मत्ती 9
9
लकवै गै रोगी नै ठीक करणो
(मरकुस 2:1-12; लूका 5:17-26)
1फेर यीसू किस्ती पर चडगे आपगै गाम आ'ग्यो। 2बठै कीं लोग एक लकवै गै रोगी नै मांची पर सुणागे बिंगै कनै ले आया। बण बांगो बिस्वास देखगे बिनै केयो, “हे बेटा हिम्मत राख, तेरा पाप माफ हो'ग्या।” 3जद केई नेम विधान सिखाण आळा आपस में केण लागग्या, “ओ आदमी परमेसर गी बेजती करै।” 4जद यीसू जाणग्यो कै ऐ आपगै मन में के सोचै अर बानै केयो, “थे गळत क्यामी सोचो?” 5सोरो है के ओ केणो तेरा पाप माफ हो'ग्या अर ओ केणो कै खड़यो हो अर अठुं चाल। 6पण अब थानै ठा लागज्यैगो कै मिनख गै बेटै कनै धरती पर पाप माफ करण गी ताकत है। 7जद यीसू बिं रोगी नै केयो, “खड़यो हो अर आपगो माचो चकले अर घरे उड़जा। अर बो रोगी खड़यो होगे घरे उड़ग्यो।” 8जद लोग ओ देखगे भोत हेरान होया अर परमेसर गी बडाई करण लागग्या कै ईं मिनख नै हिस्यो हक दियो है।
मत्ती गो बुलायो जाणो
(मरकुस 2:13-17; लूका 5:27-32)
9यीसू जद जाण लागरयो तो रा में चोकी पर बेठयै एक आदमी नै देख्यो झिको कर लेवै हो। बिंगो नाम मत्ती हो। यीसू बिनै केयो, “मेरै लारै आ'ज्या।” जदी बो हातो हात बिंगै लारै चाल पड़यो। 10फेर यीसू जद मत्ती गै घरे भोत सारा कर लेण आळा अर पापी लोग अर आपगै चेला सागै रोटी जिमै हो। 11जद फरीसियां ओ देखगे चेला नै पूछयो, “थारो गुरू कर लेण आळा अर पापी लोगां सागै क्यामी जिमै?” 12ओ सुणगे यीसू बोल्यो, “चंगै भलै आदमी नै डाक्टर गी लोड़ कोनी होवै। बीमार नै लोड़ पडै़।” 13ईंखातर थे जा'गे सासतर में ईं बचन गो मतलब समझो। मैं बलिदान कोनी दया चावूं। मैं धरमी लोगां नै कोनी, पापी लोगां नै बचाण आयो।#होसया 9:13
14फेर बतिस्मो देण आळै यूहना गै चेला आ'गे पूछयो, “म्हे अर फरीसी लोग बरत क्यामी राखां? थारा चेला क्यूं कोनी राखै।” 15यीसू बानै केयो, “जद तांई बीन बरातियां गै सागै है बे दुख कोनी करै। पण बो दिन आवैगो जद बीन बरातियां कनै कोनी हो'सी जद बे बरत करैगा। 16नुअ कपडै़ गी कारी कोई पुराणै कपडै़ में कोनी लगावै क्यूंकै बा कारी बिं कपडै़ पर भेळी होगे ओर पाड़ देवै। 17नुओ दाखरस पुराणै माटला में कोनी घालै क्यूंकै बे माटला फूठज्यै अर दाखरस ढुळज्यै। ईंखातर नुओ दाखरस नुअ माटला में भरिजै जिंऊं बे दोनूं बचया रेवै।”
मरेड़ी छोरी अर बीमार लुगाई
(मरकुस 5:21-43; लूका 8:40-56)
18जद बो बाऊं बात करण लागरयो तो जदी एक सतसंग घर गो मुख्य बिं कनै आयो अर झुकगे बिनती करण लागग्यो। मेरी बेटी मरगी। थे चालगे बिंगै सिर पर हात रख दैयो तो बा जींवंती होज्यैगी। 19जद यीसू आपगै चेलां सागै चाल पड़यो। 20बिं भीड़ में एक लुगाई ही बिनै बारा सालां ऊं लोइ पड़ण गो रोग हो। बा यीसू कनै आयी अर होळै'सी बिंगी चादर गै पलै गै हात लगायो। 21बा सोचै ही कै जे मैं इंगै पलै गै हात लगा दैयूं तो ठीक हो जाऊंगी। 22यीसू मुड़गे देख्यो अर बिनै केयो, “बेटी, हिम्मत राख, तेरै बिस्वास तनै ठीक कर दी,” अर बा बिं टेम ई ठीक होगी। 23फेर बिं मुख्य गै घरे पूग्यो तो बण देख्यो कै मरेड़ी छोरी खातर सारा लोग दुख करण लागरया है। 24जद बण लोगां नै केयो, “सारा बारै जाओ, छोरी मरेड़ी कोनी सूती है।” ओ सुणगे लोग बिं पर हांसण लागग्या। 25फेर बो सारा नै बारै घालगे छोरी गै कमरै में जा'गे बिंगो हात पकड़गे बिनै खड़ी कर दी। 26ऐ बातां बठै सारै इलाकै में फेलगी।
दो आंधा नै आंख देणी
27यीसू जद बठूं चाल पड़यो तो दो आंधा आदमी लारै जोर जोर गा हेला मारण लागग्या, “हे दाऊद गा बेटा, म्हारै पर दया कर।” 28यीसू जद घरे आ'ग्यो तो बे दोनूं बिं कनै आया। यीसू बानै केयो, “थानै मेरो पर भरोसो है, के मैं थानै आंख दे सकूं?” बां केयो, “म्हानै भरोसो है।” 29जद यीसू बांगी आंख्या पर हात राखगे केयो, “थारै खातर बिंयाई होवै जिंया थारो बिस्वास है।” 30अर बे ठीक हो'ग्या। जद यीसू बानै केयो कै, “ईं बात गो किनी ठा नई लागणो चईयै।” 31पण बां बठूं जा'गे आ बात सारा नै बता दी।
एक गूंगै नै ठीक करणो
32जद बे दोनूं बठै जाण लागरया तो केई लोग एक गूंगै आदमी नै यीसू कनै ल्याया, बिमै ओपरी बडे़ड़ी ही। 33जद यीसू बिमू ओपरी काड दी तो बो बोलण लागग्यो। जद लोग हेरान होगे केण लागग्या इसराएल में हिसी बात पेलां कदी कोनी होयी। 34पण फरीसी केण लागग्या, “ओ ओपरी सैतान गी मदद ऊं काडै।”
35यीसू सारा गामां अर नगरां में फिरतो रेयो अर बांगै सतसंग घरां में संदेस देवंतो रेयो। सुरग गै राज गो परचार करतो रेयो। अर लोगां गी हर एक दुख बीमारी नै दूर करतो रेयो। 36जद बण भीड़ नै देखी तो बिनै तरस आयो क्यूंकै बे बां भेड़ां गै बरगा हा झिकां गो कोई रुखाळो कोनी हो अर भटकेड़ी ही। 37जद यीसू मसी आपगै चेला नै केयो, “खेत पकेड़ा तो भोत है। पण मजदूरिया थोड़ा है।” 38ईंखातर खेत गै मालिक ऊं बिनती करो कै बो आपगो खेत बाडण खातर मजदूरिया घालै।
Iliyochaguliwa sasa
मत्ती 9: BGQ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2023 (Active), Wycliffe Bible Translators, Inc. All rights reserved. © WIn Publishing Trust
