Yohana 12

Mari suusi idiir ge yee gḛḛ ge Zeso ko ma ta

Mat 26.6-13; Mrk 14.3-9

1Zḛḛ dwam menengal ge go nda mà kee vḛḛso ge Paska ge Yahuɗ ma way ɗe, Zeso mbo ge Betani yà, suwal van ge jiyale, ge Lazar ge Zeso ta̰a̰ ne ge swày se kaa ne diŋ. 2Ge sok mbe go, àa kee Zeso gɔswal, Marta ka vaa kaŋ zam mbe ne, Lazar kaa ge nda ge ka zam kaŋ zam ge ne ma buwal zì. 3Mari hee koblo ge ga̰a̰l huyya ge idiir ge yee gḛḛ, ge ɗiyage-ɗiyage, ge àa tol ne nar, kan ne ge Zeso ko ma ta, tigɗi ne gezi ge na pagal susu. Idiir mbe huri mbo ya ndage digi, ame zok pul mɔɗwag. 4Yudas Iskariyoɗ ge kaa Zeso nda ge ame hateya ma buwal zì, ne ge mbo dee ɓyan ne ya gezi, jan go: 5Ge dape àa wa yaɗ idiir mbe ge yee gḛḛ gezi ɗoo, àa wa hon ne bware mbe nda ge a̰se ma to de? 6Kaɗɗa na jin̰a fare mbe no, a be go ne ndu ge kuwa nda ge a̰se ma a̰se ne to, ɗaŋɗe, a ndu ge vḛḛne kaŋ ne. A ne ka koy maa bware ne, ka hee kaŋ ge àa ka ee ne tok go wa fyafyalag, be ge nda gegene ma kuwaya. 7Ɗaŋɗe, Zeso jan ne go: N̰a gwale mbe cɔgwaɗ, koy idiir mbe ge mbi dwam mbulla pe. 8Nda ge a̰se ma mbo ka kàɗɗa ɗaɗag ge ḛ buwal zì, ɗaŋɗe, kaɗɗa ge mbi, mbi mbo kaɗ ge ndwa ɗiŋ ge ḛ buwal zì to.

Wa ge àa vuwa ne ndwa hun Lazar

9Yahuɗ ma za̰a̰ go Zeso go ge suwal Betani diŋ, àa mbo ya ɓase nɔnɔg, be ge ne pe ɗeŋew to, ɗaŋɗe, ndwa kuwa Lazar ge ne ta̰a̰ ne ge sok swày se waɗme. 10Ge sok mbe go, ga̰a̰l ge nda ge kee tuwaleya ma way ma vwal wa go, maa hṵṵ Lazar gezi waɗme. 11Ago, ge ne pe, Yahuɗ ma gḛḛ ka n̰a num, àa ka hoɗ fareba ge Zeso ta me.

Kunna ge walay nde ge Zeso ne ge Jerusalem diŋ

Mat 21.1-11; Mrk 11.1-10; Luk 19.29-44

12Sok yan kin̰are, nda ge mbo ya ɓase nɔnɔg ge vḛḛso ge Paska ge Yahuɗ ma way pe ma za̰a̰ go, Zeso yan ja mbo waɗ ge suwal ga̰a̰l Jerusalem diŋ. 13Àa chal kùɗi tok ma, àa waɗ-ɗa zum mbo kun ne, àa ka oyya go: «Hosana! Dok ke wa tare ge ndu ge mbo no ya ge Bagezok dḭḭl pagal, ge gan ga̰a̰l ge Izrayel ma way pagal me!»#Mkm 118.25-26. 14Zeso wan kwar van ɗu, ndàa ne pagal, dinna ge ne fare no ge Njaŋeya ge Dok ne zì go: 15«Ḛ chiya voo to, nda ge Siyo̰#12.15 Van gwale Siyo̰, a tolla ge Yahuɗ ma tol suwal ga̰a̰l Jerusalem koo nda ge kaa ne diŋ ma ne waɗme. diŋ-ge ma! Ḛ kuwa ḛ gan ga̰a̰l yan ja no, kàɗɗa ge kwar van pagal digi.»#Zak 9.9. 16Ne nda ge ame hateya ma be wan kaŋ ge ka keeya tok ol go pe to, ɗaŋɗe, guwa̰ kaal nde, sok ge Zeso see pateya go, num pagal dwaɗ fare ge Maktub ge Dok ne njaŋe ne pagal mbe, ge num deɗ-ɗa ge deɗ ja keeya no tetem. 17Sok ge Zeso ta̰a̰ Lazar, ee ne waɗ ge tugul swày zì ya zum go, nda ge kaa dagre ge Zeso sok mbe go ma jan fare ge Lazar ne mbe ge nda ge ɗogle ma ta. 18Ɓase mbe ma mbo ya Zeso ndwa zì, ge dape, àa za̰a̰ go ne kê kaŋ ajab mbe ne. 19Sok mbe go, Farisi ma ka jan ta, ta buwal zì go: Ḛ kuwa ya go tà! Nè dee deɗ ɓal, nda peɗ gaa mbo ne pe yà.

