Yohana 5

Ndu ge looɗeya ge Zeso zo̰o̰ ne

Yoh 7.19-24; 9.1-17

1Guwa̰, Yahuɗ ma ɗege kee vḛḛso ge Dok ne a̰me ɗu ge suwal ga̰a̰l Jerusalem go, Zeso mbo ge sok mbe yà waɗme. 2Ge suwal ga̰a̰l mbe diŋ, guwa ge ne zok wa ge tame ma waɗ ne go, baal ga̰a̰l ge àa nuusi ne kan mam se kaa. Àa ka tol ne wa hebre go Betesda. Baal mbe wa ge waɗɗa ma kaa pe nuwan̰ laaya ge pag. 3Ge ne pag wa mbe ma zì, nda ge ka ke tuguɗi ma gḛḛ kaa se fiiya: Ɓaal ma, nda ge giɗi mage nda ge looɗeya ma. [Àa ka da̰a̰re mam mbella ya digi, 4ge dape, malayka ge Dok ne a̰me ɗu ka mbo mam baal mbe se gogoy zegeɗe ne digi. Ndu ge kee tuguɗi ge mbo ne se wal, guwa̰ ge mam mbe zegeɗe ya digi go, koo ne ka mà tuguɗi pe puy, seɗ zonna.]

5Dee ya no go ndu a̰me ɗu ge ka kee tuguɗi, ge ne tuguɗi mbe dol ne ya se del tapool ɗu pɔgwa wa gezi zi, wa ya fiiya se ge sok mbe go. 6Sok ge Zeso ka̰a̰ na ndwa kuwa ne fiiya, za̰a̰ me go ne kee ya kaal ge na tuguɗi mbe zì, ele ne go: Mo ɓyare go mo see zonna de? 7Ndu ge kee tuguɗi mbe gwan ge ne janna go: Ndu ge zok-goo, mbi ndu a̰me ge wa paa mbi ge mam ge baal ne mbe se, sok ge mam zegeɗe digi go to. Sok ge mbi ɗege kee vin̰a ge mbo se ɗe, ndu ge ɗogle mbo ya mbi ndwa zḛḛ sok. 8Zeso jan ne go: Ɗege digi, warge mo daŋ, mo mbo. 9Ge sok mbe go gaw, ndu mbe seɗ zonna, warge na daŋ, dol tene mboya. 10Ajo̰o̰ fare mbe kee ge dwam sabaɗ go ɗe, Yahuɗ ma ga̰a̰l ma jan ndu mbe ge see zonna go: Ge i eeya ma pagal, vin̰a be hage go, mo ḭḭ mo daŋ ge dwam sabaɗ go to. 11Gwan ge num janna go: Ndu ge zo̰o̰ mbi jin̰a mbi go: Warge mo daŋ, mo mbo. 12Yahuɗ ma ga̰a̰l mbe ma ele ne go: Ndu mbe ge jin̰a mo go mo warge mo daŋ mo mbo ɗe, a huɗi de? 13Ɗaŋɗe, ndu ge see zonna mbe, be wan ndu ge zo̰o̰ na pe to, ago, Zeso waɗ-ɗa ge ɓase ge kaa sok mbe go ma buwal zì yà.

14Dwam ma kwaɗa zi guwa̰, Zeso mbo ya seɗ ndu ge na dana zo̰o̰ ne mbe ge zok ge Dok ne pul ge zum-ge go, jan ne go: Kuwa go mo seɗ zonna ya no ɗe, ɓyare go mo ka̰a̰ mo tok gezi ge sone keeya go. Kaɗɗa go to, mo mbo gwan za̰a̰ yal waɗeya. 15Ndu ge see zonna mbe mbo jan Yahuɗ ma ga̰a̰l ma go, ne Zeso zane zo̰o̰ na ne. 16Yahuɗ ma ga̰a̰l mbe ma ɗege kee Zeso ho̰o̰l ge ne zo̰o̰ ndu dwam sabaɗ go pe. 17Ɗaŋɗe, Zeso gwan ge num janna go: Mbi Ba go sok chiya nda kṵwa̰ go ɗiŋ ge sego, mbi sḛ waɗme mbi chiya nda kṵwa̰. 18Ge Zeso fare ge jin̰a mbe pe, Yahuɗ ma ga̰a̰l ma ɗege ɓyare vin̰a ge aa ta go, maa hṵṵ ne gezi, ge dape, ne be hele eeya ge dwam sabaɗ ne pagal ɗeŋew to, ɗaŋɗe, fare ge ne jin̰a waɗme go, Dok na Ba sḛ ne, go mbe no, ne ɓyare ndil tene leɗeɗ ge Dok go.

