Zaŋ 8
8
Sôwâ kaw ma məti gi nja
1Kəki rum, swə ɗaw ɗaw daŋ' 'ya ta so um, ama Zezu ur ta wa igway' məni gu olivə wə han juku. 2Siw rum kə bəka ceɗ, mum faŋ ta ze rawti so po' fur sôwâ Zuwif, ɓay raw sôwâ daŋ' mbə hay' rumu. Mum suk ɓay təŋ kə ta' kwa nday ne. 3Kəri rum, sum pay zu dan dlay kə kul sôwâ Zuwif mə ɗe kə Farisiyen mbə kuni hay' rum kə ma məti handay kaw kə nja, handay cin sə kor sôwâ daŋ', 4ɓay handay la' ne kə Zezu: «Bə ta' kwa, namba kaw ma məti rə wə ri gi nja. 5Wə du dan dlay Moyizə, mum ne vari ne mba kədan namba ci rawkwa mə ndani kuni kə ge kə gway'i. Ɓay mə ha, ha in ma wa rum su#Lev 20.10; Ddd 22.22-24?» 6Handay in ndəna' zə handay wə wa' kədan handay um kaw kə dan ge vun, ɓay tum sem rum kə ndi. Ama Zezu goɓ ɓay təŋ kə wây' kwa wa nya kə vayɓa rumu. 7Handay wə də kofo kə ci vun Zezu. Zə rum, mum par wa fray ɓay la' ne ndaya: «Say swə mə du ri məni cu gi kwa mə bro' ɗaw mi nə car ge sə kə gway' copo.» 8Mum faŋ goɓ kərem ɓay dle kə wây' kwa wa nya. 9Kəri məni handay mun dan rum, handay wur dle ɗaw ɗaw, kəsa' wur copo. Zezu gwa' hoɓ kə ma məti car wə kor rum ra. 10Zezu faŋ par wa fray ɓay la' ne kə ma ra: «Ma jwə, handay wə ka su? Swə ɗaw cu kaw naŋ kə dan mi su?» 11Ta ɗam vun rumu: «Cu ɗaw mi, Bârî.» Zezu la' ne sa: «Na ta', na cu maŋ kaw kə dan mi. Əŋ də ye, ama daka mgbaŋ ni əŋ gi kwa mə bro' za' mi.»
Zezu nə ri mə ɓu zə sôwâ nya
12Zezu in dan ne kə raw sôwâ kəreme: «Na nə ri mə ɓu zə sôwâ nya. Swə məni wə ta zə rin bə rum də ke kə ri mə ɓu məni wə ne nyî mə də hâ, ɓay mum cu də ta wə ri mə ura' kpe mi#Mat 5.14; Zaŋ 9.5.» 13Kul sôwâ Zuwif mə ɗe kə Farisiyen la' ne numu: «Mgbaŋ ni nə, ha wə in njeŋ dan wa tu ru kə tu ru! Dan məni ha wə in cu kə sin mi!» 14Zezu ɗam vun ndaya: «Ko na la' wə in njeŋ dan wa tu rin kə tu rin, dan məni na wə in nə kəzin', zə na we ri məni na car mbə han, kə ri məni na wə də han nə si. Ama mə hi, hi cu we ri məni na car mbə han, ko ri məni na wə də han nə mi. 15Hi wə ɓok dan kə vari məni sôwâ wə ɓoko. Mə na, na cu ɓok dan wa swə ɗaw mi. 16ɓay na la' ɓok dan kəzə si, dan ɓok man də ke njeŋ, zə na cu ɓok dan kə ɗaw rin mi, ama Ba man məni sin nan nə, mum kə rini. 17Dan məni nə wây' wə du dan dlay mi: Kəri məni sôwâ hoɓ in njeŋ dan mə ɗaw, dan rum njeŋe. 18Na wə in njeŋ dan wa rin kə tu rin, ɓay Ba man məni sin nan wə in njeŋ dan wa rin ta'a.» 19Handay ci vun rumu: «Ba wû wə ka su?» Zezu ɗam vun ndaya: «Hi cu we nan ko Ba man mi. Hi la' we nan kəzə si, hi we Ba man ta'a.»
