Ifipigo 10

Petulo na Koleneli

1Epwali umunu ku Kaisaliya yeitambulwa Koleneli, Umuvina va Avanyigalu va ikilugu chekitambulwa, “Ikilugu cha Kiitalya.” 2Umunu uyo ali munofu, umwene pamwinga na avanu va mukaye yakwe vevina choga kwa Nguluvi. Apigige nzolofu ukuvatanga avamikaa va Ikiyudya ifunyige mbepali kwa Nguluvi. 3Mu kivalilo wita icha igonza pelitegamwike, awene pelu mumaloto munyivaha va Nguluvi akwingila kugati na ukumutigila, “Koleneli!” 4Koleneli amulafile uyo munyivaha kono we akogopa, amutigee, “Kwina kiki Mulugu?” Uyo umunyivaha amutigee, “Nguluvi idiche na ukwiwuka ukwifunya kwako na ifitawulwa fyako kwa avamikaa. 5Sweno, vatumage avanu ku Yopa vakamukemele umunu uyumwi yeitambulwa Simoni, ilitawa lingi itambulwa Petulo. 6Umwene ali mukaye ya Simoni umunyakuhona ing'ingo yeikaye yakwe yipipi na ibahali.” 7Uyo munyivaha peyealonzile iso ibitye, Koleneli avakemelye avakami vakwe vavili va mukaye na uyumwi va avanyigalu vakwe yee mwogopa Nguluvi, 8swe akuvalongela mbesili sesesiwonike, ndawe avatumige ku Yopa.

9Ikimunyi cha kavili, avanu iwo avadatu we vali mulugendo, neke vepipi ukufika ku Yopa, Petulo iilyee pachanya piking'a mukivalilo icha mutanda pamunyi sambi ifunye. 10Inzala yeyimuvafile, neke afwe musale. Peviteleka ichakulya, alotite amaloto. 11Awene kwilanga kudindwike na ikinu witigila lyenda likomi likwisiwa pasi kono wevalibete imbali sitayi. 12Mulyenda ilyo mwemofili ifikoko ifilipolofu: ifikoko finyamagulu gatayi, ifikoko fyefyafitambala na ifidege. 13Apulike iliswi likumutigila, “Petulo lamuke udumule sambi ulye!” 14Petulo apitwe, “Nda, Mutwa; sindendilagela nangi ukulya ikinu chaafu nambi ikihongawinya.”

15Lila liswi lyapulise kangi litigila: “Ulafitigila fihongawinya ifinu fye Nguluvi afyofwige!” 16Ulo lwapigike kadatu, sweno ndawe ilyenda lila lyapilukige kuchanya.

17Petulo we peasasavala ulwa amaloto igo gealotite kwekutigila kiki vala avanu avatume na Koleneli, vayikagwe ikaye ya Simoni, vafisile pamulyango, 18swe ndawe vihugige ukukemela: “Ndawuli ipa pina umunu umugenzi yeitambulwa Simoni Petulo?”

19Petulo eakali peihosa amaloto gala kwekutigila kiki, na baho Umuhe amutige, “Pulikise! Kwina vanu vadatu ipa vakukusaka yuveve. 20Wangufye wike na ulemwa kusina pakubitasa nawo, pakuva ye nene yendivatumite.” 21Sweno, ndawe Petulo ikige pasi, akuvatigila avanu vala, “Ye nene yemukusaka. Mbi ndawuli musile?” 22Nawo ndawe vamupitulige, “Umuvina va avanyigalu Koleneli ye munu munofu, munyachoga kwa Nguluvi umutambule pamiho ga Avayudaya mbevali atutumite. Munyivaha Umwelu akamulonje akulaalike veve kukaye yakwe, sambi akupulikise veve kwa chechekivesaga winacho icha ukumulongela.” 23Petulo ndawe avakemelige vingile mukaye, swe akuvalagila pawuvaso ikilo kikila.