Dok ho̰ pool ma peɗ ge na Van tok go

19Zeso gwan hee fare, jan Yahuɗ ma ga̰a̰l ma go: Fareba mbi jan ḛ ne no, mbi kee a̰me ge mbi pagal to, mbi, Van ge Dok ne. Mbi kee kaŋ ge mbi kuwa mbi Ba mà kee ne. Kaŋ ge mbi Ba kee ne, mbi ge ne Van kee ne waɗme. 20Ago, mbi Ba laa wa̰a̰ mbi ge na Van wan, ngay mbi na kaŋ keeya ma no peɗ. Mbo gwan ngay mbi kaŋ keeya ge ajab waɗe ano mbe ma no, ge go ḛ mbo seɗ fare ge janna daa to. 21Ago, dinna ge mbi Ba gwan nda ge swày zì ya hon num ndwa go, mbi ge ne Van sḛ waɗme, mbi hon ndu ge diige ndwa ge mojo̰o̰ mbi ɓyare go. 22Ta ɔwale, mbi Ba kun sariya ge ndu a̰me pagal to, ɗaŋɗe, ɓin̰a pool ge kun sariya ge nda pagal ma peɗ ge mbi ge na Van tok go, 23ndwa go nda peɗ num ho̰ mbi ga̰a̰l, dinna ge àa hon mbi Ba ga̰a̰l go. Ndu ge hon mbi ge ne Van ga̰a̰l ya to, hon mbi Ba ge teme mbi ya ga̰a̰l to me.

24Zeso gwan jan go iya: Fareba mbi jan ḛ ne no, ndu ge diige ge za̰a̰ mbi fare ma ya, hoɗ fareba ge Dok ge teme mbi ya ta me, seɗ ndwa ge ɗiŋ ge din. Àa mbo kun sariya daa ge ne pagal to, ɗaŋɗe, kale ja ge swày zì ya mbo ya ge ndwa ge fareba go. 25Fareba mbi jan ḛ ne no, dwam ma mbo mbo ya, ge sego, àa mbo ja mbo zoo, ge go nda ge suu ma mbo za̰a̰ fare ge Dok Van jan ne. Num ge mbo za̰a̰ ne fare mbe ma ya, àa mbo kaɗ ge ndwa ge fareba. 26Ajo̰o̰ mbi Ba ndu ge hon nda duwana ma ndwa ne, hage vin̰a ya ge mbi ge na Van pagal ge hon nda ndwa mbe go waɗme. 27Hon pool ya ge mbi tok go ge kun nda duwana ma sariya, ge dape, mbi, mbi Van ge Ndu ne. 28Ḛ ke ajab to, ago dwam ma mbo mbo ya ge go nda ge suu ma peɗ mbo za̰a̰ mbi ka̰a̰l, àa tan ge swày se me. 29Num ge kê kwaɗa ya ma mbo tan, àa seɗ ndwa ge fareba. Num ge kê sone ya ma mbo tan waɗme, ɗaŋɗe, àa mbo kun sariya ge num pagal. 30Mbi, mbi mbyaɗ kee a̰me ge mbi pagal to. Mbi kun sariya ge fare ge Dok jan mbi ne pagal, mbi sariya mbe kun temel, ge dape, mbi kee be laa ɓyareya ge ambi to, ɗaŋɗe, laa ɓyareya ge Ndu ge teme mbi ya ne.

