Aposetolo 11
11
Iuda ekalesia karu ve o haiiri
1Soka Iudea ve soa voa pepeita aposetolo karu aea paumarehari ita, toruipi haria karu ere ta Ualare ve o la sukaerereōpe lea o la mapōpe. 2Mapi, Petero Ierusalema voa ata patei forerōpe lea mea, peritome leipe lea firu karu arero o haiiri mō ōpe, 3A peritome leiti auke karu ve oti voa kei pōvi ere ita farehoria ta larietau lalape.
4A—, Petero lea fari foromai soa oarehōva etau soa sisa etau voa erero mōfeare moipe, 5Ara Iopa karikara voa pea Ualare la loki leipe soa, ara haiako auka paea, etau auvia rovaea feare lalave orakaraka mea voa paraea faukōpe la ofae eovi, aea lea etau araro tai faukōpe. 6Ara ofae koko fofoisa animala merava hariaharia, aea tititaita etau aea fufukaita ori ita la eavōpe. 7Ara i ta mapi araro mō ōpe, Petero e, itei, savi laria. 8A—, ara mō ōpe, Papuvita e, lōfeare kakaeite; ipi etau merava aea ape ōta etau arave ape voa oropai sore. 9A—, i kauri voa orakori soa tava o mō ōpe, Ualare sa ovava leitita lea etau a arero merava rare levi aria. 10Lōri mai soa oroisoria lei lei, lea etau foromai kauri voa haiovi pataipe. 11Lea soa kofa voa karu oroisoria ela pepeiape uvi voa au forerōpe; ere Kaisarea voa itapi ara vei kotipe karu. 12Soka Arahoha araro o moipe, ara ere ita horahora auke ita kavai vei. Mea Iopa paumarehari six ta ara ita farehoria kei, aea ela lea vita Koneliusi ve uvi voa oropōpe. 13Are fari elaro o moipe, ipi are aneru aea areve uvi iri voa soi peiape la eovi, aea are mō ōpe, Iopa voa itapaia, Simona, rare aeata Petero la lariōvi kotia; 14are ovoro aro omoi roi, aro aea ave uvi karu ita farehoria la lei makuri leiti vei. 15Soka ara laua fapi sukavōpe soa, Safu Arahoha Lareva erero tai arori voa faukōpe reha, oarehōva soa usoso ereitaro tai faukōpe lea mai feare. 16Lea mea ara Papuvita sa mōri moipe o la haikaeaita reha, Ioane ero ma sa bapatiso leiape, a—, ero Safu Arahoha Lareva sa bapatiso leiti roi.#Apos 1:5 17Soka Ualare sa areve au miaraita meru erero miarōpe reha, usoso omopa soa ereita Papuvita Iesu Keriso la mapi sukaerereōpe lea soa, ereitaro ta miarōpe lōfeare. Aita! ara ita leisa, ara Ualare la sukavuteai vei ei?
18Ere lea o la mapi, o ata omoi kao. Ere Ualare la maeati mō ōpe, Soka Ualare toruipi haria ta loita meha, ere haiiri kerori makuri lōri ovai vei.
Ekalesia Antioka voa
19Soka Setefana la paeōpe soa aea ekalesia la irori mai ita hasiavōpe lea mea, Iesu la sukaerereaita karu oti hariaharia voa liōvea toa fafarapōpe. Karu hea soa Fenisia aeata Kupero aeata Antioka voa fafarapi, Iuda karu la haria Ovoro Lareva itoro ape.#Apos 8:1–4 20A—, lea karu hea, Kupero aea Kurene karu, ere Antioka voa forerōpe lea mea ere toruipi‐ipi hariaharia karu ta Papuvita Iesu ve fari la satiriaraiape. 21Papuvita ve mai ere ita fareho lei, karu sitavu lea o la sukaererea Papuvita voa kerori topiaraiape.
22Lea leipe mai ve fari Ierusalema voa pepeita ekalesia karu sa mapi, ere Banabasi la Antioka voa itapōpe. 23Are kei foreri, Ualare ve maeaforoe ve meru ere voa ofae eovi, are hailareva lei, erero foromai la kureōpe ere Papuvita voa lulalula haiiri auke ita topiari pepei vei. 24Ipi Banabasi are ta karu lareva, Safu Arahoha Lareva aea Iesu la sukaerereaita haiiri ita ovi soa’ meiape. Soka karu sitavu Papuvita voa topiarōpe reha.
25Aite Banabasi Tareso karikara voa kavōpe Saulo la eli vei. 26Are arero sukaeōpe lea mea arero Antioka voa lariōvi koti foreri, ereuka tivi Antioka ekalesia ita farehoria sisoro farakeka voa leiape, karu rauapo la satiriaiape. Lea soa voa Iesu la sukaererea roroaiape karu ve rare Keristiana la aravōpe; lea o Antioka voa elori forerōpe.
Agabo ve o posera vei
27Soka lea soa voa peroveta karu hea Ierusalema kiripi kei Antioka voa forerōpe. 28Ereve karu farakeka aea rare Agabo itei, Arahoha sa arero lei ore leipe lea vei posera mearovaeka foromai voa forerai o everori omoipe. Lea posera Klaudio sa Roma basileia ve harofave leipe soa voa forerōpe.#Apos 21:10 29Soka Iesu la sukaerereaita karu foromai haiiri kekese leipe, farafarapo usoso ereve elore elore etauroro ve rauapo feare, toaraita meru etau Iudea voa pepeiape paumarehari la toarai vei itapai vei. 30Ere lōri lei lei, ereve moni kekese lei ovi Banabasi auka Saulo ita ve mai voa miōri itapōpe, ekalesia opasora‐sora la miarai vei.
Iliyochaguliwa sasa
Aposetolo 11: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
