Ifipigo 11

Petulo akulyolelela ilikanisa ku Yelusalemu

1Avigendo na avanyalukolo ave ku Yudaya vapulike ukutigila avanu avamyanza nawo yevanuche ulukani lwa Nguluvi. 2Sweno, Petulo avelige apiluka ku Yelusalemu, vala Avayudaya avevafuuvitwe vevawendige avanu avamyanza vawoolwagwe vamung'ulite, Vakumutigila: 3“Veve ukahele kuvanu vesivawoole neke wikale na ukulya nawo!” 4Ipo Petulo ndawe avangige ukuwolelela wunofu mwa mbesili sesikapigike ukuhuma pamuvango: 5“Ikimunyi Ikimwi pendifunyige muboma ku Yopa, ndalotite amaloto; ndakiwene ikinu witigila lyenda likomi likwika pasi ukuhuma kuchanya kono wevalibete imbali isitayi, swe livikwa palubali panene. 6Ndavelige ndihungilila wunofu mugati ndafiwene ifikoko finyamagulu gatayi, ifikoko ifya mwihala, ifikoko fyefyafitambala pasi, na ifidege fya mwihala. 7Swe ndawe ndapulikige iliswi likunigila, ‘Petulo lamuke udumule sambi ulye.’ 8Neke nene ndatige: ‘Nda, Mutwa; pakuva kwa nene ikinu ikinyawinya sichekilagela kingile mumulomo gwangu.’ 9Iliswi lila lyapulise kangi ukuhuma kuchanya: ‘Ulemwage ukufitigila finyawinya ifinu ifyofuge na Nguluvi.’ 10Ulukani ulo lwawonike kadatu, neke pambele ndawe fyapilukige kuchanya. 11Lulusika lulo, avanu vadatu avevatumitwe kwa nene vihuma ku Kaisaliya vafisile pakaye yendefiche. 12Umuhe anige mbitage nawo ndemwakusina. Iwo vanyalukolo avimutanda vahelelise na nene ku Kaisaliya uko twinje mukaye ya Koleneli. 13Nave atulonje lwe akamuwene munyivaha mukaye yakwe na ukumutigila: ‘Mutumage umunu abite ku Yopa akamukemele umunu uyumwi yeitambulwa Simoni, ilitawa ilingi ye Petulo. 14Uyo yeakulongela ing'ani veve na va mukaye yako mbevali isa uwupoki.’ 15Na ngavelige ndivanga ukulonga, Umuhe Umwelu swe akuvasila ndawe lwe atusye hwehwe pamwandi. 16Ipo ndiwike ing'ani sila seealonzile Umutwa: ‘Yohane abatisige na ululenga, neke nyenye mubatisiwa kwa Umuhe Umwelu.’ 17Sweno, wone Nguluvi avapelye nawo avanu avamyanza ikipelwa kikila cheatupelye hwehwe peyetumufuuvitwe Umutwa Yesu Kilisito, mbi nene ndendinani yendendimubesa Nguluvi?” 18Vavelige vipulika ulo, swe vileka ulubesa vakumulumba Nguluvi vitigila, “Nguluvi avapelye ikilega sambi vahongese na ukupela vave na uwumi!”

Likanisa lya ku Andyokiya

19Avevafuuvitwe vala vevevatagalye ukwimila ukuteseka ukwe kuwonike ulusika lwe Sitefani vamuwulaje. Avamwi vahele mbaka ku Foinike, na ku Kipulo na ku Andyokiya vidalika ulo ulukani ku Vayudaya swe. 20Neke avamwi mwavala avevafuuvitwe vevevahumite ku Kipulo na ku Kilene, vahele ku Andyokiya vidalika ulukani ulo kwa avamyanza vakuvadalikila ulukani ulunofu lwa Umutwa Yesu. 21Umutwa avatanzile na avanu wolwike vanyakufuuwa na ukumupitukila Umutwa. 22Ing'ani sa ulukani ulo sapulise kulikanisa lya ku Yelusalemu. Swe ndawe vamutumige Balanaba abite ku Andyokiya. 23Avelige ifika uko na ukwilavila uwuwuya wa Nguluvi kuvanu vala, ahekelye na ukuvasukanisa mbevali vaginage muwuhuvilwa wawo kulu Mutwa. 24Balanaba ali munu munofu, eamemite Umuhe Umwelu na ulufuuwo. Ililugu likomi lyamupituche Umutwa. 25Sweno, Balanaba ndawe abitige ku Taliso ukumusaka Sawulo. 26Na peamuwene amuletite ku Andyokiya. Nawo ndawe vavili vikalite na ilikanisa lila kwa ulusika lwa mwaka mbeguli vakwigisa ililugu likomi lya avanu. Uko ku Andyokiya kwekwene avanyigendo vatasile ukuvatambula vakilisito.

27Ulusika lulo avamwi va avavisi vasile ku Andyokiya vihuma ku Yelusalemu. 28Sweno, uyumwi va vawo yeitambulwa Agabo imite, na kwa uludali lwa Umuhe apavite ulwa kuva na kinge mung'i mbeyili (Ikinge icho chawonike ulusika lwe Kulawudio pee Kaisali.) 29Vala avanyigendo valamwe ukuta umunu yeyeavesaga ina kinu asindikage vavatange avanyalukolo avikalige mu Yudaya. 30Sweno ndawe vagitige ndahihyo neke vavapelage Balanaba na Sawulo umuhangu ugo vasindike vavene kuvavaha va ilikanisa.

தற்சமயம் தேர்ந்தெடுக்கப்பட்டது:

Ifipigo 11: HeNT2004

சிறப்புக்கூறு

பகிர்

நகல்