Maluko 13

Sosovo sou Voxo Kaluxu

(Mat 24:1-14; Luk 21:5-19)

1Xe Iesu muavuti, la musukusou taasou lalotu tatila noxou Lataua, la vile noxi'a ta molomolo noxou ne, muvikalanu aloxo 'o, “Itema sou ulosixe lavulavu! Namalei. Lavolavo'o 'o ne, lailaixe misevile. Mo tanitani 'o ne, lailaixe kalumo misevile.”

2 # Luk 19:44 Iesu muavuti la mukolinu aloxo 'o, “Nini nemaisou tanitani e toxotoxoxa'a 'o? Ia umomomo sou ie'i uvaxau lavo'o vile 'o ne, uvo'uvo'utulo no lataanu menexu vile uasi, lavolavo'o latala ne, imamamulo ka ipeinu ulu'elai no lia.”

3Iesu mulai mo a uxoxolu no laxa'ilu ne Olivu, la iou muvaxau tani tila noxou Lataua no talaxu. Pita ilou Iakovo mo Ioanesi ilou Andeleasi milutu vaxa, la mitali'isou se'isisi va'axu aloxo 'o, 4“Navikalanexi. Talu la mimii ane lexe uxali 'o, uxali maninasou? Sosovo ma'ia ane uxali tei sou uvikala lamana noxixe lexe anu mimii ane ne, asou uxali maninasou?”

5Xe Iesu muavuti la mupeletotosi'a aloxo 'o, “Ngasaxila'inge laixe. Loxo 'o io itema vile uxali ukalavoingengi. 6Ta mitema tavu'alo ixali, la imoxou ualasilo. Ivikala lexe, ‘Eni anu,’ la ikalavoine'i tavu'alo. 7No voxo ane ngingi ngalomusi'a ta mitema i'oto'oto mo vaikala sivosivo sou 'oto'oto ne, la ngaavuavuti mo tangengi kalaua mo nga'ume uasi. Anu mimii ane loxo ne anu uxali, ia voxo kaluxusou ne a uao unene'e o. 8Ta mitema sou tuala vile iavuti, la ialivulane'i ta mitema sou tuala vile ane va'axu. Mo ta mitema noxou tatananu tuala vile iavuti, la ilo'a ta mitema noxou tatananu tuala vile ane va'axu i'oto. Xe no xalexalee tuatuala se'i, la laliua ukunikuni, mo soli toxoxa'a uxali. Anu tu'utu'umaxu ane ne, uxali tei loxo sema ixamuli navunavu tei ka sou ivo'o 'ilie.

9 # Mat 10:17-20 Anu laixe lexe ngingi ngasaxila'inge laixe. Xo ino'inge ka ilai itulusinge no anu vaivaikala no ie'i ta tatila no anu pita noxi'a ka ivenge no nano no taasou lalotu noxi'a ta Iutaia. Tava'u xo ngingi noxilo, la sou ane'i itulusinge no ie'i ta mitema sou xaixai noxi'a ta tatananu tuatuala ilo'a ta tatananu tuatuala, la sou ngingi ngaavuti sou nga'aloxu a'alo laixe noxilo ulai noxi'a. 10La sou voxo kaluxusou uxali uao, la a'alo laixe ne, ia'aloxu no xalexalee tuatuala ukalusi tei. 11#Luk 12:11-12Xe lexe itetelisinge mo ilailingenge sou itovongengi, la ngaxavutala piena no anu vaikala sou ngalemolu uasi. Vaikala ma'i ane uxali no anu xavutalamengi alalae ne, la ngalemolu ulai noxi'a. Xo ngingi ane ngavivikala ne uasi, Uleenu Tavuna ane uvivikala ne.

12 # Mat 10:21 Itema vile uavuti la ukalanu vimou sou ivau usoli, mo ta molomolo kalumo ne ta mami'a i'oxo aloxo ne noxi'a. Xe ta 'ili'ili'a ne, iavuti la iasaxai'a ta neni'a ilo'a ta mami'a sou ive'a isoli. 13#Mat 10:22; Ioa 15:21Ulai la ta mitema tavu'alo opone'i masuainge xo ngingi noxilo, ia ane'i ane itulu pekia'a ulai utalo no voxo ane ane'i maulixa'a ukalu no anu, la Lataua upamauline'i.”