20Zezu in dan rum kəri məni mum wə ta' kwa ne kə sôwâ wə rawti so po' fur sôwâ Zuwif hay' kwa məni sôwâ wə njay səlay hana. Swə ɗaw cu kaw num mi, zə ri um cu mbə məto'o.
Hi cu gak də ri məni na wə də han nə mi
21Zezu la' ne nday kəreme: «Na wə də 'ya, ɓay hi də man keɓ, ama hi də mar wə du kwa mə bro' mi. Hi cu gak də ri məni na wə də han nə mi.» 22Sôwâ Zuwif ci vun nji mbok nji: «Mum wə də ci tu rum su? Zə mum ini: "Hi cu gak də ri məni na wə də han nə mi su?"» 23Zezu ɗam vun ndaya: «Mə hi, hi car mbə nya, ama mə na, na car mbə wafraya. Mə hi, hi mə nya, ama mə na, na cu mə nya mi. 24Zə rum, na in ne ni i hi də mar wə du kwa mə bro' mi. Zə hi la' cu ve i na nə swə məni Na Nə mi si, hi də mar wə du kwa mə bro' mi.» 25Handay ci vun rumu: «Ha sa su?» Zezu ɗam vun ndaya: «Ce' ndə məni na in ne ni daka təŋ zu rumu. 26Na kə dan juk kədan na in ɓay ɓok wa ri. Ama swə məni sin nan, mum wə in dan mə kəzin', ɓay na wə ka' dan məni na mun wə hay' rum nə taw ne kə sôwâ nya.»
27Handay cu mun i mum in dan wa Ba um nday ne nə mi. 28Zə rum Zezu la' ne ndaya: «Kəri məni hi tle Vay sumra' rew ta fray, hi də we i na nə swə məni Na na. Ɓay hi də we i na cu gi kwa kə wa tu rin mi. Na wə ta' kwa məni Ba man ne nan nə tawa. 29Swə məni sin nan nə, mum kə rini. Mum cu ar nan kə ɗaw rin mi, zə bəka daŋ' na wə gi kwa mə kəɗam tu rumu.» 30Kəri məni Zezu in dan ndəna', sôwâ juk ve numu.
Sôwâ məni kə wa tu nday ɓay beke
31Kəri rum Zezu la' ne kə sôwâ Zuwif məni ve numu: «Hi la' ta zə kwata' man njeŋ si, hi də ke sum ta zə rin kəzin', 32hi də we dan mə kəzin' ɓay dan mə kəzin' nə də mi gi fe wa tu ri.» 33Handay ɗam vun rumu: «Namba daw rawti Abraham, ɓay namba cu ke bek swə ɗaw kpe mi! Gi ma ha in ne mba: Hi də fe wa tu ri su?» 34Zezu ɗam vun ndaya: «Na in mi ne kəzin', sa su daŋ' məni wə gi kwa mə bro', bə rum nə bek kwa mə bro'. 35Bek cu ke ce' ndə vay vra' cava də hâ mi, zə vay vra' wə ke cava də hâ. 36Vay la' mi gi fe wa tu ri si, hi də fe wa tu mə kəzini. 37Na we si, hi daw rawti Abraham, ama hi wə keɓ kədan hi man ci, zə hi cu ve kwata' man mi. 38Na wə in dan wa kwa məni Ba man ta' ne nan, ama mə hi, hi wə gi kwa məni ba mi in ne ni.» 39Handay ɗam vun rumu: «Ba mba nə Abraham.» Zezu la' ne ndaya: «Hi la' daw Abraham kəzin' si, hi wə gi sin məni mum gi. 40Ama mgbaŋ ni nə, ko na in dan mə kəzin' məni Ifray ne nan ne ni, hi wə keɓ kədan hi man ci. Abraham cu gi ndəna' mi! 41Hi wə gi sin mə ɗaw kə sin məni ba mi gi.» Handay ɗam vun rumu: «Namba cu daw woŋ mi! Ba mba ɗaw sar, mum nə Ifraya!» 