Zaŋ 1
1
Dan faŋ Sumra'a
1Kə təŋ zu kwa, Dan kəta', ɓay Dan nə kəta' kə Ifray ɓay Dan nə Ifray na. 2Dan nə kəta' kə Ifray daka təŋ zu kwa. 3Ifray gi kwa daŋ' kə rum, kwa məni gi dan rum cu ɗaw mi. 4Nyî wə du Dan, ɓay nyî rum nə ri mə ɓu sôwâ daŋ'ŋ. 5Ri mə ɓu nə ɗeri du ri mə ura', ɓay ri mə ura' cu gak we num mi.
6Ifray swə ɗaw mə ɗe kə Zaŋ#Mat 3.1; Mak 1.4; Luk 3.1-2. 7Mum mbə ce' ndə bə in njeŋ dan wa ri mə ɓu nə, mum mbə kədan sôwâ daŋ' mun dan um ɓay ve. 8Mum cu ri mə ɓu kə tu rum mi, mum mbə kədan mum in njeŋ dan wa ri mə ɓu na. 9Dan rum nə ri mə ɓu mə kəzin', məni mbə wa nya ɓay wə ɗeri wa sôwâ daŋ'ŋ.
10Dan nə kəta' wə du sôwâ nya, Ifray gi sôwâ nya zə rum, ama kə ndi nə daŋ' sôwâ nya cu we num mi. 11Mum mbə wə nya um, ama sôwâ nya um cu ve num mi. 12Ama sôwâ məni ve num daŋ', mum ne gbəgboŋ ne nday kədan handay faŋ daw Ifraya. 13Handay cu faŋ daw Ifray kə vari vra', ce' ndə məni swə wə vra' vay wa nya mi. Ifray kə məni ne nday nyî.
14Dan nə faŋ sumra' ɓay suk wə du mba, vunduk rum nyen peɗ kə ɓay kə dan mə kəzin', ɓay namba we mbra' um, mbra' məni Vay mə ɗaw fe wə ɓa Ba. 15Zaŋ in njeŋ dan wa rum, mum ka'a: «Mum nə swə məni na in dan wa rum kəri məni na ini: Mum wə də mbə kəki rin, ama mum kə mbra' pâ nan si, zə mum kəta' cop kəri məni na cu vra' məto'o.» 16Wə du ndak um, namba daŋ' fe kuswa' vun nyeme. 17Ifray ne dan dlay ne mba kə ɓa Moyizə, ama ɓay kə dan mə kəzin' mbə kə Zezu Kris. 18Swə mə we Ifray cu mi. Ama Vay mə ɗaw məni mum nə Ifray məni suk wə hay' Ba um, mum kə məni ta' Ifray ne mba.
Dan ka' Zaŋ-Baptistə
(Mat 3.1-12; Mak 1.1-8; Luk 3.1-18)
19Njeŋ dan məni Zaŋ kəri məni sôwâ Zuwif mə so Jeruzalem sin sôwâ məsin mə du sum po' fur kə sôwâ məsin mə du sôwâ zə saŋ Levi kədan kuni ci vun Zaŋ: «Ha nə sa su?» 20Zaŋ cu pe' dan rum mi, ama mum in dan rum təlak kor nday daŋ'ŋ: «Na cu Kris mi.» 21Handay faŋ ci vun rumu: «La' cu mi, ha nə sa su? Ha Eliya su?» Zaŋ ɗam vun ndaya: «Â â, na cu Eliya mi.» Handay faŋ ci vun rumu: «Ha Bə Ka' Dan su?» Mum ɗam vun ndaya: «Â â»#Ddd 18.15,18; Mal 3.23. 22Zə rum, handay ci vun rumu: «La' cu mi, ha nə sa su? A ɗam ci vun mba kədan namba də in dan rum ne kə sôwâ məni sin mba! Ha in dan mi wa tu ru su?» 23Zaŋ ɗam vun ndaya:
«Na nə wor swə ɗaw məni wə ka' dan du igopo:
"I gila' vari səreŋ ne kə Bârî", ce' ndə məni bə ka' dan mə ɗe kə Esaya ini#Esa 40.3.»
24Wə du sum sin məni sôwâ sin nday ta hay' Zaŋ, sôwâ məsin mə du sôwâ Zuwif mə ɗe kə Farisiyen kəta' wə hana. 25Handay ci vun Zaŋ: «Ha la' cu Kris, ko Eliya, ko bə ka' dan mi si, zə mi ha wə gi baptem ne kə sôwâ su?» 26Zaŋ ɗam vun ndaya: «Mə na, na wə gi baptem mi ne kə mbi. Ama wə du ri, swə məsin kəta' məni hi cu we mi. 27Mum wə də mbə kəki rin, ama na cu nde i kədan na ulay' zew tərak um mi.»
28Kwa rum daŋ' gi wə so Betani, məni wə dapa ga' sin ze Zurdeŋ, ri məni Zaŋ gi baptem ne kə sôwâ wə hana.
