Mataio 24
24
Ierusalema Maso Uvi la toa foforukai o
(Mareko 13:1–2; Luka 21:5–6)
1Iesu Maso Uvi kiripi maria voa terōpe soa, areve satiriaraita karu arero tai kotipe, Maso Uvi ve oti hariaharia la arero muiai vei. 2Are tava o erero mō ōpe, E mea etau foromai la ofae eavai ei? Okofa ara ero o la moi, Mōvoa eaeipeta fave koru fave farakeka aea la areve oti voa levi kiripi eaeava roi, erero foromai la toa foforukai roi.
Haisora leita soasoa
(Mareko 13:3–13; Luka 21:7–19)
3Soka Iesu Olive Raepa ve arori voa patei aiseseiape lea mea, areve satiriaraita karu arero tai murufa forera mō ōpe. Elaro omoia, lea etau leasauka forerai roi, aea a ata kerori koti peise aea soa sarapaita soa ve peise ta larelekōru.
4Iesu tava o erero mō ōpe, Kiva leitia, karu ero apeva vuteai ave. 5Karu rauapo arave rare ita foreri mō ari roi, Ara Keriso, aea ere karu rauapo la apeva lōfeare vuteai roi. 6Soka e haekao voa arita marehaukai rauapo ve hohororo, aea ára‐ita voa arita marehaukai rauapo ve fari ita la mapaita lea mea, hai levi isoia. Lea etau rauapo forerai roi, a—, soa sarapaita soa areapo. 7Ipi toruipi haria karu ere toruipi haria karu la marehaukai vei itotea itotea ari roi, aeata basileia aea basileia haria ita sosori ari roi; aea posera aea pupuiōvu ita lō patei leiti roi. 8Lea haisora ere usoso avasa pataita soa ve oarehōva leita hehea feare.
9Lea soa voa ere ero fasi teavi sari vei miōri, ero paea opai roi. Toruipi hariaharia karu foromai arave rare vei ero kaifa leiti roi.#Mat 10:22 10Lea mea karu rauapo la lei safosafoa putei putei a’, aea havara elore elore lō paraea lō paraea lei, aea elore elore kaifa leiti roi. 11Aea apeva peroveta rauapo itotea, karu rauapo la apeva vuteai roi. 12Aea ipi safu miroapaita mai sa fafarapaita lea vei, karu rauapo ve elore elore leitita haikakare taiparaeai roi. 13A—, haiiri rofo ita meita tetetete soa kaleitita lea karu la lei makuri leiti roi.#Mat 10:22 14Soka basileia ve mea Ovoro Lareva mearovaeka foromai voa itoro ari roi, toruipi‐ipi karu foromai la lei ore leiti vei; aite soa sarapaita soa lōri forerai roi.
15Soka mu‐eokere etau maealolo‐eiteapo, saroroapai ve ipi, Daniele peroveta vita sa omoipe lea etau safu oti voa pavaita la ofae eavai roi. (Mutita karu e, lea etau haiiri metakao seseōvaia.)#Dan 9:27; 11:31; 12:11 16Lea soa voa Iudea mea voa pepeita karu raepa voa oroavaia. 17Uvi kōu voa meita karu uvi iri voa siseita etau maravai vei levi oropaia.#Luk 17:31 18Forōva oti voa meita lea karu are areve arori puta ovai vei ata levi keroria. 19A—, lea sare sare voa ére ita uamori aea kō savuaita uamori ita vei, ahai‐e! 20Ualare la loki leitia, e vevekoko pisahu voa aeata Sabati sare voa levi oroavai vei. 21Ipi lea soa voa haisora rovaea kofa leiti roi; lōfeare haisora evera leiti kasirau soa mearovaeka ve oarehōva soa itiiti faitora, aea lōfeare soa ata levi forerai roi peava roi.#Dan 12:1; Apok 7:14 22A—, lea sare sare la haruakao sarapai auke leitita, maeasarōva farakeka aea la lei makuri levi leiti roi. A—, ipi are haikaea maravi roroaita lea karu vei, Ualare lea sare sare la sarapi haruakao leiti roi.
23Lea soa karu aea ero mō moit’ oria, Ofae eavaia, Keriso meha, ō are reha! lōfeare o la levi mapi sukaerereaia. 24Ipi apeva Keriso rauapo aeata apeva peroveta karu rauapo forerai roi. Ere peise etau maeamaea aea haihava leita mai rauapo ita la muiai roi, ipi ere leitita ore lei leiti oria, a—, ere Ualare sa haikaea maravaita lea karu la apeva vuteai vei. 25Mapaia, ara lea etau vei ero everori sasauka o moita meha.
