Ifipigo 9

Ukupituka kwa Sawulo

(Ifipigo 22:6-16; 26:12-18)

1Na ulusika ulo Sawulo eaginite ukuwogofya avanu nu nukutosa ukuvawulaga vala avevamufuuvitwe Umutwa. Ahele kwa Umutambisi Umuvina 2asuke ulwandiko ulwa ukumukagulisa mumasinagogi aga Ikiyudaya uko ku Damesiki, sambi wone avafike uko avagosi na avang'inetu vevafuuvitwe ing'asi ya umutwa avibate na ukuvaleta ku Yelusalemu.

3Neke peali mung'asi pipi na ukufika ku Damesiki, sukumwi ulung'ali uluhuma kwilanga lwamung'aliche imbali mbesili. 4Agwe pasi neke apulike iliswi likumutigila, “Sawulo! Sawulo, mbi ndawuli ukunesa?” 5Nave Sawulo amuwusise, “Wi nani veve Mutwa?” Iliswi lila lyapitwe, “Nene ye nene Yesu yukunesa veve. 6Neke veve wime, wingile muboma uko kwe usakulongelwa lwelukuvaje veve upige.” 7Vala avanu vevagendasige pamwinga na Sawulo vevimite bahala, vafwe libupwi; vapulike lila iliswi neke sivamuweni munu. 8Sawulo imite, na avelige ilava alemilwe ukukiwona nambi kinu; sweno, avanu vala ndawe vamwibatige Sawulo iliwoko vakumusindika mbaka ku boma ya mu Damesiki. 9Sawulo ikalite filo fidatu wesilava, na ulusika ulo salisigi nambi kunywa.

10Sweno, uko ku Damesiki epwali munyigendo uyumwi yealafuuvitwe yeitambulwa Ananiya. Umutwa amulonje mu maloto, “Ananiya!” Nave Ananiya akwidika, “Nene ndibaha, Mutwa.” 11Swe Umutwa amutige, “Wigelanise ubite ku ng'asi iyitambulwa inyakidonya, na mukaye ya Yuda wusage umunu uyumwi Sawulo va ku Taliso. Lino de akwifunya. 12Na mumaloto amuwene umunu yeitambulwa Ananiya akwingila na ukumugeleka amawoko sambi alave kangi.” 13Neke Ananiya apitwe, “Mutwa, nene mulike kwa wolofu ing'ani isa umunu uyo; mulike na ing'ani imbi seakuvapigila avanu vako uko ku Yelusalemu. 14Na lino asile ipa we ina ululagi ukuhuma kwa Avatambisi avavina ukuvibata mbevali vevakwifunya mwitawa lyako.” 15Neke umutwa amutigile, “Veve bite hela, pakuva nene ndimuhagwe amigile, adalike ilitawa lyangu kwa vesivamuseli Nguluvi (avamyanza) na avatwa vawo na kuvana va Isilaeli. 16Na yunene ndimulagila inzolofu, sesimwambusa ateseke ukwimila litawa lyangu.”

17Sweno, Ananiya ndawe abitige, swe akwingila mukaye yiyo. Ndawe amugelekige Sawulo amawoko gakwe swe itigila, “Munyalukolo Sawulo, Umutwa umwene Yesu yeakweleluche veve mung'asi lweukasige kono, anumite nene sambi ulave kangi na ukupelwa Umuhe Umwelu.” 18Sukumwi ifinu witigila ifibandi fyagwe pasi ukuhuma mumiho ga Sawulo, ndawe avangige ukulava kangi. Ndawe imige, swe ibatisiwa. 19Na avelige ilya ichakulya, uludali lwakwe ndawe lwemupilukilige kangi.

Sawulo idalika uko ku Damesiki

Sawulo ikalite filo fikefu pamwi na vanyigendo uko ku Damesiki. 20Lusika lulula Sawulo avanzile ukudalika mumasinagogi ukutigila Yesu ye Mwana va Nguluvi. 21Avanu mbevali vevamupulike vasasave, vitigila, “Uyu si ye yuyu yakavawulagige vala vevakifunyige mwitawa lili kula ku Yelusalemu? Kangi akalakasile ipa ina lukani lulo ulwa ukuvibata avanu iwo na ukuvasindika ku vatambisi avavina!” 22Sawulo aginite ukupelwa uludali, na pe aginige pakuva mupifu pa kulonga ukuta Yesu ye Kilisito, palulo avahuguvike hilo Avayudaya va ku Damesiki. 23Pefilutye ifilo fyolofu, Avayudaya vakong'ine sambi vagahe ikigaho cha ukumuwulaga Sawulo. 24Neke Sawulo apulike ulupweng'enyu lwa ikigaho chawo. Avene pakilo na pamunyi valolelige imilyango ja ukwingilila muboma sambi vamuwulage Sawulo. 25Sweno pakilo vala avanyigendo vakwe vevepamwi nave, vamutegwe Sawulo mulihang'a, swe vakumwisa mulinang'ana lya mulukanzi ahume.

