मत्ती 10

यीसू गा बारा चेला

(मरकुस 3:13-19; लूका 6:12-16)

1यीसू आपगै बारा चेलां नै बुला'गे बानै ओपरी काडण गो अधिकार दियो अर लोगां गा दुख दरद दूर करण गो अधिकार दियो। 2बां बारा खास चेला गा ऐ नाम हा: सारा ऊं पेलां समौन झिको पतरस कुहावै, अर बिंगो भाई अंद्रियास, जब्दी गो बेटो याकूब अर बिंगो भाई यूहना, 3फिलिप्पुस, बरतुल्मै, थोमा, कर लेण आळो मत्ती, हलफई गो बेटो याकूब अर तदियास, 4समौन जिलौत अर यहूदा इस्करियोति झिको यीसू नै पकड़ाण आळो हो। 5आं बारा चेला नै आग्या देगे भेज्या अर केयो, “गेर यहुदियां में ना जाईयो अर सामरिया गै कोई बी नगर में ना जाईयो। 6पण इसराएल गै परिवार गी गमेड़ी भेड़ा कनै जाईयो। 7अर चालता चालता परचार करो कै सुरग गो राज नेडै़ आ'ग्यो। 8मरेड़ा नै जींवंता करो, कोढिया अर बीमारा नै ठीक करो अर ओपरी आळा ऊं ओपरी काडो। थानै मुफ्त में प्रभु गी आसिस अर सकती मिली है। ईंखातर दूसरा नै मुफ्त में बांटो। 9थे थारा बटुवां में सोनो, चांदी अर ना तांबो राखियो। 10सफर में सागै झोळो बी ना राखियो अर ना दो कुड़ता राखियो, चप्पल अर लाठी बी ना राखियो क्यूंकै मजदूर नै बिंगी रोटी मिलणी चईयै। 11थे जद बी कोई गाम में जाओ तो बठै देखो बिस्वास गै लायक कुण है। अर बठै ई रुक्या रेईयो जद तांई बठूं ना जाओ। 12थे किंगैई घरे जावो तो बानै आसिस देओ अर केओ थानै सांती मिलै। 13जे घर गै लोगां में कोई धरमी होयो तो थारो आसिरवाद बांगै सागै रेसी नई तो पाछो थारै कनै आज्यासी। 14जे कोई थारो आदर मान अर थारी बात ना सुणै तो बिं घर अर नगर नै छोड़ दैयो। अर थारै पगां गै लागेड़ी माटी बठै ई झाड़ देईयो। 15मैं थानै साची केऊं, जद न्याय होवैगो बिं दिन बिं नगर गी दसा ऊं सदोम अर अमोरा नगर गी दसा भोत आच्छी हो'सी।

आण आळो संकट

(मरकुस 13:9-13; लूका 21:12-17)

16सावधान रेईयो। मैं थानै भेड़ा गी तरियां भेड़ियां गै बिचाळै भेजण लागरयो हूं। सांप गी तरियां चलाक अर कबूतर गी तरियां भोळा बणगे रेईयो। 17लोगां ऊं चोकस रेईयो क्यूंकै बे थानै पकड़गे यहुदी पंचायत में सोंप दैयगा अर आपगै सतसंग घरां में कोड़ा ऊं कुटवासी। 18थानै राजा गै सामै पेस करैगा क्यूंकै थे मेरा चेला हो। पण थानै टेम मिलैगो कै थे बांगै अर गेर यहुदियां सामै मेरै बारै में गवाई देईयो। 19जद थानै पकड़ लेवै तो घबराईओ ना क्यूंकै परमेसर थानै बता दैयगो कै थानै के करणो अर के बोलणो है। 20पण याद राखीयो, बोलण आळा थे कोनी होस्यो परमेसर गी पवितर आत्मा थारै माऊं बोलैगी। 21भाई भाई नै अर मां बाप आपगै टाबरां नै अर टाबर आपगै मां बापा नै पकड़वागै मरवा देवैगा। 22मेरै नाम ऊं लोग थारूं बेर करैगा। पण आखर तांई टिक्या रेवोगा तो जद ई थारी मुकती हो'सी। 23जद थानै एक नगर गा लोग सतावै तो दूसरै नगर में भाज जाईओ। मैं थानै साची केऊं कै जद मिनख गो बेटो दुसर आज्यैगो जद तांई थे इसराएल गै सारा नगरां में जा कोनी सकोगा। 24चेलो आपगै गुरू ऊं मोटो कोनी हो सकै अर ना'ई दास आपगै मालिक ऊं। 25चेलै नै आपगै गुरू गै बराबर अर दास नै आपगै मालिक गै बराबर होण में संतोस राखणो चईयै। जद बे घर गै मालिक नै बालजबूल केवै तो बो घर में रेण आळै लोगां गै सागै भोत माड़ो बरताव करसी।