Num ge kee sayda ge Zeso ne ma

31Zeso gwan jan go iya: Kaɗɗa mbi kee tene sayda ne ge mbi pagal, ndu mbo vin mbi sayda mbe to. 32Ɗaŋɗe, kaɗɗa ne ndu ge ɗogle kee mbi sayda ne, mbi ge kuwaya go nda mbo vin ne sayda mbe ge ke no ge mbi pe. 33Ḛ daa teme nda mbo ge Yohana Ba ge kee nda baptem ta yà, jin̰a fare ge fareba no ge mbi pe ba. 34Kaɗɗa ge mbi, mbi be ndu a̰me ge ɓyare ne go, nda ge ɗogle ma jin̰a fare ne ge mbi pagal mbḛḛ to. Ano puy ɗe, mbi voɗ ḛ pagal ɗeŋew ge fare ge Yohana jin̰a ne ge mbi pe ndwa go Dok mo̰o̰ ḛ. 35Yohana kaa dinna ge lampe ge nda ee ne, ka zen kɔn̰al go. Ḛ sḛ ma vḭḭ kee laa saal ge ne kɔn̰al mbe wa go no swag. 36Ɗaŋɗe, kaŋ ge mbi kee num ma ee nda ne kuwa mbi hetel, àa gwan kaɗ jwab waɗe fare ge Yohana jin̰a num ge mbi pe ma. Mbi kee kaŋ ge mbi Ba jin̰a mbi go, mbi kê num ma tem. A num mbe ma ee nda ne kuwa mbi hetel, àa gwan ngay ne go Dok Ba teme mbi ya ne. 37Mbi Ba ge teme mbi ya, kee sayda sḛ ne ge mbi pe. Dwam ɗu ḛ be za̰a̰ ne ka̰a̰l koo kuwa ne diir to. 38Ḛ vin ne fare ge ḛ sḛ zì to, ge dape, mbi mbe ge a teme mbi ya, ḛ hoɗ fareba go ge mbi ta to me. 39Ḛ kaɗ hale Njaŋeya ge Dok ne ma pul ge dape, ḛ dwaɗ go ḛ mà seɗ fare a̰me ge num zì ge mbiya ee ḛ kaɗ ge ndwa ge ɗiŋ ge din. Zane no, a ge num zì, àa njaŋe fare ge mbi pe ma no. 40Ano puy, ḛ ɓyare mbo ya mbi ta ndwa seɗ ndwa ge fareba to!

41Mbi ɓyare ee nda duwana ma sale mbi to. 42Mbi kuwa ḛ kuwa, ḛ laa be wan Dok sḛ go fyalag to peɗ. 43Kaɗɗa ge mbi, mbi mbo ya ḛ ta ge dḭḭl ge mbi Ba ne, ḛ be ɓyare ame mbi to. Ɗaŋɗe, kaɗɗa ndu ge ɗogle vin tene mbo ya ḛ ta ge na pagal ɗe, ḛ gwan ame ne! 44Ajo̰o̰ ḛ laa wa̰a̰ dore ta ge ta buwal zì ɗe, ḛ ɓyare kee kaŋ a̰me ge go Dok sḛ ɗeŋew dore ḛ ne to. Kee mà pe gyana, ḛ wa hoɗ fareba ge mbi ta de? 45Ḛ duwa go mbi mbo ee fare ne ge ḛ pagal ge mbi Ba ndwa se yà to. Ɗaŋɗe, a Moyiz mbo ee fare ne ge ḛ pagal, ne ge ḛ ee ḛ jobreya ma no ge ne pagal. 46Daa no go ḛ ho fareba sḛ hoɗ ge fare ge Moyiz njaŋe num ma ta ɗe, ḛ daa mà hoɗ fareba ge mbi ta waɗme, ge dape, njaŋe fare mbe ma ge mbi pe. 47Ɗaŋɗe, mà kaɗɗa ḛ be hoɗ fareba ge ne fare ge njaŋe num ma ta to no, kee mà pe gyana, ḛ wa hoɗ fareba ge mbi fare ma ta de?

Iliyochaguliwa sasa

Yohana 5: kiaGRB

Kuonyesha

Shirikisha

Nakili