Ioane 13
13
Iesu areve satiriaraita karu ve mora la maukōpe
1Soka Foapaita Sosoka soa ve omopa voa, Iesu ore are mearovaeka la kiripi, aea are Oa tai terai vei leipe soa forerōpe reha. Mearovaeka voa pepeiape areve lea karu kofa la are haikakare leiape, aea are erero haikakare ta lei vovo meiape soa tetete sisatao soa voa.
2Meafautu larietau pori kekese leipe soa, Diabolo Iesu la kivaia leita haiiri Iudasi Isakariota karu Simona ve atute la satiriōri roroka leipe. 3Iesu ta ore Oa etau foromai areve mai voa miōri, aeata are Ualare voa pea kotipe aea are Ualare tai terai vei leipe. 4Lea soa are larietau oti voa itei, areve arori puta fōovi miavi, taoele la ovi areve sofa voa fasōpe. 5Aite are ma saesa voa sisōvi, areve satiriaraita karu ve mora la mauka, erero areve sofa voa fasōpe taoele sa roroapōpe.
6Ma suka vovo eakoa are Simona Petero tai foreri, are Iesu la mō ōpe, Papuvita e, a arave mora ta maukai vei ei? 7Iesu tava o arero mō ōpe, Ara leipeta mea etau ve eite a faitora ore kao, a—, aite soa voa a eite ore leiti roi. 8Petero arero mō ōpe, A arave mora la ma levi ukai roi; Iesu tava arero mō ōpe, Ara aro maukai auke leitita, a—, a ara voa firu levi ovai roi. 9Simona Petero arero mō ōpe, Papuvita e, arave mora haria kasirau, a—, arave harofave aea arave mai oraka ta reha. 10Iesu arero mō ōpe, Masukei roroka leita lea karu ereve mora la haria maukaita usoso, areve maea foromai la lei ovava loita reha. E ta ovava ia, a—, e voa karu aea sa kasirau. 11Ipi are kivaia lei arero paeai vei miarai vei leiti vita la ore leipe; are lea vei mō ōpe, E voa karu aea sa kasirau.
12Soka are ereve mora la ma uka uka roroka lei, areve arori puta ata mopi makea iavi, are erero mō ōpe, Ara ero loita lea mai e eite ore ei?#Luk 22:27 13E araro ero Satiriaraita Vita aea Papuvita rare la arava vovea, aea eve o okofa, ipi ara reha. 14Soka ara eve Papuvita aea ero Satiriaraita Vita, eve mora maukaita, a—, e ta eve karu hariaharia ve mora la maukaia. 15Ipi ara sa loita lea mai ero satiriaraita meha, ara sa ero loita lea mai e ta lōri leiti vei. 16Okofa ara ero o la moi, tivi sarufa ere ereve papuvita ve arori voa kao, aea meu karu arero itapaita vita ve arori voa ta kao.#Mat 10:24; Luk 6:40; Ion 15:20 17E mea etau la ore lei, mai lōri leitita, a—, e lareva ia.
18Ara e foromai vei laua sukavai kao; ara haikaea ovaita karu la ara ore. A—, Safu Buka voa uka siseita o la okofa leiti roi; o meha, Ara ita fareho larietau lapeta lea vita areve mora kiri araro toai vei moravaita meha.#Sal 41:9 19Ara mea forerai vei leita etau ero everori moi, are aite voa foreraita soa, ara arave elore maea vei omoita lea vita e lea la sukaerereai vei. 20Okofa ita ara ero o la moi, Ara itapaita lea karu hariaharia la maeafukapaita lea vita araro ta maeafukapai, aea araro maeafukaita lea vita araro itapōpe Ualare ta maeafukapaita reha.#Mat 10:40; Mak 9:37; Luk 9:48; 10:16
Iesu la kivaia lei opai voa miarai vei leipe vita
(Mataio 26:20–25; Mareko 14:17–21; Luka 22:21–23)
21Iesu lea o mei roroka lei, are haiiri eae lei, o pisiri mei mō ōpe. Okofa ita ara ero o la moi, Eve karu farakeka aea sa araro kivaia lei opai voa miarai roi. 22Lō mei, satiriaraita karu ofae elore elore i a’ haiiri ta titititi ōpe, are omoipe lea vita leisa. 23Areve satiriaraita karu farakeka aea Iesu ve haiposa voa makea iavōpe; are Iesu sa haikakare lei vovo meiape vita. 24Simona Petero haro sa vutea arero mei are Iesu la lalasi leiti vei, are laua sukavaiape lea vita leisa. 25Soka lea satiriaraita vita maea makea Iesu ve haiposa voa topiari, arero mō ōpe, Papuvita e, lea vita leisa? 26Iesu tava o mō ōpe, Ara larietau tara uaina voa paraea arero miaraita, lea vita are reha. Lō mei are larietau tara ovi uaina voa paraea arero Iudasi Simona, Isakariota karu la miarōpe reha. 27Miōri Iudasi ovi roroka leipe soa, Satani are voa oropōpe reha. Soka Iesu arero mō ōpe, A leiti vei leipeta lea etau lavelave leitia. 28Lea posa voa makea siseiape karu ere horahora leipe, Iesu sa arero lōri moipe o ve ipi lekōru. 29Karu hea ve haiiri, Iudasi sa moni oroasi ovi kiva leiape lea vei, Iesu arero omoipe are ere sa sosoka leiti vei haikaeaita etau itaea leiti vei varo, ō mōfeare varo, etau ovi merava karu la miarai vei. 30Soka Iudasi lea larietau tara la’ roroka lei, maria voa utohoa terōpe. Faita muru soa reha.
Safu áre
31Soka Iudasi sa maria voa terōpe lea mea, Iesu mō ōpe, Faitora Karu ve Atute ve sosorusosoru pisiri muia, aea Ualare ve sosorusosoru ta are voa muiaita meha. 32Ualare ve sosorusosoru are voa muiait’ oria, Ualare are Karu ve Atute ve elore maea voa areve sosorusosoru ta muiai roi, aea are lea sosorusosoru utohoa muiai roi. 33Arave irave e, soa taheka haria ara e ita fareho meava roi. Aite voa e araro eli roi, a—, usoso ara sa Iuda karu la moipe lea o feare, ara ero ta o mō la auai, Ara teraita lea oti voa e kotita ore kao.#Ion 7:34 34Ara safu áre ero miaraita meha, e elore elore haikakare leiti vei. Ara ero haikakare lei vovo meita feare, e ta elore elore haikakare lei vovo roroava.#Ion 15:12, 17; 1 Ion 3:23; 2 Ion 5 35E elore elore haikakare leitita, a—, karu foromai e arave satiriaraita karu ere lea la ore leiti roi.
36Simona Petero arero mō ōpe, Papuvita e, a leavoa terai roi ei? Iesu tava o mō ōpe, Ara terai vei leipeta lea oti voa a araro faitora aitetaita ore kao; a—, aite soa a araro aitetai roi. 37Petero arero mō ōpe, Papuvita e, ara aro faitora aitetaita ore auke leiti vei ipi levea? Ara arave makuri la a vei miarai vei kakeva. 38Iesu tava o mō ōpe, A ave makuri la ara vei miarai roi ei? Okofa ita ara aro o la moi, Kokora vita fi arita soa ve omopa voa a araro soa oroisoria avoa ari roi.
Iliyochaguliwa sasa
Ioane 13: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
