Yohana 11

Swày ge Lazar ne

1Ndu a̰me ge àa ka tol ne Lazar, ge kaa tuguɗi, kaa ge suwal van ge jiyale Betani ge ne na̰ van ge gwale Mari mage Marta kaa ne diŋ. 2A Mari mbe ka̰a̰ idiir ge Bagezok ko ma ta dee ne, tigɗi ne gezi ge na pagal susu#11.2 Nè mbo seɗ fare ge pagal susu ne mbe pe wanna ge caɗeya ge wol pɔgwa zi yà go. no. Lazar mbe ge kee tuguɗi ne na̰ van ne. 3Ne na̰ van ge gwale ma dol tèmel mbo Zeso ta ndwa jan ne go: Bagezok-goo, mo kondore ge laa wanna go tuguɗi. 4Sok ge Zeso za̰a̰ fare mbe go, jan go: Lazar tuguɗi mbe gene ne mbo swày to, ɗaŋɗe, a ndwa ngay nda kaŋ ajab ge Dok mbiya kee ne mage ee nda hon Dok Van hormo.

5Zane no ɗe, Zeso laa wa̰a̰ Marta mage na na̰ van Mari wan, num na̰ van ge son Lazar me. 6Sok ge za̰a̰ Lazar tuguɗi mbe fare go, gwan gaa kàɗɗa dwam zi ge na sok mbe go. 7Guwa̰, jan na nda ge ame hateya ma go: Ge sego, ḛ guwa̰ nè mbo suwa Jude. 8Ne nda ge ame hateya ma jan ne go: Ba ge hateya, tuwal zì no ɗe, Yahuɗ ge no ge suwa Jude go ma ɓyare mbal mo gezi ge njal, mo ɓyare gwan ge sok mbe ya ge dape de? 9Zeso gwan ge num janna go: Ndu ge diige kuwa kuwa go, ge gyala ndaa ge na na̰ pe go mbo dinna, ler ma wol pɔgwa zi. Kaɗɗa ndu an gyala, ne ko chal to, ge dape kuwa sok kwaɗa. 10Ɗaŋɗe, kaɗɗa ndu an ɗaal, ne ko chal chal, ge dape, kuwa sok kwaɗa to. 11Guwa̰ ge jin̰a fare ano mbe ma no go, gwan dol fare pagal go: Ḛ kuwa go, nè kondore Lazar fii dwam boo, ɗaŋɗe, nè mbo mbi mà kore ne digi ge ne sok dwam mbe se. 12Ne nda ge ame hateya ma gwan ge ne janna go: Bagezok, kaɗɗa ne ndwa wa̰a̰ dwam ne boo ɗe, gaa seɗ zonna. 13A fareba go, Zeso ɓyare jan num go Lazar suu ya go, ɗaŋɗe, num sḛ ma ka dwaɗɗa go ne fii dwam bàŋ. 14Sok mbe go, Zeso kee num kuwaya gezi kɔn̰al go: Lazar wa dibiya go. 15Ajo̰o̰ mbi ge ne ta yà to ɗe, mbi ge laa saal ge ḛ pe, ndwa go mbo hate ḛ hoɗ fareba ge mbi ta. Ge sego, ɓyare go nè mbo ne ta. 16Sok mbe go, Tomas ge àa chiya ne dḭḭl go bumu, jan nda ge ame hateya gegene ma go: Nè mbo ge ne, kaɗɗa na swày puy, nè ge num suu dagre.

