Ioane 10
10
Mamoe kiva vita lareva
1Okofa ara ero omoi, Mamoe ve kora ve otiape voa oropai auke leitita, a—, kora maea merava voa patei faukaita lea karu murufa torea aea irori ita torea leita karu are reha. 2A—, otiape voa orapaita lea vita mamoe ve kiva vita kofa are reha. 3Otiape kiva vita otiape are vei fapa vovea; are areve elore mamoe la rare ita isaita lea mea, ere areve i‐ape la mapi, aea are erero maria voa lariōvaitore. 4Are areve elore mamoe la maria voa lei foreraita lea mea, are erero lariōvi lea mamoe arero aitetai roroava roi, ipi ere areve i‐ape malasa eavia. 5Ere karu haria la aite levi tai roi, a—, arero tore lei oroai roi; ipi ere karu haria ve i‐ape malasa auke eavia. 6Mea parabole o Iesu sa erero omoipe, a—, are erero moipe o ve eite ere ore leiti kao.
7Soka Iesu erero ata mō ōpe, Okofa ara ero o la moi, Mamoe ve otiape ara meha. 8Arave omopa voa foreraiape lea karu murufa torea aeata irori ita torea leita karu ere reha, a—, mamoe erero mapai kasirau. 9Otiape eite arao. Karu ara voa oropaita, a—, arero lei makuri leiti roi; are iri voa oropi maria voa foreri, larietau la eli sukaeai roi. 10Torea karu torea lei, paea aea saroroapai vei haria foreraitore. A—, ara foreri meipeta ipi ere makuri ovi, aeata lea makuri topiari rovaea kofa ta ovai vei.
11Mamoe la kiva vita lareva ara meha. Mamoe la kiva vita lareva areve makuri la mamoe vei miarai vei kakeva leititore. 12Tava ita tivi vita are mamoe la kiva vita kofa kao, aeata are papuvita kofa kao; aea lea vita furuka ave merava sa koti la eavaita soa, are mamoe la kiripi soea, aea lea furuka ave sa mamoe la forea putovi, erero liōvea ere fu ari roi. 13Ipi are tava tivi vita, aea mamoe la haikaeai kofa leiti sore.
14Mamoe la kiva vita lareva ara meha. Ara arave elore mamoe la ore, arave elore mamoe ta araro ore. 15Usoso Oa sa araro ore leita, ara ta Oa la ore leita lōfeare. Ara arave makuri la mamoe vei miarai vei kakeva ia.#Mat 11:27; Luk 10:22 16Soka ara mamoe haria la ovai; ere mea kora ve mamoe kao. Ara erero ta lariōvi, aea ere ta arave i‐ape la mapai roi, aea mamoe sitavu farakeka, kiva vita ta farakeka leiti roi.
17Oa araro haikakare lei vovea, ipi ara arave makuri miarai vei kakeva, aeata arero lōfeare ata ovai vei. 18Arave makuri la karu aea sa ara voa fareovai kasirau, a—, ara haria sa arero la miaraipea. Ara siahu ia arave makuri la miarai vei, aeata ara siahu ia arero ata ovai vei. Lea o ara Oa voa ovi mea.
19Ipi lea o vei Iuda karu haiiri tofei itai itai leipe. 20Ere rauapo mō ōpe, Are harisu ia, are maeakakare ari laipea. E arero mapaipeta ipi levea? 21A—, karu hea ta mō ōpe, Lea o harisu sa toa meita vita ve o kao. Harisu ofae kuku karu ve ofae oraka la lei ovava leitita ore ei?
Maso Uvi la lei Safu leipe Sosoka
22Lea soa Ierusalema voa Maso Uvi Safu leipe Sosoka forerōpe. Vevekoko pisahu soa reha; 23aea Iesu Maso Uvi voa Solomono ve pitaka voa mora keroriape. 24Soka Iuda karu arero eakoa mō moiape, A elaro horahora lei lei mea savori leafeare leiti roi? A Keriso kofa oria, elaro o pisiri moia. 25Iesu tava o erero mō ōpe, Ara ero evera moita, a—, e sukaerereai kao. Ara arave Oa ve rare voa leita lea etau etau araro lei pisiri muia vovea. 26A—, e sukaerereai auke leitita ipi e arave mamoe auke eavia. 27Arave mamoe arave i‐ape la mapi, aea ara erero ore, aea ere ta araro aitetaitore. 28Ara peita makuri erero miōri, ere levi opai peava roi; aea karu aea sa erero arave mai voa levi toapi maravai roi. 29Erero araro miarōpe lea Oa, are karu foromai ve rofo la sapataita Ualare reha, aea karu aea sa etau farakeka aea la arave Oa ve mai voa levi toapi ovai roi. 30Elaka Oa ita farakeka reha.
31Lea mea Iuda karu fave korukoru la arero toai vei ata arisovōpe. 32Iesu erero tava o mō ōpe, Oa voa foreraita etau lareva rauapo ara lei ero muiai vovo mea. Lea leita etau farakeka aea lehara, lea vei e araro fave sa toai haikaeaipea ei? 33Iuda karu tava o arero mō ōpe, Ela etau lareva vei aro fave sa toai kao; a—, kaiae o vei, ipi a karu, eite a ave maea usoso Ualare ve maea feare lei mea.#Levi 24:16 34Iesu tava o erero mō ōpe, Eve Safu Buka voa o mō uka sisea, Ara mō ōpe. E eite ualare.#Sal 82:6 35Ualare ve o erero tai forerōpe lea karu la are ualare rare aravaita (aea Safu Karoro la sarapi fareovaita ore kao). 36A—, Oa sa safu lei mearovaeka voa itapi meipeta vita la o mōri moita soa, Ara Ualare ve Atute, e kaiae o auai. 37Ara arave Oa ve tivi la leiti auke leitita, a—, e araro levi sukaerereaia. 38A—, ara lea tivi la leitit’ oria, e araro sukaerereai haikaeai auke leitita, a—, lea tivi vei sukaerereaia. Lōfeare voa e haiiri fapi ore leiti roi Oa are arave iri voa, aea ara ta Oa ve iri voa.
39Soka ere arero sukafori mai paeai vei ata seseōvi, a—, are ereve mai voa safauka kavōpe. 40Kei kei are Ioridana voa ufi mai itai voa, Ioane sa oarehōva bapatiso leiape lea oti voa foreri peiape.#Ion 1:28 41Karu rauapo arero tai fosi mō ōpe, Ioane siahu ve peise leiti kao, a—, Ioane sa mea vita vei moiape lea o foromai okofa. 42Soka karu rauapo lōvoa arero sukaerereaiape reha.
Iliyochaguliwa sasa
Ioane 10: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
