Yohana 4

Zeso jan fare gwale a̰me ɗu ge no suwa Samari go

1Zeso kuwa go, Farisi ma za̰a̰ ya go go na seɗ nda ge ame hateya mage kee nda baptem gḛḛ waɗe Yohana. 2A fareba go, a be Zeso sḛ ka kee nda baptem ne to, a ne nda ge ame hateya ma. 3Sok mbe go, ɗege ge suwa Jude go, gwan mbo suwa Galile yà. 4Sok ɗege mboya go, ɓyare go ne hê vin̰a ge kale suwa Samari go. 5Deɗ-ɗa ge suwal a̰me ge Samari ne diŋ, ge àa tol ne Sichar, ge no guwa ge gaaso ge Jakob dee ho̰ na van ge son Jozef ne, ge zḛḛ ya kaal day. 6Tub ge Jakob dee aa ne ge zḛḛ ya wal day wa ya ge sok mbe go. Ajo̰o̰ Zeso tane ya sok kereya go ɗe, mbo ya kaɗ se ge tub mbe wa go, sok gaa ya guwa ge gyala pɔgwa.

7Gwale a̰me ɗu ge no suwa Samari go mbo ya tub mbe wa go zal mam. Zeso jan ne go: Ho̰ mbi mam njoɗɗa nde! 8Ago ne nda ge ame hateya ma mbo ya suwal diŋ ɓyare kaŋ zam yaɗɗa. 9Gwale mbe jan ne go: Mo daa se Yahuɗ ne no ɓade! Kee pe gyana mo wa ele mbi mam njoɗɗa, mbi ge gwale Samari no de? Mo sḛ daa kuwa kuwa ɗer go Yahuɗ mage nda ge Samari ma tok ɓan ge kaŋ ge ɗu go to ɓade? 10Zeso jan ne go: Daa no go mo wan bobo ge Dok ɓyare hon nda duwana ma ne pe wan, mo wan ndu ge ele mo mam njoɗɗa no pe me ɗe, mo sḛ daa mà ele ne mam njoɗɗa ne, daa mà hon mo mam ge ee nda kaɗ ge ndwa. 11Gwale mbe gwan ge ne janna go: Ba ge hateya, mo be kaŋ zal mam me no, tub mbe ɗugul me ɗe, mo seɗ mam ge ee nda kaɗ ge ndwa mbe mà ge diya de? 12I baŋ Jakob ge n̰a i tub mbe ge ne sḛ njoo ne mam ɓanna ge na van ge soɗob mage na vwag kaŋ kogor ma, mo ga̰a̰l waɗe ne ɗaŋ de? 13Zeso gwan ge ne janna go: Ndu ge diige ge njoɗ mam mbe no ya, mam njuwal mbo gwan kee ne. 14Ɗaŋɗe, ndu ge mbo njoɗ mam ge mbi mbo hon ne ya, mam njuwal mbo daa gwan kee ne to baɗ: Mam ge mbi mbo hon ne ya, mbo seŋe ne zì mam ge ɓulla gugul ge mbo hon ne ndwa ge ɗiŋ ge din. 15Gwale mbe jan ne go: Ba ge hateya, mbi kaɗe mo kaɗe, ho̰ mbi mam mbe honna ge go mam njuwal daa gwan kee mbi koo ge mbi ko gwan eeya zal mam ge go go daa to baɗ.

