Zaŋ 9
9
Zezu ar i ne kə dəŋâra
1Kəri məni Zezu wə pâ, mum we swə ɗaw məni vra' kə dəŋâra. 2Sum ta zə rum ci vun rumu: «Bə ta' kwa, zə mi swə məni nə vra' kə dəŋâr su? Zə kwa mə bro' mə kəca um su? Ko mə sôwâ um su?» 3Zezu ɗam vun ndaya: «Mum cu dəŋâr zə kwa mə bro' mə kəca um ko mə sôwâ um mi. Ama mum dəŋâr kədan sôwâ gak we sin məni Ifray wə də gi wa rumu. 4Zə fəta kəta' ɓo, say mə gi sin swə məni sin nana: Dukri mbə həre', ɓay wə du rum, swə ɗaw cu gak gi sin mi. 5Kəri məni na kəta' wa nya, na ri mə ɓu zə sôwâ nya#Mat 5.14; Zaŋ 8.12.» 6Kəki məni Zezu in dan rum, mum tup mê' ta nya ɓay ray nya kî kə ndi. Mum ma' i dəŋâr kə ndi, 7ɓay la' ne numu: «A də kol i ru wə bara mə ɗe kə Silowe.» Semɗe rum wa' dan ini: «Bə sini». Dəŋâr nə 'ya ta han, mum kol i rum, ɓay kəri məni mum faŋ gewa, mum təŋ kə weri.
8Jik um kuni kə sôwâ məni we num wə o kwa ɓa', ci kuni vunu: «Swə məni nə, swə məni ke suk wə o kwa nə, cu mi su?» 9Sôwâ məsin ini: «Mum na.» Sôwâ məsin ini: «Â â, mum cu mi, ama mum ra' nji kə rumu.» Ɓay swə nə ɗama: «Na na.» 10Handay ci vun rumu: «Gi ma i ru ar nə su?» 11Mum ɗam vun ndaya: «Swə mə ɗe kə Zezu ray nya kî, mum ma' i rin kə ndi ɓay la' ne nana: "A də bara mə ɗe kə Silowe ɓay kol i ru wə hana." Na ta wə han ɓay kəki məni na kol, na təŋ kə weri.» 12Handay ci vun rumu: «Swə nə wə ka su?» Mum ɗam vun ndaya: «Na cu we mi.»
Farisiyen ci vun swə məni ke dəŋâra
13Kəri rum, sôwâ mbə kə swə məni ke dəŋâr nə wə kor kul sôwâ Zuwif mə ɗe kə Farisiyen. 14Fəta məni Zezu ray nya ɓay ar i ne num kə ndi nə fəta pemây sôwâ Zuwif. 15Zə rum, kul sôwâ Zuwif mə ɗe kə Farisiyen ci vun swə nə wa kwa məni gi kədan mum wə weri mgbaŋ ni na. Mum la' ne ndaya: «Mum ma' nya ta ne nan i kî, na faŋ kol i rin, ɓay mgbaŋ ni nə na wə weri.» 16Sôwâ məsin mə du kul sôwâ Zuwif mə ɗe kə Farisiyen la' ne numu: «Swə məni gi kwa mə ndani nə cu car mbə hay' Ifray mi, zə mum cu ta zə dan dlay fəta pemây sôwâ Zuwif mi.» Ama sôwâ məsin du nday ini: «Swə nə la' bə gi kwa mə bro' si, gi ma mum gak gi yew məni kuni su?» Ɓay handay ɓul nji wa dan rumu. 17Zə rum, kul sôwâ Zuwif mə ɗe kə Farisiyen ci vun swə məni ke dəŋâr nə kəreme: «Ɓay mə ha, ha in dan mi wa swə məni ar i ne nu nə su?» Mum ɗam vun ndaya: «Mum bə ka' dan na.» 18Ama sôwâ Zuwif cu bə ve i mum ke dəŋâr ɓay mgbaŋ ni nə mum gak weri nə mi, hâ handay ɗe sôwâ umu. 19Kədan handay ci vun ndaya. Zə rum, handay ci vun ndaya: «Məni nə vay mi məni hi la' i mum vra' kə dəŋâr su? La' ndəna' si, gi ma mum wə weri mgbaŋ ni nə su?» 20Sôwâ um ɗam vun ndaya: «Namba we si, mum nə vay mba ɓay mum vra' kə dəŋâra. 21Ama namba cu we kwa məni gi kədan mum weri mgbaŋ ni nə mi. Ɓay namba cu we swə məni ar i ne num nə məta', i ci vun rum ye, mum jeŋ si, ɓay mum gak ɗam vun ri kə tu rumu!» 22Sôwâ um in ndəna', zə handay wə ne wəlok sôwâ Zuwif. Zə sôwâ Zuwif kawvun kədan handay 'way sôwâ daŋ' məni wə in i Zezu nə Kris wə rawti so Ifray sôwâ Zuwif də rəka. 23Zə rum, sôwâ um ini: «Mum jeŋ si, i ci vun rum ye.»