Zezu, Vay Cime Ifraya
29Siw rum, Zaŋ we Zezu wə mbə hay' rum, ɓay mum ini: «I kar ri', Vay Cime Ifray məni wə ra' kwa mə bro' sôwâ nya nə nay' na! 30Mum nə swə məni na in dan wa rum kəri məni na ini: "Swə məsin wə də mbə kəki rin, ama mum kə mbra' pâ nan si, zə mum kəta' cop kəri məni na cu vra' məto'o." 31Mum nə sa su, na cu we mi, ama na mbə gi baptem ne kə sôwâ kə mbi kədan na um ta' ne kə sôwâ Israyel.»
32Zaŋ faŋ in kəreme: «Na we Simbeɗ Ifray car mbə wafray ce' ndə kuruk, mbə suk wa rumu. 33Na cu we i mum nə məto', ama Ifray məni sin nan wə gi baptem ne kə sôwâ kə mbi in ne nana: "Ha də we Simbeɗ man car mbə wafray dam mbə wa swə, mum nə swə məni wə də gi baptem ne kə sôwâ kə Simbeɗ mə Kəleŋe." 34Na we kwa rum, ɓay na wə in i mum nə Vay Ifraya.»
Sum ta zə Zezu mə vun kofo
35Səday' rum, Zaŋ faŋ mbə wə ri rum kərem kə sôwâ hoɓ mə du sum ta zə rumu. 36Kəri məni mum we Zezu wə pâ, mum ini: «I kar ri', vay cime Ifray nə nay' na.» 37Sum ta zə Zaŋ mə hoɓ kuni mun dan məni Zaŋ in, ɓay handay 'ya ta zə Zezu. 38Zezu faŋ i, mum we nday wə ta zə rum, ɓay mum ci vun ndaya: «Hi wə keɓ mi su?» Handay ɗam vun rumu: «Ha suk wə ka su Rabi, məni wa' dan in i bə ta' kwa?» 39Mum ɗam vun ndaya: «I mbə ye, ɓay hi də we.» Zə rum, handay 'ya ta, ɓay handay weri məni mum suk wə han, ɓay handay suk riya kə rumu. (Kwa rum gi kə fəta riya.)
40Swə ɗaw du sôwâ mə hoɓ məni mun dan Zaŋ ɓay 'ya ta zə Zezu, mum nə Andre, njər Simoŋ Piyer. 41Cop rum, Andre ta za' njər rum Simoŋ ɓay la' ne numu: «Namba za' Mesi nə si.» (Dan rum wa' ini: «Kris.») 42Mum faŋ ta cin Simoŋ hay' Zezu. Zezu kar num ɓay ini: «Ha Simoŋ, vay Zaŋ, ama semɗe ru də faŋwa ɗe kə Kefas.» (Semɗe rum wa' ini: «pra.»)
Zezu ɗe Filip kə Nataniyel
43Səday' mə day' rum, Zezu wa' kədan mum də nya Galile. Mum ndewa kə Filip ɓay la' ne numu: «A ta zə rini.» 44Filip nə swə so Betsayda, so məni Andre kə Piyer gay' wə hana. 45Kəki rum, Filip ta za' Nataniyel ɓay la' ne numu: «Namba za' swə məni Moyizə in dan wa rum wə du ɗerwa dan dlay, ɓay sum ka' dan in dan wa rum ta' nə si: Mum nə Zezu, vay Zozef mə so Nazaret.» 46Nataniyel ci vun rumu: «Kwa mə ɓay gak car mbə so Nazaret si su?» Filip ɗam vun rumu: «A mbə, ɓay a kar ye.»
47Kəri məni Zezu we Nataniyel wə mbə hay' rum, mum in wa rumu: «I kar ri'i, swə Israyel mə kəzin' nə ni na, vur vur cu hay' rum mi.» 48Nataniyel ci vun rumu: «Ha we nan kə vari mi su?» Zezu ɗam vun rumu: «Na we nu kəri məni ha suk wə zə gu tərum, cop kəri məni Filip cu ɗe nu məto'o.» 49Zə rum, Nataniyel la' ne numu: «Bə ta' kwa, ha nə Vay Ifray, ha nə jwə sôwâ Israyel!» 50Zezu ɗam vun rumu: «Ha ve nan zə na in i na we nu kəri məni ha suk wə zə gu tərum su? Ha də we kwa mə mbri mə pâ kwa məni na!» 51Ɓay mum in kəreme: «Na in mi ne kəzin', hi də we wafray ar vun, ɓay sum sin Ifray mə wafray wə ur də wafray ɓay wə dam mbə wa Vay sumra'a#Tzk 28.12!»
Iliyochaguliwa sasa
Zaŋ 1: KMN
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Le Nouveau Testament et Psaumes en Peve © Alliance Biblique du Tchad, 2014.
