Yohana 10

Fare sḭḭ ge ndu a̰me ɗu ge koy tame ma pagal

1Zeso hee fare jan go: Fareba mbi jan ḛ ne no, ndu ge zon gulum pagal ndwa waɗ ge tame ma pe zì, be ge ne waɗ ge zok wa ge ɗagarta ne ya to, a chala ne, kaɗ ndu ge fiiri vin̰a ne me. 2Ɗaŋɗe, ndu ge waɗ ge zok wa ya, a ndu ge koy tame ma ne, 3ndu ge koy ɗagarta hage ne zok wa, tame ma za̰a̰ ne ka̰a̰l, tol tame ge na ne ma ge maa dḭḭl, pole num mbo zum. 4Sok ge pole num zum yà go peɗ, dol tene mboya num ndwa zḛḛ, tame ma ka kàre ne pe, ge dape, àa za̰a̰ ne ka̰a̰l za̰a̰. 5Àa mbo kàre ndu ge ɗogle pe to baɗ, àa mbo chiya gezi yà kaal vare zoo ge ne ta, ge dape, àa za̰a̰ nda ge ɗogle ma ka̰a̰l to. 6Zeso jan nda ge kaa sok mbe go ma fare sḭḭ mbe no, ɗaŋɗe, àa wan fare ge ne ɓyare jan maa ne mbe pe to.

Zeso Ba ge koy tame ge kwaɗa ne

7Zeso jan nda ge kaa sok mbe go ma iya go: Fareba mbi jan ḛ ne no, mbi ge mojo̰o̰ zok wa ge tame ma waɗ ge ne go go. 8Num ge mbo ya mbi ndwa zḛḛ ma peɗ#10.8 A nda ge ka kee ta go, maa nda ge koy tame ma ne., àa chala ma ne, àa kaɗ nda ge fiiri vin̰a ma me. Ɗaŋɗe, tame ma be ɓyare za̰a̰ num to. 9Kaɗɗa ge mbi, mbi ge mojo̰o̰ zok wa ge tame ma waɗ ge ne go go. Ndu ge diige ge waɗ ge mbi ta, mbo seɗ monna. Mbo ka seɗ na kaŋ zam sok waɗ zum mage gwan-na diŋ go. 10Chala mbo ya ga̰a̰l ge chel kaŋ pe, ge hal kaŋ ka̰a̰l pe, ge aa kaŋ ma pe me. Kaɗɗa ge mbi, mbi mbo ya ndwa go tame ma see ndwa ge fareba, num see ne gḛḛ ceɗeɗ me.

11Zeso jan go iya, kaɗɗa ge mbi, mbi ba ge koy tame ge kwaɗa ne. Ba ge koy tame ge kwaɗa hon tene swày ge na tame ma pe. 12Ɗaŋɗe, ndu ge kee tèmel ge bware pe ɗeŋew, a be ndu ge koy tame ge kwaɗa ne to, kaɗ tame ma ba to me. Sok ge kuwa bagomso ya, swaɗ tame ma, jay na pe soo. Bagomso gaa wan tame a̰me ma, ɓarse num vwag mbe se me. 13Ndu mbe kee go ge dape, a ndu ge kee tèmel ɗeŋew ge bware pe ne, be paa ne zì ge tame ma to. 14Kaɗɗa ge mbi, mbi ba ge koy tame ge kwaɗa ne. Mbi kuwa mbi tame ma kuwa ɗu ge ɗu, num sḛ ma kuwa mbi me. 15Àa kuwa mbi kwaɗa ge mojo̰o̰ mbi Ba kuwa mbi kwaɗa go, mbi sḛ kuwa ne kwaɗa me. A ge pe, mbi hon tene swày ge num pe no me. 16Mbi go ge tame ge ɗogle ge no ɗagarta mbe zì to ma, ɓyare go mbi ka mbo num ndwa zḛḛ ɗeme num waɗme. Àa mbo za̰a̰ mbi ka̰a̰l, àa mbo ɓan digi jwàg vwag ɗu, àa mbo kaɗ ge ndu ɗu ge koy maa me. 17Mbi Ba laa wa̰a̰ mbi wan, ge mbi vḭḭ tene mbo swày pe, mbi mbo gwan seŋe ya kaɗ ge ndwa iya. 18Ndu a̰me ge hee mbi on̰om to, ɗaŋɗe, mbi vḭḭ tene sḛ ne mbo swày. Mbi ge pool hon tene gezi mbo swày, mbi ge pool gwan seŋe ya kaɗ ge ndwa iya. Ano mbe no, a mbi Ba wa ge ho mbi ne.

19Guwa̰ ge Yahuɗ ma za̰a̰ fare mbe ge Zeso jin̰a num ma go, àa daa gwan za̰a̰ ta ge ta ta buwal zì to iya. 20Ge num mbe ma buwal zì, nda gḛḛ ka janna go: A ge on̰om ge sone na zì, kee seger, ge dape ḛ wa kaa za̰a̰ ne de? 21Nda gegene ma ka janna go: Ndu ge no ge on̰om ge sone ge na zì mbyaɗ jan fare ge go mbe ma no pe to, zon ndu ge ɓaal ndwa to me.