26Ere ero mō arit’ oria, Mapaia, are furuka merava voa; furuka voa levi kavaia; ō mapaia, are uvi lalava iri voa; lea o levi mapi sukaerereaia.#Luk 17:23–24 27Ipi ususo kevaro mairimairi itai voa mavi soa isei isei sare sukopaita oti voa mavaita feare, Karu ve Atute sa foreraita soa ta lōfeare leiti roi. 28Opaita maea sa eaeita, lōvoa sarōva laloita ori kokorukai roi.#Luk 17:37
29Lea sare sare ve haisora soa sa kaleitita lea mea, sare utohoa murumuru lei, aeata papare areve ovava ta levi haeai roi; koru ta kauri voa sisapi, aea kauri ve siahu etau etau la lei oriri‐oriri ari roi.#Isa 13:10; 34:4; Esek 32:7; Ioe 2:10, 31; 3:15; Apok 6:12–13 30Lea mea Karu ve Atute ve peise la kauri voa ofae eavai roi; aea lea soa mearovaeka ve torutoru karu fi ari roi, ere Karu ve Atute la mea‐e voa, siahu rovaea ita sosorusosoru rovaea ita foreraita la misilei fofoisaita lea mea.#Dan 7:13; Seka 12:10–14; Apok 1:7 31Aea are areve aneru rauapo u rovaea ita itapi, are haikaea maravi roroaita karu la fareovaita mea ve soa orakaraka voa, aea soa kauri ve itua itua‐tao voa kokorukai roi.
Malaila tola sa satiriaraita o
(Mareko 13:28–31; Luka 21:29–33)
32Soka malaila tola sa ero satiriaraita o la ore leitia; areve sivusi taoea rorore faita lea mea, e ore avora soa haekao la loi. 33Soka mea ta lōfeare, e lea etau la eavaita soa, ore leitia, soa forerai vei haekao la loi, utape kofa voa. 34Okofa ara ero o la moi, Mea taotao levi kaleiti roi tetete lea etau foromai forerai ao. 35Kauri ita mearovaeka ita kaleiti roi, a—, arave o levi kaleiti roi.
36Eite lea sare aeata lea ora ve foreraita soa karu foromai ore kasirau, kauri voa pepeita aneru ta ore kao, Atute ta ore kao, a—, Oa sa haria ore. 37Ipi Noa ve soa voa leiape lea mai feare, Karu ve Atute ve foreraita sare ta lōfeare leiti roi.#Gen 6:5–8 38Ipi lea soa voa ma patai auke leipe soa, ere larietau ma ita lalape, ere vita ita ua ita laeaiape, pepepepe Noa vavaea voa forerōpe lea sare voa; 39ere lea etau haveva lei, ma sa patei ovi aieri karu foromai la lei hohōroa haroavōpe; Karu ve Atute sa foreraita soa ta lōfeare leiti roi.#Gen 7:6–24 40Karu orakoria ereukave forōva oti voa roroaita, a—, farakeka la fareovai roi, farakeka aea la kiripai roi. 41Uamori oraka fareho uiti fare la faihohōroaita etau la rorokeaita, a—, farakeka la fareovai roi, farakeka aea la kiripai roi.
Kiva leitia
(Mareko 13:33–37; Luka 12:39–40, 42–46)
42Lea vei, kiva leitia, ovoako leitia, ipi eve Papuvita forerai sare leasauka e lea la ore kasirau. 43Mea etau ore leitia, uvi ve papuvita torea vita sa kotita soa la everori ore leitita, a—, are ovoako lei uvi la tofapai vei kiva leita mai la levi kiripai lare.#Luk 12:39–40 44Soka, e ta reha, kekese lei vovo roroava, ipi e sa ore auke ora voa Karu ve Atute forerai roi.
45Soka etauroro la kiva leita aeata haiore ita leitita sarufa leisa? Areve papuvita sa arero lei areve uvi ve tivi harofave vita leiti vei aea tivi irave ve larietau soa kofa voa miarai vei lōfeare vita leisa? 46Areve papuvita foreraita soa are lea sarufa sa lōfeare tivi leitita la eavaita, a—, lea sarufa lareva ia. 47Okofa ara ero o la moi, Are arero lei areve ovi meita etau foromai la kiva leita vita kofa leiti roi. 48A—, lea sarufa maealolo areve haiiri voa mō ari oria, Arave papuvita si‐si‐eite; 49aea areve maeapavora sarufa karu la toa toa, maeakakare leita ma la loloita karu ita fareho larietau ita uaina ita larita, 50a—, lea sarufa karu ve papuvita, areve sarufa sa tai auke sare aeata are ore auke leita lea ora voa forerai roi; 51aea arero toa tofei itai itai lei, aiera‐aiera karu ita fareho oti arero miarai roi; lōvoa fi a’ a’ tao ta karekare ari roi.
Iliyochaguliwa sasa
Mataio 24: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