24Kul sôwâ Zuwif mə ɗe kə Farisiyen ɗe swə məni ke dəŋâr nə sem hoɓ rum ɓay la' ne numu: «A in njeŋ kor Ifraya! Namba we si swə nə bə gi kwa mə bro'o.» 25Mum ɗam vun ndaya: «Mum la' bə gi kwa mə bro' ko cu bə gi kwa mə bro' mi, na cu we mi. Ama na we kwa ɗaw, i na ke dəŋâr, ɓay mgbaŋ ni nə, na wə weri.» 26Handay ci vun rumu: «Mum gi ma wa ru su? Mum gi ma kədan mum ar i ru su?» 27Mum ɗam vun ndaya: «Na in dan rum ne ni si ama hi cu mun mi! Zə mi hi wə wa' kədan hi mun dan rum kərem su? Hi ta' hi wa' faŋ sum ta zə rum su?» 28Handay i num ɓay la' ne numu: «Mə ha, ha bə ta zə swə na! Ama mə namba, namba sum ta zə Moyizə. 29Namba we si, Ifray ge dan kə Moyizə, ama mə mum, namba cu we ri car um mi!» 30Swə nə ɗam vun ndaya: «Dan rum dan mə jin' wa na: Hi cu we ri car um mi, ama mum ar i ne nana! 31Namba we si, Ifray cu mun vun sum gi kwa mə bro' mi, ama mum wə mun vun swə məni wə um ô ɓay wə gi kwa məni mum wə wa'a. 32Daka təŋ zə rum, swə ɗaw cu mun i swə ar i ne kə swə məni vra' kə dəŋâr kpe mi. 33Swə məni nə la' cu car mbə hay' Ifray mi si, mum cu gak gi kwa məsin mi.» 34Handay ɗam vun rumu: «Ha wə du kwa mə bro' daka vra' wû, ɓay ha wa' kədan ha ta' kwa mba ne su?» Ɓay handay 'way num pâ ta rəka.
Dəŋâr mə vunduku
35Zezu mun i handay 'way num si. Mum ndewa kə rum ɓay la' ne numu: «Ha ve Vay sumra' su?» 36Swə nə ɗam vun rumu: «Bârî, a ta' num ne nan kədan na gak um ve.» 37Zezu la' ne numu: «Ha we num si, ɓay mum kə məni wə ge dan kə ru mgbaŋ ni na.» 38Swə nə ini: «Bârî, na ve nu si.» Ɓay mum kuduk ta nya kor Zezu. 39Zezu faŋ ini: «Na mbə wə du sôwâ nya kədan na ɓok dan, kədan dəŋâr weri, ɓay kədan sôwâ məni weri faŋ dəŋâra.» 40Sôwâ məsin mə du kul sôwâ Zuwif mə ɗe kə Farisiyen məni wə hay' rum mun dan rum ɓay ci vun rumu: «Mə namba, namba dəŋâr ta' su?» 41Zezu ɗam vun ndaya: «Hi la' dəŋâr si, hi cu kə kwa mə bro' mi, ama zə hi wə ini: "Namba wə weri, hi kə kwa mə bro' bəka daŋ'ŋ."»
Iliyochaguliwa sasa
Zaŋ 9: KMN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Le Nouveau Testament et Psaumes en Peve © Alliance Biblique du Tchad, 2014.
