Lukə 24
24
Zezu car mbə mara
(Mat 28.1-10; Mak 16.1-8; Zaŋ 20.1-10)
1Dimaŋsə, kə bəka ceɗ, rawkwa 'ya ta vun zra kə mur ɓay urdi məni handay gila' rumu. 2Handay ta za' gway' mə ta' vun zra ɓuru ta kə hay'i. 3Handay cok ta han, ama handay cu za' tu Bârî Zezu han mi. 4Handay cu we i handay ɗik ma su mi, kəri rum, njiwkwa hoɓ ge mbraw mə wəɗi wəɗi mbə car hay' ndaya. 5Wəlok gi nday juk ɓay handay no' wa ta nya. Zə rum, njiwkwa kuni la' ne ndaya: «Zə mi hi wə keɓ swə mə kə i wə du sum mar su? 6Mum cu ti mi, ama mum car mbə mar si. I dla' wa dan məni mum in ne ni kəri məni mum ke wə nya Galile ɓo na, 7mum ini: "Say sôwâ də ar Vay sumra' də ɓa sôwâ məni wə gi kwa mə bro', handay də um gay' də wa gu ɓay mum də car mbə mar kə bəka hinji' rumu#Mat 16.21; 17.22-23; Mak 8.31; 9.31; Luk 9.22; 18.31-33."»
8Handay dla' wa dan Zezu. 9Handay 'ya ar vun zra ɓay ta in dan rum daŋ' ne kə sum ta zə Zezu mə guɓ wa ɗaw kə sôwâ məsin daŋ'ŋ. 10Rawkwa məni in dan rum ne kə sum sin kuni ni na: Mari mə so Magdala kə Zanə ɓay Mari mə ya Zakə kə rawkwa məsin məni kə ndaya. 11Ama sum sin kar dan məni handay wə in nə dan mə uray, ɓay handay cu ve dan rum mi. 12Kəri rum, Piyer car ne ta vun zra. Mum goɓ kar ri ta han ɓay mum cu we kwa məsin mi, say zim mə galɓat məni handay ku' mar kə ndi ɗəlak cin wə hana taw, ɓay mum faŋ ta so um zə kwa rum jin' wa ne num juku.
Wə vari so Emayus
(Mat 16.12-13)
13Kə bəka rum, sôwâ hoɓ du nday wə də so mə ɗe kə Emayus. So rum seŋ kə so Jeruzalem i kilometrə guɓ wa ɗawa. 14Handay wə ge dan wa kwa daŋ' məni ke gi. 15Kəri məni handay wə ge dan kə way dan mbok nday, Zezu kə tu rum mbə hay' nday ɓay tle vari kə ndaya. 16Handay we num, ama kwa məsin tak nday dan we i mum na. 17Zezu ci vun ndaya: «Hi wə ge dan kə nji mbok nji wa dan mi kəri məni hi wə ta vari su?» Handay faŋ ca sototo. 18Swə ɗaw du nday, um ɗe kə Kleyopas, ci vun rumu: «Ha ɗaw wə du sôwâ so Jeruzalem məni cu we kwa məni gi du bəka məni kuni mi su?» 19Mum ci vun ndaya: «Kwa mi kuni gi su?» Handay ɗam vun rumu: «Kwa məni gi wa Zezu mə so Nazaret. Mum nə ke bə ka' dana. Mum kə gbəgboŋ du sin gi kə du dan ge kor Ifray kə sôwâ daŋ'ŋ: 20Sum rôwâ mə du sum po' fur mba kə sum rôwâ mba ar num kuni kədan sum ɓok dan ɓok dan mar wa rum, ɓay handay gay' num ta wa gu. 21Namba ve ɓay ɗik i mum nə swə məni wə də tumwa sôwâ Israyel. Ama kə ndi nə daŋ', kwa rum gi bəka hinji' tama. 22Kərem, rawkwa məsin wə du mba mbə jin' wa mba kə dan ndaya. Handay ta vun zra kə bəka ceɗ, 23ama handay cu za' mar um mi, handay faŋ gewa mbə in ne mba i handay we sum sin Ifray mbə hay' nday ɓay la' ne nday i mum kəta' kə i. 24Sôwâ məsin wə du mba 'ya ta vun zra ta', ɓay handay ta za' kwa rum ce' ndə məni rawkwa kuni ini. Ama mum, handay cu we num mi.»
25Zezu faŋ la' ne ndaya: «Hi sôwâ mə dan wa! Hi sôwâ məni herere kə ve dan daŋ' məni sum ka' dan ka'a! 26Kris cu də ce boni rum, ɓay faŋ ze ri mbra' um mi su?» 27Kəki rum, mum pay zu dan məni Ɗerwa Ifray wə in wa rum daŋ' ne ndaya. Mum təŋ kə ɗerwa Moyizə hâ day ɗerwa sum ka' dan daŋ'ŋ.