Sawulo ipiluka ku Yelusalemu

26Sawulo peafikite ku Yelusalemu agelite ukwihanza na vala avanyigendo. Neke mbevali vamwogopige, na sivafuuvitwi ulwa nave Sawulo ye ave munyigendo va Yesu. 27Ipo, ndawe Balanaba asige ukumutegula Sawulo, swe akumusindika ku avigendo na ukuvalongela lwe Sawulo akitang'ine na Umutwa mung'asi na lwe Umutwa akalonzile nave. Avalonje kangi na lwe Sawulo akadalikige ku Damesiki mugaya muhwehwe. 28Sweno, Sawulo ndawe ikalige nawo, na ukugenda mu Yelusalemu mbeyili idalika ulukani lwa Umutwa we mugaya muhwehwe. 29Kangi, olelelige na ukwibesa na Avayudaya vevalongige Ikigiliki, neke iwo vagahige ukumuwulaga. 30Vala vanyalukolo avevafuuvitwe vavelige vakulukagula ulukani ulo, vamutegwe Sawulo, na ukumsindika mbaka ku Kaisaliya swe vakumuleka abite ku Taliso.

31Ulusika ulo ilikanisa mbelili lya mu Yudaya, na mu Galilaya na mu Samaliya lyave muwikalakunoga. Ilikanisa lyaginite ukongelekela na ukusikimala mu choga kulu Mutwa na ukoloka avanu mu ludali lwa Umuhe Umwelu.

Petulo akumuponia Eneya

32Petulo peagendige apono polofu afisile kwa avanu va Nguluvi vevikalige ku Luda. 33Uko kweamufisile umunu uyumwi yeitambulwa Eneya yeemutamwa kwa myaka gimunana ealambale mulupasa pakuva eina litela. 34Sweno, Petulo ndawe amutigilige, Eneya, Yesu Kilisito akukuponia. “Lamuke utandike ulupasa lwako.” Eneya ndawe anyaganisige ukulamuka. 35Avanu mbevali avikalige ku Luda na ku Saloni vamuwene Eneya, na mbevali ndawe vamupitukilige Umutwa.

Petulo akumuponia Dolika.

36Epwali mung'inetu uyumwi muboma iya ku Yopa yeitambulwa Tabita (kwa Kigiliki ye Dolika, kwekutigila, Nyalusi). Umung'inetu uyo apigige inofu pakuvatanga avamikaa mbepali. 37Ulusika ulo atamike swe ifwa. Avanu wofwige umufimba gwakwe, neke vaguvike mukibupa cha pachanya. 38Pa Yopa sipataali hilo ukuhuma ku Luda; swe avanyigendo avevafuuvitwe vavelige vipulika ulwa Petulo ali mu Luda, ndawe vavatumige avanu vavili kulumwene vakamutigile; “Wuse ukwetu yilino de.” 39Sweno, Petulo ndawe abitasige nawo. Avelige ifika swe vakumusindika pachanya pala pa kibupa avang'inetu avafwile wolofu vamupilime Petulo kono vivemba na ukumulagila imyenda jeawuyapige Dolika peemumi. 40Petulo avahumise mbevali kwivala, ndawe afugamige akwifunya. Ndawe agupitulige gula umufimba swe itigila, “Tabita lamuke.” Nave ndawe adindulige amiho swe ilamuka, na avelige akumuwona Petulo, ndawe ateng'emalige. 41Petulo ndawe amutangilisige sambi ime, ndawe avakemelige vala avanu va Nguluvi na vala avang'inetu avafwile, ndawe amutawulige kwa avene yave mumi. 42Ulukani ulwa ikipigo iki lwatagalye mbekuli uko ku Yopa, na avanu wolofu vamufuuvitwe Umutwa. 43Petulo ikalite filo fyolofu uko ku Yopa, kwa umunu uyumwi umunyakuhona ing'ingo yeitambulwa Simoni.

தற்சமயம் தேர்ந்தெடுக்கப்பட்டது:

Ifipigo 9: HeNT2004

சிறப்புக்கூறு

பகிர்

நகல்