16Zeso jan ne go, mbo, mo tol mo obe ya, ḛ ge ne mbo ya seɗ mbi go go. 17Gwale gwan ge ne janna go: Mbi be obe. Zeso jan ne ge ne wa zì go: Ge mo jan ne ya ge mo wa zì no go, mo be obe ɗe, mo fare temel. 18Ago mo hee obe ya pe nuwan̰, ndu ge ḛ ge ne kaa no ge sego no puy, a be mo obe ne to. Fare mbe ge mo jin̰a mbi ne, a fare ge fareba ne. 19Ge sok mbe go, gwale mbe jan ne go: Ba ge hateya, mbi kuwa ya go mo zane ndu ge zwagre Dok wa ne. 20Jin̰a mbi gale, a huɗi fare temel ne de? I baŋ ma uware Dok ge njal mbe no pagal, ɗaŋɗe, ḛ Yahuɗ ma jan go, ne daa kaa ge suwal ga̰a̰l Jerusalem yà mbḛḛ. 21Zeso gwan ge ne janna go: Za̰a̰ mbi gale, dwam ma mbo mbo ya ge go, nda mbo daa gwan uware Dok Ba ge njal mbe no pagal koo ge Jerusalem yà to me. 22Ḛ nda ge Samari ma uware Dok be ge ḛ wan ne pe hetel to, ɗaŋɗe, i Yahuɗ ma uware ne go i kuwa ne kuwa, ago, nuusiya ge Dok ne ge mon nda duwana ma ee pe ge Yahuɗ ma ta ya. 23Ɗaŋɗe, dwam ma mbo mbo ya, ge sego àa mbo ja mbo zoo, ge go nda ge uware Dok fareba ma mbo uware Dok Ba ge On̰om ge ne ne mage fareba ge ne ne ta. Ago Dok Ba ɓyare nda mbe ge uware na go ma. 24Dok, a On̰om ne. Ɓyare go num ge uware ne ma, num uware ne ge On̰om ge ne ne mage fareba ge ne ne ta. 25Gwale mbe jan Zeso go: Mbi kuwa kuwa go Krist, Ndu ge Dok taa ne mbo mbo ya. Sok ge mbo mbo ja, mbo wan i fare ma pe zum kakaɗag. 26Zeso gwan ge ne janna go: Mbi ge jan mo fare no, mbi ndu mbe ne gagan̰.

27Sok mbe go, Zeso nda ge ame hateya ma yan-na jaɗɗa. Àa ɗege kee ajab ge ne siɗigi fare ge ndu gwale pe. Go no puy, a̰me ɗu be ele ne fare go: Mo ɓyare da ge ne ta koo ḛ ge gwale mbe jan ta ma̰ fare de to. 28Ge sok mbe go gaw, gwale mbe swaɗ na kṵṵri se, gwan mbo suwal ga̰a̰l diŋ mbo jan nda go: 29Ḛ mbo ya ndil ndu a̰me ge jin̰a mbi, mbi kaŋ ge mbi kê num ma peɗ no. Tamekyala kaɗ mà Krist, ndu ge Dok taa nee ne to wa? 30Nda mbe ma waɗ ge suwal diŋ ya zum ndwa mbo ya ge Zeso ta.

Sok kan siyal mbyaɗɗa go

31Zḛḛ ge go nda mbe ma mbo ya, Zeso nda ge ame hateya ma wa ya ka kaɗe ne go: Ba ge Hateya, za kaŋ nde. 32Ɗaŋɗe, gwan ge num janna go: Mbi go ge kaŋ zam ge zamma ge ḛ wan ne pe to. 33Ne nda ge ame hateya ma ɗege jan ta, ta buwal zì go: Ndu a̰me gene ne kaŋ zam ya de? 34Guwa̰, Zeso ɗege wan num fare pe go: Mbi kaŋ zam, a kee laa ɓyareya mage huy tèmel ge ndu ge teme mbi ya ne wa.

35Ḛ daa jan go, siyal gaa saba ndà kade? Kaɗɗa ge mbi, mbi jan ḛ go: Ḛ he ḛ ndwa ma digi ndil gaaso ma gale, swa ma zonna no piw ndwa kan siyal. 36Ge sego, ndu ge syaɗ swa seɗ na poɗɗa ya seɗ zoo, ge ne kwate swa digi kan hal se ge ndwa ge ɗiŋ ge din pe. Go mbe no, ndu ge dol swa mage ndu ge syaɗ swa ɓa̰a̰ kee laa saal dagre. 37Ago ge fare sḭḭ mbe no zì, ne fare mbe ge jin̰a fare ge fareba ne go: Ndu ge ɗu dol swa, ndu gegene gaa syaɗ ne. 38Mbi, mbi teme ḛ mbo syaɗ swa ge gaaso ge ḛ sḛ ma kê ne tèmel wal to zì. Ḛ fare dee ḛ son, ge dape, nda ge ɗogle ma za̰a̰ yal gḛḛ sok kee ne tèmel go.