28Kəri məni handay mbə day həre' kə so məni handay wə də han, Zezu gi ce' ndə məni mum wa' də kofo. 29Ama handay tak num kə ini: «A suk kə mba, fəta so' si, ɓay ri wa' dli ye.» Zə rum, mum ze ta so kədan mum suk kə ndaya. 30Mum suk vun tablə kə nday, mum tle vun tləpe' fun ɓay gi soko ne kə Ifray, mum faŋ jak vun tləpe' fun rum ɓay ne ndaya. 31Kəri rum, i nday ar ɓay handay we num, ama mum faŋ tuɓ i nday 'yeŋe. 32Handay in kə nji mbok nji: «Kəri məni mum ge dan kə mba ɓay pay zu dan Ɗerwa Ifray ne mba wə vari, dan rum cu car kəɗam wə vunduk mba mi su?»
33Handay car kəkor sar ɓay faŋ ta so Jeruzalem. Handay ta za' sum ta zə Zezu mə guɓ wa ɗaw ɓa wə han kə sôwâ məni kə nday, 34məni wə ini: «Kəzin' Bârî car mbə mar si, Simoŋ we numu!» 35Ɓay sôwâ mə hoɓ kuni in zu dan kwa məni ke gi wə vari kə vari məni handay we Zezu kəri məni mum jak vun tləpe' fun ne ndaya.
Zezu ta' tu rum ne kə sum ta zə rumu
(Mat 28.16-20; Mak 16.14-18; Zaŋ 20.19-23; Sin 1.6-8)
36Kəri məni handay wə in dan də in ɓo, Zezu kə tu rum mbə car du nday ɓay la' ne ndaya: «Heɓ ke kə ri.» 37Vunduk par nday ɓay handay ne wəlok juk, zə handay ɗik i handay we usiya. 38Ama Zezu la' ne ndaya: «Zə mi hi wə ne wəlok su? Zə mi hi kə way dan wə vunduk ri su? 39I kar ɓa rin kə sem rini: Na na. I ɗak nan ɓay i kar nan, zə usiya cu ke kə tlew kə so mi, ama hi we na kə ndi.» 40Mum in ndəna' kə ta' ɓa rum kə sem rum daŋ' ne ndaya. 41Handay cu gak ve dan rum ga'ri sar mi, zə vunduk nday tuk kəɗam juk ɓay dan rum jin' wa ne ndaya. Zə rum, Zezu ci vun ndaya: «Hi kə kwati ti kəta' su?» 42Handay pok keve mə həhaw ne numu. 43Mum tle keve nə ɓay ti i ndaya. 44Mum faŋ la' ne ndaya: «Dan məni na in ne ni kəri məni na ke kə ri ɓo nə ni na: Kwa daŋ' məni wây' wə wa rin wə du ɗerwa dan dlay Moyizə kə du ɗerwa sum ka' dan ɓay du ɗerwa nyem daŋ' wə gi ye!» 45Mum faŋ ar dan ɗik wa nday kədan handay mun zu Ɗerwa Ifraya. 46Ɓay mum la' ne ndaya: «Dan məni wây' nə ni na: Kris də ce boni, ɓay kə bəka hinji' rum, mum də car mbə mara. 47Ɓay sôwâ də ka' dan kə semɗe rum wə nya daŋ', wə təŋ so Jeruzalem kədan handay ɗe sôwâ faŋ vunduk nday ɓay Ifray vrum kwa mə bro' ndaya. 48Hi sum we njeŋ dan rumu. 49Ɓay na də sin kwane məni Ba man kawvun kə ri wa rum mi ne. Ama say i gay' wə so Jeruzalem hâ gbəgboŋ mə wafray nə dam mbə wa ri#Sin 1.4.»
Ifray tle Zezu ta wafraya
(Mak 16.19-20; Sin 1.9-11)
50Kəki rum, Zezu wur mbə so kə nday ta ga' so Betani, wə han, mum ra' ɓa rum gun wa nday ɓay kuswa' ndaya. 51Kəri məni mum wə nday kuswa' ɓo, mum ɓul nji kə nday, ɓay Ifray tle num ta wafraya#Sin 1.9-11. 52Mə handay, handay kuduk ta nya kor um, bur num ɓay faŋ ta so Jeruzalem kə tuk kəɗam juku. 53Handay wə də so po' fur sôwâ Zuwif bəka daŋ' kə bur Ifraya.
Iliyochaguliwa sasa
Lukə 24: KMN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Le Nouveau Testament et Psaumes en Peve © Alliance Biblique du Tchad, 2014.