14 # Tan 9:27; 11:31; 12:11 Xe Iesu muavuti la muvikalane'i la aloxo 'o, “Lexe ngamaisou mii vile e Lataua umasaxa uasisi manina xe umamulonu mimii a ututulu no xalee lia vile ne anu noxou uasi, la laixe lexe 'ei ane uitisou vaivaikala ano 'o, la ulavu laixe no anu. Mo ta mitema ane ixolu ne Iutaia ne, i'ume'ume ilai no laxalaxa'ilu. 15#Luk 17:31Itema ane mulai mo 'a uxoxolu no taasou kisou ne, umomomo sou ulu'elai mo u'unalai sou uno'u mimii se'i uuatunu uasi. 16Mo itema ane mulai no xaixu mo 'a uxaxai ne, umomomo sou ulivu ulai no tani sou uno'u tokolomou uasi. 17#Luk 23:29Ia ta sema ane opoopone'i xe ane'i ane isusune'i ta 'ili'ili'a ta keakea, anu voxo masua noxi'a manina. 18Ia anu laixe lexe ngingi ngalinga, mo sou anu mii ane ne uxali no voxo sou la'iua uasi. 19#Tan 12:1; Pal 7:14Xo no voxo ane ne, anu voxovoxo sou tu'utu'umaxu manina, umomomo no anu voxo ane tatei Lataua mukoinu xalexalee tuatuala mo utalo vaimomo mo ili'i la uasi manina. 20Ia lexe Tila uxoto voxo ane ne uxali kulunu uasi, la evile umomomo sou umauli uasi. Ia tava'u xo ane'i ta mitema ane anu musovosi'a lexe anu ta mitema noxou maninasou, la sou ane anu uxotonu voxo ne uxali kulunu. 21No voxo ane ne, la evile uvikalangengi aloxo 'o, ‘Ngamaisou, Kalisito ano 'o!’ Uasi, uvikala lexe, ‘Ngamaisou, anu 'ole!’, la mamu sou ngamuxamuxaxu tangengi no anu vaikalau. 22#Pal 13:13Xo ta mitema se'i ixali, la ikalavoi lexe ane'i Kalisito xe ane'i ta mitema sou palomatana. Lexe ixali, la i'oxonu sosovo se'i uxali mo mimii se'i sou ta mitema imaisou la ikuluke no anu kalumo, lexe anu umomomo sou ikalavoine'i ta mitema ane Lataua musosovosi'a lexe ta na'u 'ole. 23La sou ane eni avikalangengi lexe ngasaxila'inge laixe, xo mimii latala ane uxali noxinge ili'i, ane evikalangengixu mukalu ne.

24 # Ais 13:10; Ioe 2:10, 31; 3:15; Pal 6:12-13 Ia no voxo ane ili'i no anu voxo sou tu'utu'umaxu ukalu, la,

‘aso ne uxali isivoxo mo so'io ne uiei la uasi,

25ta oto ne, ilapalapau no opo loxotolo ilu'e, mo ta mimii loxo ta'umali ilo'a koiuxaxai mo tavaivolo no opo loxotolo ne ikunikuni.’

26 # Pal 1:7 No voxo ane ne, la ta mitema imaisou Itema 'Olu mine ulu'e no umuumu no anu xavi mo lamana toxoxa'a noxou. 27#Mat 13:41La sou Anu upalusi'a ta angelo noxou sou ino'a ane'i ane noxou e Anu molu musovosi'a me'a no atume iou tami'a, xe no xalexalee lia teletelexu 'o, ulai utalo no teletelexu loxotolo ukalusi.”

28Xe Iesu muavuti la muvikala aloxo 'o la, “Anu laixe lexe ngingi ngano'u lavulavu no anu ovu lovo. No voxo ane ovu xolanu uxali xe uxalixu xataxataxu, la ngingi ngelavu lexe anu voxo laixe sou aso a uxali 'alai. 29Lexe ngingi ngamaisou sosovo iouiou uxali, la anu aloxo nesi. Ngingi ngalavusi lexe voxo sou Itema 'Olu 'a une'e ne. Muxali 'alai manina. 30Eni avikalangengi manina aloxo 'o, ta mitema sou voxo ano 'o isoisoli uao, ia mimii ane eni elemolu lamana noxinge ne, anu uxali. 31Mii latala teitexi no opo loxotolo mo no lia 'o ne, ulai la ukalu. Ia vaivaikala noxilo ne ukalu uasi.

Evile Ulavu no Anu Voxo Ane ne Uasi

(Mat 24:36-44)

32Evile ulavu no anu voxo ane ne uasi. Ta angelo teitexi no opo loxotolo mo 'Olu ne ilavusou uasi, ia Momusi Anu mulavusou. 33Ngasaxila'inge laixe. Mo ngautiti laixe. Xo ngingi ngalavusou lexe voxo ane ne uxali talu uasi. 34Anu aloxo itema vile ulai no tuala vile va'axu. Ulutu la u'umesou taasou sou ulai, io umuxaxa'a ta mitema sou xaixai noxou sou isaxila'u. Anu muvelu xaixai noxi'a vilevilesi, ia ane sou usaxila'u aitenga ne, muvikalanu sou lexe uutiti uxoxolu aloxo ne.

35 # Luk 12:38 Anu aloxo ne, la sou ngingi ngautiti laixe, xo ngingi ngalavusou voxo ane tatananu tani ulivu une'e no anu uasi. Male uxali no 'olo'olovoxo. Uasi la, no 'olovoxo lixinu. Uasi la, no kakau mine ta koko'a i'ava'ava. Uasi la, no aso uxali utetelo. 36Lexe anu uxali upasipaangengi, la mamu sou ngingi 'a ngaai. 37Vaivaikala ane eni elemolu noxinge 'o ne, eni elemolu noxi'a ta mitema latala ne mukalusi. Ngaxoxolu ia ngautiti laixe.”

Iliyochaguliwa sasa

Maluko 13: ataNTpo

Kuonyesha

Shirikisha

Nakili