किऊं डरा?

(लूका 12:2-7)

26ईंखातर लोगां ऊं ना डरियो झिको कीं लुकेड़ो है सामणै आसी। अर हर एक चीज झिकी लुकेड़ी है एक दिन प्रकट हो'सी। 27मैं अंधेरै में थानै झिको कीं केण लागरयो हूं, मैं चाऊं कै थे बिनै चानणै में केओ। झिको कीं मैं थारै कान में केऊं मैं चाऊं कै थे बिनै कोठै पर चढगे केओ। 28बाऊं ना डरो झिका थारै सरीर नै खत्म करैगा। पण बे थारी आत्मा नै कोनी मार सकै। बिं परमेसर ऊं डरो झिको थारै सरीर अर आत्मा दोनां नै नरक में रेड़गे खत्म कर सकै। 29एक टकै गी दो चिड़ियां मू एक बी बिना परमेसर गी इच्छा बगेर नीचै कोनी पड़ सकै। 30पण थारै तो सिर गा बाळ तांई गिणेड़ा है। 31ईंखातर डरो ना। थे बां चिड़ियां ऊं भोत जादा किमती हो।

32झिको मनै सारां गै सामै मानैगो मैं बी बिनै सुरग में पिता परमेसर गै सामै आपगो मानूंगा। 33झिको मनै सारां लोगां सामै ना मानैगो मैं बी बिनै सुरग में पिता परमेसर गै सामै कोनी मानूंगा।

34ओ ना समझो कै मैं धरती पर मिलाप कराण आयो हूं। पण मैं मिलाप कराण कोनी तलवार चलाण आयो हूं। 35मैं ईंखातर आयो हूं कै मिनख नै बिंगै पिता ऊं अर बेटी नै बिंगी माऊं अर बहु नै बिंगी सासूं ऊं न्यारी कर दैयूं।

36आदमी गा दुसमण बिंगै घर गा ई लोग होवैगा।#मीका 7:6 37झिको आपगै मां बाप नै अर झिको आपगै बेटा बेटी नै मेरूं जादा प्यार करै बो मेरो कोनी बण सकै। 38मेरै खातर झिको दुख सेण नै तैयार कोनी बो मेरो चेलो कोनी बण सकै। 39बो आदमी झिको आपगो प्राण बचाणो चावै बो बानै खो देवैगो पण झिको मेरै खातर प्राण खत्म करैगो बो जीवन पावैगो।

40झिको थारो आदर करै बो मेरो आदर करै अर झिको मेरो आदर करै बो परमेसर गो आदर करै झिकै मनै धरती पर घाल्यो है। 41झिको परमेसर गी बात बताण आळै नै परमेसर गी बात बताण आळो समझगे आदर करै बिनै बो ई फळ मिलैगो झिको परमेसर गी बात बताण आळै नै मिलै। थे एक भलै आदमी नै आच्छो समझगे बिंगो आदर करो तो थानै बो ई फळ मिलैगो झिको बिं भलै आदमी नै मिलैगो। 42जे कोई आ छोटा मू मेरो चेलो जाण गे बिनै पाणी पियासी तो मैं थानै साची केऊं बिनै बिंगो फळ जरूर मिलसी।”

Iliyochaguliwa sasa

मत्ती 10: BGQ

Kuonyesha

Shirikisha

Nakili