Yohana 3

Fare siɗigiya ge Zeso mage Nikodem ne

Mat 18.3; Yoh 1.12-13; 1Pi 1.3, 23

1Ndu a̰me ɗu ge àa ka tol ne Nikodem, kaa ge ɓan pagal ge Farisi ma way zì, kaɗ ge ga̰a̰l ge Yahuɗ ma way ge ɗeme ɓase ma buwal zì me. 2Mbo ya ɗaal a̰me zì ɗu ge Zeso ta, jan ne go: Ba ge Hateya, i kuwa kuwa go Dok teme mo ya ne ndwa hon i hateya ge jwab. Ago ndu a̰me ge kee kaŋ ajab mbe ge mo kee num ma pe to, kaɗɗa Dok dagre ge ne to. 3Zeso gwan ge ne janna go: Fareba mbi jan mo ne no, kaɗɗa ndu tol tolla ge jin̰al ya to, mbo kuwa muluk ge Dok ne ndwa to. 4Nikodem jan ne go: Kee mà pe gyana ndu wa gwan tol jin̰al, sok ge haɗ-ɗa ndu pool no paŋ de? A ge pool gwan na na̰ laa zì ɗoo, wa gwan tol jin̰al de? 5Zeso gwan ge ne janna go: Fareba mbi jan mo ne no, ndu a̰me ge vin̰a ge kuwa muluk ge Dok ne ndwa to, kaɗɗa na be tol jin̰al ge mam mage On̰om ge Dok ne ta to. 6Nda ge tol sḛ duul go ma rusu ge nda duwana ma way ma ne, nda ge tol ge on̰om zì ma nda ge On̰om ge Dok ne ne ma ne. 7Kaa ge mo kee ajab ge fare ge mbi jin̰a mo go: Ndu ge diige mbiya tol jin̰al pe to. 8Sa̰a̰m kwal ge sok ma go peɗ, mo za̰a̰ ne kṵwa̰ ɓa, ɗaŋɗe, mo wan pe go ne ɗege ge dii ya koo ne mbo ge diya yà de to. Ano mbe kee go waɗme, ge ndu ge diige ge see ndwa ge jin̰al ge On̰om ge Dok ne ta.

9Ge sok mbe go, Nikodem ele ne go: Ano mbe kee mà pe gyana de? 10Zeso gwan ge ne janna go: Mo ndu ge hateya ge nda hon ne ga̰a̰l gḛḛ ne ge Izrayel van ma buwal zì, mo jan go, mo wan fare mbe ge mbi jan mo ne pe to wa! 11Fareba mbi jan mo ne no, i jan ḛ fare ge kaŋ ge i sḛ ma kuwa num ma pagal, i wuwage ḛ fare ge i kuwa num ge i ndwa hetel ma me. Go no puy, ḛ vin i fare mbe ma ḛ sḛ zì to. 12Kaɗɗa ḛ be hoɗ fareba ge fare ge mbi jin̰a ḛ num ge kaŋ ge kee no suwa pagal ma ta to no, kee ma pe gyana ḛ wa mbo hoɗ fareba ge fare ge mbi mà jan ḛ num ya, ge kaŋ ge kee no pḭḭ digi yà ma ta de? 13Ndu a̰me ɗu gale be mbo ge pḭḭ zì yà to, ɗeŋew, Van ge Ndu ne, ge mbo no [ge pḭḭ zì ya se].

14Dinna ge Moyiz vuwa bwam ge àa ɗeere ne ge walam kàal ge ɔwara ta, hê ne digi ɗuuya ge babur pul go no, àa mbo hee#3.14 Fare ge hee digi mbe ne ngay go, nda mbo pel Zeso ge ɔwara kaŋre ta digi (8.28, 12.32-33, 13.31-33). Van ge ndu ne digi be go ca, 15ndwa go, ndu ge diige ge hoɗ fareba ya ne ta, see ndwa ge ɗiŋ ge din. 16Dok laa wa̰a̰ nda ge dunin̰a zì ma gḛḛ, ho̰ na van ge melaw ɗu kikiɗ ya no, ndwa go ndu ge diige ge hoɗ fareba ya ne ta, seɗ ndwa ge ɗiŋ ge din ge Dok ta, ɗaŋɗe, ban gezi to. 17Ago, Dok be teme na van ya dunin̰a zì ndwa wan nda ge dunin̰a zì ma ge sariya to, ɗaŋɗe, ndwa go num see monna ge ne ta. 18Ndu ge hoɗ fareba ya ne ta, sariya wan ne to, ɗaŋɗe, ndu ge hoɗ fareba ya ne ta to, sariya wan ne ya wan zoo, ge dape, be hoɗ fareba ge Dok Van ge melaw ɗu kikiɗ ta to. 19Sariya kunna ge Dok ne doo pe gyana de: Kɔn̰al mbo ya ge nda ge dunin̰a zì ma ta, ɗaŋɗe, nda mbe ma laa gwan wan tṵṵ ge ɗeɗeg waɗe kɔn̰al mbe, ge dape, àa bulmi ge sone keeya zì. 20Ndu ge bulmi sone keeya zì ɓyare kɔn̰al to baɗ, dyan tene ya ge ne go to, ge dape, a ge voo go, na kaŋ ge sone mbe ma bḛḛ ya kɔn̰al zum. 21Ɗaŋɗe, ndu ge diige ge gwan na pagal ge fareba ge Dok ne pe se, dyan tene ge kɔn̰al go, ndwa go, nda kuwa gezi hetel go, na kaŋ keeya ma mbo ge laa ɓyareya ge Dok ne pagal.