Rusu ge ɗogle ma ɓyare vin̰a ge kuwa Zeso

20Nda ge no rusu Grek zì a̰me ma kaa ge nda ge mbo ya suwal ga̰a̰l Jerusalem diŋ ndwa uware Dok ma buwal zì, ge dwam ge nda ka kee vḛḛso ge Paska ge Yahuɗ ma way ne go. 21Àa gwan ta ya ge ndu ge suwal Betsayda ge no suwa ge Galile go, ge àa tol ne Filib ta zì, àa jan ne go: Ndu ge zok, i mà seɗ vin̰a ge kuwa Zeso nde de. 22Filib mbo jan Andre fare mbe, guwa̰, num sḛ ma jwàg ɓan mbo jan Zeso fare mbe. 23Zeso gwan ge num janna go: Dwam ma mbyaɗɗa go, ge go nda kuwa pateya ge mbi, Van ge Ndu ne. 24Fareba mbi jan ḛ ne no, kaɗɗa àa dol ne ya suwa zì, suu to, kaɗ na ɗu new. Ɗaŋɗe, kaɗɗa na suu ya, seŋe tol ndwa gḛḛ. 25Ndu ge kaɗ kwacware tene ge ndwa ge na ne, mbo ban tene. Ɗaŋɗe, ndu ge kaɗ kwacware tene ge ne to, ge kàɗɗa ge na ne dunin̰a mbe no zì, mbo koy ne, seɗ ndwa ge ɗiŋ ge din me. 26Kaɗɗa ndu a̰me ɓyare kee mbi tèmel, ɓyare go ne kàre mbi pe, ndwa go ne wa mbo kaɗ ge sok ge mbi mbo kàɗɗa ne go. Go mbe no, ndu ge diige ge kee mbi tèmel mbo seɗ doreya ge mbi Ba ta.

Zeso jan fare ge na swày ne

27Zeso gwan jan go: Ge sego, mbi duul suu ya se leɗeɗ. Mbi mà mbo jan gyana de ɗe! Mbi mà jan go: Baa, mo̰o̰ mbi ge ler mbe ge yal ne ge ɓyare deɗ mbi pagal no zì nde? Ɗaŋɗe, mbi mbo ya dunin̰a zì ndwa za̰a̰ yal dinna ge mbi mà mbo za̰a̰ ne ya go. 28Baa, ngay nda go mo pate pate. Sok mbe go gaw, ka̰a̰l a̰me ka faa fare ge pḭḭ zì ya go: Mbi ngay nda pateya ge ambi ya go, mbi mbo gwan ngay nda ne iya. 29Ɓase ge kaa sok mbe go ma, sok ge àa za̰a̰ kṵwa̰ ge ka̰a̰l mbe ne go, nda a̰me ge num buwal zì ma jan go ne pḭḭ ban̰ ne. Gegene ma jan go, ne malayka ge Dok ne a̰me ɗu jin̰a ne fare ne. 30Zeso hee fare jan go: Ka̰a̰l mbe jin̰a fare mbe ge mbi pe to, ɗaŋɗe, ge ḛ pe.

31Ge sego, Dok gaa kun sariya ge nda ge dunin̰a zì ma pagal, mbo fiyage ga̰a̰l ge on̰om ge sone ma way ge wa̰a̰ dunin̰a no na tok go gezi ge dunin̰a zì. 32Kaɗɗa ge mbi, sok ge àa mbo pel mbi ya ge ɔwara kaŋre ta digi, mbi mbo kee go nda duwana ma peɗ mbo ya ge mbi ta. 33Sok jan fare mbe ma go, Zeso ɓyare ngay go na mbo suu pe gyana de. 34Ɓase ma gwan ge ne janna go: I eeya ma jan i go Krist, ndu ge Dok taa ne mbo kaɗ ɗiŋ ge din. Go mbe no, mo daa gwan jan gyana go: Ɓyare go àa pee Van ge Ndu ne ge ɔwara kaŋre ta digi de? Van ge Ndu ne mbe sḛ huɗi ne de? 35Zeso jan num go: Kɔn̰al mbo kaɗ ge ḛ buwal zì swag. Ḛ ka mbo ndwa zḛḛ, teg ge kɔn̰al mbe gale no go waɗ, ndwa go ne kaa ge tṵṵ ta̰a̰ ḛ tugcug to. Ago ndu ge mbo no ge tṵṵ zì, wan pe go na mbo go dii de to. 36Ḛ ho fareba ge ndu ge gene kɔn̰al ya ta, teg ge gale no ḛ buwal zì, ndwa go ḛ sḛ ma seŋe van ge no kɔn̰al zì ma. Guwa̰ ge jin̰a fare mbe ma go, Zeso dol tene mbo ge sok ge àa daa seɗ ne to go.

