Aposetolo 12
12
Heroda sa ekalesia la hasiavōpe mai
1Lea soa voa King Heroda are ivara eokere ita ekalesia karu hea la hasiavaiape. 2Are Iakobo, Ioane ve paua la marehaukaita soi sa suka paeōpe. 3Are Iuda karu la ofae eovi, ere hailareva lea vei leipe, are Petero ta mai paea fasōpe. Fefesi auke Faloa la lōpe soa reha. 4Soka are arero fasi dibura uvi voa sasauka, maola karu sixteen sa lei arero kiva leiti vei tivi erero miarōpe. Lea maola karu erero faeafaea a’ ere firu orakaraka lei elore elore soasoa voa ovi kiva leiti vei. Heroda ve haiiri Foapaita Sosoka roroka lei, Petero la karu ve soso voa lariōvi pisiri voa lōri forerai vei.#Eso 12:1–27 5Soka Petero dibura uvi voa fasi peiape; a—, ekalesia karu ta ere Ualare la are vei loki taupi leiape.
6Soka Heroda Petero la maria voa lariōvi forerai haikaeōpe lea sare ve omopa faita voa, Petero auri horou orakoria sa fasi, maola karu oraka ve aru voa ivutu eaea, aea kiva karu ta utape voa soi pepea dibura la kiva leiape. 7Soka Papuvita ve aneru arero tai utohoa forera pōvi, aea ovava areve lalava voa haeōpe reha. Haea aneru Petero ve kararapa la totoa, arero lei itakaeri a’ mō ōpe, Lavelave itoia. Soka areve mai fasōpe auri horou oraka sisapi oaipe reha. 8Aneru arero ta mō ōpe, Ave maea puta fasi, tamaka mora voa mopaia. Are lōri leipe. Aite aneru arero mō ōpe, Ave arori puta ta mopi, araro aitetaia. 9Soka are arero aitetei, maria voa terōpe. Aneru sa leiape lea etau are ore kofa leiti kao, areve haiiri are haiako auka la paea eavaita varo. 10Ereuka omopa kiva karu firu, aeata aite kiva karu firu la orapa vovo isei isei, karikara voa foreraita auri utape voa foreri, lea utape ta ereuka vei elore maea au fapōpe. Ereuka maria voa te, otiharo farakeka voa lariōvi te orapōpe soa, aneru arero utohoa kiripōpe.
11Soka Petero areve haiiri kofa ata ovava lei mō ōpe, Faitora ara ore kofa loi, Papuvita areve aneru Heroda ve mai voa, aeata Iuda karu sa leiti vei haikaeaipeta lea etau foromai voa araro fareōvi pisiri voa foreraita meha.
12Lea la ore lei, are Maria ve uvi voa terōpe; lea Maria are Ioane Mareko ve lou. Lōvoa karu rauapo Ualare la Petero vei loki leiti vei kokoruka aipepeiape. 13Are maria utape la totoōpe lea mea, tivi mori rare Roda are utape fapai vei kotipe. 14Koti are Petero ve o ape la mapi, ore lei, hailareva lea vei lei, utape fapai auke ita, iri voa soea kei, Petero maria utape ve kōu‐aite voa soi peiape o la au moipe. 15Ere arero mō ōpe, A maeakakare! A—, are o serea a’ mō ōpe, Okofa! Ere tava o mō ōpe, Lea areve ove.
16Soka Petero lea utape la totoa totoa a’, ere utape la fapi, arero ofae eovi haihava foromai leipe. 17Are erero o tororoai vei mai sa sasaukōpe; sasauka are Papuvita sa arero dibura uvi voa lariōvi maria voa forerōpe o la erero omoipe. Are ta mō ōpe, Mea fari Iakabo aea paumarehari ita la omoia. Soka are oti haria voa au terōpe.
18Mea ōpōpe soa maola karu haiara lei topiferavōpe, Petero leafeare loloi? 19Heroda o mei ere arero eli vei, a—, ere arero eavai auke leipe lea soa voa, are dibura kiva karu la kaiae seseōvi erero o a’ erero paeai o moipe.
Lea ve aite voa Heroda Iudea kiripi Kaisarea voa fauka lōvoa pavōpe.
Heroda ve opai
20Heroda are Turia karu aea Sidono karu ita la kitou rovaea leipe; lea vei ere karu firu Heroda la ofae eavai vei kotipe. Ere omopa Balaseto, king ve uvi la kiva harofave vita la kurea, aea aite ere Heroda la tairu vei loki leipe, ipi ereve karu larietau king ve mea voa ilala lei maravaiape eavia.
21Soka loki lei kekese leipe sare voa Heroda areve king ve puta mopi, terona voa avi, erero itoro ōpe. 22Itoro a’, karu mō isa moipe, Lea o karu ve o kao a—, lea o ape ualare aea sa moi. 23A—, Papuvita ve aneru arero utohoa toōpe, ipi are Ualare la maeati auke eavia. Lea mea seseve sa areve maea la totori la’ la’ are opōpe.
24A—, Papuvita ve o asi rovaea au leiape.
25Soka Banabasi auka Saulo ita ereukave tivi roroka lei, Ioane Mareko la lariōvi, Ierusalema kiripi Antioka voa ata kerori kavōpe.
Iliyochaguliwa sasa
Aposetolo 12: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