42Zezu la' ne ndaya: «Ifray la' Ba mi kəzin' si, hi man bə, zə na car mbə hay Ifray, ɓay mgbaŋ ni nə, na kəta' ti. Na cu mbə kə wa tu rin mi, ama Ifray kə məni sin nana. 43Zə mi hi cu mun dan məni na wə mi in ne nə mi su? Zə wa ri cu gak ve dan man mi. 44Ba mi nə Satan, ɓay hi kə mê' gi sin məni ba mi wə wa'a. Daka təŋ zə kwa, mum bə ci mara. Mum cu car wa dan mə kəzin' kpe mi, zə dan mə kəzin' cu wə vunduk rum mi. Kəri məni mum wə hay dan, mum in dan ce' ndə kpak tu rum, zə mum bə hay dan, ɓay hay dan daŋ' car zu mbə hay' rumu. 45Ama mə na, na wə in dan mə kəzin' ɓay zə rum hi cu gak ve nan mi. 46Sa du ri gak ta' kwa mə bro' məni na gi nə su? Na la' wə in dan mə kəzin' si, zə mi hi cu ve nan mi su? 47Swə mə Ifray wə mun dan Ifraya. Ama hi cu mə Ifray mi, ɓay zə rum, hi cu mun dan um mi.»
Zezu kə Abraham
48Sôwâ Zuwif ci vun Zezu: «Namba cu in njeŋ kəri məni namba in i ha swə nya Samari ɓay ha kə gam wa ru nə mi su?» 49Zezu ɗam vun ndaya: «Na cu kə gam wa rin mi. Na wə mbâ Ba man, ama hi wə man jeɗe. 50Na cu keɓ mbra' zə tu rin mi: Swə məsin wə keɓ man ne, ɓay mum kə məni wə də ɓok dan wa rumu. 51Na in mi ne, kəzini: Swə məni wə ta zə dan man, bə rum cu də mar kpe mi.» 52Sôwâ Zuwif la' ne numu: «Mgbaŋ ni ne, namba we si, kəzini: ha kə gam wa ru! Abraham mar si, sum ka' dan mar si, ɓay ha, ha ini: Swə məni wə ta zə rin, bə rum cu mar kpe mi. 53Ba mba Abraham nə mar si, ha ɗik i ha kə mbra' pâ num si su? Sum ka' dan mar si ta'a. Ha wə kənji' tu ru kə sa su?» 54Zezu ɗam vun ndaya: «Na la' wə mbra' tu rin kə tu rin si, mbra' man də ke uraya. Swə məni wə də gi mbra' man ne nə Ba mana. Mum nə swə məni hi in wa rum i mum nə Ifray mba. 55Ama hi cu we num mi, ama mə na, na we num si. Na la' in i na cu we num mi si, na də ke bə hay dan ce' ndə hi. Ama na we num si, ɓay na ta zə dan umu. 56Ba mi Abraham tuk kəɗam kə ɗik i mum də we bəka mana: Mum we bəka rum, ɓay mum tuk kəɗama.» 57Sôwâ Zuwif ci vun rumu: «Ha cu gi kim guvatl məto', ɓay ha in i ha we Abraham su?» 58Zezu ɗam vun ndaya: «Na in mi ne kəzin', cop kəri məni Abraham cu vra' məto', na kəta'a.» 59Kəri rum, handay ra' gway' kədan handay um ge kə ndi, ama Zezu tuɓ 'yeŋ ɓay pâ mbə rawti so po' fur sôwâ Zuwif ta rəka.
Iliyochaguliwa sasa
Zaŋ 8: KMN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Le Nouveau Testament et Psaumes en Peve © Alliance Biblique du Tchad, 2014.