Zeso ba ge hon nda ndwa ne

17Sok ge Zeso dee yà, za̰a̰ go àa ee Lazar duul swày ya ge tugul zì, ne kee ya dwam ndà. 18Ajo̰o̰ suwal Betani mage suwal ga̰a̰l Jerusalem buwal guwa mbo kaŋ ge kilometr taa go ɗe, 19Yahuɗ ma mbo ya gḛḛ ge Marta mage Mari ta ndwa sun num ndwa ge num na̰ van swày pe. 20Sok ge Marta za̰a̰ go Zeso yan ja mbo ya ɗe, mbo ge ne ndwa zì yà, seɗ ne, ɗaŋɗe, Mari gaa kàɗɗa zok diŋ. 21Sok ge àa see ta, jan Zeso go: Bagezok, daa go mo kaa ge go go ɗe, mbi na̰ van daa mà suu to. 22Ɗaŋɗe, mbi kuwa kuwa ge sego puy, Dok mà hon mo kaŋ ge mo mà ele na num ya ma mɔɗwag. 23Zeso jan ne go: Mo na̰ van mà tan. 24Marta gwan ge ne janna go: Mbi kuwa kuwa go, ne mbo tan ge dwam tanna ge nda ge swày ma way, ge dwam pe aaya go. 25Zeso jan ne go: Mbi, mbi ba ge ee nda tanna ge nda ge swày ma buwal zì ne, mbi gwan hon num ndwa ne iya. Ndu ge hoɗ fareba mbi ta, koo ne suu puy, mbo kaɗ ge ndwa ge fareba. 26Ndu ge diige ge kaa no ge ndwa, hoɗ fareba mbi ta, mbo suu to baɗ. Mo hoɗ fareba ya ge ano mbe no pagal de? 27Marta gwan ge ne janna go: O̰o̰, Bagezok, mbi hoɗ fareba ya tyatyaɗ go mo Krist, ndu ge Dok taa ne, Dok Van, ndu ge mbiya mbo ya dunin̰a zì ne.

Zeso fyal ge na kondore Lazar pe

28Guwa̰ ge Marta jin̰a ano mbe go, mbo mbo tol na na̰ van Mari. Wuwase ne go: Nè Ba ge hateya go guwa ge go go, jan mo mbo ya. 29Sok ge Mari za̰a̰ fare mbe go gaw, ɗege digi avun cab, chiya mbo ge Zeso ta yà. 30Ago Zeso gale wa ya be waɗ-ɗa ge suwal diŋ, ɗaŋɗe, kaa ge sok ge Marta see ne go. 31Yahuɗ ge kaa Mari ta zok diŋ sun ne ndwa ma kuwa ne ɗege digi avun cab waɗ-ɗa zum. Àa kàre ne pe yà, ge dwaɗɗa ge go ne mbo sḭḭ pagal yà ndwa fyalla. 32Sok ge Mari dee ya ge Zeso sok ge mḛḛ no go, kuwa ne, dol tene ne ndwa se, jan ne go: Bagezok, daa go mo kaa ge go go ɗe, mbi na̰ van daa mà suu to. 33Sok ge Zeso kuwa go ne fyal fyal, Yahuɗ ge mbo ya ne pe go ma fyal go fyal waɗme ɗe, ne duul duwa̰me ne, ne pagal mbo ya banna me. 34Ele num go: Ḛ ee ne duul ge dii ya de? Àa gwan ge ne janna go: Bagezok, mbo ya, mo mà kuwa ne. 35Zeso ndwa ɗege kan miim. 36Yahuɗ mbe ma ɗege jan ta ta buwal zì go: Ḛ kuwa gale! Ne laa wa̰a̰ ne wan ɗaŋ! 37Nda a̰me ge num buwal zige ma ka jan ta go: Daa zo̰o̰ ɓaal ma ndwa zoo ba, daa ge pool keeya go Lazar suu to me ba!

Zeso ta̰a̰ Lazar ge swày se

38Zeso duul gwan duwa̰me ne iya, mbo ge tàal wa yà. Tàal mbe kaa njal pṵṵl ge àa câ ne caa ne, ge njal dibiya na wa go. 39Hoɗ nda ge kaa sok mbe go ma na wa go: Ḛ viŋri njal mbe gezi. Ndu ge suu na̰ van ge gwale Marta jan ne go: Bagezok, ɗege mà ya huuya, ago, kee ya dwam ndà ge sok mbe zì. 40Zeso gwan ge ne janna go: Mbi daa be jan mo to de? Kaɗɗa mo hoɗ fareba ya, mo mà kuwa pool ge Dok nee ne kade. 41Nda mbe ma viŋri njal gezi, Zeso hee na ndwa digi kee kaɗeya, jan go: Baa, mbi kee mo mersi ge dape mo za̰a̰ mbi za̰a̰. 42Kaɗɗa ge mbi, mbi kuwa kuwa go, mo za̰a̰ mbi za̰a̰ ɗaɗag, ɗaŋɗe, kaɗɗa mbi jin̰a ano mbe, a ge ɓase mbe ma no pe, ndwa go num ho fareba go, mo teme mbi ya ne. 43Guwa̰ ge jin̰a ano mbe go, oy ge ka̰a̰l ndaal go: Lazar, wuwa ya zum! 44Ndu ge suu mbe waɗ-ɗa zum, ne ko mage ne tok ma kaa taaya zì ge ba̰a̰ pakta ma, ne ndwa kaɗ vwalla zì ge ba̰a̰ wa. Zeso hoɗ num na wa go: Ḛ saa ba̰a̰ pakta mbe ma ge ne ta gezi, ḛ n̰a ne mboya hini.