39Van Samari mbe ge suwal Sichar diŋ-ge ma gḛḛ mbo ya hoɗ fareba ge Zeso ta, ge fare mbe ge gwale jin̰a ne zum waŋ ta go: Jin̰a mbi, mbi kaŋ ge mbi kê num ma peɗ. 40A ge pe, sok ge van Samari mbe ma dee ya ne ta, àa kaɗe ne ge aa ta go ne kaa ge maa ta swag. Ge sok mbe go, Zeso gaa kàɗɗa num ta dwam zi. 41Ge fare ge ne sḛ ka jan num ma ta, nda mbo ya gwan hoɗ fareba ne ta gḛḛ waɗeya. 42Nda mbe ma ka jan gwale mbe ge ne wa zì go: Ge sego, i hoɗ fareba ne ta, ge dape, i sḛ ma za̰a̰ ne ya go ge i tɔgwa, be ge fare ge mo jin̰a i num ma ta ɗeŋew to. I kuwa ya go go ne Ba ge mon nda duwana ge dunin̰a zì ma ge fareba ne.

Zonna ge ndu ge tèmel ga̰a̰l ge gan ga̰a̰l ne van ge son

Luk 7.1-10

43Sok ge Zeso kê dwam zi ge sok mbe go, guwa̰, ɗege ge ne go gwan mbo suwa Galile yà. 44Ago ne sḛ jin̰a nda ne ge na wa zì go: Ndu ge zwagre Dok wa seɗ ga̰a̰l ge suwa ge na ne go to. 45Zane no ɗe, sok ge dee ge suwa Galile yà, nda ge suwa mbe go ma ame ne ge laa saal, ge dape, num sḛ ma mbo kee vḛḛso ge Paska ne waɗme ge suwal ga̰a̰l Jerusalem yà, àa kuwa kaŋ ge ne sḛ kê num ma no peɗ ge dwam vḛḛso mbe go.

46Guwa̰, Zeso mbo ya ge suwal ga̰a̰l Kana ge no suwa ge Galile ne go diŋ, sok ge ne sḛ dee seŋe mam on̰or jìn̰al go. Ndu ge kee tèmel ga̰a̰l ge gan ga̰a̰l diŋ kaa ge sok mbe go, ne van ge ka kee tuguɗi kaɗ ge suwal ga̰a̰l Kapernawom yà. 47Sok ge za̰a̰ go Zeso mbo ja ge suwa Jude ya ge suwa Galile go, mbo ya seɗ ne: Kaɗe ne ge aa tene go: Mà kaɗ ge mo mbo ya zon mbi van ge son ge aa no ya ngangabag, ge suwal ga̰a̰l Kapernawom yà nde de. 48Ɗaŋɗe, Zeso jan ne go: Ɗeŋew go, ḛ sḛ ma no peɗ, kaɗɗa ḛ kuwa mbi ya kee kaŋ ajab mage kaŋ ngayya ma to, ḛ mbo hoɗ fareba ge mbi fare ma ta to baɗ! 49Ndu ge kee tèmel ga̰a̰l ge gan ga̰a̰l diŋ gwan ge ne janna go: Ba ge hateya, mà kaɗ ge go nè ee ko vun cab mbo mbi yà nde de, zḛḛ ge go mbi van wa dibi. 50Zeso jan ne go: Guwa̰ mbo mo yà, mo van yà ge na ndwa. Ndu mbe kale hoɗ fareba ge fare ge Zeso jin̰a na ta gaw, gwan mboya.

51Ndu ge kee tèmel ga̰a̰l ge gan ga̰a̰l diŋ, ge sok gwan dii go, ne nda ge tèmel ma mbo ya ne ndwa zì wuwage ne go: Mo van yà ge na ndwa! 52Ele num go: Ne duul ka̰a̰ ne digi ge mà gyala pe go de? Àa gwan ge ne janna go: Dana, gyala cigi ya, haare n̰a ne no. 53Van ba pagal kale tyan gezi, kuwa go ne gyala mbe ge Zeso dana jin̰a na fare ge ne pe go ne tem go: Mo van yà ge na ndwa. Ge sok mbe go, ne sḛ ɓanna ge na zok mɔɗwag, àa hoɗ fareba ge Zeso ta. 54A Zeso gwanna ge ndwa zi ge suwa Jude ya ge suwa Galile go ne, kê kaŋ ajab a̰me ge ɗogle no ta ɗu.

Iliyochaguliwa sasa

Yohana 4: kiaGRB

Kuonyesha

Shirikisha

Nakili