Yohana ba ge kee nda baptem faa fare ge Zeso ne

22Ge ano mbe guwa̰, Zeso mbo ge suwa ge Jude ne yà ɓanna ge na nda ge ame hateya ma. Gaa kàɗɗa ge nda ge sok mbe go ma ta swag, ka kee nda baptem me. 23Yohana sḛ waɗme ka kee nda baptem ge Enon go, guwa ge suwal Salim, sok ge baal ma no go gḛḛ. Nda ka mbo ya ge ne ta, ne sḛ ka kee num baptem me. 24Ano mbe kee zḛḛ ge go àa gale wa ya be wan Yohana ge daŋay zì.

25Ge dwam a̰me go ɗu, Yohana nda ge ame hateya a̰me ma ɗege pee ta fare ge Yahuɗ a̰me ɗu, ge vin̰a ge haɗ ta kɔn̰al ndwa uware Dok pagal. 26Yohana nda ge ame hateya ma mbo ya ge ne ta, àa jan ne go: Za̰a̰ gale! Ba ge Hateya, ndu mbe ge ḛ ge ne kaa ge mangaɗam Urdun wa lee gene yà, ge mo jin̰a i ne fare, kee nda baptem go, nda gḛḛ mbo ne ta yà. 27Yohana gwan ge num janna go: Ndu a̰me ge kee kaŋ mbe no pe to, kaɗɗa Dok be hon ne pool mbe ne to. 28Ḛ sḛ ma za̰a̰ mbi janna go: Mbi be Krist, ndu ge Dok taa nee ne to, ɗaŋɗe, Dok teme mbi ya zḛḛ ge go ne mbo ya. 29Ndu san gwale ya jin̰al, a gwale jin̰al obe ne, ɗaŋɗe, sok ge gwale jin̰al obe kondore ge wa kag mḛḛ ge ne ziya, ka za̰a̰ fare ge ne jan, kee laa saal gḛḛ ge na za̰a̰ na kondore ka̰a̰l pe. Go mbe no, ḛ kuwa go mbi ge laa saal gḛḛ ge be ɗoo to. 30Ɓyare go hormo ge Zeso ne ka zam zḛḛ zḛḛ, ge ambi dageya se.

Ndu ge mbo ge pḭḭ zì ya se

31Ndu ge mbo ge pḭḭ zì ya se, a ga̰a̰l ge nda pagal digi peɗ, ndu duwana ge kaa no suwa pagal, a ndu duwana ne bàba, wan fare ge kaŋ ge kee no suwa pagal ma ɗeŋew. Ndu ge mbo ge pḭḭ zì ya se, [a ga̰a̰l ge nda pagal digi peɗ], 32wan fare ge kaŋ ge na kuwa num mage na za̰a̰ num ma, go no puy, ndu a̰me ge vin ne fare mbe ma na sḛ zì to. 33Ndu ge ame ne fare mbe ma, ngay go fare ge Dok jan num ma, num fare ge fareba ma ne. 34Ago Krist, ndu ge Dok teme ne ya, jan ka̰a̰l ge Dok ne, ge dape, Dok ho̰ ne na On̰om mbyaɗɗa tab. 35Dok Ba laa wa̰a̰ na Van wan, n̰a fare ma peɗ ge ne tok go. 36Ndu ge hoɗ fareba ya ge Dok Van ta seɗ ndwa ge ɗiŋ ge din. Ndu ge kuri ya be hoɗ fareba ge ne ta, mbo seɗ ndwa mbe to, ɗaŋɗe, gaa go twam ge Dok ne dee ne pagal.

Iliyochaguliwa sasa

Yohana 3: kiaGRB

Kuonyesha

Shirikisha

Nakili