wi Leesa.”
40Pali na anachi yalolanga lwa patali, pali yao walipo Malia Mandalena na Malia nyina wi Yakobo, untoo wi Yose, na Salome. 41Yao, ayano yalondekine nawe uku Galilea nu kumwombela, na anina yinji yano yayile ponga nawe uku Yelusalemu.
Yesu wazikwa mwilindi
(Mt 27:57-61; Lk 23:50-56; Yn 19:38-42)
42Nga pano yawa mangusi kuno yalalilile uwanda uno ukolelile uwanda wa Sabato. 43Wayile Yosefu untu wa ku Alimateo, untu wa mwitengo, unchindamu nawe kwene walolelanga uwene-wi-Leesa; achita ichiposye aya kuli Pilato, alomba ichala chi Yesu. 44Leelo Pilato azunguka fino watafwa, wita wilye unkulu wa asalifi, wamtondosya ndi akazimbo chi kapita, pano wafwila. 45Na pano wamanya ningo uku unkulu wa asalifi, apano wazumila Yosefu atole ichala. 46Akala umwenda untiswe, nga amwisya; nga afunda ichala um-mwenda untiswe, amzyika umwilindi ilyimbe uku mwamba, nga asungutizya ifinga apilindi. 47Na Malia Mandalena na Malia nyina wi Yose, yalolanga pano wazyikwa.
தற்சமயம் தேர்ந்தெடுக்கப்பட்டது:
Malko 15: FNT1988
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
New Testament in Fipa © United Bible Societies, 1988. Bible Society of Tanzania.
