Ioane 9
9
Ofae kuku ita epōpe vita
1Are foapōpe lea mea Iesu karu aea la ofae eovōpe, lea karu la ofae oraka kuku ita epōpe. 2Eovi areve satiriaraita karu arero lalasi mō leipe, Rabai e, kaiae leipe karu leisa, ipi arero ofae kuku ita epōpe lea vei, mea vita ei, a—, areve oalou ei? 3Iesu tava o mō ōpe, Mea vita aea areve oalou ta kaiae leiti kao; a—, arero ofae kuku ita epōpe ipi Ualare ve leita mai la areve maea voa muiai vei. 4Ereita araro itapōpe Ualare ve leita mai la sareri leiti vei; faita muru foreraita soa, karu tivi leitita ore kao. 5Ara mearovaeka voa peita soa, ara mearovaeka ve ovava lei meitore.#Mat 5:14; Ion 8:12
6Lea o mei roroka lei, are pea mea voa soea, sauka pea ita ilafisa, lea vita ve ofae oraka sauka sa veveti, 7arero mō ōpe, Fauka te Siloama ve Sitoi voa maukaia (lea rare ve eite Itapōpe). Soka are fauka te mauka, aea ofae ovava lei ata iti pataipe.
8Soka haekao peita karu aea arero evera meru vei loki leiape la ofae eavaiape lea karu mō ōpe, Avi meru vei loki leita vita meha ei? 9Karu hea mō ōpe, Are reha. Karu aea ta mō ōpe, Kao, eite areve soso feare. A—, lea vita mō ōpe, Ara kofa meha. 10Soka ere arero mō ōpe, Ave ofae leafeare lei ovava loi? 11Are tava o mō ōpe, Iesu la aravaita lea vita, sauka la pisosi arave ofae la veveti araro mō auai, Siloama voa fauka te maukaia. Soka ara fauka te mauka, ara ofae ovava loita meha. 12Ere arero mō ōpe, Are leavoa? Are mō ōpe, Ara ore kao.
13Soka ere lea evera ofae kuku leipe vita la Farisea karu tai lariōvōpe. 14Iesu sauka la pisosi areve ofae la vevetipe lea sare, Sabati sare reha. 15Lea vei Farisea karu arero ta lalasi leipe, areve ofae ovava leafeare leipe. Soka are erero mō ōpe, Are sauka arave ofae oraka voa lei pasaea, ara fauka te mauka, ofae eavaita meha. 16Lō mei, Farisea karu hea mō ōpe, Mea vita Ualare voa pea forerai kao, ipi are Sabati sare kiva kao. A—, karu hea mō ōpe, Iri kaiae karu lōfeare siahu ve peise leafeare ore lei leiti roi ei? Ere haiiri hariaharia tofei itai itai leipe.
17Soka ere ofae kuku karu la ata mō ōpe, A are vei o leafeare moi, ipi are ave ofae oraka la lei ovava loita lea vei? Are mō ōpe, Are peroveta vita. 18Soka Iuda karu are ofae kuku lei ata ovava leipe lea o la sukaerereai vei haikaeai kao, tetete areve ofae ata ovava leipe lea vita ve oalou la ere isa, 19ereukaro mō ōpe, Ofae oraka kuku ita epōpe o arita mea atute eukave ei? Soka are faitora ofae leafeare lei eavaipea? 20Areve oalou tava o mō ōpe, Elaka ore mea elakave atute, aea arero ofae kuku ita epōpe; 21a—, are faitora leafeare lei ofae eavaipea elaka ore kao, aea areve ofae la lei ovava loita lea vita leisa, elaka lea ta ore kao. Arero lalasi leitia, are karu sora; are areve elore etau vei laua sukavaita ore. 22Areve oalou o lōri moipe ipi ereuka Iuda karu la tore leipe eavia, ipi Iuda karu haiiri farakeka lei kekese leipe, Iesu are Keriso o lōri haikaea arita karu la sunako voa sukavutea are maria karu leiti vei. 23Lea vei areve oalou mō ōpe, Are karu sora, arero lalasi leitia.
24Soka ere ofae kuku leipe karu la ata isa arero mō ōpe, Ualare ve fari la moravi sosorusosoru leitia; ela ore kofa lea vita are iri kaiae vita. 25Lō mei, are erero mō ōpe, Are iri kaiae vita varo kasirau varo, ara lea la ore kao. Etau farakeka ara ore, ara omopa ofae kuku, a—, faitora ara eavaita meha. 26Soka ere arero mō ōpe, Are aro loita mai leafeare? Are ave ofae leafeare lei ovava loi? 27Are tava o erero mō ōpe, Ara o ero evera moi, a—, e mapaia kao. E ata mapai haikaeaipeta ipi levea? E ta areve satiriaraita karu leiti vei haikaeaipea ei? 28Soka ere arero o haiiri ita mō ōpe, A sa areve satiriaraita karu; ela Mose ve satiriaraita karu. 29Ela ore Ualare are Mose la laua sukavaiape; a—, mea vita are leavoa forerai ela lea ore kasirau. 30Areve ofae ovava leipe lea vita tava o erero mō ōpe, Haihava etau soa haria reha! Are leavoa forerai e lea la ore kao, eite are sa arave ofae la lei ovava loi. 31Ereita ore Ualare iri kaiae karu la mapai sore; a—, Ualare la tore lei, areve haikaeai la kakeva leita lea karu la are mapaitore. 32Mearovaeka ve oarehōva soa itiiti faitora ofae oraka kuku ita epōpe karu ve ofae la ovava leita lea fari la mapai sore. 33Lea vita Ualare voa forerai auke leiti oria, are etau farakeka aea la leitita ore levi leiti lare. 34Ere tava o arero mō ōpe, Aro kaiae leita mai foromai voa miōpe. A ta elaro satiriarai haikaeaipea ei? Soka ere arero sunako voa sukavuteōpe are maria karu leiti vei.
35Ere arero maria voa sukavuteōpe fari la Iesu sa mapi, are arero tai koti mō ōpe, A Karu ve Atute la sukaerereai ei? 36Are tava o mō ōpe, Papuvita e, are ita leisa? ara arero sukaerereai vei. 37Iesu mō ōpe, A arero ofae eovi roroka; are eite a ita laua la sukavaipea meha. 38Lea mea are mō ōpe, Papuvita e, ara sukaerereai, aeata are sukakoka avi arero maeatipe reha.
39Soka Iesu mō ōpe, Ara karu la seseōvi tava miarai vei mearovaeka voa foreri mea. Ofae eavai auke leita lea karu la lei ofae eavai vei, aea ofae eavaita lea karu la lei ofae kuku leiti vei. 40Are ita fareho peiape Farisea karu hea lea o la mapi arero mō ōpe, Lei, ela ta ofae kuku ei? 41Iesu erero mō ōpe, E ofae kuku leitita, a—, e kaiae ita levi leiti lare. A—, ipi e mō aritore, Ela ofae ovava, lea vei eve kaiae laisisea.
Iliyochaguliwa sasa
Ioane 9: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