Wa vwalla ge Yahuɗ ma ga̰a̰l ma way ge Zeso pagal

45Yahuɗ mbe ge mbo ya Mari ta ma, a̰me ma gḛḛ ge num buwal zì, ge kuwa kaŋ ge Zeso kê num ma, hoɗ fareba ge ne ta. 46Ɗaŋɗe, gegene ma mbo mbo seɗ Farisi ma, àa wan num fare pe ge kaŋ ge Zeso ke num ma. 47Sok mbe go, ga̰a̰l ge nda ge kee tuwaleya ma way mage Farisi ma kwate Yahuɗ ma ga̰a̰l ge kun sariya ma ya se, àa ka jan ta ta buwal zì go: Ndu mbe kee kaŋ ajab ma gḛḛ, nè kee ge ne gyana de? 48Kaɗɗa nè n̰a ne ya ka zam zḛḛ ge kaŋ ajab mbe ma keeya ɗe, nda peɗ mbo hoɗ fareba ne ta, nda ge Rom ma ga̰a̰l ma mbo zuɗ-ɗa zum, àa mbo vḛḛne nè zok ge Dok ne mage nè pe rusu gezi me. 49Ga̰a̰l ge nda ge kee tuwaleya ma way ge waɗe ge àa ka tol ne Kayf, kaa ga̰a̰l del mbe go ne, hee fare jan num go: Ḛ wan fare ge kee no pe to. 50Ḛ wan pe go, ne nde-nde ge ḛ pe go, nè n̰a ndu ɗu suuya ge nè rusu pe, ge go suwal burmi gezi genjem. 51Zane no, be ka jan fare mbe ma ge na pagal to, ɗaŋɗe, ajo̰o̰ na kaa ga̰a̰l ge nda ge kee tuwaleya ma way ge waɗe del mbe go ɗe, ka jan ka̰a̰l ge nda ge zwagre Dok wa ma way go, Zeso mbiya mbo swày ne ge pe rusu ge Yahuɗ ma way pe, 52be ge pe rusu mbe pe ɗeŋew to, ɗaŋɗe, ndwa ɓan van ge Dok ne ge kaa no suwa ma go pe hini-hini ma ya digi peɗ ge ɓase ɗu go waɗme. 53Ge dwam mbe ya day, Yahuɗ ma ga̰a̰l ma vwal wa go maa hṵṵ Zeso gezi. 54Ge fare mbe no pe, Zeso daa gwan an ge Yahuɗ ge no suwa Jude ne go ma ndwa zum to. Ɔwabe tene ge sok mbe go, mbo ge suwal ga̰a̰l ge àa tol ne Efrayim yà, ge no guwa ge sok babur pul. Gaa kàɗɗa ne go swag ɓanna ge na nda ge ame hateya ma. 55Ajo̰o̰ Yahuɗ ma vḛḛso ge Paska ne gaa ya guwa, nda gḛḛ ɗege ge suwal van ge jiyale ma ya mbo ya ge suwal ga̰a̰l Jerusalem diŋ ndwa haɗ ta kɔn̰al, ge dwam vḛḛso mbe ndwa zḛḛ. 56Àa ka ɓyare Zeso ge zok ge Dok ne pul ge zum-ge go, àa ka jan ta ta buwal zì go. Ḛ dwaɗ gyana de? Mà mbo ya ge vḛḛso mbe go ɗer ya? 57Zane no, ga̰a̰l ge nda ge kee tuwaleya ma way mage Farisi ma hoɗ maa wa ya go, ndu ge mà kuwa ne ya, ɓyare go ne ta maa ndwa go maa wa wan ne.

Iliyochaguliwa sasa

Yohana 11: kiaGRB

Kuonyesha

Shirikisha

Nakili