Yahuɗ ma lee gḛḛ kuri be hoɗ fareba Zeso ta

37Zeso kee kaŋ ajab ma gḛḛ go ga ge ɓase ma ndwa go, ano mbe no puy, àa be hoɗ fareba ne ta to. 38A go mbe no, fare mbe ma peɗ dee ya keeya no tetem, ge mojo̰o̰ ndu ge zwagre Dok wa Ezay dee wuwage num ya go: «Bagezok Dok, a huɗi ho fareba ne ge fare ge i ka oy nda num ma ta de? Bagezok Dok ngay na pool ge ɓaŋlaŋ huɗi ta de?»#Eza 53.1. 39Ge dape àa wa hoɗ fareba to de? A Ezay gwan hage nè pagal gezi ne iya ge fare mbe pagal, sok ge jan go:

40«Dok dibi num ndwa ma ya digi

Ndwa go num daa gwan kuwa sok to,

Twagre num dul wa ma ya go

Ndwa go num daa gwan wan fare pe to me.

A ge pe, Dok jan no go, àa seŋe ta ya se mbi ta to

Ndwa go mbi mà haɗ zon num.»#Eza 6.10.

41Ezay jin̰a ano mbe ge dape, kuwa pateya ge Zeso mbo seɗ ne ya zḛḛ wal, faa fare ge ne ne mbe no me. 42Go no puy, koo ge Yahuɗ ma ga̰a̰l mbe ma sḛ buwal zì puy, a̰me ma gḛḛ deɗ-ɗa hoɗ fareba ge Zeso ta. Ɗaŋɗe, ge Farisi ma pe, àa be ka ngay ta zum to, ge dape, num mà kee ge tele maa daa be mbo ge num zok kee kaɗeya ma zì. 43Ago ga̰a̰l ge ho fareba mbe ma laa wa̰a̰ doreya ge nda duwana ma way waɗe ge Dok ne.

Zeso fare ma mbo kun sariya nda pagal ne

44Zeso oy digi ge ka̰a̰l ndaal go: Ndu ge diige ge hoɗ fareba ya mbi ta, be hoɗ ne mbi ta to, ɗaŋɗe, ho fareba mbe ge ba ge teme mbi ya ta. 45Ndu ge diige ge kuwa mbi ya, kuwa ba ge teme mbi ya. 46Kaɗɗa ge mbi, mbi mbo ya dunin̰a zì ge mojo̰o̰ kɔn̰al go ge nda ta, ndwa go ndu ge diige ge hoɗ fareba ya mbi ta, ne kaa ge tṵṵ zì to. 47Kaɗɗa ndu za̰a̰ fare ge mbi jan num no ma ya, mbo ge num pagal to ɗe, a be mbi kun ne sariya ne to, ago, mbi mbo ya dunin̰a zì ndwa mon nda, be ge kun sariya ge num pagal to. 48Ndu ge diige ge kuri mbi ya, ame mbi fare ma to, àa mbo kun sariya ne pagal, ge fare mbe ge mbi jan num no ma ta, ge dwam pe aaya go. 49Ago fare ge mbi jin̰a num mbe ma no, mbi be jan num ne ge mbi pagal to, ɗaŋɗe, mbi Ba ge teme mbi ya ho mbi na wa sḛ ne go mbi jin̰a num mage hate num. 50Mbi kuwa kuwa go wa yuwaleya ge ne ne ma ee nda ne kaɗ ge ndwa ge ɗiŋ ge din. Go mbe no, fare ge mbi jan num ma, mbi jan num ge mojo̰o̰ mbi Ba ho mbi na wa go.

Iliyochaguliwa sasa

Yohana 12: kiaGRB

Kuonyesha

Shirikisha

Nakili