Peyekuche, Petulo avangige ukugenda pamwinga nawo na avangi mwavala avevafuuvitwe nawo vahelelise. 24Ikimunyi icha kavili vafisile ku Kaisaliya na uko Koleneli avasindilige Umwene na va mukaye yakwe na avanyawiyendi vakwe veeavalaalike. 25Petulo peingilige, Koleneli ahumite kwivala amwanukile, ndawe amufugamilige na ukugondama mbaka pasi. 26Neke Petulo swe akumwimya, akumutigila, “Wime, pakuva nene ndi munu hela.” 27Petulo ave pealonga na Koleneli kono vakwingila mukaye umo mwemwemovali avanu wolofu vakong'ine. 28Petulo avatige, “Nanye mulusele wunofu ukutigila Umuyudaya mutanile na Indagilo sakwe isa ulufuuwo lwakwe ukuhanga na avanu vesivamuseli Nguluvi avamyanza. Neke lino Nguluvi anzigise ulwa ndemwage ukumutigila umunu yeyeavesaga muhongawinya na apangi mwaafu. 29Nambi kwaulo, muvelige mukung'emela nzusile ndimugaya lukani. Sweno, nguvawusa; mbi ndawuli mung'emelye?” 30Koleneli atige, “Ifilo fidatu fyefilutye ulusika ndawe lulu, ikivalilo icha igonza pelitegamwike, nene ndifunyige mwidama lyangu. Sukumwi, umunu yealafwite imyenda igimalavadika imite pa nene, 31itigila: ‘Koleneli! Ukwifunya kwako na ifitawulwa fyako kuvamikaa Nguluvi idiche. 32Mutume umunu ku Yopa akamukemele umunu uyumwi yeitambulwa Simoni, ilitawa ilingi ye Petulo; afiche mukaye ya Simoni umunyakuhona ing'ingo pipi na ibahali.’ 33Nambi nene numite avanu kwa veve na sifuvalii pakupiga ulo, nave ugisile wunofu pakusa. Lino, hwehwe tuli pa Nguluvi, tupulikise chechekivesaga che Umutwa akulaje ukutulongela.”

Ukudalika kwa Petulo

34Petulo ndawe avangige ukulonga: “Lino yendilukagwe nachene ulwa Nguluvi siayipigila avanu kwa luhagu. 35Umunu yeyeavesaga mung'i yeyeivesaga yeiva na choga kwa Nguluvi na ukupiga isa uwugolofu uyo akwidikilwa na umwene. 36Na ulu lwe lukani lwe Nguluvi avasindiche avana va Isilaeli, idalika ulukani ulunofu ulwileta uwikalakunoga ukukola kwa Yesu Kilisito Umutwa va mbevali. 37Nyenye mulusele ulukani ulwawonike mung'i mbeyili iya Avayudaya ukuvangila ku Galilaya pewulutye wula uwubatiso weadalikige Yohane. 38Mumusele Yesu uva ku Nasaleti na lwe Nguluvi amuhagwe kwa ukumwisikisa Umuhe Umwelu na uludali. Nguluvi ali pamwinga nave; umwene abitige uko na uko ipiga inofu na ukuponia mbevali avevibatike na yula umwanangifu. 39Na hwehwe twiwolelesi va ing'ani mbesili seapigite mung'i iya Avayudaya na mu Yelusalemu. Sweno, vamuwulige vakumutumbika mumusalaba; 40neke Nguluvi amusilibwe ikimunyi icha wudatu, amugisile sambi awoneke 41si kwa mbevali nda pesi kwa vala ve Nguluvi eavahagwe vave wolelesi vakwe, ukutigila hwehwe yetwalisige na ukunywa pamwinga nave peasilibwike ukuhuma kwa avafwe. 42Na atulaje ukudalika ulukani ulunofu ku vanu mbevali na ukolelela ulwa ye mwene umuhagule na Nguluvi ave muhisi va awumi na avafwe. 43Avavisi mbevali valonzile isa umwene ulwa umunu yeyeavesaga akumufuuwa saadegepelwa inzanangifu sakwe mbesili mwitawa lyakwe.”

Avamyanza vakumwanukila Umuhe Umwelu

44Petulo weepealonga ing'ani iso, Umuhe Umwelu avasye mbevali vevapulikisige ulukani ulo. 45Vala Avayudaya na avevafuuvitwe vevevasile pamwinga na Petulo ukuhuma ku Yopa vasasave pakuva Nguluvi avapelye ikipelwa cha Umuhe Umwelu vala avamyanza nawo; 46pakuva vapulike vilonga indongele isingi vilumba indolo sa Nguluvi. Ipo Petulo atige, 47“Avanu iva vamwanuche Umuhe Umwelu ndawe hwehwe lwetukamwanuche. Mbi, lino poyoli umunu yeahwanite ukuvatanila valemwe ukubatisiwa kwa ululenga?” 48Sweno, ndawe avalagile vabatisiwe mwitawa lya Yesu Kilisito. Swe ndawe vamusukige Petulo ikale nawo filo fikefu.

தற்சமயம் தேர்ந்தெடுக்கப்பட்டது:

Ifipigo 10: HeNT2004

சிறப்புக்கூறு

பகிர்

நகல்