Nda kuri Zeso kuri

22Guwa̰ kaal nde, Yahuɗ ma mbo ya kee vḛḛso dwaɗ pagal ge zok ge Dok ne wa hageya pe, ge suwal ga̰a̰l Jerusalem diŋ somo̰ pagal. 23Zeso ka mbo ya ka gwan-na ge zok ge Dok ne sok ge àa tol ne go, pag wa ge Salomo̰ ne zì. 24Yahuɗ ma mbo ya vee ne se, àa ele ne go: Mo daa n̰a i ge ɗimil zì kaal go gyana de? Jin̰a i fare ge fareba zum gale, mo Krist, ndu ge Dok taa nee ne de? 25Zeso gwan ge num janna go: Mbi jan ḛ ne ya go, ḛ be ɓyare hoɗ fareba to. Kaŋ ge mbi kee num ge mbi Ba dḭḭl zì mbe ma no, àa num ee nda ne kuwaya go mbi huɗi ne de. 26Ɗaŋɗe, kaɗɗa ge ḛ, ḛ ɓyare hoɗ fareba to, ge dape, ḛ be mbi tame ma ne to. 27Mbi tame ma za̰a̰ fare ge mbi jan num ma za̰a̰, mbi kuwa num kwaɗa, àa ka kàre mbi pe me. 28Mbi hon num ge kàre mbi pe ma ndwa ge ɗiŋ ge din. Àa mbo ban to baɗ, ndu a̰me mbo harge num ge mbi tok zì to me. 29Mbi Ba ge ho̰ mbi num pool waɗe nda waɗe peɗ. Ndu a̰me ge mbyaɗ harge num ge ne tok zì to. 30I ge mbi Ba ge ndu ɗu go.

31Yahuɗ ma gwan paa tok hee njal ma iya ndwa mbal Zeso gezi. 32Zeso gwan hee fare, jan num go: Mbi kee kaŋ keeya ge kwaɗa ge ḛ kuwa num no ma ya gḛḛ. Mbi kê num ge dḭḭl ge mbi Ba ne. A ge kaŋ keeya a̰me ge diige ge num buwal zige pe ɗoo, ḛ ɓyare mbal mbi gezi ge njal no de? 33Nda a̰me ge num buwal zige ma gwan ge ne janna go: I ɓyare mbal mo gezi ge njal ge kaŋ keeya a̰me ge kwaɗa pe to, ɗaŋɗe, a ge mo jan fare sone kakatag no ge Dok pagal pe: Mo sḛ ndu duwana ne bàŋ me, mo gwan ndil tene ge Dok go ba! 34Gwan ge num janna go: «Fare ge Dok jin̰a ge njaŋe no ḛ eeya ma zì: Mbi jin̰a go: “Ḛ sḛ ma dok ma ne.”»#Mkm 82.6. 35I kuwa kuwa go Njaŋeya ge Dok ne fare ge jin̰a eya to. Ajo̰o̰ Dok too nda ge na jin̰a num fare ma go num dok ma ne ɗe, 36kaɗɗa ge mbi, Dok Ba mbege mbi gezi ne, teme mbi ya ge dunin̰a zì no. Kee pe gyana ḛ wa jan go, mbi jan fare ge sone kakatag ya ge ne pagal, ge fare ge mbi jin̰a zum waŋ go: Mbi Dok Van ne pe de? 37Kaɗɗa mbi kee be kaŋ keeya ge mbi Ba ne ma to, ḛ ho fareba mbi ta to. 38Ɗaŋɗe, kaɗɗa go mbi kee sḛ num, ne kaa go ḛ ɓyare hoɗ fareba mbi ta to puy, ḛ ho fareba ge kaŋ keeya mbe ma no pe, ndwa go ḛ kuwa ge ndwa fafa go, i ge mbi Ba ge ndu ɗu go. 39Sok mbe go, Yahuɗ ma ɗege ɓyare vin̰a iya go maa wan ne, ɗaŋɗe, pwalge ge num tok go.

40Zeso gwan mbo ge mangaɗam Urdun wa lee gene yà, ge sok ge Yohana ka kee nda baptem wal go. Gaa kàɗɗa ge sok mbe go. 41Nda gḛḛ ka mbo ya ne ta, àa ka janna go: Yohana be kee kaŋ ajab a̰me ɗu to, ɗaŋɗe, fare ge ne jin̰a ge ndu mbe pe ma peɗ, àa fare ge fareba ma ne. 42Ge sok mbe go, nda gḛḛ mbo ya hoɗ fareba ne ta.

Iliyochaguliwa sasa

Yohana 10: kiaGRB

Kuonyesha

Shirikisha

Nakili