Ioane 14
14
Oa tai teraita otiharo Iesu reha
1Eve haiiri kapekapea haisora lei lei vovo levi roroava. E Ualare la sukaerereaia, aea araro ta sukaerereaia. 2Arave Oa ve uvi voa pepeita oti rauapo ia; lōfeare auke oria, ara ero omoi lare; ipi ara lōvoa terai vei la roi, oti e vei kaiapai vei. 3Aea ara oti e vei kaiapai vei teraita, a—, ara ata koti roi, ara arave elore oti voa ero maeafukapai vei; lea vei ara sa peita lea oti voa, e ta pavai roi. 4Ara teraita lea oti ve otiharo e ore.
5Tomasi arero mō ōpe, Papuvita e, a teraita lea oti ela ore kao; soka otiharo ela leafeare lei ore leiti roi? 6Iesu arero mō ōpe, Otiharo aeata okofa aeata makuri eite ara meha. Ara voa terai auke leitita lea karu farakeka Oa tai levi forerai roi. 7E araro ore leitita, a—, e arave Oa ta ore loita reha. Soa faitora e arero ore, aea arero ta eovi roroka.
8Filipi arero mō ōpe, Papuvita e, elave haikaeai farakeka meha, Oa elaro muiai vei. 9Iesu arero mō ōpe, Filipi e, ara e ita mea savori mea vovea, aea a araro ore kao ei? Araro ofae eavaita lea karu, Oa ta ofae eavaita reha. A o levei mō aipea, Oa elaro muiaia? 10Ara Oa ve iri voa aea Oa ta arave iri voa, a lea o la sukaerereai kao ei? Ara ero moipeta mea o, ara vei haria moia kao, a—, arave iri voa peita Oa sa are areve tivi la lei vovea. 11Ara Oa ve iri voa, aea Oa ta arave iri voa, arave mea o la sukaerereaia. A—, usoso auke oria, ara sa leitita lea etau vei araro sukaerereaia. 12Okofa ita ara ero o la moi, Araro sukaerereaita lea karu, are ta ara leitita lea etau la leiti roi; aea lea etau ve etau metameta ta are sa leiti roi, ipi ara Oa tai terai vei leipeta eavia. 13E arave rare vei loki leita lea etau foromai ara leiti roi, Oa ve fari la Atute voa lei sosorusosoru leiti vei. 14E etau aea la arave rare vei loki leit’ oria, a—, ara lea la leiti roi.
15E araro haikakare leitita, a—, e arave safu o la mapi kakeva leiti roi. 16Aea ara Oa la loki lei, are Toaraita Vita aea la ero miarai roi, are e ita farehoria pavai vei peava roi. 17Okofa ve Arahoha reha. Mearovaeka lea Arahoha la maeafukapaita ore kao, ipi mearovaeka arero ofae eavai sore, arero ta ore leiti sore. A—, e arero ore, ipi are e ita farehoria pea vovea, aea eve iri voa peava roi.
18Ara ero atutemori merava feare lei levi kiripai roi; ara ero tai koti roi. 19Soa taheka haria la eaea, lea ve aite voa mearovaeka araro ofae levi eavai roi, a—, e araro ofae eavai roi; ipi ara sa makuri leipeta lea vei, e ta makuri leiti roi. 20Lea sare voa e ore leiti roi ara Oa ve iri voa, aea e arave iri voa, aea ara ta eve iri voa. 21Arave safu o la mapi kakeva lei vovo meita, araro haikakare leita vita reha; aea araro haikakare leita lea vita, arave Oa sa arero haikakare arai roi, aea ara ta arero haikakare ari, arero lei are araro ofae eovi ore leiti roi.
22Soka Iudasi (lea Kariota karu kao) arero mō ōpe, Papuvita e, a elaro lei ela sa aro ofae eovi ore leiti roi, a—, mearovaeka la levi muiai roi ipi levea? 23Iesu tava o arero mō ōpe, Karu araro haikakare araita, a—, are arave o la mapi kakeva lei vovo meava roi; aea arave Oa arero haikakare ari, elaka arero tai foreri, aea elakave pavaita oti are ita leiti roi. 24Araro haikakare auke leitita lea karu, arave o la mapi kakeva levi leiti roi; e mapaipeta mea o, arave o kao, a—, araro itapōpe Oa ve o.
25Ara e ita farehori peita soa voa mea etau vei laua la sukavaipea. 26A—, Toaraita Vita, Safu Arahoha Lareva reha, Oa sa arave rare vei itapai vei leita lea Arahoha, are etau foromai ero satiriōri, aeata ara ero omoita lea o foromai la ero lei haikaeai roi.
27Ara tairu la e ita fareho kiripai roi; arave tairu ara ero miarai roi. Ara miaraita lea tairu mearovaeka sa tairu la miaraita mai feare kao. Eve haiiri kapekapea haisora levi leitia, tore levi leitia. 28Ara terai roi aea ara ero tai ata koti roi, arave lea o la e mapi roroka. E araro haikakare araita, a—, ara Oa tai terai vei leita lea vei e hailareva leiti lare; ipi Oa sa arave rovaea la sapatai. 29Soka etau forerai auke leita soa, ara ero lea etau vei everori moi, ipi lea etau sa foreraita lea mea e sukaerereai vei. 30Ara laua rauapo ero ata levi sukavai roi, ipi mearovaeka ve harofave vita la kotipea. Are ara voa siahu kasirau; 31a—, mōfeare mai ve ipi mearovaeka la lei ore leiti vei, ara Oa la haikakare lei vovo meitore, aea Oa sa moita o feare, ara lōri lei vovo mea vovea.
Itotea ereita maea leiti vei.
Iliyochaguliwa sasa
Ioane 14: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
